Jaya to Whenue Ylandonọ de Lẹnvọjọ

To ojlẹ voovo lẹ mẹ to lizọnyizọn etọn whenu, Jesu ko zinnudo nujọnu-yinyin whiwhẹ tọn ji. E nọ to jejeji nado mọ sunnu po yọnnu po he tindo ojlo nado sẹ̀n Jiwheyẹwhe po whiwhẹ po lẹ. Ṣigba kakajẹ din, delẹ to yé mẹ sọgan gbẹsọ yin ylandonọ akonka lẹ.

Falesi lẹ po wekantọ lẹ po doayi e go dọ omẹ mọnkọtọn lẹ—he yé lẹndọ yé ma jẹ lẹ—to alọkẹyi owẹ̀n Jesu tọn bo to e dè wá. Yé wule dọmọ: “Dawe ehe nọ yí ylandonọ lẹ bo nọ dùnú hẹ yé.” (Luku 15:2) Falesi lẹ po wekantọ lẹ po nọ tindo numọtolanmẹ dọ yé yiaga hugan gbẹtọ paa lẹ bo nọ yinuwa hẹ yé taidi dihó he to afọ yetọn glọ. Nado do wangbẹna he yé tindo na omẹ mọnkọtọn lẹ hia, ogán lẹ nọ yí hogbe Heblu tọn he yin ‛am ha·’aʹrets zan, yèdọ “omẹ [aigba] tọn lẹ” nado dlẹnalọdo yé.

To vogbingbọn mẹ, Jesu nọ doyẹyigona gbẹtọ lẹpo, nọ do homẹdagbe hia yé, bosọ nọ do awuvẹmẹ hia yé. Gbọnmọ dali, mẹsusu he nọ yin pinpọnhlan di mẹhe yìdo lẹ, etlẹ yin mẹdelẹ he yin ylandonọ lẹ, nọ to jejeji nado dotoaina Jesu. Ṣigba, numọtolanmẹ tẹwẹ Jesu tindo podọ nawẹ e yinuwa gando homọdọdomẹgo lọ dọ e to alọgọna omẹ mọnkọtọn he yìdo lẹ go gbọn?

Gblọndo kanbiọ enẹ tọn wá họnwun to whenue e na apajlẹ he whànmẹ de, ehe sọgbe hẹ dehe e na to Kapẹlnaumi to ojlẹ de mẹ wayi. (Matiu 18:12-14) Jesu na apajlẹ lọ to aliho de mẹ bọ e taidi dọ Falesi lẹ yin dodonọ bo tin to hihọ́ glọ to apó Jiwheyẹwhe tọn mẹ. Ṣigba, e do mẹhe yìdo lẹ hia taidi mẹhe ko danbú bo tin to ninọmẹ búbú tọn mẹ. Jesu dọmọ:

“Mẹnu to mì mẹ, he tindo lẹngbọ 100, eyin e hẹn dopo to yé mẹ bu, bọ e ma na jo 99 he pò lẹ do danfafa ji nado yì dín dehe bu lọ, kakajẹ whenue e mọ ẹn? Podọ to whenue e mọ ẹn, e ze e do abọ́ etọn lẹ ji bosọ jaya. To whenue e lẹkọwa whégbè, e ylọ họntọn po kọmẹnu etọn lẹ po pli, bo dọna yé dọ, ‘Mì jaya hẹ mi, na yẹn ko mọ lẹngbọ ṣie he bu lọ.’”—Luku 15:4-6.

Zẹẹmẹ tẹwẹ Jesu basi do apajlẹ ehe ji? E dọmọ: “Yẹn dọna mì dọ, mọdopolọ ayajẹ na sù humọ to olọn mẹ do ylandonọ dopo he lẹnvọjọ ji hugan do dodonọ 99 he ma tindo nuhudo lẹnvọjọ tọn lẹ ji.”—Luku 15:7.

To whenue Jesu donù lẹnvọjọ go, enẹ dona ko paṣa Falesi lẹ taun. Yé nọ pọ́n yede hlan di dodonọ bo nọ mọdọ emi ma tindo nuhudo lẹnvọjọ tọn. To whenue delẹ to yé mẹ mọhodọdo Jesu go to nudi owhe awe die wayi dọ e nọ dùnú hẹ tòkuẹ-ṣinyantọ lẹ po ylandonọ lẹ po, e gblọn dọmọ: “Yẹn ma wá nado ylọ dodonọ lẹ gba, adavo ylandonọ lẹ.” (Malku 2:15-17) Falesi dodonọ-jlatọ lẹ gboawupo nado mọdọ emi dona lẹnvọjọ, podọ enẹwutu yé ma hẹn ayajẹ depope wá to olọn mẹ. Ṣigba, ylandonọ he lẹnvọjọ nugbonugbo lẹ hẹn ayajẹ wá to olọn mẹ.

Nado vọ́ nùzindeji dọ eyin ylandonọ he danbú de lẹkọwa enẹ nọ hẹn ayajẹ daho wá to olọn mẹ, Jesu na apajlẹ devo he sọgbe hẹ ninọmẹ whégbè tọn de dọmọ: “Kavi yọnnu tẹwẹ na tindo abọgan-kuẹ dlakma ao, bọ eyin e hẹn dlakma dopo bu, e ma na tá miyọ́ngbán bo zà ohọ̀ etọn mẹ bosọ yí sọwhiwhe do dín kakajẹ whenue e mọ ẹn? Podọ to whenue e mọ ẹn, e ylọ họntọn po kọmẹnu etọn yọnnu lẹ po pli, bo dọmọ, ‘Mì jaya hẹ mi, na yẹn ko mọ abọgan-kuẹ dlakma he yẹn hẹnbu lọ.’”—Luku 15:8, 9.

Zẹẹmẹ he Jesu basi do apajlẹ ehe ji taidi dehe e basi to whenue e na apajlẹ lẹngbọ he danbú lọ tọn fó godo. Todin e dọmọ: “Enẹwutu, yẹn dọna mì dọ, ayajẹ nọ tin to angẹli Jiwheyẹwhe tọn lẹ ṣẹnṣẹn do ylandonọ dopo he lẹnvọjọ ji.”—Luku 15:10.

Yí nukun homẹ tọn do pọ́n angẹli Jiwheyẹwhe tọn lẹ dile yé to ojlo sisosiso dohia to kọlilẹwa ylandonọ de tọn mẹ! Enẹ jẹna ayidego, na ylandonọ he lẹnvọjọ bosọ mọ otẹn de to Ahọluduta olọn mẹ tọn Jiwheyẹwhe tọn mẹ lẹ na tin to otẹn he yiaga hugan angẹli lẹ lọsu tọn mẹ! (1 Kọlintinu lẹ 6:2, 3) Etomọṣo, angẹli lẹ ma nọ whànwu. To whelọnu lo, nawẹ mí na yinuwa gbọn to whenue ylandonọ de lẹnvọjọ mlẹnmlẹn bo lẹkọwa Jiwheyẹwhe dè?