Naegbọn Mẹhe Tin to Otẹn Aṣẹpipa Tọn mẹ lẹ Do Jẹna Sisi?

 1, 2. (a) Naegbọn e do nọ vẹawuna mí nado do sisi hia mẹhe tin to otẹn aṣẹpipa tọn mẹ lẹ? (b) Kanbiọ tẹlẹ wẹ mí na gbadopọnna?

BE HIẸ ko doayi nuyiwa yọpọvu de tọn go pọ́n to whenuena nuhe e ma jlo na wà de yin bibiọ to e si ya? Aliho he mẹ e dọ̀n nukunmẹ ylọn te sọgan dohia we hezeheze dọ nude to jijọ to ahun etọn mẹ dọ́n. E sè nuhe mẹjitọ etọn biọ to e si bosọ yọnẹn dọ emi dona do sisi hia aṣẹpipa etọn. Ṣigba to whẹho ehe mẹ, e ma jlo e nado setonu. Ninọmẹ visunnu lọ tọn do nuhe mímẹpo nọ diahi hẹ to whedelẹnu hia.

² E ma nọ bọawuna mí to whepoponu nado do sisi hia mẹhe tin to otẹn aṣẹpipa tọn mẹ lẹ. Be e nọ vẹawuna we to whedelẹnu nado do sisi hia mẹhe tindo jlọjẹ aṣẹpipa tọn do jiwe jẹ obá de mẹ ya? Eyin mọ wẹ, yọnẹn dọ e ma yin hiẹ ṣo wẹ e nọ vẹawuna. Mí to gbẹnọ to ojlẹ de mẹ whenuena e taidi dọ suhugan gbẹtọ lẹ tọn nọ yí nukunpẹvi do pọ́n aṣẹpipa hugan gbede pọ́n. Ṣogan, Biblu dọ dọ mí dona nọ do sisi hia mẹhe tindo jlọjẹ aṣẹpipa tọn do mí ji lẹ. (Howhinwhẹn lẹ 24:21) Na nugbo tọn, dandannu wẹ ehe yin nado sọgan gbọṣi owanyi Jiwheyẹwhe tọn mẹ. Enẹwutu, whẹho ehe fọ́n kanbiọ delẹ dote. Naegbọn e do nọ vẹawuna mí sọmọ nado do sisi hia mẹhe tin to otẹn aṣẹpipa tọn mẹ lẹ? Naegbọn Jehovah biọ ehe to mí si, podọ etẹwẹ na gọalọna mí nado wàmọ? To tadona mẹ, aliho tẹlẹ mẹ wẹ mí sọgan do sisi hia yé te?

 3, 4. Nawẹ ylando po mape po bẹjẹeji gbọn, podọ naegbọn mapenọ-yinyin mítọn nọ hẹn ẹn vẹawuna mí nado do sisi hia mẹhe tin to otẹn aṣẹpipa tọn mẹ lẹ?

³ To kleun mẹ, mì gbọ mí ni gbadopọnna whẹwhinwhẹ́n awe he wutu sisi didohia mẹhe tin to otẹn aṣẹpipa tọn mẹ lẹ nọ vẹawu sọmọ. Tintan, mapenọ wẹ mí yin podọ awetọ, mẹhe to aṣẹpa do mí ji lẹ lọsu yin mapenọ. Ylando po mapenọ-yinyin gbẹtọvi tọn po bẹjẹeji to ojlẹ dindẹn die to jipa Edẹni tọn mẹ whenuena Adam po Evi po diọnukunsọ aṣẹpipa Jiwheyẹwhe tọn. Enẹwutu atẹṣiṣi wẹ hẹn ylando wá. Kakajẹ egbehe, mí tindo ayilinlẹn jọwamọ tọn lọ nado nọ ṣiatẹ.—Gẹnẹsisi 2:15-17; 3:1-7; Psalm 51:5; Lomunu lẹ 5:12.

