Nọ Mọnú Hlan Nukọn bo Nọ Yinuwa po Nuyọnẹn Po

Apajlẹ visunnu he bu lọ tọn he Jesu ṣẹṣẹ na dona ko hẹn họnwun na tòkuẹ-ṣinyantọ lẹ, wekantọ lẹ po Falesi he to todoaina ẹn lẹ po hezeheze dọ Jiwheyẹwhe wleawufo nado jona ylandonọ he lẹnvọjọ lẹ. (Luku 15:1-7, 11) Todin, Jesu jẹ hodọna devi etọn lẹ ji. E na apajlẹ devo gando dawe adọkunnọ de go he sè dọ mẹhe nọ penukundo owhé etọn go, kavi họ̀nkọnsi etọn ko ṣinuwa.

Jesu dọ dọ yè sawhẹdokọna họ̀nkọnsi lọ dọ e to nutindo klunọ etọn tọn lẹ ṣì zan. Enẹwutu, klunọ lọ dọ dọ họ̀nkọnsi lọ na yin yinyan. Họ̀nkọnsi lọ dọna ede dọ, “etẹwẹ yẹn na wà, to whenue e yindọ klunọ ṣie na yí họ̀nkọnsi-zọ́n lọ sọn asi e? Yẹn ma tindo huhlọn sọmọ nado kùndò, winyan sọ nọ hù mi nado biọnu.” Nado sọgan pehẹ nuhe to nukọn ja, e wá tadona lọ kọ̀n dọmọ: “Yẹn yọ́n nuhe yẹn na wà, bọ eyin yẹn wá yin yinyan sọn họ̀nkọnsi-zọ́n mẹ, gbẹtọ lẹ na kẹalọyi mi do owhé yetọn lẹ gbè.” To afọdopolọji, e ylọ ahọ́tọnọ klunọ etọn tọn lẹ bo kanse yé dọmọ: “Nẹmu wẹ hiẹ dù do klunọ ṣie?”—Luku 16:3-5.

Omẹ tintan gblọn dọmọ: “Ojlẹnu daho amì olivie tọn 100.” Enẹ sọzẹn hẹ amì litli 2 200. Ahọ́tọnọ lọ sọgan ko tindo olivie-gle daho de kavi ko yin ajọwatọ de he nọ sà amì. Họ̀nkọnsi lọ dọna ẹn dọmọ: “Gọ̀ kandai gbekọndopọ tọn towe ze bo sinai bosọ kàn 50 [enẹ wẹ litli 1 100] po awuyiya po.”—Luku 16:6.

Họ̀nkọnsi lọ kanse mẹdevo dọmọ: “Todin, nẹmu wẹ hiẹ dù?” Mẹlọ gblọn dọ: “Ojlẹnu daho likun tọn 100.” Enẹ wẹ nudi litli 22 000. Họ̀nkọnsi lọ dọna ahọ́tọnọ ehe dọmọ: “Gọ̀ kandai gbekọndopọ tọn towe ze bo kàn 80.” Gbọnmọ dali, e de ahọ́ lọ pò na ahọ́tọnọ lọ, yèdọ 20 to 100 ji.—Luku 16:7.

Na họ̀nkọnsi lọ gbẹ́ pò to nukunpedo whẹho akuẹ tọn klunọ etọn tọn go wutu, to linlẹn de mẹ, e gbẹ́ tindo aṣẹ nado de ahọ́ he mẹdevo lẹ dù do klunọ etọn pò. Gbọn ahọ́ lọ didepo dali, họ̀nkọnsi lọ to họntọnji hẹ mẹhe sọgan do nukundagbe hia ẹ to whenue azọ́n na wá gble do e lẹ.

To nukọn mẹ, klunọ lọ wá sè nuhe jọ. Mahopọnna dọ nuhe họ̀nkọnsi lọ wà zọ́n bọ nususu gú klunọ lọ, nuyiwa họ̀nkọnsi lọ tọn hẹn awuji i bọ e pà ẹ, na “dile e tlẹ yin mawadodonọ, . . . e yinuwa po nuyọnẹn po.” Jesu yidogọ dọmọ: “Ovi titonu ehe tọn lẹ nọ yọnnuin to aliho he yọ́n-na-yizan mẹ to nuyiwa yetọn hẹ whẹndo yetọn titi mẹ hugan lehe e yin do na ovi hinhọ́n tọn lẹ.”—Luku 16:8.

Jesu ma to whẹsuna nuyiwa họ̀nkọnsi lọ tọn lẹ gba, mọjanwẹ e masọ to tulinamẹ nado nọ kàn ayiha gigẹdẹ to ajọwiwa mẹ. To whelọnu lo, etẹwẹ yin nuagokun lọ? E dotuhomẹna devi lẹ dọmọ: “Mì jihọntọn lẹ na mìde gbọn adọkun mawadodo tọn lẹ yiyizan dali, na to whenue yé na busẹ, họntọn ehelẹ nido kẹalọyi mì do nọtẹn madopodo lẹ mẹ.” (Luku 16:9) Nuplọnmẹ lọ tofi wẹ nado nọ mọnú hlan nukọn bosọ nọ yinuwa po nuyọnẹn yọ́n-na-yizan po. Devizọnwatọ Jiwheyẹwhe tọn lẹ, yèdọ “ovi hinhọ́n tọn lẹ,” dona nọ yí nutindo yetọn lẹ zan po nuyọnẹn po dile yé to nukundo sọgodo madopodo.

Jehovah Jiwheyẹwhe po Visunnu etọn po kẹdẹ wẹ sọgan kẹalọyi mẹde do Ahọluduta olọn tọn kavi Paladisi aigba ji tọn to Ahọluduta enẹ glọ mẹ. Mí dona dovivẹnu nado jihọntọn hẹ yé gbọn adọkun agbasa tọn he mí tindo lẹ yiyizan nado nọgodona Ahọluduta lọ dali. Gbọnmọ dali, jide na tin dọ mí na duvivi sọgodo madopodo de tọn eyin sika, fataka po adọkunnu devo lẹ po tlẹ wá busẹ.

Jesu sọ dọ dọ mẹhe nọ zan adọkunnu kavi agbasanu depope he yé tindo bosọ nọ penukundo yé go po nugbonọ-yinyin po lẹ, nasọ yí nugbonọ-yinyin do penukundo nuhe yin nujọnu hugan mọ lẹ go. Jesu tá hinhọ́n do ehe ji dọmọ: “Enẹwutu, eyin mì ma ko do mìde hia nado yin nugbonọ gando adọkun mawadodo tọn lẹ go, mẹnu wẹ na ze nuhe yin nugbo [taidi nuhe gando Ahọluduta lọ go lẹ] do alọmẹ na mì?”—Luku 16:11.

Jesu to didohia devi etọn lẹ dọ nususu wẹ na yin bibiọ to yé si eyin yé na yin alọkẹyi “do nọtẹn madopodo lẹ mẹ.” Mẹde ma sọgan yin devizọnwatọ nugbo Jiwheyẹwhe tọn bosọ yin afanumẹ na adọkunnu agbasa tọn mawadodo tọn lẹ to ojlẹ dopolọ mẹ gba. Jesu dotana dọmọ: “Devizọnwatọ whégbè tọn de ma sọgan yin afanumẹ na ogán awe, adavo ewọ na gbẹwanna ode bo yiwanna awetọ kavi ewọ na sẹbọdo ode go bo gbẹkọ awetọ go. Mìwlẹ ma sọgan yin afanumẹ na Jiwheyẹwhe podọ na Adọkunnu lẹ.”—Luku 16:9, 13.