‘Yí Whẹdida Dodo Zan’ to Zọnlinzinzin hẹ Jiwheyẹwhe Mẹ

1-3. (a) Naegbọn mí duahọ pẹdido tọn dó Jehovah? (b) Etẹwẹ Mẹwhlẹngántọ owanyinọ mítọn biọ sọn mí si?

MÍ NI dọ dọ hiẹ tin to tọjihun he to sisiọ de mẹ. To whenuena a lẹndọ todido de ma tin ba, mẹwhlẹngántọ de wá bo dọ̀n we tọ́njẹgbonu. Lehe ayiha towe na jai do sọ to whenuena mẹwhlẹngántọ towe ze we jẹgbonu sọn owù lọ mẹ bo dọmọ: “A ko gán todin”! Be e ma na yin dandan na we nado dopẹ́ na mẹlọ ya? Nado dọ hójọhó, hiẹ duahọ ogbẹ̀ towe tọn do e.

² To aliho delẹ mẹ, ehe basi dohia nuhe Jehovah ko wà na mí tọn. Na nugbo tọn, mí duahọ pẹdido tọn do e. Na ewọ wẹ wleawuna ofligọ lọ, bo hẹn ẹn yọnbasi na mí nado yin whinwhlẹngán sọn omọ̀ ylando po okú po tọn mẹ. Ayiha mítọn jai, bọ mí yọnẹn dọ eyin mí yí yise zan to avọ́sinsan họakuẹ enẹ mẹ, ylando mítọn lẹ na yin jijona, bọ mí na duvivi sọgodo mavọmavọ de tọn. (1 Johanu 1:7; 4:9) Dile mí mọ to Weta 14tọ mẹ do, ofligọ lọ yin dohia owanyi po whẹdida dodo he yiaga Jehovah tọn po. Etẹwẹ mí dona wà?

³ E jẹ dọ mí ni gbadopọnna nuhe Mẹwhlẹngántọ owanyinọ mítọn lọsu biọ sọn mí si. Jehovah dọ gbọn yẹwhegán Mika gblamẹ dọmọ: “Hiẹ dawe, ewọ ko do nuhe yin dagbe hia we; podọ etẹwẹ OKLUNỌ to kinkanbiọ sọn dè we, adavo nado nọ yí [whẹdida dodo zan], podọ nado yiwanna lẹblanu, podọ nado nọ yí whiwhẹ do zinzọnlin po Jiwheyẹwhe towe po.” (Mika 6:8) Doayi e go dọ dopo to nuhe Jehovah biọ to mí si lẹ wẹ nado nọ ‘yí whẹdida dodo zan.’ Nawẹ mí sọgan wà enẹ gbọn?

 4. Nawẹ mí yọnẹn gbọn dọ Jehovah nọ donukun sọn mí si nado nọgbẹ̀ sọgbe hẹ nujinọtedo dodo tọn etọn lẹ?

⁴ Jehovah nọ donukun sọn mí si nado nọgbẹ̀ sọgbe hẹ nujinọtedo dagbe po oylan po etọn lẹ. To whenuena e yindọ nujinọtedo etọn lẹ jlọ bo yin dodo, eyin mí nọgbẹ̀ sọgbe hẹ yé, be mí to afọdona whẹdida dodo po dodowiwa po. Isaia 1:17 dọmọ: “Mì plọn dagbewiwa, mì dín whẹdida [dodo].” Ohó Jiwheyẹwhe tọn na tuli mí nado “dín dodo.” (Zẹfania 2:3) E sọ dotuhomẹna mí nado “ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn.” (Efesunu lẹ 4:24) Dodowiwa nugbo—whẹdida dodo—nọ gbẹ́ danuwiwa, mawé, po fẹnnuwiwa po dai, na onú helẹ nọ hẹn nuhe yin wiwe flu.—Psalm 11:5; Efesunu lẹ 5:3-5.

5, 6. (a) Naegbọn e ma yin agbanpẹnmẹnu de na mí nado nọgbẹ̀ sọgbe hẹ nujinọtedo Jehovah tọn lẹ? (b) Nawẹ Biblu dohia dọ afọdidona dodowiwa yin nuyiwa he nọ to nukọnzindo de gbọn?

