30 ASUṢIỌSI ZALEFATI TỌN
E Do Adọgbigbo Hia to Ojlẹ Ayimajai Tọn lẹ Mẹ
E GÁN ko taidi na ẹn dọ mẹdepope ma yọnẹn. Amọ́ be mẹde ka doayi awufiẹsa etọn lẹ go ya? Be mẹde ka to etọn hòpọn nugbonugbo ya? Asuṣiọsi de wẹ e yin, bosọ tindo ovi. Osẹ́n homẹdagbe tọn he Jiwheyẹwhe zedai to Islaeli nado basi hihọ́na asuṣiọsi po tọṣiọvi lẹ po na ko nọ vọ́ jide na yé. Amọ́ uwọ ma yin Islaelivi. Zalefati wẹ e nọ nọ̀, yèdọ tòdaho de to lẹdo Sidoni tọn mẹ. Ahọlu Sidoni tọn he nọ yin Etibaali na ko yin yẹwhenọ yẹwhe-yọnnu Aṣitolẹti tọn de. Sinsẹ̀n-bibasi Aṣitolẹti tọn nọ ze walọ gblezọn wunmẹ lẹpo daga. To otò de he mẹ kanyinylan gbayipe, bọ gbẹtọ lẹ to tukla susu jẹ nado lùn akúdido lọ tọ́n bosọ mọ núdùdù te, todido tẹwẹ asuṣiọsi de do dọ lẹblanu na yin didohia emi?
E ṣinyan núdùdù kleunkleun he e sọgan mọ lẹ pli, na ewọ po visunnu etọn po nido mọ nuhe yé na dù nado nọgbẹ̀. Ṣogan, nulẹ fọ́n bo to yinylan dogọ, podọ todin e taidi dọ okú wẹ to tepọn yé.
Etomọṣo, yọnnu asuṣiọsi ehe do nude he jẹna ayidego. To nukọn mẹ to nudi owhe 1000 godo, Jesu Klisti dohia dọ dọ to nukun Jehovah tọn mẹ, nawe ehe gbọnvona Islaelivi he ma tindo yise lẹ. To aliho de mẹ, e taidi dọ e plọnnu gando Jehovah go, yèdọ Jiwheyẹwhe Islaeli tọn. Vlavo aliho he mẹ ewọ nọ yinuwa hẹ omẹ etọn lẹ te wẹ na ko whàn nawe lọ. E tindo yise to ewọ mẹ. Amọ́, etẹwẹ Jehovah na wà na nawe ehe, he to jonọ gbéji podọ to akọta kosi tọn de mẹ? E do nunina ayidego tọn de hlan ẹn.
Jehovah deanana yẹwhegán etọn Elija nado zingbejizọnlin pànta tòtaligbé Islaeli tọn, nado mọ asuṣiọsi ehe bosọ nọpọ́ hẹ ẹ to ojlẹ akúdido tọn de mẹ. Whenue yẹwhegán lọ jẹ Zalefati, e mọ nawe de he to nake ṣinyan nado flọ miyọ́n. E dọhona ẹn po homẹdagbe po, bosọ biọ ẹ onú kleun de dọmọ: “Jaale, hẹn osin vude wá na mi to kọfo de mẹ nado nù.” Amọ́, e ma ko mọ Elija pọ́n. Ṣogan, mí hia dọmọ: “Nawe lọ dedo osin lọ ba gbé.” Vlavo e gán ko yindọ kọnugbè etọn, hogbe homẹdagbe tọn etọn lẹ, kavi awugbó yẹwhegán tọn kleun he e do wẹ na ko dohia ẹ dọ devizọnwatọ Jehovah tọn de wẹ e yin. Be yọnnu ehe wẹ Jehovah do e hlan nado yì pọ́n ya? Elija sọ biọ nudevo—yèdọ akla pẹvi de.
Todin, asuṣiọsi lọ dọ nuhe to ahun ji na ẹn lẹ. E dọmọ: “Dile Jehovah Jiwheyẹwhe towe togbẹ̀,” bo gbọnmọ dali dohia dọ emi yise dọ Jiwheyẹwhe nugbo lọ wẹ, “Jiwheyẹwhe ogbẹ̀nọ lọ.” (Jel. 10:10) Enẹgodo, e dọna Elija dọ emi ma do akla depope; adavo linfin alọgogo dopo to ozẹ́n daho lọ mẹ gọna amì vude to ozẹ́n pẹvi lọ mẹ. Ewọ jlo na flọ miyọ́n nado dà núdùdù godo tọn de na ewọ po visunnu etọn po. E yidogọ poun dọ: “Eyin mí dù i fó janwẹ, be okú wẹ pò na mí.”
Onú kaka de ma pò to nawe lọ po visunnu etọn po si nado dù, ṣogan yẹwhegán Jehovah tọn biọ dọ e ni na emi núdùdù nùdo godo tọn he pò to e si
Nuhe Elija dọ bọdego lẹ dona ko paṣa ẹ taun. E dọmọ: “A dibu blo.” Nawẹ ewọ gán nọma dibu gbọn to whenuena e yindọ to linlẹn etọn mẹ huvẹ-kú wẹ to tepọn ewọ po visunnu etọn po? Ṣogan, e dotoai. Enẹgodo, Elija dọ nuhe Jehovah dopà nado wà de na ẹn. Eyin ewọ wleawuna akla pẹvi de na yẹwhegán lọ jẹnukọn, Jehovah na suahọ ẹ. E na hẹn ẹn diun dọ ozẹ́n linfin tọn po amì tọn lọ lẹ po ma na jẹvọ́ kakajẹ whenue akúdido lọ wá vivọnu!
