Weta 103

Tẹmpli lọ Didlapọn Whladopo Dogọ

JESU po devi etọn lẹ po ko ṣẹṣẹ yí ozán yetọn atọ̀ntọ zan to Bẹtani sọn whenue gbọ́n yé ko wá Jẹliko. Todin hinhọ́n fliflimẹ afọnnu lundi Nisan 10 tọn, mọ yé to aliho ji jei Jelusalẹm. Huvẹ to Jesu hù. Enẹwutu to whenuena e sọnukun mọ ovotin de he ji amà lẹ tin te, e yì e kọ̀n nado pọ́n vlavo e sọgan tindo ovò-sinsẹ́n delẹ.

Amà atin lọ tọn lẹ yawu tọ́n jẹnukọn taun, to whenuena e yindọ ojlẹ ovò-sinsẹ́n tọn ma na wá kakajẹ juin, podọ vivọnu mars tọn poun wẹ e yin todin. Ṣigba, kunnudenu dohia dọ Jesu lẹndọ to whenuena e yindọ amà lẹ yawu tọ́n, ovò-sinsẹ́n lẹ sọgan yawu tọ́n ga. Ṣigba ewọ yin hinhẹn jẹflumẹ. Amà lẹ ko na awusọhia oklọ tọn atin lọ. Enẹgodo Jesu hodẹ̀ do atin lọ, dọmọ: “Mẹde ma sọ dù sinsẹ́n sọn hiẹ mẹ gbede sọn egbé kakadoi blo.” Kọdetọn nuyiwa Jesu tọn lẹ po zẹẹmẹ etọn po yin yinyọnẹn to wunkẹngbe etọn.

To nukọnzinzindo mẹ, Jesu po devi etọn lẹ po jẹ Jelusalẹm to madẹnmẹ. E yì tẹmpli lọ mẹ, ehe e ko dlapọn to osọ̀ whèmẹ he wayi. Ṣigba, to egbehe e yinuwa, kẹdẹdile e wà do to owhe atọ̀n die jẹnukọn to whenuena e wá Juwayi lọ tẹnmẹ to owhe 30 W.M. Jesu yàn mẹhe to nusà bosọ to hihọ̀ to tẹmpli lọ mẹ lẹ jẹgbonu bosọ takitina tafo akuẹ-diọtọ lẹ tọn po oján mẹhe to apoe sà lẹ tọn lẹ po. E ma tlẹ na dotẹnmẹ mẹdepope nado ze núzinzan depope gbọn tẹmpli lọ mẹ gba.

To whẹgbigbledo mẹhe to akuẹ diọ bo to kanlin sà to tẹmpli lọ mẹ lẹ mẹ, e dọmọ: “Be yè ma ko kanwe dọ, Owhé odẹ̀ tọn de na akọta lẹpo wẹ yè na nọ ylọ owhé ṣie dọ? Ṣigba mì ko hẹn ẹn zun odò ajotọ lẹ tọn.” Yé yin ajotọ na yé nọ biọ akuẹ he yiaga tlala lẹ sọn mẹhe ma tindo aliho devo lẹ adavo nado họ̀ kanlin heyin nuhudo etọn tindo na avọ́sinsan lẹ sọn yé dè. Enẹwutu Jesu pọ́n nuyiwa ajọwiwa tọn ehelẹ hlan taidi wunmẹ alọslonamẹ kavi ajojijẹ tọn de.

To whenuena ogán yẹwhenọ tọn lẹ, wekantọ lẹ, po omẹ nukundeji lẹ po sọn gbẹtọ lẹ mẹ sè nuhe Jesu ko wà, yé sọ vọ́ dín aliho de whladopo dogọ nado hù i. Yé gbọnmọ dali dohia dọ yé ma sọgan yin vivọjlado gba. Ṣogan, yé ma yọ́n lehe yé sọgan wagbọn do hù Jesu gba, to whenuena e yindọ gbẹtọ lẹpo wẹ to godona ẹn nado dotoai na ẹn.