⁵ Be agbanpẹnmẹnu de wẹ e yin nado nọgbẹ̀ sọgbe hẹ nujinọtedo dodo Jehovah tọn lẹ ya? Lala. Nubiọtomẹsi Jehovah tọn lẹ ma nọ yin agbanpẹnmẹnu de na ahun he dọnsẹpọ ẹ lẹ gba. Na mí yiwanna Jiwheyẹwhe mítọn po jẹhẹnu etọn lẹpo po wutu, mí nọ jlo na nọgbẹ̀ to aliho he na hùnhomẹ na ẹn mẹ. (1 Johanu 5:3) Flindọ Jehovah “yiwanna dodo.” (Psalm 11:7) Eyin mí jlo na hodo apajlẹ whẹdida dodo, kavi dodowiwa Jiwheyẹwhe tọn nugbonugbo, mí dona yiwanna nuhe Jehovah yiwanna lẹ bosọ gbẹwanna nuhe e gbẹwanna lẹ.—Psalm 97:10.

⁶ E ma nọ bọawu na gbẹtọvi mapenọ lẹ nado doafọna dodowiwa gba. Mí dona klọ́n gbẹtọ-yinyin hoho lọ po walọ ylankan etọn lẹ po dai bo ze yọyọ lọ dogo. Biblu dọ dọ gbẹtọ-yinyin yọyọ lọ nọ yin didiọ “zun yọyọ” gbọn oyọnẹn he pegan dali. (Kọlọsinu lẹ 3:9, 10) Hogbe lọ heyin lilẹdogbedevomẹ taidi yin didiọ “zun yọyọ” dohia dọ zize gbẹtọ-yinyin yọyọ lọ dogo yin nuyiwa he to nukọnzindo de, he biọ vivẹnudido vẹkuvẹku. Mahopọnna vivẹnu depope he mí dó nado wà nuhe sọgbe, mapenọ-yinyin mítọn nọ hẹn mí to whedelẹnu nado ṣinuwa to linlẹn, ohó, kavi walọ mẹ.—Lomunu lẹ 7:14-20; Jakobu 3:2.

 7. Nukun tẹwẹ mí dona yí do pọ́n nuhe nọ glọnalina mí nado doafọna dodowiwa lẹ?

⁷ Nukun tẹwẹ mí dona yí do pọ́n nuhe nọ glọnalina vivẹnudido mítọn nado doafọna dodowiwa lẹ? Nugbo wẹ dọ, mí ma na yí nukun pẹvi do pọ́n ylanwiwa gba. Etomọṣo, mí ma dona gbọjọ, bo lẹndọ awugbopo mítọn lẹ nọ hẹn mí ma nado pegan nado sẹ̀n Jehovah gba. Jiwheyẹwhe homẹdagbenọ mítọn ko wleawudai nado hẹn mẹhe lẹnvọjọ nugbonugbo lẹ gọwá nukundagbe etọn mẹ. Lẹnnupọndo ohó jidenamẹ tọn apọsteli Johanu tọn lẹ ji, dọmọ: “Owe onú helẹ tọn wẹ yẹn wlan hlan mì, na mì ma nado waylan.” Ṣigba e yidogọ tlọlọ dọmọ: “Eyin mẹdepope waylan [na mape he mí dugu etọn wutu], mí tindo whẹyidọtọ de to Otọ́ dè, Jesu Klisti dodonọ lọ.” (1 Johanu 2:1) Mọwẹ, Jehovah ko wleawuna avọ́sinsan ofligọ Jesu tọn, na mí nido yin alọkẹyi to Ewọ dè mahopọnna ninọmẹ ylandonọ-yinyin tọn mítọn. Be ehe ma whàn mí nado wà nuhe go mí pé lẹpo nado hẹn homẹ Jehovah tọn hùn ya?

8, 9. Nawẹ wẹndagbe lọ lilá do whẹdida dodo Jehovah tọn hia gbọn?

⁸ Mí sọgan yí whẹdida dodo zan—yèdọ, bo hodo apajlẹ whẹdida dodo Jiwheyẹwhe tọn—gbọn mahẹ gigọ́ tintindo to wẹndagbe Ahọluduta Jiwheyẹwhe tọn lilá na mẹdevo lẹ mẹ dali. Kanṣiṣa tẹwẹ tin to whẹdida dodo Jehovah tọn po wẹndagbe lọ po ṣẹnṣẹn?

