Yé Wà Ojlo Jehovah Tọn

Tenọgligo-Hinhẹn Job Tọn Yin Ahọsuna

JOB yin sunnu awuvẹmẹtọ de, yèdọ avunhona asuṣiọsi lẹ, tọṣiọvi lẹ, po mẹhe yin yasana lẹ po tọ́ de. (Job 29:12-17; 31:16-21) Enẹgodo, to ajiji mẹ, e jai jẹ nugbajẹmẹji sinsinyẹn mẹ, hẹn adọkun etọn lẹ, ovi etọn lẹ, po agbasalilo etọn po bú. Po awubla po, dawe nukundeji ehe lọ he ko yin odòtin godonọnamẹ tọn de na mẹhe yin kọgbidina lẹ mọ alọgọ vude yí to ojlẹ nuhudo tọn etọn mẹ. Yèdọ asi etọn lọsu titi dọna ẹn nado “gbẹ́ Jiwheyẹwhe dai, bo kú.” Podọ “họntọn” etọn lẹ Elifazi, Bildadi, po Zofali po ma wleawuna homẹmimiọn depope gba. Kakatimọ, yé to nùzindeji dọ Job ko wà ylando podọ enẹwutu jẹ na awufiẹsa etọn.—Job 2:9; 4:7, 8; 8:5, 6; 11:13-15.

Mahopọnna yajiji susu, Job gbọṣi nugbonọ-yinyin mẹ. Na ehe tọn wutu, Jehovah to godo mẹ dlẹnkan lẹblanu tọn hlan Job bosọ dona ẹn. Kandai lehe e wàmọ gbọn tọn wleawuna jidide to devizọnwatọ tenọgligo-hẹntọ Jiwheyẹwhe tọn lẹpo mẹ dọ yé lọsu lẹ na yin ahọsuna to madẹnmẹ.

Whẹsuna po Hinhẹngọdo Tẹnmẹ Po

Jẹnukọn whẹ́, Jehovah gbẹnuna Elifazi, Bildadi, po Zofali po. To hodidọ hlan Elifazi, mẹhe kunnudenu dohia nado yin mẹho hugan lọ mẹ, e dọmọ: “Yè hẹn homẹgble ṣie jimiyọn do ojí we, podọ do họntọn towe awe lẹ ji: na mìwlẹ ma ko dọho onú heyin jijlọ ṣie tọn de gba, dile Job devi ṣie tindo do. Enẹwutu dinvie, mì yí hlan mìde oyìnsu ṣinawe po agbò ṣinawe po, bo yì devi ṣie Job dè bo na nunina avọ́ tọn na mìde avọ́ nunina mimẹ̀ de; devi ṣie Job na hodẹ̀ na mì.” (Job 42:7, 8) Lẹnnupọndo nuhe ehe zẹẹmẹdo ji!

Jehovah biọ avọ́sinsan he sù de sọn Elifazi, Bildadi, po Zofali po si, vlavo nado do sinsinyẹn-yinyin ylando yetọn tọn hia yé. Na nugbo tọn, vlavo to yinyọnẹn mẹ kavi to mayọnẹn mẹ, yé ko zannu do Jiwheyẹwhe go gbọn didọ dali dọ ewọ ‘ma tindo yise to devi etọn lẹ mẹ gba’ podọ e ma tlẹ yin nujọnu depope hlan ewọ vlavo Job yin nugbonọ kavi lala. Elifazi tlẹ dọ dọ Job ma họakuẹ hugan odọ́ de to nukun Jiwheyẹwhe tọn lẹ mẹ gba! (Job 4:18, 19; 22:2, 3) Abajọ Jehovah do dọmọ: “Na mìwlẹ ma ko dọho onú he yin jijlọ ṣie tọn de gba”!

Ṣigba e mayin popolẹpo niyẹn gba. Elifazi, Bildadi, po Zofali po sọ wà ylando sọta Job tlọlọ gbọn didọ hlan ẹn dali dọ ewọ lọsu wẹ hẹn nuhahun lẹ wá ede ji. Whẹsadokọnamẹ he ma tindo dodonu lẹ po mẹtọnmahopọn mlẹnmlẹn yetọn po hẹn Job yin adìnọ bosọ jẹflumẹ, bo hẹn ẹn nado dawhá jẹgbonu dọmọ: “Dẹn sọ na wẹ mìwlẹ na do to homẹgblena alindọn ṣie? Bosọ yí ohó lẹ do gbà mi hanyanhanyan?” (Job 10:1; 19:2) Lẹnnupọndo awusọhia nukunmẹ winyan tọn dawe atọ̀n ehelẹ tọn ji dile yewlẹ todin dona basi avọ́sinsan de hlan Job na ylando yetọn lẹ tọn wutu!

