Weta 51

Hlọnhuhu to Hùnwhẹ Jijizan de Tọn Whenu

TO ANADEMẸ lẹ nina apọsteli etọn lẹ godo, Jesu do yé hlan jẹgbonu yì aigba-denamẹ lọ ji awe-awe. E yọnbasi dọ nọvi-nọvi lẹ Pita po Andlé po, Jakobu po Johanu po, Filipi po Batelemi po, Tọmasi po Matiu po, Jakobu po Tade po, podọ Simọni po Juda Iskaliọti po wẹ yì dopọ. Hagbẹ awe-awe ṣidopo wẹndagbe-jlatọ lọ lẹ tọn lá wẹndagbe Ahọluduta lọ tọn bosọ wà azọ́njiawu azọ̀nhẹngbọ tọn lẹ to filẹpo he yé yì.

To ojlẹ enẹ mẹ, Johanu Baptizitọ lọ gbẹ́ pò to ganpamẹ. Ewọ ko tin to finẹ na nudi owhe awe nkọtọn todin. Hiẹ sọgan flin dọ Johanu ko dọ to gbangba dọ e yin nuhe jẹagọ na Hẹlodi Antipa nado yí Hẹlọdia, asi nọvisunnu etọn Filipi tọn, na ede. To whenuena e yindọ Hẹlodi Antipa sọalọakọ́n nado to Osẹ́n Mose tọn hodo, Johanu ko hùngona kọndopọ ayọdide ehe tọn to gbesisọ mẹ. Enẹwutu Hẹlodi hẹn Johanu nado yin zizedo ganpamẹ, vlavo to tudohomẹnamẹ Hẹlọdia tọn glọ.

Hẹlodi Antipa yọnẹn dọ Johanu yin gbẹtọ dodonọ de bo tlẹ nọ dotoai hlan ẹn po homẹhunhun po. Enẹwutu, ewọ tin to bẹwlu mẹ gando nuhe e na wà na ẹn go. To alọ devo mẹ, Hẹlọdia gbẹwanna Johanu bo to díndín to whepoponu dọ ewọ ni yin hùhù. To godo mẹ, dotẹnmẹ hundote he e ko to tenọpọn lọ wá.

Ojlẹ kleun de jẹnukọnna Juwayi owhe 32 W.M., Hẹlodi basi tito na hùnwhẹ daho jijizan etọn tọn. Mẹhe plidopọ na hùnwhẹ lọ lẹ wẹ ogán daho daho Hẹlodi tọn lẹpo gọna awhàngán lẹ, to pọmẹ po tomẹnu nukundeji Galili tọn lẹ po. Dile hùnwhẹ lọ to nukọnzindo, Salomi, viyọnnu awhli Hẹlọdia tọn ehe e ji na Filipi asu etọn dai tọn, yin didohlan nado dúwe na jonọ lọ lẹ. Sunnu he tin to mẹplidopọ lọ mẹ lẹ yin dududeji mlẹnmlẹn gbọn wedudu etọn dali.

Hẹlodi yin homẹhunhunnọ taun do Salomi go. “Biọ onú depope he hiẹ jlo sọn así e, yẹn na yí ì na we,” wẹ e dọ. Etlẹ whlé dọmọ: “Onú depope he hiẹ na biọ sọn así e, yẹn na na we, kakajẹ dadawe ahọludu ṣie tọn.”

Whẹpo e nado na gblọndo, Salomi jẹgbonu yì nado dọho hẹ onọ̀ etọn. “Etẹwẹ yẹn na biọ?” wẹ e kanse.

Dotẹnmẹ hundote lọ die to godo mẹ! “Ota Johanu Baptisti tọn,” wẹ Hẹlọdia dọ matin awuwhiwhle.

To afọdopolọji Salomi lẹkọyi Hẹlodi dè bo ze obiọ lọ donukọnna ẹn dọmọ: “Yẹn jlo na hiẹ ni na ota Johanu Baptistitọ lọ tọn mi to agbánvla de mẹ.”

Hẹlodi yin hinhẹn savò taun. Ṣogan na jonọ etọn lẹ ko sè whiwhle etọn wutu, ewọ na mọ winyan ma nado hẹn ẹn di, dile etlẹ yindọ ehe na zẹẹmẹdo gbẹto homẹvọnọ de hùhù mẹ. Ota-gbonamẹtọ de yin didohlan ganpa lọ mẹ to afọdopolọji po anadenamẹ budonamẹ tọn etọn lẹ po. To madẹnmẹ ewọ lẹkọ po ota Johanu tọn po to agbánvla de mẹ, bọ ewọ sọ yí ì na Salomi. Ewọ, to godo mẹ, ze e yì onọ̀ etọn dè. To whenuena devi Johanu tọn lẹ sè nuhe ko jọ, yé yì bosọ ze oṣiọ etọn sẹ bo di i, bọ to enẹgodo yé na linlin nuhe ko jọ tọn hlan Jesu.

To godo mẹ, to whenuena Hẹlodi sè dogbọn azọ̀nhẹngbọna gbẹtọ lẹ po aovi lẹ yinyan jẹgbonu Jesu tọn po dali, ewọ yin budona, bo to budi dọ Jesu wẹ yin Johanu he ko yin finfọnsọnku na taun tọn. To enẹgodo, e tindo ojlo vẹkuvẹku nado mọ Jesu, e mayin nado sè yẹwhehodidọ etọn wẹ gba, ṣigba nado yin nujikudonọ dọ vlavo eyin obu etọn lẹ tindo dodonu dagbe kavi lala. Matiu 10:1-5; 11:1; 14:1-12; Malku 6:14-29; Luku 9:7-9.

▪ Naegbọn Johanu do tin to ganpamẹ, podọ naegbọn Hẹlodi ma jlo nado hù i?

▪ Nawẹ Hẹlọdia penugo nado hẹn Johanu yin hùhù to godo mẹ gbọn?

▪ To okú Johanu tọn godo, naegbọn Hẹlodi jlo nado mọ Jesu?