⁹ Jehovah ma na hẹn vasudo titonu ylankan ehe tọn wá gba, adavo avase lọ ko yin lilá na mẹlẹpo whẹ́. To dọdai Jesu tọn gando nuhe na jọ to ojlẹ opodo lọ tọn whenu mẹ, e dọmọ: “Yè ma sọgan nọ ma dọho wẹndagbe tọn pé akọta lẹpo ṣẹnṣẹn whẹ́.” (Malku 13:10; Matiu 24:3) Hogbe lọ “whẹ́” he yin yiyizan dohia dọ nujijọ devo lẹ na bọdo azọ́n yẹwhehodidọ lẹdo aihọn pé tọn lọ go. Dopo to nujijọ enẹlẹ mẹ wẹ nukunbibia daho he ko yin didọdai lọ, ehe na hẹn vasudo wá na mẹylankan lẹ bo na wleawudai na aihọn yọyọ dodo tọn lọ. (Matiu 24:14, 21, 22) Na jide tọn, mẹdepope ma sọgan gblewhẹdo Jehovah dọ e yin mawadodonọ hlan mẹylankan lẹ gba. Gbọn avase lọ lilá dali, e to dotẹnmẹ hundote he pé de na hlan omẹ mọnkọtọn lẹ nado lẹnvọjọ bo lùn vasudo lọ tọ́n.—Jona 3:1-10.

10, 11. Nawẹ mahẹ tintindo mítọn to wẹndagbe lọ lilá mẹ nọ do whẹdida dodo Jiwheyẹwhe tọn hia gbọn?

¹⁰ Nawẹ yẹwhehodidọ wẹndagbe lọ tọn mítọn nọ do whẹdida dodo Jiwheyẹwhe tọn hia gbọn? Tintan whẹ́, e yin nuhe sọgbe nado wà nuhe go mí pé lẹpo nado gọalọna mẹdevo lẹ nado mọ whlẹngán. Lẹnnupọndo apajlẹ yinyin whinwhlẹngán sọn tọjihun he to sisiọ lọ mẹ tọn ji whladopo dogọ. To whenuena hiẹ ko yin whinwhlẹngán biọ tọjihun-gbẹwhlẹngán tọn de mẹ, na jide tọn, hiẹ na jlo nado gọalọna mẹdevo lẹ he gbẹ́ pò to osin mẹ. Mọdopolọ, azọngban mítọn wẹ e yin nado gọalọna mẹhe gbẹ́ pò to yaji to “osin” aihọn ylankan ehe tọn mẹ lẹ. Nugbo wẹ dọ, mẹsusu nọ gbẹ́ owẹ̀n mítọn dai. Ṣigba eyin Jehovah zindonukọn nado to homẹfa, mí tindo azọngban lọ nado na yé dotẹnmẹ hundote nado “wá lẹnvọjọ kọ̀n” nado sọgan mọ whlẹngán yí.—2 Pita 3:9.

¹¹ Gbọn wẹndagbe lọ lilá na mẹhe mí dukosọ hẹ lẹpo dali, mí to whẹdida dodo yizan to aliho titengbe devo mẹ: Mí to mẹnukuntamahopọn dohia. Flindọ “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibusi i, bo wazọ́n dodo, wẹ yè kẹalọyi to e dè.” (Owalọ lẹ 10:34, 35) Eyin mí jlo na hodo apajlẹ whẹdida dodo Etọn tọn, mí ma dona nọ dawhẹna gbẹtọ lẹ jẹnukọn. Kakatimọ, mí dona lá wẹndagbe lọ na mẹlẹpo mahopọnna akọ̀, fie yé wá sọn, kavi ninọmẹ akuẹzinzan tọn yetọn. Gbọnmọ dali, mí na na dotẹnmẹ hundote lọ mẹhe jlo lẹpo nado sè bo kẹalọyi wẹndagbe lọ.—Lomunu lẹ 10:11-13.

12, 13. (a) Naegbọn mí ma dona nọ yawu dawhẹna mẹdevo lẹ? (b) Etẹwẹ ayinamẹ Jesu tọn heyin “mì dawhẹ blo” podọ “mì gblewhẹdo omẹ blo” zẹẹmẹdo? (Pọ́n nudọnamẹ odò tọn.)

