Adán Gbò Yé Omẹ Awe Lẹ

NAOMI pehẹ adángbòmẹ lẹ debọdo-dego. Whenue huvẹ de tọ́n to Islaeli, asu etọn basi dide nado sẹtẹn na whẹndo lọ sọn otò yetọn mẹ to Bẹtlẹhẹm yì aigba Moabi tọn ji. Amọ́ to gbèdopo, asu Naomi tọn kú, bo jo ewọ po visunnu yetọn awe lẹ po do ṣokẹdẹ to jonọ-gbéji. To nukọn mẹ, visunnu lọ lẹ dà yọnnu Moabinu lẹ he ma nọ sẹ̀n Jehovah. To nudi owhe ao godo, adán devo sọ gbò e: Visunnu etọn awe lẹ sọ kú! Depope yetọn ma ka jivi pọ́n. Enẹwutu todin, e ma yin asu Naomi tọn kẹdẹ wẹ kudo e, amọ́ visunnu etọn awe lẹ ga, podọ e masọ do todido nado do ovivi lẹ ba.

Na e mọdọ nude masọ pò na emi ba wutu, e de nado lẹkọyi otò etọn mẹ to Bẹtlẹhẹm, yèdọ gbejizọnlin nudi osẹ dopo tọn de. Luti po Ọlpa po, yèdọ ovisi Naomi tọn lẹ hodo nawe yọnhonọ lọ dedo whé. Amọ́ linlẹn lọ dọ yé ni jo owhé po hẹnnumẹ yetọn lẹ po do ma jẹeji na Naomi, na vlavo ehe gán glọnalina yé nado vọ́ alọwle bo ji ovi yetọn titi lẹ. Naomi do mẹtọnhopọn hia bo na tuli Luti po Ọlpa po nado lẹkọyi whé, yèdọ yì onọ̀ yetọn lẹ dè. Naomi adọgbotọ lọ wleawufo nado zingbejizọnlin lọ edeṣo. Ọlpa viavi, amọ́ e lẹkọ. Luti lọsu viavi ga, amọ́ e ma jo Naomi do.

Luti dọna Naomi dọmọ: “A vẹ̀ mi nado jo we do . . . blo; na fihe hiẹ yì wẹ yẹn na yì, podọ fihe a dọ́ wẹ yẹnlọsu na dọ́. Omẹ towe lẹ wẹ na lẹzun omẹ ṣie lẹ, podọ Jiwheyẹwhe towe wẹ na lẹzun Jiwheyẹwhe ṣie. Fihe a kú do wẹ yẹn na kú do, podọ finẹ wẹ n’na yin dìdì do.” Yọnnu jọja nugbonọ podọ adọgbotọ ehe yí Jiwheyẹwhe Naomi tọn Jehovah do basi Jiwheyẹwhe etọn titi.

Enẹwutu, Luti hodo Naomi yì Islaeli bo jo whẹndo etọn, aṣa etọn gọna yẹwhe Moabinu lẹ tọn lẹ do. To whenue yé omẹ awe lẹ jẹ Bẹtlẹhẹm, e paṣa yọnnu delẹ taun nado mọ obá he mẹ ninọmẹ Naomi tọn ko diọ jẹ to owhe lẹ gblamẹ. E yí avigbè do gblọn dọ Jehovah ko yí nutindo emitọn lẹpo sọn emi si bo ko jo emi do to awufiẹsa mẹ podọ asigbá-alọgbá. Hogbe Naomi tọn lẹ gán ko gbleawuna Luti, yèdọ mẹhe ko yí nususu do sanvọ́ nado gọalọna asu-nọ̀ etọn, amọ́ kunnudenu depope ma dohia dọ Luti gblehomẹ. Kakatimọ, Luti yin dotẹnmẹ na nado yì ṣinyan jinukun lẹ to ogle he sẹpọ yé lẹ mẹ nado sọgan penukundo ede po Naomi po go.

Boazi he yin visunnu Lahabi tọn yin adọkunnọ bosọ do aigba susu lẹ, e doayi e go dọ Luti to azọ́n sinsinyẹn wà to ogle lọ lẹ mẹ. Dawe dodonọ ehe kanhose mẹlẹ gando Luti go. E sè dọ Luti nọ wazọ́n sinsinyẹn nado penukundo Naomi go. E pà Luti na e de nado wá dín fibẹtado po hihọ́ po to awà Jehovah Jiwheyẹwhe tọn glọ. E tlẹ sọ hẹn ẹn diun dọ sunnu pakanọ lọ lẹ ma dotukla ẹ.

To gbenẹgbe zánmẹ, whenue Naomi sèhó gando homẹdagbe he Boazi dohia go, homẹ etọn hùn taun. Be Boazi jlo na dà Luti wẹ ya? Hẹnnumẹ yetọn de wẹ, podọ Osẹ́n Jiwheyẹwhe tọn wleawu tito vonọtaun de tọn na asuṣiọsi jọja lẹ taidi Luti. Whenue yọnnu de lẹzun asuṣiọsi, e do jlọjẹ nado dá hẹnnumẹ sẹpọmẹ asu etọn he ko kú lọ tọn de. Gbọnmọ dali, e gán gbẹ́ ji visunnu de he na hẹn yinkọ asu etọn tọn dote, podọ hukan whẹndo tọn lọ ma na busẹ bọ ogú lọ na gbọṣi whẹndo lọ mẹ. (Deut. 25:5, 6) Naomi basi zẹẹmẹ nuhe Luti dona wà lẹ tọn na ẹn.

