Mẹnu lẹ Wẹ Na Yin Finfọnsọnku? Fie Wẹ Yé Na Nọ?

OMẸ nẹmu wẹ mí hia to weta awe he wayi lẹ mẹ he yin finfọnsọnku?⁠— Omẹ atọ́n wẹ. Omẹ nẹmu to yé mẹ wẹ yin yọpọvu?⁠— Omẹ atọ̀n. Podọ ẹnẹtọ yin jọja de. Etẹwẹ hiẹ lẹndọ ehe dohia?⁠—

Do glido, e dohia dọ Jiwheyẹwhe yiwanna yọpọvu lẹ. Ṣigba e nasọ fọ́n mẹsusu devo lẹ sọnku ga. Be mẹhe wadagbe lẹ kẹdẹ wẹ Jiwheyẹwhe na fọnsọnku ya?⁠— Mí sọgan lẹn mọ. Ṣigba mẹsusu ma plọn nugbo lọ dogbọn Jehovah Jiwheyẹwhe po Ovi etọn po dali whẹpo do kú gba. Enẹwutu yé wà onú ylankan lẹ na onú ylankan wẹ yin pinplọn yé wutu. Be a lẹndọ Jehovah na fọ́n omẹ mọnkọtọn lẹ sọnku ya?⁠—

Biblu dọmọ: “Fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Etẹwutu wẹ mẹhe mayin dodonọ lẹ, kavi mẹhe ma wà nuhe sọgbe lẹ, na yin finfọnsọnku?⁠— Na yé ma tindo dotẹnmẹ hundote lọ nado plọnnu dogbọn Jehovah po ojlo etọn po dali whẹpo do kú wutu wẹ.

Whetẹnu wẹ hiẹ lẹndọ gbẹtọ lẹ na yin finfọnsọnku?⁠— Flindọ whenuena Lazalọsi kú bọ Jesu dopagbe na nọvi etọn Malta dọ: “Nọvisunnu towe nasọ fọ́n.” Malta gblọn dọmọ: “Yẹn yọnẹn dọ e nasọ fọ́n to fọnsọnku mẹ to azán opodo gbè.” (Johanu 11:23, 24) Etẹ dọ wẹ Malta te to whenuena e dọ dọ Lazalọsi na fọ́n to “azán opodo gbè”?⁠—

Malta ko sè opagbe Jesu tọn he dọ: ‘Mẹhe tin to yọdo oflin tọn mẹ lẹpo na sè ogbè etọn bo na tọ́njẹgbonu.’ (Johanu 5:28, 29) Enẹwutu “azán opodo gbè” yin ojlẹ lọ he mẹ mẹhe tin to oflin mẹ na Jiwheyẹwhe lẹpo na yin hinhẹngọwa ogbẹ̀. Azán opodo tọn ehe ma yin ganhiho 24 de gba. Ṣigba e na dẹn na owhe fọtọ́n. Biblu dọ gando azán ehe go dọ, ‘Jiwheyẹwhe na dawhẹna mẹhe to aigba ji lẹ.’ Mẹhe yin finfọnsọnku lẹ na tin to mẹhe e na dawhẹna lẹ mẹ.—Owalọ lẹ 17:31; 2 Pita 3:8.

Yí nukun homẹ tọn do pọ́n lehe azán enẹ na hẹn ayajẹ wá do sọ! To azán, he zẹẹmẹdo owhe-fọtọ́n lọ gblamẹ, livi susu mẹhe ko kú lẹ tọn wẹ na yin hinhẹngọwa ogbẹ̀. Jesu ylọ fie mẹhe gọwá ogbẹ̀ lẹ na nọ dọ Paladisi. Dike mí ni pọ́n fie Paladisi lọ na nọ podọ lehe e na te.

Nudi ganhiho atọ̀n jẹnukọnna okú Jesu tọn to yatin ji, e dọho gando Paladisi go na dawe he tin to yatin ji to apá na ẹn. Dawe lọ to yinyin hùhù na sẹ́nhẹngba etọn wutu. Ṣigba dile sẹ́nhẹngbatọ lọ pọ́n Jesu bo sè nuhe yin didọ gando E go, e jẹ yise tindo to Jesu mẹ ji. Enẹ zọ́n bọ sẹ́nhẹngbatọ lọ dọmọ: “Flin mi, whenuena hiẹ jẹ ahọludu towe mẹ.” Jesu gblọnna ẹn dọ: ‘Nugbo wẹ yẹn dọ hlan we to egbehe, Hiẹ na nọhẹ mi to Paladisi mẹ.’—Luku 23:42, 43.

Etẹwẹ Jesu tindo to ayiha mẹ to whenuena e dọ ehe? Fie wẹ Paladisi lọ te?⁠— Lẹnnupọndeji. Tintan whẹ́, fie wẹ Paladisi tin te dai?⁠— Flindọ, Jiwheyẹwhe ze sunnu tintan, Adam, po asi etọn po do paladisi de mẹ to aigba ji fi nado nọ nọ̀ e mẹ. E yin yiylọdọ jipa Edẹni tọn. Kanlin lẹ tin to jipa enẹ mẹ, ṣigba yé ma nọ gbleawunamẹ. Podọ atin lẹ tin to finẹ bo nọ sẹ́n sinsẹ́n dagbedagbe lẹ, podọ tọ̀sisa daho de sọ to finẹ ga. Eyin nọtẹn dagbe de he yọ́n na ninọ!—Gẹnẹsisi 2:8-10.