¹² Mí sọ sọgan yí whẹdida dodo zan gbọn nuyiwahẹ mẹdevo lẹ to aliho he mẹ Jehovah nọ yinuwahẹ mí te dali. E nọ saba bọawu nado dawhẹna mẹdevo lẹ, bo nọ mọ nuṣiwa yetọn lẹ podọ tindo ayihaawe gando vivẹnudido yetọn lẹ go. Ṣigba mẹnu to mí mẹ wẹ na jlo dọ Jehovah ni gbeje vivẹnudido mítọn po nuṣiwa mítọn lẹ po pọ́n matin lẹblanu? Jehovah ma nọ yinuwahẹ mí to aliho enẹ mẹ gba. Psalm-kàntọ lọ dohia dọmọ: “Mẹnu wẹ sọgan ṣite, eyin hiẹ OKLUNỌ na payiha ylando go?” (Psalm 130:3) Be homẹ mítọn ma hùn dọ Jiwheyẹwhe dodonọ po lẹblanunọ mítọn po ma nọ ze ayidonugo do awugbopo mítọn lẹ ji ya? (Psalm 103:8-10) To whelọnu lo, nawẹ mí dona yinuwahẹ mẹdevo lẹ gbọn?

¹³ Eyin mí mọnukunnujẹ lehe whẹdida dodo Jiwheyẹwhe tọn nọ do lẹblanu hia do mẹ, mí ma na nọ yawu dawhẹna mẹdevo lẹ to whẹho he ma dù mí kavi he mayin nujọnu lẹ mẹ. To Yẹwhehodidọ Osó ji tọn mẹ, Jesu na avase dọmọ: “Mì dawhẹ blo, na mì ma [na] yin mẹdawhẹna.” (Matiu 7:1) To kandai Luku tọn mẹ, Jesu yidogọ dọmọ: “Mì gblewhẹdo omẹ blo, yè ma sọ to na gblewhẹdo mì.”a (Luku 6:37) Jesu dohia dọ emi yọnẹn dọ gbẹtọvi mapenọ lẹ tindo ayilinlẹn lọ nado nọ dawhẹnamẹ. Depope to hosetọ etọn lẹ mẹ he tindo walọ lọ nado nọ yawu dawhẹ agọ̀ na mẹdevo lẹ dona doalọtena.

14. Whẹwhinwhẹ́n tẹlẹ wutu wẹ mí dona ‘doalọtena whẹdidana’ mẹdevo lẹ?

¹⁴ Naegbọn mí dona ‘doalọtena whẹdidana’ mẹdevo lẹ? Whẹwhinwhẹ́n dopo wẹ yindọ, aṣẹpipa mítọn tindo dogbó. Devi Jakobu flinnu mí dọmọ: “Sẹ́nnamẹtọ [po whẹdatọ po] dopo wẹ tin”—yèdọ Jehovah. Enẹwutu Jakobu kanse tlọlọ dọmọ: “Hiẹ mẹnu wẹ to owhẹ̀ kọmẹnu towe tọn dá?” (Jakobu 4:12; Lomunu lẹ 14:1-4) To yidogọmẹ, mapenọ-yinyin mítọn sọgan hẹn whẹdida mítọn ma nado sọgbe. Walọyizan po mẹwhinwhàn mítọn lẹ po—gọna nuvẹun, goyiyi, awuwhàn, po dodonọ-yinyin mẹdetiti tọn jijlá po—sọgan hẹn mí nado nọ pọ́n gbẹtọvi hatọ lẹ hlan to aliho agọ̀ mẹ. Mí tindo dogbó devo lẹ, podọ nulinlẹnpọn do yé ji dona nọ glọnalina mí ma nado nọ yawu mọ nuṣiwa mẹdevo lẹ tọn. Mí ma sọgan mọ ahun mẹdevo tọn mẹ, kavi yọ́n ninọmẹ mẹdevo lẹ tọn to gigọ́mẹ gba. To whelọnu lo, mẹnu wẹ mí yin nado tindo linlẹn agọ̀ gando yisenọ hatọ mítọn lẹ go kavi mọhodọdo vivẹnudido yetọn to sinsẹ̀nzọn Jiwheyẹwhe tọn mẹ go? Lehe e na pọnte hugan do sọ nado hodo apajlẹ Jehovah tọn nado nọ mọ dagbe he tin to mẹmẹsunnu po mẹmẹyọnnu mítọn lẹ po mẹ kakati nado nọ ze ayidonugo do nuṣiwa yetọn lẹ ji!

