Weta 64

Nuplọnmẹ de Dogbọn Jonamẹ Dali

E HỌNWUN dọ Jesu gbẹ́ pò to ohọ̀ lọ mẹ to Kapẹlnaumi po devi etọn lẹ po. E ko to hodọ hẹ yé gando lehe yè sọgan penukundo nuhahun lẹ go to mẹmẹsunnu lẹ ṣẹnṣẹn do, enẹwutu Pita kanse dọmọ: “Oklunọ, whla nẹmu wẹ mẹmẹsunnu ṣie na waylan do ogo e, bọ yẹn na jona ẹn?” To whenuena e yindọ mẹplọntọ sinsẹ̀nnọ Juvi lẹ na ayinamẹ jijonamẹ whla atọ̀n tọn, vlavo Pita pọ́n ẹn hlan taidi alọtútlú taun nado na ayinamẹ dọ “kakajẹ whla ṣinawe?”

Ṣigba linlẹn lọ nado to kandai mọnkọtọn hẹn do ayiha mẹ ma sọgbe gba. Jesu jla linlẹn Pita tọn do dọmọ: “Yẹn ma dọ hlan we, dọ, Kakajẹ whla ṣinawe gba: adavo kakajẹ whla [kandegbàn-atọ́n-nukunawe, NW ].” E to didohia dọ dogbo de ma dona yin zizedai na whla nẹmu he Pita na jona mẹmẹsunnu etọn gba.

Nado dó do ahun mẹ na devi lẹ dandannu yetọn nado nọ jonamẹ, Jesu dó oló de na yé. E yin dogbọn ahọlu de dali he jlo nado basi lẹnjo kandai akuẹ tọn lẹ hẹ afanumẹ etọn lẹ. Afanumẹ de yin hinhẹnwa e dè he duahọ susugege abọgan-kuẹ 60 000 000 tọn. Aliho he yọnbasi depope ma tin dọ ewọ sọgan sú ahọ́ lọ gba. Enẹwutu, dile Jesu basi zẹẹmẹ do, ahọlu lọ degbe dọ ewọ po asi etọn po gọna ovi etọn lẹ ni yin sisà bọ ahọ́ lọ na yin súsú.

To enẹ sisè mẹ afanumẹ lọ jẹklo to afọ ogán etọn tọn lẹ kọ̀n bo vẹvẹ dọmọ: “Fahomẹ to dee, yẹn nasọ suahọ lẹpo we.”

Yin whinwhàn po lẹblanu po na ẹn, ogán lọ yí lẹblanu do jo ahọ́ susugege afanumẹ lọ tọn lẹpo na ẹn. Ṣigba Jesu zindonukọn dọ to madẹnmẹ he e ko wà mọ, wẹ afanumẹ ehe yì bo mọ afanumẹ hatọ de he duahọ abọgan-kuẹ 100 tata tọn do e. Dawe lọ hẹn okọ̀ na afanumẹ hatọ etọn bo jẹ fínfínyọ́n ẹn ji, dọmọ: “Suahọ he hiẹ dù do mi.”

Ṣigba afanumẹ hatọ lọ ma tindo akuẹ lọ gba. Enẹwutu e jẹklo do afọ afanumẹ he e duahọ do lọ tọn lẹ kọ̀n, bo vẹvẹ dọmọ: “Fahomẹ to dee, yẹn na suahọ lẹpo we.” To ma taidi ogán etọn, afanumẹ lọ ma tindo lẹblanu, podọ e hẹn afanumẹ hatọ etọn nado yin zizedlan ganpamẹ.

Eyọn, Jesu zindonukọn dọ, afanumẹ devo he mọ nuhe ko jọ lẹ yì bo dọna ogán lọ. E yí homẹgble do ylọ afanumẹ lọ wá. “Hiẹ afanumẹ ylankan,” wẹ e dọ, “yẹn jo ahọ́ nẹlẹ pó na we, na hiẹ vẹvẹ na mi wutu. Be hiẹ ga ma do sọ tindo lẹblanu to devi hatọ towe ji yèdọ dile yẹn tindo lẹblanu to hiẹ ji do?” Dile adi etọn jizò, ogán lọ ze afanumẹ he ma tindo lẹblanu lọ do alọmẹ na mẹzedo-ganpamẹtọ lẹ kaka e nado sú ahọ́ he e dù lẹpo.

Enẹgodo Jesu dotana dọmọ: “Mọkẹdẹ ga wẹ Otọ́ ṣie olọn tọn na wà hlan mì do, eyin dopodopo mìtọn sọn ayiha mìtọn mẹ ma jona mẹmẹsunnu etọn lẹ.”

Nuplọnmẹ dagbe nankọ die nado jonamẹ! Yijlẹdo ahọ́ ylando tọn daho he Jiwheyẹwhe ko jona mí go, nuwayindo depope he mẹmẹsunnu Klistiani de sọgan wà do mí na yin onú pẹvi nugbonugbo. Humọ, Jehovah Jiwheyẹwhe ko jona mí whla fọtọ́n susu. Whlasusu, mí ma tlẹ nọ yọnẹn dọ mí waylando do e gba. Enẹwutu, be mí ma sọgan jona mẹmẹsunnu mítọn lẹ whla vude, eyin mí tlẹ tindo whẹwhinwhẹ́n he sọgbe lẹ nado gblehomẹ? Flin dọ, dile Jesu plọnmẹ do to Yẹwhehodidọ Osó ji tọn mẹ, Jiwheyẹwhe na “jo ahọ́ mítọn lẹ na mí, dile mí ko jona ahọ́tọnọ mítọn lẹ do.” Matiu 18:21-35; 6:12; Kọlọsinu lẹ 3:13.

▪ Etẹwẹ fọ́n kanbiọ Pita tọn dogbọn jijona mẹmẹsunnu etọn lẹ dali dote, podọ naegbọn e sọgan ko pọ́n ayinamẹ etọn nado jonamẹ whla ṣinawe nado yin alọtútlú?

▪ Nawẹ gbeyiyi ahọlu lọ tọn hlan ovẹvivẹ afanumẹ etọn tọn na lẹblanu gbọnvona gbeyiyi afanumẹ lọ tọn hlan ovẹvivẹ afanumẹ hatọ etọn tọn gbọn?

▪ Etẹwẹ mí plọn sọn oló Jesu tọn mẹ?