⁴ Na mí yin ylandonọ wutu, suhugan mítọn nọ yawu joawuna goyiyi po sakla po, to whenuena whiwhẹ yin jẹhẹnu de he mí dona dovivẹnu vẹkuvẹku nado wleawuna bo hẹn e go dile etlẹ yindọ jẹhẹnu ehe vẹawu nado mọ. Eyin mí tlẹ ko sẹ̀n Jiwheyẹwhe po nugbonọ-yinyin po na owhe susu, mí sọgan joawuna tasinsinyẹn po goyiyi po. Di apajlẹ, lẹnnupọndo Kola ji, mẹhe yí nugbonọ-yinyin do jugbọn awusinyẹnnamẹnu susu lẹ mẹ po omẹ Jehovah tọn lẹ po. Ṣogan, e tindo ojlo sinsinyẹn nado mọ aṣẹpipa yí dogọ bo gbọn winyan matindo dali lẹzun tọ́ntlọ́ngbọ́n to mẹhe diọnukunsọ Mose he yin homẹmimiọnnọ hugan to whenẹnu lẹ mẹ. (Osọha lẹ 12:3; 16:1-3) Sọ flin Ahọlu Uzia ga, mẹhe goyiyi etọn sisẹ́ ẹ nado biọ tẹmpli Jehovah tọn mẹ bo hẹn azọ́ndenamẹ wiwe yẹwhenọ lẹ tọn di. (2 Otannugbo lẹ 26:16-21) Omẹ ehelẹ yin yasana taun na atẹṣiṣi yetọn. Ṣogan, apajlẹ ylankan yetọn yin avase họakuẹ de na mímẹpo. Mí dona diahi hẹ goyiyi he nọ hẹn ẹn vẹawuna mí nado do sisi hia mẹhe tin to otẹn aṣẹpipa tọn mẹ lẹ.

 5. Nawẹ gbẹtọvi mapenọ lẹ ko ṣì huhlọn yetọn zan gbọn?

⁵ To alọ devo mẹ, gbẹtọ mapenọ he tin to otẹn aṣẹpipa tọn mẹ lẹ ko wà nususu nado do aṣẹpipa hia taidi nuhe ma jẹna sisi sọmọ. Susu yetọn wẹ ko yin hùnylantọ, fifiẹtọ, kavi aṣẹglanglan-panamẹtọ. Na nugbo tọn, whenuho dohia dọ gbẹtọvi lẹ nọ ṣì huhlọn zan to ojlẹ lẹpo mẹ. (Yẹwhehodọtọ 8:9) Di apajlẹ, Sauli yin gbẹtọ dagbe, whiwhẹnọ, to whenuena Jehovah de e taidi ahọlu. Ṣigba, e joawuna goyiyi po awuwhàn po; enẹgodo e dohomẹkẹn Davidi he yin sunnu nugbonọ de. (1 Samuẹli 9:20, 21; 10:20-22; 18:7-11) To nukọn mẹ, Davidi lẹzun dopo to ahọlu dagbe hugan Islaeli tọn lẹ mẹ, ṣogan e ṣì huhlọn etọn zan to whenuena e yí asi Ulia Hitinu lọ tọn bo do dawe homẹvọnọ enẹ hlan awhàn nukọn nado yin hùhù. (2 Samuẹli 11:1-17) Mọwẹ, mape nọ hẹn ẹn vẹawuna gbẹtọ lẹ nado zan huhlọn do jijlọ ji. Podọ mẹhe tin to otẹn aṣẹpipa tọn mẹ bo ma nọ gbògbéna Jehovah lẹ tọn tlẹ sọ nọ ylan hugan. To zẹẹmẹ bibasi do aliho he mẹ papa Katoliki tọn delẹ fọ́n homẹkẹn dote to fisusu ji godo, hoyidọtọ Grande-Bretagne tọn de wlan dọmọ: “Kùn wẹ huhlọn nọ kùnmẹ ṣọ̀-ṣọ̀; eyin huhlọn petepete tlẹ wá yin ninamẹ, kùn wẹ e nọ kùnmẹ di osọ́.” Po kandai whenuho tọn mọnkọtọn po to ayiha mẹ, mì gbọ mí ni lẹnnupọndo kanbiọ ehe ji: Naegbọn mí dona do sisi hia mẹhe tin to otẹn aṣẹpipa tọn mẹ lẹ?

 6, 7. (a) Etẹwẹ owanyi he mí tindo na Jehovah nọ whàn mí nado wà, podọ etẹwutu? (b) Etẹwẹ taliai bẹhẹn, podọ nawẹ mí sọgan do e hia gbọn?