15. Hogbe po nuyiwa tẹlẹ po wẹ ma nọ yin alọkẹyi to sinsẹ̀n-basitọ Jiwheyẹwhe tọn lẹ ṣẹnṣẹn, podọ etẹwutu wẹ?

¹⁵ Etẹwẹ dogbọn hagbẹ whẹndo mítọn tọn lẹ dali? E blawu dọ, to aihọn egbehe tọn mẹ, delẹ to whẹdida he ylan hugan lẹ mẹ nọ yin bibasi to whẹndo lẹ mẹ—yèdọ fie jijọho dona dugán te. Nuhe gbayipe de wẹ e yin nado nọ sè dogbọn asu kanylantọ lẹ, asi fifiẹtọ lẹ, kavi mẹjitọ he nọ yí mẹzunzun kavi nulimẹ do “sayana” hagbẹ whẹndo tọn yetọn lẹ dali. Ṣigba hogbe fifiẹ tọn lẹ, mẹzunzun, po danuwiwa po ma nọ yin alọkẹyi to sinsẹ̀n-basitọ Jiwheyẹwhe tọn lẹ ṣẹnṣẹn gba. (Efesunu lẹ 4:29, 31; 5:33; 6:4) Ayinamẹ Jesu tọn heyin “mì dawhẹ blo” podọ “mì gblewhẹdo omẹ blo” dona yin tonusena to owhé lẹ gbè ga. Flindọ whẹdida dodo yiyizan bẹ nuyiwahẹ mẹdevo lẹ to aliho he mẹ Jehovah nọ yinuwahẹ mí te hẹn. Podọ Jiwheyẹwhe mítọn ma nọ yinuwahẹ mí po fifiẹ kavi kanyinylan po gbede. Kakatimọ, e nọ yin “awuvẹmẹtọ” hlan mẹhe yiwanna ẹn lẹ. (Jakobu 5:11) Apajlẹ jiawu nankọ die na mí nado hodo!

16, 17. (a) Etẹwẹ Jehovah nọ donukun sọn mẹho agun tọn lẹ si? (b) Etẹwẹ dona yin wiwà eyin ylandonọ de gboawupo nado do lẹnvọjọ nujọnu tọn hia, podọ etẹwutu wẹ?

¹⁶ Mímẹpo wẹ tindo azọngban nado yí whẹdida dodo zan, ṣigba na titengbe tọn, mẹho agun tọn lẹ wẹ tindo azọngban ehe to agun Klistiani tọn mẹ. Doayi zẹẹmẹ dọdai tọn he Isaia basi gando “ahọvi lẹ,” kavi mẹho agun tọn lẹ go: “Doayi e go, ahọlu de na dù to dodo mẹ, ahọvi lẹ na dugán to whẹdida [dodo] mẹ.” (Isaia 32:1) Mọwẹ, Jehovah nọ donukun mẹho agun tọn lẹ nado nọ yí whẹdida dodo zan to devizọnwiwa yetọn mẹ. Nawẹ yé sọgan wà ehe gbọn?

¹⁷ Sunnu he pegan to gbigbọ-liho ehelẹ yọnẹn ganji dọ whẹdida dodo, kavi dodowiwa, biọ dọ agun lọ ni yin hinhẹn do wiwe ji. To whedelẹnu, e nọ lẹzun dandan na mẹho agun tọn lẹ nado dawhẹ ylanwiwa sinsinyẹn lẹ tọn. To whenuena yé to mọwà, yé nọ flindọ whẹdida dodo Jiwheyẹwhe tọn nọ do lẹblanu hia eyin e yọnbasi. Enẹwutu yé nọ tẹnpọn nado deanana ylandonọ lọ nado lẹnvọjọ. Ṣigba, etẹwẹ yé na wà eyin ylandonọ lọ gboawupo nado do lẹnvọjọ nujọnu tọn hia mahopọnna vivẹnudido yetọn nado gọalọna ẹn? To gbesisọmẹ hẹ whẹdida dodo, Ohó Jehovah tọn biọ dọ afọdide sinsinyẹn de ni yin zize: “Mì de omẹ ylankan lọ sẹ̀ sọn mìde ṣẹnṣẹn.” Enẹ zẹẹmẹdo dide e sẹ̀ sọn agun mẹ. (1 Kọlintinu lẹ 5:11-13; 2 Johanu 9-11) E nọ vẹna mẹho agun tọn lẹ dọ yé dona ze afọdide mọnkọtọn, ṣigba yé yọnẹn dọ dandannu de wẹ e yin nado basi hihọ́na wiweji-ninọ agun lọ tọn to walọ po gbigbọ po liho. Eyin afọdide enẹ tlẹ yin zize, yé nọ tindo todido lọ dọ ylandonọ lọ na gọ̀ biọ ede mẹ to gbèdopo bo na lẹkọwa agun lọ mẹ.—Luku 15:17, 18.