Ṣigba Job ma jaglin do winyandomẹ yetọn ji gba. Na nugbo tọn, Jehovah biọ dọ ewọ ni hodẹ̀ do ota whẹsadokọnamẹtọ etọn lẹ tọn mẹ. Job wà kẹdẹdile ewọ yin gbedena do, podọ ewọ yin didona na ehe tọn wutu. Tintan whẹ́, Jehovah hẹn azọ̀n budonamẹ tọn etọn gbọ̀. Enẹgodo, mẹmẹsunnu, nọviyọnnu, po gbẹdohẹmẹtọ dai tọn Job tọn lẹ po wá nado miọnhomẹna ẹn, “omẹ dopodopo ga na sinsán akuẹ tọn de e, podọ omẹ dopodopo alọkẹ́ sika tọn de.”a Humọ, Job “sọ tindo lẹngbọ fọtọ́n wiẹnẹ, po kanklosọpoawenọ fọtọ́n ṣidopo po, po oglepọnu oyìn tọn fọtọ́n dopo po, po kẹtẹkẹtẹ asi fọtọ́n dopo po.”b Podọ kunnudenu dohia dọ asi Job tọn gbọwhẹ hẹ ẹ. To madẹnmẹ, Job yin didona po visunnu ṣinawe po gọna viyọnnu atọ̀n, ewọ sọ nọgbẹ̀ nado mọ whẹndo ẹnẹ ovivi etọn lẹ tọn.—Job 42:10-17.

Nuplọnmẹ lẹ na Míwlẹ

Job ze apajlẹ vonọtaun de dai na devizọnwatọ egbezangbe Jiwheyẹwhe tọn lẹ. E yin “omẹ pipé de podọ jlọjlọ de,” yèdọ dawe de he mẹ Jehovah doawagun te nado ylọ dọ “devi ṣie.” (Job 1:8; 42:7, 8) Etomọṣo, ehe ma zẹẹmẹdo dọ Job yin mẹpipe gba. To ojlẹ de mẹ to whlepọn etọn lẹ whenu, e gbọn nuṣiwa dali lẹndọ Jiwheyẹwhe wẹ hẹn nugbajẹmẹji etọn lẹ wá. E tlẹ mọhodọ do aliho nuyiwa Jiwheyẹwhe tọn hẹ gbẹtọ go. (Job 27:2; 30:20, 21) Podọ e suwhẹna dodowiwa ede tọn kakati ni yin Jiwheyẹwhe tọn. (Job 32:2) Ṣigba Job gbẹ́ nado lẹ godo etọn do Mẹdatọ lọ, bosọ gbọn whiwhẹ dali kẹalọyi vọjlado sọn Jiwheyẹwhe dè. “Yẹn ko dọho na ẹn he yẹn ma tunwun,” wẹ e yigbe. “Yẹn ṣì dee, bosọ lẹnvọjọ to kọgudu po afín po mẹ.”—Job 42:3, 6.

To whenuena mí tin to whlepọn mẹ, mílọsu sọgan lẹnnupọn, dọho, kavi yinuwa to aliho he ma sọgbe de mẹ. (Yijlẹdo Yẹwhehodọtọ 7:7 go.) Etomọṣo, eyin owanyi mítọn na Jiwheyẹwhe siso, mí ma na ṣiatẹ sọta ewọ kavi gblehomẹ na ewọ jo dotẹnmẹdona mí nado tindo numimọ awusinyẹnnamẹnu lẹ tọn wutu gba. Kakatimọ, mí na hẹn tenọgli mítọn go bo gbọnmọ dali gbẹ̀n dona daho de to godo mẹ. Psalmkantọ lọ dọ dogbọn Jehovah dali dọmọ: “Hẹ dagbewanyinọ hiẹ na do dewe hia di dagbewanyinọ.”—Psalm 18:25.

Whẹpo Job do yin hinhẹn gọ̀ do ninọmẹ agbasalilo dagbe tọn de mẹ, Jehovah biọ dọ ewọ ni hodẹ̀ do ota mẹhe waylando sọta ẹ lẹ tọn mẹ. Apajlẹ dagbe nankọ die na míwlẹ! Jehovah biọ dọ mí ni jona mẹhe waylando do mí lẹ whẹpo ylando mítọn lọsu nido sọgan yin jijona. (Matiu 6:12; Efesunu lẹ 4:32) Eyin mí ma jlo nado jona mẹdevo lẹ to whenuena dodonu dagbe tin na mọwiwà, be mí sọgan gbọn jlọjẹ dali donukun dọ Jehovah ni yin lẹblanunọ hlan mí ya?—Matiu 18:21-35.

Mímẹpo nọ pannukọn whlepọn lẹ sọn ojlẹ de mẹ jẹ devo mẹ. (2 Timoti 3:12) Etomọṣo, taidi Job mí sọgan hẹn tenọgli go. Gbọn mọwiwà dali, mí na gbẹ̀n alemọyi daho tlala de. Jakobu wlan dọmọ: “Doayi e go, míwlẹ nọ hia yé he doakọnna lẹ di donanọ. Mì ko sè homẹfa [Job] tọn, bosọ mọ opodo Oklunọ tọn; dọ awuvẹmẹtọ wẹ Oklunọ, lẹblanu etọn sọ bọ.”—Jakobu 5:11.

[Nudọnamẹ odò tọn Lẹ]