Enẹwutu to whenuena mí hia dọ sẹ́nhẹngbatọ enẹ na nọ Paladisi mẹ, mí dona lẹn to ayiha mítọn mẹ dọ aigba ehe wẹ na yin lilẹzun fininọ whanpẹnọ de. Be Jesu lọsu na nọ aigba ji tofi hẹ sẹ́nhẹngbatọ dai tọn ehe to Paladisi mẹ wẹ ya?⁠— Lala. Be a yọ́n nuhewutu e ma na tofi ya?—

Na Jesu na tin to olọn mẹ bo to gandu di Ahọlu do Paladisi aigba ji tọn lọ ji. Enẹwutu Jesu na tin hẹ dawe lọ to aliho lọ mẹ dọ e na fọ́n ẹn sọnku bo penukundo nuhudo etọn lẹ go. Ṣigba etẹwutu wẹ Jesu na hẹn sẹ́nhẹngbatọ dai tọn lọ nado wá nọ Paladisi mẹ?⁠— Gbọ mí ni dín gblọndo na kanbiọ ehe.

Whẹpo sẹ́nhẹngbatọ lọ do dọhona Jesu, be e ko yọ́n lẹndai Jiwheyẹwhe tọn lẹ wẹ ya?⁠— Lala, e ma yọnẹn. E wà onú ylankan lẹ, na e ma yọ́n nugbo lọ dogbọn Jiwheyẹwhe dali wutu. Ṣigba to Paladisi mẹ, lẹndai Jiwheyẹwhe tọn lẹ na yin pinplọn ẹn. Enẹgodo e na tindo dotẹnmẹ lọ nado dohia dọ emi yiwanna Jiwheyẹwhe nugbonugbo gbọn ojlo Etọn wiwà dali.

Be mẹhe yin finfọnsọnku lẹpo wẹ na nọgbẹ̀ to Paladisi aigba ji tọn lọ mẹ ya?⁠— Lala, e ma yinmọ. Be a yọ́n nuhewutu wẹ?⁠— Na mẹdelẹ na yin finfọnsọnku nado nọhẹ Jesu to olọn mẹ. Yé na duahọlu hẹ Jesu do Paladisi aigba ji tọn ji. Gbọ mí ni pọ́n lehe mí wagbọn do yọ́n ehe.

To ozán he jẹnukọnna hùhù Jesu tọn mẹ, e dọna apọsteli etọn lẹ dọmọ: ‘To owhé Otọ́ ṣie tọn gbè to olọn mẹ, fininọ susu wẹ tin to finẹ, podọ yẹn jei nado wleawuna otẹn de dai na mì.’ Enẹgodo Jesu dopagbe na yé dọmọ: “Yẹn nasọ lẹgọ, bo hẹn mì yì dee dè; na fihe yẹn te finẹ wẹ mì na nọ ga.”—Johanu 14:2, 3.

Fie wẹ Jesu yì to fọnsọnku etọn godo?⁠— E yì Otọ́ etọn dè to olọn mẹ. (Johanu 17:4, 5) Enẹwutu Jesu dopagbe na apọsteli etọn lẹ po hodotọ etọn devo lẹ po dọ emi na fọ́n yé sọnku na yé nido nọhẹ ẹ to olọn mẹ. Etẹwẹ yé na wà to finẹ hẹ Jesu?— Biblu dọ dọ devi etọn he mọ “fọnsọnku tintan” yí lẹ na nọ olọn mẹ bo na dugán do aigba ji ‘di ahọlu hẹ ẹ na owhe fọtọ́n.’—Osọhia 5:10; 20:6; 2 Timoti 2:12.

Omẹ nẹmu wẹ na mọ “fọnsọnku tintan” lọ yí bo na dugán hẹ Jesu taidi ahọlu?⁠— Jesu dọna devi etọn lẹ dọ: ‘Mì dibu blo, lẹngbọpa pẹvi; na homẹvivi Otọ́ mìtọn tọn wẹ nado yí ahọludu na mì.’ (Luku 12:32) “Lẹngbọpa pẹvi” ehe, he yin finfọnsọnku nado nọhẹ Jesu to Ahọluduta olọn tọn mẹ, tindo sọha tangan de. Biblu dohia dọ omẹ sọha “fọtọ́n [donu] kantọ̀n-konukunẹnẹ” wẹ yin finfọnsọnku sọn aigba ji.—Osọhia 14:1, 3.

Omẹ nẹmu wẹ na nọ Paladisi mẹ to aigba ji?⁠— Biblu ma dọ sọha lọ gba. Ṣigba Jiwheyẹwhe ko dọna Adam po Evi po to whenuena yé gbẹ́ tin to jipa Edẹni tọn mẹ nado jivi bo gọ́ aigba ji. Nugbo wẹ dọ yé ma hẹn enẹ di gba. Ṣigba Jiwheyẹwhe na hẹn ẹn diun dọ lẹndai emitọn nado hẹn gbẹtọ dagbe lẹ gọ́ aigba ji yin hinhẹndi.—Gẹnẹsisi 1:28; Isaia 45:18; 55:11.

Pọ́n lehe e na yọnwhanpẹ do sọ nado nọgbẹ̀ to Paladisi mẹ! Aigba lọ pete na wá taidi jipa whanpẹnọ de. Ohẹ̀ lẹ, kanlin voovo lẹ, atin whanpẹnọ lẹ po vounvoun wunmẹwunmẹ lẹ po na gọ́ e mẹ. Azọ̀n ma na hẹn awufiẹsa wá na mẹdepope ba, mọjanwẹ mẹdepope ma na kú ba. Mẹlẹpo wẹ na lẹzun họntọn vivẹ lẹ. Eyin mí jlo na nọgbẹ̀ kakadoi to Paladisi mẹ, ojlẹ lọ die nado wleawudai na ẹn.