18. Etẹwẹ mẹho agun tọn lẹ nọ hẹn do ayiha mẹ to whenuena yé to ayinamẹ he sinai do Biblu ji na mẹdevo lẹ?

¹⁸ Devizọnwiwa to gbesisọmẹ hẹ whẹdida dodo sọ bẹ ayinamẹ he sinai do Biblu ji lẹ ninamẹ to whenue nuhudo etọn tin hẹn ga. Nugbo wẹ dọ, mẹho agun tọn lẹ ma nọ to awugbopo mẹdevo lẹ tọn dín gba. Mọjanwẹ yé ma nọ to mẹṣọ́ to whelẹponu nado namẹ ayinamẹ gba. Ṣigba yisenọ hatọ de sọgan ‘ṣì afọ ze to mayọnẹn mẹ.’ Mẹho agun tọn lẹ nọ flindọ whẹdida dodo Jiwheyẹwhe tọn ma nọ yin bibasi po kanyinylan kavi lẹblanu matindo po gba, enẹ nọ whàn yé nado “hẹn omẹ mọhunkọ gọ̀ do otẹn etọn mẹ to gbigbọ walọmimiọn tọn mẹ.” (Galatianu lẹ 6:1) Enẹwutu, mẹho agun tọn lẹ ma nọ dawhá do mẹhe ṣinuwa de ji kavi wadán do e ji gba. Kakatimọ, ayinamẹ he yin nina po owanyi po nọ na tuli mẹhe mọ ẹn yí lọ. Etlẹ yin to whenuena mẹho agun tọn lẹ to wọhẹ tlọlọ de namẹ—bo to kọdetọn afọdide he ma sọgbe de tọn dohia—yé nọ hẹn do ayiha mẹ dọ yisenọ hatọ he ṣinuwa lọ gbẹ́ yin lẹngbọ de to apó Jehovah tọn mẹ.b (Luku 15:7) Eyin ayinamẹ kavi wọhẹ de yin awuwlena bo yin ninamẹ to owanyi mẹ, e nọ bọawu nado vọ́ linlẹn mẹhe ṣinuwa lọ tọn jlado.

19. Nudide tẹlẹ wẹ e nọ biọ dọ mẹho agun tọn lẹ ni basi, podọ etẹ ji wẹ yé dona nọ ze nudide mọnkọtọn lẹ sinai do?

¹⁹ E nọ saba biọ dọ mẹho agun tọn lẹ ni basi nudide he gando yisenọ hatọ yetọn lẹ go. Di apajlẹ, mẹho agun tọn lẹ nọ basi opli sọn ojlẹ de mẹ jẹ devo mẹ nado gbadopọnna vlavo eyin mẹmẹsunnu devo lẹ to agun lọ mẹ ko pegan nado yin pipà taidi mẹho agun tọn kavi devizọnwatọ lizọnyizọnwiwa tọn lẹ. Mẹho agun tọn lẹ yọ́n nujọnu-yinyin mẹnukuntamahopọn tọn. Yé nọ dike nubiọtomẹsi Jiwheyẹwhe tọn lẹ na mẹpipa mọnkọtọn lẹ ni deanana yé to nudide yetọn lẹ mẹ, bo ma nọ ganjẹ numọtolanmẹ mẹdetiti tọn lẹ go poun. Gbọnmọ dali, yé ma nọ ‘dawhẹnamẹ aplà’ bo masọ nọ ‘hò mẹnukunta pọ́n gba.’—1 Timoti 5:21.