⁶ Whẹwhinwhẹ́n titengbe hugan lẹ nado do sisi hia mẹhe tin to otẹn aṣẹpipa tọn mẹ lẹ sinai do owanyi ji—yèdọ owanyi he mí tindo na Jehovah, na hatọ mítọn, podọ na míde. Mí jlo na hẹn homẹ Jehovah tọn hùn na ewọ wẹ mí yiwanna hugan wutu. (Howhinwhẹn lẹ 27:11; Malku 12:29, 30) Mí yọnẹn dọ nupojipetọ-yinyin etọn, yèdọ jlọjẹ etọn nado dugán do wẹkẹ lọ ji, ko yin nukundiọsọ to aigba ji sọn atẹṣiṣi Edẹni mẹ tọn whenu gbọ́n podọ suhugan gbẹtọvi lẹ tọn ko nọgodona Satani bo gbẹ́ gandudu Jehovah tọn dai. Homẹ mítọn nọ hùn nado nọgodona nupojipetọ-yinyin Jehovah tọn. Eyin mí hia hogbe he whànmẹ Osọhia 4:11 tọn lẹ, yé nọ yinuwado mí ji yì ahun mẹ. Lehe e họnwun na mí hezeheze dọ Jehovah wẹ jẹ nado dugán do wẹkẹ lọ ji do sọ! Mí nọ nọgodona nupojipetọ-yinyin Jehovah tọn bo nọ kẹalọyi gandudu etọn to gbẹninọ egbesọegbesọ tọn mítọn mẹ.

⁷ Sisi mọnkọtọn bẹ tonusise po taliai po hẹn. Mí nọ setonuna Jehovah sọn ojlo mẹ na mí yiwanna ẹn wutu. Ṣigba, ojlẹ delẹ na tin bọ tonusise na vẹawuna mí taun. To ojlẹ mọnkọtọn lẹ mẹ, mí dona plọn nado nọ litai kẹdẹdi apajlẹ yọpọvu he yin hodọdeji to bẹjẹeji lọ tọn. Mí flindọ Jesu litaina ojlo Otọ́ etọn tọn to whenuena mọwiwà tlẹ taidi nuhe vẹawu taun. “Ojlo ṣie ma wẹ gba, adavo towe, yin wiwà,” wẹ e dọna Otọ́ etọn.—Luku 22:42.

 8. (a) Etẹwẹ taliaina aṣẹpipa Jehovah tọn nọ saba bẹhẹn to egbehe, podọ etẹwẹ do pọndohlan Jehovah tọn do whẹho ehe ji hia? (b) Etẹwẹ sọgan gọalọna mí nado tuntoai na ayinamẹ bo yí oplọn? (Pọ́n ‘Tuntoai Na Ayinamẹ bo Yí Oplọn.’)

⁸ Nugbo wẹ dọ Jehovah ma nọ dọhona dopodopo mítọn tlọlọ to egbehe; e nọ yí Ohó etọn gọna afọzedaitọ he yin gbẹtọvi lẹ zan. Enẹwutu, mí nọ saba dohia dọ mí litaina aṣẹpipa Jehovah tọn gbọn sisi didohia mẹhe e zedo otẹn aṣẹpipa tọn mẹ, kavi he e ko na dotẹnmẹ nado zindonukọn to otẹn lọ mẹ lẹ dali. Eyin mí diọnukunsọ omẹ enẹlẹ—di apajlẹ, gbọn gbigbẹ́ nado kẹalọyi ayinamẹ po nugbẹnamẹ sinai do Owe-wiwe ji yetọn po dali—mí na hẹn homẹgblena Jiwheyẹwhe mítọn. Whenuena Islaelivi lẹ hlunnudọ bo diọnukunsọ Mose, Jehovah pọ́n nuyiwa yetọn lẹ hlan taidi atẹṣiṣi do ewọ lọsu go tlọlọ.—Osọha lẹ 14:26, 27.

 9. Naegbọn owanyi he mí tindo na hatọ mítọn lẹ na whàn mí nado do sisi hia mẹhe tin to otẹn aṣẹpipa tọn mẹ lẹ? Na apajlẹ.