Luti yigbe nado wà dile Naomi dọ do, dile etlẹ yindọ aṣa lọ gán ko paṣa ẹ bosọ gbàhundona ẹn. Enẹwutu, e yì likun flétẹn lọ to ozán enẹ mẹ, yèdọ fie sunnu lẹ nọ saba dọ́ to jinukun he yé ko yà bo bẹpli lẹ pá. E wà dẹẹdẹ bo dọnsẹpọ afọ Boazi tọn lẹ, hùn avọ̀ sọn yé ji, bosọ mlọn finẹ. Whenue Boazi fọ́n, Luti yí whiwhẹ do flinnu in gando osẹ́n Jiwheyẹwhe tọn go bo kanse e eyin ewọ na jlo nado sọ́n emi. Dawe homẹdagbenọ ehe gán ko doayi ayimajai Luti tọn go. Na adọgbigbo etọn gọna owanyi nugbo he e do na Jehovah po whẹndo etọn po yinuwado Boazi ji sisosiso wutu, e yigbe nado pọ́n eyin nuhe Luti biọ lọ gán yọnbasi na emi.

To wunkẹngbe, Boazi yì mẹho Bẹtlẹhẹm tọn lẹ dè bo basi tito lẹpo dile e jẹ do. E dà Luti. To nukọn mẹ, e ji visunnu de. Naomi yiwanna ovivi etọn Obẹdi taun. Kúnkan etọn mẹ wẹ Ahọlu Davidi wá sọn, podọ Mẹsia lọ ga to owhe kanweko susu lẹ godo! (Mat. 1:5, 6, 16) Jehovah dona adọgbigbo Naomi po Luti po tọn susugege!

Hia nujijọ lọ to Biblu mẹ:

• Luti 1:1–4:22

Na hodọdopọ:

Aliho tẹlẹ mẹ wẹ Naomi po Luti po do adọgbigbo hia te?

1. 2. Naegbọn mí gán dọ dọ Luti ma dọnsẹpọ Boazi po linlẹn mawé lẹ po? (ia 47 huk. 17-18)

   Gblọndo towe

2. 3. Naegbọn e do jẹna ayidego dọ Boazi dlẹnalọdo Luti taidi “viyọnnu”? (Luti 2:8; w16.11 3)

   Gblọndo towe

3. 4. To vogbingbọn mẹ na dawe lọ he yin yiylọdọ Omẹ-le, nawẹ Boazi do mẹtọnhopọn hia gbọn whenue e yigbe nado dà Luti? (w23.03 14) B

   Gblọndo towe

   

Yí Nuplọnmẹ lọ lẹ Do Yizan Mẹ

• Nawẹ apajlẹ Luti tọn na nuhe dù azọ́n sinsinyẹn wiwà po pinpẹn-nutọn-yinyọnẹn po gán gọalọna mí whenue mí to jujugbọn nuhahun akuẹzinzan tọn lẹ mẹ gbọn? C

  Gblọndo towe

  

• Whenue Naomi jẹflumẹ sinsinyẹn, Luti gọalọna ẹn nado doakọnnanu. Etẹwẹ mí plọn sọn Naomi dè na nuhe dù whiwhẹ yíyí do kẹalọyi alọgọ mẹdevo lẹ tọn? Etẹwẹ mí plọn sọn Luti dè gando tulinina mẹdevo lẹ go?

  Gblọndo towe

• Aliho devo tẹlẹ mẹ wẹ a gán hodo apajlẹ adọgbigbo Naomi po Luti po tọn te?

  Gblọndo towe

Lẹnnupọn Yinukọn

• Etẹwẹ kandai ehe plọn mi gando Jehovah go?

  Gblọndo towe

• Kanṣiṣa tẹwẹ tin to kandai ehe po lẹndai Jehovah tọn lẹ po ṣẹnṣẹn?

  Gblọndo towe

• Kanbiọ tẹlẹ wẹ e na jlo mi nado kanse Naomi po Luti po to fọnsọnku whenu?

  Gblọndo towe

Plọnnu Dogọ

Etẹlẹ wẹ mí gán plọn sọn owe Luti tọn mẹ gando owanyi nugbo go, podọ nawẹ mí gán yí nuplọnmẹ enẹlẹ do yizan mẹ gbọn?

“Mì Nọ to Owanyi Nugbo Dohia Ode Awetọ Zọnmii” (w21.11 8-13)

Yí otàn Biblu tọn he yẹdide zọnpọ hẹ ehe zan do gọalọna ovi lẹ nado yí nukun homẹ do pọ́n kandai ehe.

“Luti Yin Họntọn Nugbonọ De” (ijwis hosọ 12tọ)