“Mì Nọ Flin Mẹhe to Anadenanu to Ṣẹnṣẹn Mìtọn Lẹ”

SỌN Pẹntikọsti 33 W.M. tọn gbọ́n wẹ apọsteli nugbonọ Oklunọ Jesu Klisti tọn lẹ he yin hagbẹ anademẹtọ lọ ko yin tọ́ntlọ́ngbọ́n to anadidena agun Klistiani tọn he ṣẹṣẹ yin didoai lẹ mẹ. (Owalọ 6:2-4; Heb. 13:7) To nudi owhe 49 W.M. tọn, sọha hagbẹ anademẹtọ ehe tọn ko jideji bo bẹ mẹdevo lẹ hẹn gbọnvona apọsteli Jesu tọn lẹ. To whenue whẹho adàgbigbo tọn fọ́n, pipli hagbẹ anademẹtọ lọ tọn bẹ ‘apọsteli po mẹho he to Jelusalẹm lẹ po’ hẹn. (Owalọ 15:1, 2) Yewlẹ wẹ tindo azọngban lọ nado nọ dọhodo whẹho he gando Klistiani lẹ go to filẹpo ji. Yé nọ do wekanhlanmẹ po anademẹ lẹ po hlan agun lẹ, ehe nọ hẹn agun lẹ lodo bo nọ gọalọna devi lẹ nado hẹn pọninọ go to linlẹn po walọ po mẹ. Agun lẹ nọ litaina hagbẹ anademẹtọ lọ bo nọ setonuna anademẹ yetọn, podọ enẹ nọ zọ́n bọ yé nọ mọ dona Jehovah tọn bo nọ tindo kọdetọn dagbe.—Owalọ 8:1, 14, 15; 15:22-31; 16:4, 5; Heb. 13:17.

² To okú apọsteli lẹ tọn godo, atẹṣiṣi daho lọ fọ́n. (2 Tẹs. 2:3-12) Dile dọdai Jesu tọn dohia do to oló likun po ogbé ylankan lẹ po tọn mẹ, mẹde wá do ogbé ylankan lẹ (Klistiani lalo lẹ) do likun lọ lẹ (Klistiani yiamisisadode lẹ) ṣẹnṣẹn. Pipli awe lọ lẹ yin jijodo nado whẹ́n dopọ na owhe kanweko susu lẹ kakajẹ jibẹwawhé lọ whenu, yèdọ “vivọnu titonu lọ tọn.” (Mat. 13:24-30, 36-43) Klistiani yiamisisadode dopodopo zindonukọn nado to nukundagbe Jesu tọn tindo to ojlẹ ehe gblamẹ, ṣigba hagbẹ anademẹtọ de ma tin, asisa he họnwun de ma tin to aigba ji he gblamẹ Jesu to anadena hodotọ etọn lẹ gbọn to whenẹnu. (Mat. 28:20) Amọ́, e dopagbe dọ diọdo de na wá aimẹ to jibẹwawhé lọ whenu.

³ “Na nugbo tọn, mẹnu wẹ afanumẹ nugbonọ podọ nuyọnẹntọ lọ?” Kanbiọ enẹ wẹ Jesu Klisti yí do bẹ oló, kavi apajlẹ de jẹeji, taidi apadewhe “ohia” he e na gando “vivọnu titonu lọ tọn” go tọn. (Mat. 24:3, 42-47) Jesu dohia dọ afanumẹ nugbonọ ehe na hẹn alọnu ján to núdùdù gbigbọmẹ tọn nina omẹ Jiwheyẹwhe tọn lẹ mẹ “to ojlẹ sisọ mẹ.” Kẹdẹdile Jesu yí pipli sunnu lẹ tọn de—kakati nido yin mẹdopo de—zan nado deanana nulẹ to owhe kanweko tintan whenu do, mọ wẹ afanumẹ nugbonọ lọ he Jesu to yiyizan to vivọnu titonu lọ tọn ma yin sunnu dopo de do niyẹn.