⁹ Mí sọ nọ do sisi hia mẹhe tin to otẹn aṣẹpipa tọn mẹ lẹ na mí yiwanna hatọ mítọn lẹ wutu. Gbọnna? Eyọn, mí ni dọ dọ hiẹ yin awhànfuntọ de to awhànpa de mẹ. E yọnbasi dọ kọdetọn dagbe kavi etlẹ yin awhàngbigba awhànpa lọ tọn ni sinai do gbekọndopọ, tonusise, po sisi he awhànfuntọ dopodopo nọ dohia mẹhe yin ogán etọn po ji. Eyin hiẹ yí nukunpẹvi do pọ́n tito enẹ bo ṣiatẹ, ogbẹ̀ awhànfuntọ hatọ towe lẹ tọn sọgan yin zizedo owù mẹ. Nugbo wẹ dọ awhànpa gbẹtọvi tọn lẹ to gbakija susu hẹnwa to aihọn lọ mẹ to egbehe. Ṣigba, dagbe kẹdẹ wẹ awhànpa he tin to anademẹ Jehovah tọn glọ lẹ nọ wà. Biblu dlẹnalọdo Jiwheyẹwhe whlasusu taidi “OKLUNỌ awhànpa lẹ tọn.” (1 Samuẹli 1:3) Ewọ wẹ nọ degbena awhànpa daho nudida gbigbọnọ lẹ tọn. To whedelẹnu, Jehovah nọ yí devizọnwatọ aigba ji tọn etọn lẹ jlẹdo agun kavi awhànpa de go. (Psalm 68:11; Ezekiẹli 37:1-10) Eyin mí ṣiatẹ do mẹhe Jehovah zedo otẹn aṣẹpipa tọn mẹ lẹ, be e ma yin ohia de niyẹn dọ mí to ogbẹ̀ awhànfuntọ gbigbọmẹ tọn hatọ mítọn lẹ tọn zedo owù mẹ ya? Whenuena Klistiani de ṣiatẹ do mẹho dide lẹ, mẹdevo lẹ sọgan jiya etọn to agun mẹ ga. (1 Kọlintinu lẹ 12:14, 25, 26) Whenuena ovi de ṣiatẹ, whẹndo lọ blebu sọgan jiya. Enẹwutu mí nọ dohia dọ mí yiwanna hatọ mítọn lẹ gbọn awuwiwlena gbigbọ sisi po gbekọndopọ tọn po dali.

10, 11. Onú devo tẹwẹ nọ whàn mí nado setonuna mẹhe tin to otẹn aṣẹpipa tọn mẹ lẹ?

¹⁰ Mí sọ nọ do sisi hia mẹhe tin to otẹn aṣẹpipa tọn mẹ lẹ na ehe nọ hẹn ale wá na mí. Eyin Jehovah biọ to mí si nado do sisi hia omẹ mọnkọtọn lẹ, e nọ saba dọ ale he mí na mọyi sọn mọwiwà mẹ lẹ. Di dohia, e biọ to ovi lẹ si nado nọ setonuna mẹjitọ yetọn lẹ na yé nido nọgbẹ̀ dẹn to ayajẹ mẹ. (Deutelonomi 5:16; Efesunu lẹ 6:2, 3) E biọ dọ mí ni nọ do sisi hia mẹho agun tọn lẹ na awugbopo nado wàmọ sọgan hẹn awugblena mí to gbigbọ-liho. (Heblu lẹ 13:7, 17) Podọ e biọ dọ mí ni nọ setonuna aṣẹpatọ aihọn tọn lẹ na dagbemẹninọ mítọn wutu.—Lomunu lẹ 13:4.

¹¹ Be hiẹ ma na yigbe dọ nuhewutu Jehovah jlo dọ mí ni setonu yinyọnẹn nọ gọalọna mí nado do sisi hia mẹhe tin to otẹn aṣẹpipa tọn mẹ lẹ ya? Enẹwutu, mì gbọ mí ni gbadopọnna lehe mí sọgan do sisi hia omẹ mọnkọtọn lẹ do to adà titengbe atọ̀n gbẹzan tọn mẹ.

12. Azọngban tẹwẹ Jehovah dena asu kavi otọ́ to whẹndo mẹ, podọ nawẹ sunnu de sọgan hẹn azọngban enẹ di gbọn?

¹² Jehovah lọsu wẹ ze tito whẹndo tọn dai. Taidi Jiwheyẹwhe he nọ nọ̀ titoji to whepoponu, e ko wleawuna whẹndo ganji na e nido sọgan tindo kọdetọn dagbe. (1 Kọlintinu lẹ 14:33) E na asu kavi otọ́ aṣẹpipa nado yinuwa taidi tatọ́ to whẹndo mẹ. Asu nọ do sisi hia Ota etọn, yèdọ Klisti Jesu, gbọn hihodo apajlẹ aliho he mẹ Jesu nọ yí tatọ́-yinyin etọn zan do agun lọ ji te tọn dali. (Efesunu lẹ 5:23) Enẹwutu, kakati asu ni dovọ́na azọngban etọn, e dona hẹn ẹn di po nujikudo po; mọjanwẹ e ma dona yin aṣẹglanglan-panamẹtọ kavi fifiẹtọ kakatimọ, e dona yin owanyinọ, lẹnpọn dagbenọ, po homẹdagbenọ po. E nọ hẹn ẹn do ayiha mẹ dọ aṣẹpipa etọn tindo dogbó—e ma zẹ̀ aṣẹpipa Jehovah tọn go gbede.