Fie yise asuṣiọsi lọ tọn yin whiwhlepọn te die. Be e na jo núdùdù nùdo godo tọn he pò to e si lọ do nado na núdùdù yẹwhegán Jehovah tọn wẹ ya? Vlavo e yọnẹn dọ Jehovah ko wà azọ́njiawu lẹ do omẹ etọn lẹ tamẹ, ehe sọ gẹdẹ hugan núdùdù nina asuṣiọsi de po visunnu etọn po poun. Ṣogan, be e na tindo adọgbigbo nado setonu ya? Mí hia dọmọ: “Enẹwutu, nawe lọ yì bo wà kẹdẹdile Elija ko dọ do.”
Jehovah dona nawe lọ susugege. To azọ́njiawu-liho, ozẹ́n linfin tọn po amì po tọn asuṣiọsi lọ tọn ma jẹvọ́ kakajẹ whenue akúdido lọ wá vivọnu. Podọ Jehovah sọ wà nuhe tlẹ sọ jiawu humọ de na nawe lọ. Adán gbò nawe lọ bọ visunnu etọn bẹ azọ̀n bosọ kú to ajiji mẹ. Amọ́, Jehovah yí Elija zan nado gọ̀ visunnu lọ wá gbẹ̀! Fọnsọnku tintan he yin nùdego to Biblu mẹ niyẹn. Matin ayihaawe, azọ́njiawu enẹ na ko yidogọna adọgbigbo asuṣiọsi lọ tọn taun. Sọn ojlẹ lọ mẹ, gbẹtọ livi susu lẹ wẹ adọgbigbo po apajlẹ etọn po na ko hẹn lodo.
Hia nujijọ lọ to Biblu mẹ:
Na hodọdopọ:
Aliho tẹlẹ mẹ wẹ asuṣiọsi Zalefati tọn lọ do adọgbigbo hia te?
Dindonanu Dogọ
1. Basi zẹẹmẹ sinsẹ̀n Sidoni tọn, yèdọ tatọ́-tònọ Fenike tọn. Nawẹ sinsẹ̀n enẹ yinuwado Islaelivi lẹ ji gbọn? (it “Sidoni” huk. 6-wcgr) A
Penta Springs Limited/Alamy Stock Photo
Yẹdide A: Boṣiọ Zalefati tọn, he gán ko tin sọn nudi 1500 J.W.M.
2. Kanṣiṣa tẹwẹ tin to Etibaali po Ahọlu Ahabi Islaeli tọn po ṣẹnṣẹn? (it “Etibaali”-wcgr)
3. Fenikenu lẹ nọ sẹ̀n yẹwhe-yọnnu Aṣitolẹti (kavi Astalte). Aṣa he zọnpọ hẹ sinsẹ̀n-bibasi yetọn tẹlẹ wẹ gbẹ́ tin to egbehe? (g93 22/11 13 huk. 1-4-wcgr)
4. Whenue visunnu asuṣiọsi lọ tọn kú, naegbọn e kanse Elija dọ: “Nado hẹn mi flin whẹhuhu ṣie bo hù visunnu ṣie wutu wẹ hiẹ do wáfi ya?” (1 Ahọ. 17:18; w14 15/2 15 huk. 4-5) B
Yẹdide B
Yí Nuplọnmẹ lọ lẹ Do Yizan Mẹ
Jehovah doayi yọnnu asuṣiọsi lọ go, mahopọnna dọ tòdaho de he mẹ mẹlẹ nọ sẹ̀n Baali te wẹ e nọ nọ̀. Etẹwẹ enẹ plọn we gando Jehovah gọna aliho he mẹ mí dona nọ pọ́n mẹhe nọ nọ̀ aigba-denamẹ mítọn ji lẹ hlan te go? (Owalọ 10:35)
Etẹwẹ Klistiani he tindo nuhahun akuẹ tọn lẹ gán plọn sọn yise po adọgbigbo yọnnu Zalefati tọn po mẹ? C
Yẹdide C
Aliho tẹlẹ mẹ wẹ a gán hodo apajlẹ adọgbigbo Asuṣiọsi Zalefati tọn lọ tọn te?
Lẹnnupọn Yinukọn
Etẹwẹ kandai ehe plọn mi gando Jehovah go?
Kanṣiṣa tẹwẹ tin to kandai ehe po lẹndai Jehovah tọn lẹ po ṣẹnṣẹn?
Kanbiọ tẹlẹ wẹ e na jlo mi nado kanse Asuṣiọsi Zalefati tọn to fọnsọnku whenu?
Plọnnu Dogọ
Taidi asuṣiọsi Zalefati tọn, nawẹ mí gán dohia dọ haṣinṣan mítọn hẹ Jehovah họakuẹ na mí hú nutindo agbasa tọn lẹ gbọn?
“Nukundagbe Jiwheyẹwhe Tọn Mimọyi Nọ Planmẹ Yì Ogbẹ̀ Madopodo Mẹ” (w11 15/2 13-17)
Etẹwẹ hẹn we kudeji dọ Jehovah nọ doayi nudepope he mí wà nado do yise hia to ewọ mẹ lẹ go?
“Be Jehovah Nọ Doayi Nuhe Hiẹ to Wiwà lẹ Go Ya?” (w03 1/5 28-31)