⁴ Mẹnu wẹ Jesu de nado na núdùdù hodotọ etọn lẹ? Ayihaawe ma tin dọ Klistiani yiamisisadode he to aigba ji lẹ wẹ e na yizan. Biblu ylọ yé dọ “yẹwhenọ he to sinsẹ̀n di ahọlu lẹ,” he ko yin azọ́ndena nado “‘lá gigo daho’ Mẹlọ he ylọ [yé] sọn zinvlu mẹ wá hinhọ́n jiawu etọn mẹ tọn lẹ.” (1 Pita 2:9; Mal. 2:7; Osọ. 12:17) Be mẹyiamisisadode he to aigba ji lẹpo wẹ afanumẹ nugbonọ lọ bẹhẹn ya? Paali. To whenue Jesu gbọn azọ́njiawu dali na núdùdù agbasa tọn gbẹtọgun de he bẹ sunnu 5 000 hẹn, mahia yọnnu po yọpọvu lẹ po, devi etọn lẹ wẹ e ze núdùdù lọ na bọ yewlẹ wá má ẹn na gbẹtọgun lọ. (Mat. 14:19) E na núdùdù mẹsusu gbọn alọ omẹ vude tọn mẹ. Aliho dopolọ mẹ wẹ e to awuwlena núdùdù gbigbọmẹ tọn te to egbehe.

⁵ Enẹwutu, “họ̀nkọnsi nugbonọ, nuyọnẹntọ lọ,” bẹ pipli mẹmẹsunnu yiamisisadode lẹ tọn kleun de hẹn, he nọ tindo mahẹ tlọlọ to awuwiwlena núdùdù gbigbọmẹ tọn lọ po mimá ẹn na mẹlẹ po mẹ to ojlẹ tintin tofi Klisti tọn whenu. (Luku 12:42) To azán godo tọn ehelẹ gblamẹ, mẹmẹsunnu yiamisisadode he “afanumẹ nugbonọ podọ nuyọnẹntọ lọ” bẹhẹn lẹ nọ sẹ̀n to tatọ́-tẹnnọ mítọn. To egbehe, mẹmẹsunnu yiamisisadode ehelẹ wẹ yin Hagbẹ Anademẹtọ Kunnudetọ Jehovah tọn lẹ tọn.

⁶ Pipli ehe wẹ Klisti to yiyizan nado zín nudọnamẹ lẹ jẹgbonu gando hẹndi dọdai Biblu tọn lẹ tọn go podọ nado na anademẹ he wá do gànmẹ lẹ gando lehe mí sọgan yí nunọwhinnusẹ́n Biblu tọn lẹ do yizan mẹ to gbẹzan mítọn mẹ do go. Núdùdù gbigbọmẹ tọn ehe nọ yin nina mí gbọn agun Kunnudetọ Jehovah tọn lẹ tọn dopodopo gblamẹ. (Isa. 43:10; Gal. 6:16) To ojlẹ Biblu tọn lẹ mẹ, afanumẹ kavi họ̀nkọnsi dejidego de wẹ nọ penukundo whédo de go. Mọdopolọ, afanumẹ nugbonọ podọ nuyọnẹntọ lọ ko yin azọ́ndena nado nọ penukundo whédo yise tọn go. Enẹwutu, afanumẹ nugbonọ lọ sọ nọ penukundo nutindo agbasa tọn lẹ go, gọna azọ́n yẹwhehodidọ tọn, tito-to-whinnu plidopọ lẹ tọn, nugopọntọ lẹ dide nado wadevizọn to otẹn voovo lẹ mẹ to titobasinanu lọ mẹ po owe sinai do Biblu ji lẹ zinzinjẹgbonu po go, nado hẹn ale wá na “devizọnwatọ whégbè tọn” lẹ.—Mat. 24:45.

⁷ Todin, mẹnu wẹ yin “devizọnwatọ whégbè tọn” lẹ? Do glido, mẹhe yè to núdùdù na lọ lẹ wẹ. To dai, devizọnwatọ whégbè tọn lọ lẹpo wẹ yin mẹyiamisisadode lẹ. To godo mẹ, ehe wá bẹ gbẹtọ susugege “lẹngbọ devo lẹ” tọn hẹn. (Joh. 10:16) Pipli awe lọ lẹ wẹ nọ dù núdùdù he afanumẹ nugbonọ lọ nọ wleawuna.

⁸ To whenue Jesu na wá hẹn whẹdida ṣẹ do titonu ylankan ehe ji to nukunbibia daho lọ whenu, e na de afanumẹ nugbonọ lọ “do nutindo etọn lẹpo ji.” (Mat. 24:46, 47) Mẹhe afanumẹ nugbonọ lọ bẹhẹn lẹ na mọ ale olọn mẹ tọn yetọn yí. Yemẹpo to pọmẹ gọna pipotọ 144 000 lẹ tọn na má aṣẹpipa Klisti tọn hẹ ẹ to olọn mẹ. Dile etlẹ yindọ afanumẹ nugbonọ podọ nuyọnẹntọ de ma na pò to aigba ji, Jehovah po Jesu po na nọ gbọn mẹhe yin dide di “ahọvi lẹ” gblamẹ na anademẹ lẹ mẹhe tin to Ahọluduta Mẹsia tọn glọ to aigba ji lẹ.—Salm. 45:16.