13. Nawẹ asi kavi onọ̀ sọgan hẹn azọngban whẹndo tọn etọn di to aliho he na hẹn homẹhun Jehovah te mẹ gbọn?

¹³ Asi kavi onọ̀ de dona yinuwa taidi alọgọtọ kavi gọtọ de na asu etọn. Aṣẹpipa yin nina ewọ lọsu to whẹndo mẹ, na Biblu dọho gando “osẹ́n onọ̀ towe tọn” go. (Howhinwhẹn lẹ 1:8) Nugbo wẹ dọ aṣẹpipa etọn tin to asu etọn tọn glọ. Asi Klistiani de nọ do sisi hia na aṣẹpipa asu etọn tọn gbọn alọgigọna ẹn nado hẹn azọngban etọn di taidi tatọ́ whẹndo tọn dali. Asi lọ ma nọ de e pò, deanana ẹn, kavi yí otẹn etọn. Kakatimọ, e nọ nọgodona asu etọn bo nọ kọngbedopọ hẹ ẹ. Eyin e ma yiwanna nudide asu etọn tọn lẹ, e sọgan dọ linlẹn etọn po sisi po, ṣigba e nọ gbọṣi taliai mẹ. Eyin asu etọn yin mayisenọ, e sọgan pehẹ ninọmẹ sinsinyẹn lẹ, ṣogan taliai etọn sọgan whàn asu etọn nado dín Jehovah.—1 Pita 3:1.

14. Nawẹ ovi lẹ sọgan hẹn ayajẹ wá na mẹjitọ yetọn lẹ po Jehovah po gbọn?

¹⁴ Ovi lẹ nọ hẹn homẹhun Jehovah eyin yé setonuna otọ́ po onọ̀ yetọn po. Yé sọ nọ hẹn gbégbò po ayajẹ po wá na mẹjitọ yetọn lẹ. (Howhinwhẹn lẹ 10:1) To whẹndo mẹjitọ-godoponọ tọn lẹ mẹ, ovi lẹ nọ hodo nunọwhinnusẹ́n tonusise tọn dopolọ, bo nọ hẹn ẹn do ayiha mẹ dọ mẹjitọ yetọn tlẹ sọgan tindo nuhudo godonọnamẹ po gbekọndopọ yetọn po tọn dogọ. Ayajẹ po jijọho susu po nọ tin eyin hagbẹ whẹndo de tọn lẹpo hẹn azọngban he Jiwheyẹwhe dena yé lẹ di. Ehe nọ hẹn gbégbò wá na Dowatọ whẹndo lẹpo tọn, yèdọ Jehovah Jiwheyẹwhe.—Efesunu lẹ 3:14, 15.

15. (a) Nawẹ mí sọgan dohia dọ mí nọ do sisi hia aṣẹpipa Jehovah tọn to agun mẹ gbọn? (b) Nunọwhinnusẹ́n tẹlẹ wẹ sọgan gọalọna mí nado setonuna mẹhe to nukọntọ yin lẹ? (Pọ́n apotin lọ “Mì Nọ Setonuna Mẹhe to Nukọntọ Yin Lẹ.”)

¹⁵ Jehovah ko de Ovi etọn taidi Ogán do agun Klistiani tọn ji. (Kọlọsinu lẹ 1:13) To alọ devo mẹ, Jesu ko deazọ́nna “afanumẹ nugbonọ, nuyọnẹntọ” nado penukundo nuhudo gbigbọmẹ tọn omẹ Jiwheyẹwhe tọn lẹ tọn go to aigba ji. (Matiu 24:45-47) Hagbẹ Anademẹtọ Kunnudetọ Jehovah tọn lẹ tọn wẹ nọ ze afọ pipli afanumẹ lọ tọn dai. Kẹdẹdile e yin do to agun Klistiani owhe kanweko tintan tọn lẹ mẹ, to egbehe mẹho agun tọn lẹ nọ mọ nudọnamẹ po ayinamẹ po yí sọn Hagbẹ Anademẹtọ lọ dè tlọlọ kavi gbọn afọzedaitọ etọn lẹ gblamẹ, taidi nugopọntọ tomẹyitọ lẹ. Eyin dopodopo mítọn do sisi hia aṣẹpipa mẹho Klistiani lẹ tọn, Jehovah wẹ mí to tonusena.—Heblu lẹ 13:17.

