Nupinplọn 9

Devizọnwatọ Jiwheyẹwhe Tọn lẹ Dona Yin Wiwe

Naegbọn mí dona tin to wiwe ji to aliho lẹpo mẹ? (1)

Etẹwẹ e zẹẹmẹdo nado yin wiwe to gbigbọ liho? (2) yin wiwe to walọyizan liho? (3) yin wiwe to apọnmẹ? (4) yin wiwe to agbasa liho? (5)

Hogbe mawé alọpa tẹwẹ mí dona dapana? (6)

1. Jehovah Jiwheyẹwhe mẹ́n bosọ yin wiwe. E nọ donukun sọn sinsẹ̀n-basitọ etọn lẹ si nado gbọṣi wiwe ji—to gbigbọ liho, walọyizan liho, apọnmẹ, podọ to agbasa liho. (1 Pita 1:16) E nọ biọ vivẹnudido taun nado gbọṣi wiwe ji to nukun Jiwheyẹwhe tọn mẹ. Mí to gbẹnọ to aihọn mawé de mẹ. Mí sọ dona hoavun hẹ mẹwhinwhan mítọn lẹ nado waylan. Ṣigba mí ma dona jogbe gba.

2. Wiweji-ninọ Gbigbọmẹ Tọn: Eyin mí jlo na sẹ̀n Jehovah, mí ma sọgan gbẹsọ tẹdo depope to nuplọnmẹ kavi aṣa sinsẹ̀n lalo tọn lẹ mẹ go gba. Mí dona tọ́n sọn sinsẹ̀n lalo mẹ bo ma nọgodona ẹn to aliho depope mẹ gba. (2 Kọlintinu lẹ 6:14-18; Osọhia 18:4) To whenuena mí ko plọn nugbo lọ dogbọn Jiwheyẹwhe dali, mí dona tin to aṣeji ma nado yin kiklọ gbọn gbẹtọ he nọ plọnmẹ lalo lẹ dali.—2 Johanu 10, 11.

3. Wiweji-ninọ Walọyizan Tọn: Jehovah jlo dọ sinsẹ̀n-basitọ etọn lẹ ni nọ yinuwa taidi Klistiani nugbo lẹ to whelẹponu. (1 Pita 2:12) E nọ mọ onú he mí nọ wà lẹpo, etlẹ yin onú he mí nọ wà to nuglọ lẹ. (Heblu lẹ 4:13) Mí dona dapana fẹnnuwiwa zanhẹmẹ tọn po walọ mawé aihọn ehe tọn devo lẹ po.—1 Kọlintinu lẹ 6:9-11.

4. Wiweji-ninọ Apọnmẹ Tọn: Eyin mí hẹn ayiha mítọn gọna linlẹn he mẹ́n bo to ṣeke lẹ, walọ mítọn lọsu na yin wiwe ga. (Filippinu lẹ 4:8) Ṣigba eyin mí nọ hẹn ayidonugo mítọn do onú mawé lẹ ji, e na dekọtọn do walọ ylankan lẹ mẹ. (Matiu 15:18-20) Mí dona dapana wunmẹ ayidedai he sọgan bẹpla ayiha mítọn lẹ. Mí sọgan hẹn ayiha mítọn lẹ gọna linlẹn wiwe lẹ gbọn Ohó Jiwheyẹwhe Tọn pinplọn dali.

5. Wiweji-ninọ Agbasa Tọn: Na yé nọ ze afọ Jiwheyẹwhe tọn dote wutu, Klistiani lẹ dona hẹn agbasa po avọ̀ yetọn lẹ po do wiwe ji. Mí dona klọ alọ mítọn lẹ to whenuena mí tọ́n sọn afọdaitẹn, podọ mí dona klọ yé whẹpo do dùnú kavi doalọ núdùdù go. Eyin mì ma tindo adàdo dagbe de, dihonu afọdai tọn lẹ dona yin didi. (Deutelonomi 23:12, 13) Wiweji-ninọ agbasa tọn go hinhẹn nọ yidogọna agbasalilo dagbe. Owhé Klistiani de tọn dona tin to tito ji bosọ mẹ́n to homẹ po gbonu po. E dona yin ayidego to lẹdo lọ mẹ taidi apajlẹ dagbe de.

6. Hogbe Wiwe: Devizọnwatọ Jiwheyẹwhe tọn lẹ dona nọ dọ nugbo to whepoponu. Lalonọ lẹ ma na biọ Ahọluduta Jiwheyẹwhe Tọn mẹ gba. (Efesunu lẹ 4:25; Osọhia 21:8) Klistiani lẹ ma nọ zan hogbe gbigble lẹ. Yé ma nọ dotoai hlan kavi yìn aslan agbàagba kavi otan mawé lẹ gba. Na hogbe wiwe yetọn wutu, yé nọ yin ayidego taidi mẹhe gbọnvo to azọ́nmẹ kavi to wehọmẹ podọ to okọ yetọn mẹ.—Efesunu lẹ 4:29, 31; 5:3.

[Yẹdide lẹ to weda 18, 19]

Devizọnwatọ Jiwheyẹwhe tọn lẹ dona yin wiwe to aliho lẹpo mẹ