Gbọnvona Juvi jọwamọ tọn lẹ, Kosi lẹ lọsu wá na Juwayi lọ. Ehelẹ yin mẹdiọzun Juvi lẹ, ehe zẹẹmẹdo dọ yé ko yin didiọ biọ sinsẹ̀n Ju lẹ tọn mẹ. Glẹki delẹ, he kunnudenu dohia nado yin mẹdiọzun Juvi lẹ, dọnsẹpọ Filipi todin bo biọ nado mọ Jesu. Filipi yì Andlé dè, vlavo nado kanse eyin e na yin nuhe sọgbe nado mọ ẹn. E họnwun dọ Jesu gbẹ́ pò to tẹmpli lọ mẹ, fie Glẹki lẹ penugo nado mọ ẹn te.

Jesu yọnẹn dọ azán vude wẹ emi tindo nado nọgbẹ̀, enẹwutu e basi dohia ninọmẹ etọn tọn to aliho dagbe de mẹ dọmọ: “Ojlẹ lọ wá, na yè nido pagigona Ovi Gbẹtọ tọn. Nugbo, nugbo, wẹ yẹn dọ hlan mì, adavo likun dopo flẹ biọ aigba mẹ bosọ kú, e nọte na ede dopokẹdẹ; ṣigba eyin e kú, e hẹn sinsẹ́n susu.”

Okún likun tọn dopo ma tindo nuhọakuẹ sọmọ gba. Ṣogan, etẹwẹ eyin e yin zizedo aigba mẹ bosọ “kú,” yèdọ hẹn gbẹninọ etọn taidi okún de wá vivọnu? To whenẹnu e nọ wú podọ to madẹnmẹ nọ whẹ́n nado lẹzun atin he nọ dè sinsẹ́n susu, yèdọ okún likun susu tọn tọ́njẹgbonu. Mọdopolọ, gbẹtọ pipé dopo poun wẹ Jesu yin. Ṣigba eyin ewọ kú to nugbonọ-yinyin hlan Jiwheyẹwhe mẹ, e na lẹzun nuyizan lọ na ogbẹ̀ madopodo nina nugbonọ lẹ he tindo gbigbọ mẹdetiti-yido-sanvọ́ tọn dopolọ he ewọ tindo. Enẹwutu, Jesu dọmọ: “Mẹhe yiwanna alindọn etọn na hẹn ẹn bú; mẹhe sọ gbẹwanna alindọn etọn to aihọn he mẹ na whlá ẹ hlan ogbẹ̀ madopodo.”

E họnwun dọ Jesu ma to edetiti tọn kẹdẹ lẹnpọn gba, na e basi zẹẹmẹ bọdego dọmọ: “Eyin mẹde to sinsẹ̀n mi, gbọ e ni hodo mi; fihe yẹn te, finẹ devi ṣie na te ga: eyin mẹdepope to sinsẹ̀n mi, ewọ lọ wẹ Otọ́ ṣie na gbògbéna.” Ahọsumẹ jiawu nankọtọn die na hihodo Jesu bosọ wadevizọn na ẹn! Ahọsumẹ yinyin gbégbòna gbọn Otọ́ dali nado dogbẹ́ hẹ Klisti to Ahọluduta lọ mẹ tọn wẹ e yin.

To nulinlẹnpọn dogbọn yajiji daho po okú awufiẹsa tọn he to tenọpọn ẹn po dali, Jesu zindonukọn dọmọ: “Dinvie wẹ yè to tuklado alindọn ṣie: be etẹwẹ yẹn na dọ? Otọ́, whlẹn mi gán sọn ojlẹ he mẹ.” Eyin nuhe to ote pọ́n ẹn sọgan yin didapana kẹdẹ! Ṣigba, lala, dile ewọ dọ do dọmọ: “Na ehe lọ tọn wutu wẹ yẹn wá jẹ ojlẹ he.” Jesu tin to gbekọndopọmẹ hẹ tito Jiwheyẹwhe tọn lẹpo, gọna okú avọ́sinsan edetiti tọn. Matiu 21:12, 13, 18, 19; Malku 11:12-18; Luku 19:45-48; Johanu 12:20-27.

▪ Naegbọn Jesu donukun nado mọ ovò-sinsẹ́n lẹ dile e ma tlẹ yin ojlẹ yetọn do sọ?

▪ Naegbọn Jesu ylọ mẹhe to nusà to tẹmpli lọ mẹ lẹ dọ “ajotọ lẹ”?

▪ To aliho tẹmẹ wẹ Jesu taidi okún likun tọn de he kú te?

▪ Etẹwẹ yin numọtolanmẹ Jesu tọn dogbọn yajiji po okú he to tenọpọn ẹn po dali?