16. Linlẹn tẹ mẹ wẹ mẹho lẹ nọ yin dide gbọn gbigbọ wiwe dali te?

¹⁶ Mẹho lẹ po devizọnwatọ lizọnyizọnwiwa tọn lẹ po ma yin gbẹtọ pipé gba. Yé tindo awugbopo lẹ taidi mílọsu. Ṣogan, mẹho lẹ yin ‘nunina to sunnu lẹ mẹ,’ he yin dide nado gọalọna agun nado gbọṣi dolilo mẹ to gbigbọ-liho. (Efesunu lẹ 4:8) Mẹho lẹ nọ yin dide gbọn gbigbọ wiwe dali. (Owalọ lẹ 20:28) Gbọnna? To linlẹn lọ mẹ dọ sunnu mọnkọtọn lẹ dona jẹ nubiọtomẹsi he yin kinkàndai to Ohó he yin gbigbọdo gbọn gbigbọ Jiwheyẹwhe tọn dali mẹ lẹ kọ̀n whẹ́. (1 Timoti 3:1-7, 12; Titu 1:5-9) Humọ, mẹho he to jẹhẹnu mẹmẹsunnu de tọn gbeje pọ́n lẹ nọ hodẹ̀ vẹkuvẹku nado biọ anademẹ gbigbọ wiwe Jehovah tọn.

17. To whedelẹnu, naegbọn yọnnu Klistiani lẹ nọ ṣinyọnnudo ota yetọn to whenuena yé to nukunpedo azọ́ndenamẹ de go to agun mẹ?

¹⁷ To agun mẹ, e sọgan jọ bọ mẹho kavi devizọnwatọ lizọnyizọnwiwa tọn de ma na tin nado penukundo azọ́ndenamẹ he yé dona hẹndi de go taidi anadidena dope sinsẹ̀nzọn kunnudegbe tọn. To ojlẹ mọnkọtọn lẹ mẹ, mẹmẹsunnu he ko yí baptẹm devo lẹ sọgan penukundo e go. Eyin mẹmẹsunnu mọnkọtọn depope ma tin, mẹmẹyọnnu Klistiani he pegan lẹ sọgan sú odò mọnkọtọn lẹ. Ṣigba, to whenuena yọnnu de to nukunpedo azọ́ndenamẹ he dona yin hinhẹndi gbọn sunnu he ko yí baptẹm de dali go, e dona ṣinyọnnudo ota etọn.a (1 Kọlintinu lẹ 11:3-10) Nubiọtomẹsi ehe ma de yọnnu lẹ pò gba. Kakatimọ, e yin dotẹnmẹ hundote de nado do sisi hia tito tatọ́-yinyin tọn he Jehovah zedai to whẹndo mẹ podọ to agun mẹ.

18, 19. (a) Nawẹ hiẹ na basi zẹẹmẹ nunọwhinnusẹ́n he sọawuhia to Lomunu lẹ 13:1-7 tọn gbọn? (b) Nawẹ mí nọ do sisi hia aṣẹpatọ aihọn tọn lẹ gbọn?