⁹ Whẹwhinwhẹ́n susu wẹ tin he wutu mí dona “nọ flin mẹhe to anadenanu” lẹ bo dona nọ dejido yé go. Naegbọn mọwiwà do yin na dagbe mítọn? Apọsteli Paulu dọmọ: “Yewlẹ wẹ to mì họ́ bo yọnẹn dọ yé na dogbè, na yé nido sọgan yí ayajẹ do wà ehe bọ e ma yin po azọ̀nwinwẹn po, na ehe na yin awugblenu na mì.” (Heb. 13:17) Dandannu wẹ e yin na mí nado nọ litaina mẹhe to anadenanu lẹ bo nọ setonuna yé, na yewlẹ wẹ to mí họ́, na mí nido tin to hihọ́ po dagbemẹninọ po mẹ to gbigbọ-liho.

¹⁰ Dile e yin kinkandai to 1 Kọlintinu lẹ 16:14 mẹ do, Paulu dọmọ: “Mì gbọ nuhe mì to wiwà lẹpo ni nọ yin to owanyi mẹ.” Nudide he nọ yin bibasi do omẹ Jiwheyẹwhe tọn lẹ tamẹ lẹ nọ sinai do owanyi ji, yèdọ jẹhẹnu he yiaga hugan lọ. 1 Kọlintinu lẹ 13:4-8 dọ gando owanyi go dọmọ: “Owanyi nọ fahomẹ bo nọ yin homẹdagbenọ. Owanyi ma nọ whànwu. E ma nọ ze ede daga, ma nọ kla, ma nọ wanu jẹagọ, ma nọ dín ale edetiti tọn lẹ, ma nọ gblehomẹ aplà. E ma nọ basi kandai nuṣiwa tọn. E ma nọ jaya to mawadodo mẹ, ṣigba nọ jaya to nugbo mẹ. E nọ ṣinyọnnudo nulẹpo, nọ yí nulẹpo sè, nọ do todido to nulẹpo mẹ, nọ doakọnna nulẹpo. Owanyi ma nọ gboawupo gbede.” Na owanyi wẹ nọ deanana nudide he nọ yin bibasi do devizọnwatọ Jehovah tọn lẹ tamẹ lẹpo wutu, mí tindo whẹwhinwhẹ́n lẹpo nado tindo numọtolanmẹ hihọ́ tọn to anademẹ mọnkọtọn glọ. Humọ, ehe yin apajlẹ owanyi Jehovah tọn.

¹¹ Nugbo wẹ dọ taidi to owhe kanweko tintan whenu, mẹhe Jehovah to yiyizan nado deanana omẹ etọn lẹ ma yin sunnu pipé lẹ gba. Ṣigba, gbẹtọvi mapenọ lẹ janwẹ Jehovah yizan wayi nado hẹn ojlo etọn di. E yí Noa zan nado basi aki de bo dọyẹwheho vasudo he na wá to azán etọn gbè tọn. (Jen. 6:13, 14, 22; 2 Pita 2:5) Mose yin dide nado deanana omẹ Jehovah tọn lẹ tọ́n sọn Egipti. (Eks. 3:10) Gbẹtọvi mapenọ lẹ wẹ sọ yin gbigbọdo nado kàn Biblu. (2 Tim. 3:16; 2 Pita 1:21) Jidide mítọn to titobasinanu Jiwheyẹwhe tọn mẹ ma nọ depò, na Jehovah nọ yí gbẹtọ mapenọ lẹ zan to egbehe nado deanana azọ́n yẹwhehodidọ po mẹhẹnzun devi tọn lọ po wutu gba. Kakatimọ, ehe nọ hẹn mí lodo, na mí yọnẹn dọ titobasinanu lọ ma sọgan ko basi wadotana ehe lẹpo gba, eyin Jehovah ma to godona ẹn. Gbọn tuklajijẹ po numimọ susu po gblamẹ, afanumẹ nugbonọ lọ ko dohia dọ gbigbọ Jiwheyẹwhe tọn wẹ to anadena nulẹ. Dona susugege lẹ ko yin kinkọndo adà yinukundomọ titobasinanu Jehovah tọn ji to egbehe. Enẹwutu, mí nọ yí ahun lẹpo do nọgodona ẹn bo nọ dejido e go.