20, 21. (a) Etẹwẹ mẹho agun tọn lẹ nọ dovivẹnu nado yin, podọ etẹwutu? (b) Etẹwẹ mẹho agun tọn lẹ sọgan wà nado gọalọna “ayi mawhiwhẹnọ lẹ”?

²⁰ Mẹho agun tọn lẹ nọ yí whẹdida dodo zan to aliho devo lẹ mẹ ga. To whenuena Isaia dọ dọdai dọ mẹho agun tọn lẹ na wadevizọn “to whẹdida [dodo] mẹ” pó godo, e yidogọ dọmọ: “Gbẹtọ dopo na taidi otẹn whiwhla tọn sọn jẹhọn nù, bẹtẹn sọn yujẹhọn nù; di otọ̀ osin tọn to ofi húhú, di oyẹ̀ awinyan daho tọn to aigba húhú ji.” (Isaia 32:2) Enẹwutu wẹ mẹho agun tọn lẹ nọ dovivẹnu nado yin asisa homẹmiọnnamẹ po kọfanamẹ tọn po na sinsẹ̀n-basitọ hatọ yetọn lẹ.

²¹ Na nuhahun susu he nọ hẹnmẹ gbọjọ to egbehe lẹ wutu, mẹsusu wẹ tindo nuhudo tulinamẹ tọn. Mẹho agun tọn lẹ emi, etẹwẹ mì sọgan wà nado gọalọna “ayi mawhiwhẹnọ lẹ”? (1 Tẹsalonikanu lẹ 5:14) Mì nọ dotoaina yé po awuvẹmẹ po. (Jakobu 1:19) Yé sọgan tindo nuhudo nado dọ “awubla” he tin to ahun yetọn mẹ na mẹhe go yé dejido. (Howhinwhẹn lẹ 12:25) Hẹn yé deji dọ Jehovah, mẹmẹsunnu po mẹmẹyọnnu yetọn lẹ po tindo nuhudo yetọn, bo yọ́n pinpẹn yetọn, bosọ yiwanna yé. (1 Pita 1:22; 5:6, 7) To yidogọ mẹ, mì sọgan hodẹ̀ hẹ yé kavi na yé. Sisè bọ mẹho agun tọn de hodẹ̀ ahundoponọ de do ota yetọn mẹ sọgan miọnhomẹna yé taun. (Jakobu 5:14, 15) Jiwheyẹwhe whẹdida dodo tọn na dona vivẹnudido owanyinọ mítọn nado gọalọna mẹhe jẹflumẹ lẹ.

22. Aliho tẹlẹ mẹ wẹ mí sọgan hodo apajlẹ whẹdida dodo Jehovah tọn te, podọ po kọdetọn tẹ po?

²² Na nugbo tọn, mí nọ dọnsẹpọ Jehovah gbọn hihodo apajlẹ whẹdida dodo etọn tọn dali! Mí na to whẹdida dodo Jiwheyẹwhe tọn dohia zọnmii, eyin mí to nujinọtedo dodo tọn etọn lẹ zedaga, kavi lá wẹndagbe ogbẹ̀-whlẹngán tọn lọ na mẹdevo lẹ, bo nọ ze ayidonugo do jẹhẹnu dagbe mẹdevo lẹ tọn ji kakati nado nọ pọ́n awugbopo yetọn. Mẹho agun tọn lẹ emi, whedepopenu he mì basi hihọ́na wiwejininọ agun lọ tọn, kavi na ayinamẹ mẹjlọdote tọn he sinai do Owe-wiwe ji, kavi basi nudide mẹnukuntamahopọn tọn lẹ, podọ whedepopenu he mì na tuli mẹhe jẹflumẹ lẹ, whẹdida dodo Jiwheyẹwhe tọn dohia wẹ mì te. Lehe e na nọ hẹn homẹ Jehovah tọn hùn do sọ to whenuena e pọ́n aigba ji hlan sọn olọn mẹ bo mọ omẹ etọn lẹ to nuhe go yé pé lẹpo wà nado ‘yí whẹdida dodo zan’ to zọnlinzinzin hẹ Jiwheyẹwhe yetọn mẹ!