¹⁸ Klistiani nugbo lẹ nọ yí ahun lẹpo do setonuna nunọwhinnusẹ́n he tin to Lomunu lẹ 13:1-7. Dile hiẹ to wefọ enẹlẹ hia, a sọgan mọdọ “huhlọn daho” he yin nùdego to finẹ lẹ wẹ gandudu aihọn tọn lẹ. Dile e na dẹnsọ bọ Jehovah na dotẹnmẹ gandudu aihọn tọn ehelẹ nado tin, yé nọ yí azọngban titengbe lẹ wà bo nọ hẹn ẹn diun dọ nulẹ tin to titoji jẹ obá de mẹ bosọ nọ wleawu nuhe mí tindo nuhudo etọn devo lẹ. Mí nọ do sisi mítọn hia aṣẹpatọ ehelẹ gbọn tonusisena osẹ́n lẹ dali. Mí nọ hẹn ẹn diun dọ mí sú takuẹ mítọn lẹpo, dọ mí kanwe gọ́ alọdowemẹwe depope he gandudu sọgan biọ ganji, bo hodo osẹ́n depope he gando mílọsu, whẹndo, ajọ́, kavi nutindo mítọn lẹ go. Ṣigba, mí ma nọ litaina aṣẹpatọ aihọn tọn lẹ eyin yé biọ dọ mí ni vẹtolina Jiwheyẹwhe. Kakatimọ, mí nọ yinuwa dile apọsteli lẹ wà do to hohowhenu to whenuena yé dọmọ: “Míwlẹ ma hà nọma setonuna Jiwheyẹwhe hú gbẹtọ.”—Owalọ lẹ 5:28, 29; pọ́n apotin lọ “Aṣẹpipa Mẹnu Tọn Wẹ Yẹn Dona Setonuna?”

¹⁹ Mí sọ nọ do sisi hia aṣẹpatọ aihọn tọn lẹ gbọn aliho he mẹ mí nọ yinuwa te dali. To whedelẹnu, e sọgan biọ dọ mí ni yinuwa hẹ ahọluzọnwatọ lẹ tlọlọ. Apọsteli Paulu yinuwa hẹ aṣẹpatọ lẹ taidi Ahọlu Hẹlodi Aglipa po Togán Festu po. Mahopọnna dọ omẹ ehelẹ tindo awugbopo sinsinyẹn lẹ, Paulu dọhona yé po sisi po. (Owalọ lẹ 26:2, 25) Mí nọ hodo apajlẹ Paulu tọn, vlavo mẹhe mí to hodọna lọ yin aṣẹpatọ huhlọnnọ de kavi ponọ de to lẹdo mítọn mẹ. To wehọmẹ, jọja Klistiani lẹ nọ dovivẹnu nado do sisi mọnkọtọn hia mẹplọntọ yetọn lẹ, ahọluzọnwatọ lẹ po mẹyidoazọnmẹ lẹ po. Nugbo wẹ dọ mí ma nọ do sisi hia mẹhe kẹalọyi nuyise mítọn lẹ kẹdẹ; mí sọ nọ do sisi hia to whenuena mí to nuyiwa hẹ mẹhe jẹagọdo Kunnudetọ Jehovah tọn lẹ. Na nugbo tọn, mayisenọ lẹ to paa mẹ dona doayi e go hezeheze dọ mí nọ símẹ.—Lomunu lẹ 12:17, 18; 1 Pita 3:15.

20, 21. Ale tẹlẹ wẹ nọ wá sọn sisi he jẹ didohia mẹhe tin to otẹn aṣẹpipa tọn mẹ lẹ mẹ?

²⁰ Mì dike mí whleawu nado do sisi hia blo. Apọsteli Pita wlan dọmọ: “Mì gbògbéna gbẹtọ wunmẹ lẹpo.” (1 Pita 2:17, NW ) Gbẹtọ lẹ sọgan yin nuyiwadeji taun eyin yé mọdọ mí nọ do sisi nujọnu tọn hia yé. Flindọ jẹhẹnu ehe vẹawu mimọ to egbehe. Enẹwutu, aliho dopo wẹ e yin nado hodo gbedide Jesu tọn he dọmọ: ‘Mì gbọ hinhọ́n mìtọn ni họnwun to gbẹtọ lẹ nukọn, na yé nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.’—Matiu 5:16.

²¹ To aihọn dózin ehe mẹ, gbẹtọ ahunjijlọnọ lẹ to lilẹhlan hinhọ́n gbigbọmẹ tọn kọ̀n. Enẹwutu eyin mí nọ do sisi hia to whẹndo mẹ, to agun mẹ, kavi na aṣẹpatọ aihọn tọn lẹ, ehe sọgan dọ̀n mẹdelẹ bo whàn yé nado zinzọnlin hẹ mí to hinhọ́n lọ nù. Nukundido gigonọ nankọ die! Ṣigba eyin enẹ ma tlẹ jọ, onú dopo họnwun. Sisi he mí nọ dohia gbẹtọ lẹ nọ hẹn homẹ Jehovah Jiwheyẹwhe tọn hùn bo nọ gọalọna mí nado gbọṣi owanyi etọn mẹ. Ale tẹwẹ sọ klo hú ehe?