¹² Mẹhe yin dide do otẹn azọngban tọn mẹ to agun mẹ lẹ nọ do jide yetọn hia gbọn ayajẹ yíyí do kẹalọyi azọngban yetọn lẹ bo hẹn yé di po nugbonọ-yinyin po dali. (Owalọ 20:28) Taidi lilátọ Ahọluduta lọ tọn lẹ, mí nọ yí zohunhun do tindo mahẹ to azọ́n whédegbè jẹ whédegbè tọn, gọyìpọn lẹ po plọnmẹ Biblu lẹ bibasi po mẹ. (Mat. 24:14; 28:19, 20) Nado mọaleyi to gigọ́ mẹ sọn núdùdù gbigbọmẹ tọn he afanumẹ nugbonọ lọ nọ wleawuna mẹ, mí nọ wleawuna opli Klistiani tọn lẹ po plidopọ lẹ po bo nọ yì yé to gbesisọ mẹ. Mí nọ na tuli ode awetọ taun to whenue mí kọnawudopọ hẹ mẹmẹsunnu mítọn lẹ to pipli Klistiani tọn ehelẹ tẹnmẹ.—Heb. 10:24, 25.

¹³ Mí nọ dohia dọ mí dejido titobasinanu lọ go, eyin mí yí nutindo agbasa tọn mítọn lẹ do basi nunina nado nọgodona ẹn. (Howh. 3:9, 10) Eyin mí sọ mọdọ mẹmẹsunnu mítọn lẹ tin to nuhudo mẹ to agbasa-liho, mí nọ yawu gọalọna yé. (Gal. 6:10; 1 Tim. 6:18) Owanyi mẹmẹsunnu tọn wẹ nọ whàn mí nado wà ehe, bọ mí nọ dín dotẹnmẹ hundote lẹ nado dohia Jehovah po titobasinanu etọn po dọ mí yọ́n pinpẹn dagbewà he yin didohia mí tọn.—Joh. 13:35.

¹⁴ Mí sọ nọ dohia dọ mí dejido titobasinanu lọ go gbọn godoninọna nudide etọn lẹ dali. Ehe bẹ whiwhẹ yíyí do hodo anademẹ mẹhe tin to otẹn azọngban tọn mẹ lẹ tọn hẹn, taidi nugopọntọ lẹdo tọn lẹ po mẹho agun tọn lẹ po. Mẹmẹsunnu ehelẹ tin to “mẹhe to anadenanu” lẹ ṣẹnṣẹn, mẹhe mí dona nọ setonuna bo nọ litaina. (Heb. 13:7, 17) Eyin mí ma tlẹ mọdona whẹwhinwhẹ́n he wutu nudide delẹ yin bibasi, mí nọ kudeji dọ tonusisena yé na dekọtọn do dagbe mẹ na mí. Jehovah nasọ gbọnmọ dali dona mí na tonusise mítọn na Ohó etọn po titobasinanu etọn po. Enẹ na dohia dọ mí yin mẹmẹglọ na Ogán lọ, yèdọ Jesu Klisti.

¹⁵ Mọwẹ, mí tindo whẹwhinwhẹ́n lẹpo nado dejido afanumẹ nugbonọ podọ nuyọnẹntọ lọ go. Satani, yẹwhe titonu ehe tọn to nuhe go e pé lẹpo wà nado hẹn vlẹko wá oyín Jehovah tọn po titobasinanu etọn po ji. (2 Kọl. 4:4) Mì dike bo jai jẹ omọ̀ ayiha gigẹdẹ tọn Satani tọn lẹ mẹ blo! (2 Kọl. 2:11) E yọnẹn dọ “whenu gli de” poun wẹ emi tindo whẹpo emi nido yin zizedlan odò mapote mẹ, podọ e ko jẹma nado lẹ́ susu to omẹ Jehovah tọn lẹ mẹ sọn Jiwheyẹwhe dè dile e sọgan yọnbasi do. (Osọ. 12:12) Ṣigba, dile Satani na to nuhe go e pé lẹpo wà, mì gbọ míwlẹ ni to dindọnsẹpọ Jehovah dogọ. Mì gbọ mí ni dejido Jehovah go podọ do asisa he gblamẹ ewọ to anadena omẹ etọn lẹ gbọn to egbehe lọ go. Mọwiwà na dekọtọn do pọninọ mẹmẹsunnu lẹ tọn mẹ.