Yé Wà Ojlo Jehovah tọn

Paulu Dekunnu po Adọgbigbo po to Omẹ Gbóogbó lẹ Nukọn

VOGBINGBỌN he tin to dawe awe lọ lẹ ṣẹnṣẹn na ko yin dehe họnwun tlala. Dopo ṣinyọ́n ojẹgbakun to whenuena omẹ awetọ do gẹdẹ. Omẹ dopo yin ahọlu; omẹ awetọ lọ, gantọ de. To owhe awe ganpamẹ ninọ tọn godo, apọsteli Paulu todin ṣite to togan Juvi lẹ tọn nukọn, yèdọ Hẹlodi Aglipa II. Ahọlu lọ po gbẹdohẹmẹtọ etọn, Belnike po, ko wá “to aṣọ́ daho mẹ, bosọ biọ fie yé nọ sèhó te, po awhàngandaho lẹ lọ po, po mẹho todaho lọ mẹ tọn lẹ po.” (Owalọ lẹ 25:23) Azọ́n alọdlẹndonu tọn de dọmọ: “Vlavo gbẹtọ kanweko susu lẹ wẹ na ko tin to finẹ.”

Togan heyin dide yọyọ lọ, yèdọ Festu, ko basi tito na opli lọ. Togan he jẹnukọnna ẹn lọ, Feliksi, tindo homẹhunhun dọ Paulu ni to yaji to ganpamẹ. Ṣigba Festu tindo ayihaawe gando nugbo-yinyin whẹsadokọnamẹ lọ lẹ tọn sọta Paulu go. Etẹ, Paulu tẹdo homẹvọnọ-yinyin etọn go dọ emi ko biọ nado hẹn whẹho emitọn yì Sesali nukọn! Whẹho Paulu tọn fọ́n tlintlindo-díndín Ahọlu Aglipa tọn dote. “Yẹn jlo nado sèhó dawe lọ tọn,” wẹ e dọ. Festu basi tito lẹ po awuyiya po, vlavo to nulẹnpọn do nuhe ahọlu na lẹn gando gàntọnọ vonọtaun ehe go ji.—Owalọ lẹ 24:27–25:22.

To wunkẹngbe, Paulu mọ ede to ote to gbẹtọgun daho omẹ gbóogbó lẹ tọn nukọn. “Homẹ yẹn lọsu tọn hùn na yẹn na dọho na dee to nukọn towe to egbe,” wẹ e dọ na Aglipa, “humọ yẹn sọ yọnẹn dọ owalọ po nudindọn Ju lẹ tọn po wẹ hiẹ yọnẹn hezeheze; enẹwutu yẹn vẹ̀ we na hiẹ ni yí homẹmimiọn do sè ṣie.”—Owalọ lẹ 26:2, 3.

Hodidọ po Adọgbigbo po Paulu Tọn

Jẹnukọn, Paulu dọna Aglipa dogbọn ojlẹ he ko wayi etọn lẹ taidi homẹkẹndomẹtọ Klistiani lẹ tọn dali. ‘Yẹn nọ tẹnpọn nado hẹn yé zánnu,’ wẹ e dọ. “Yẹn sọ nọ dohomẹkẹn yé kakajẹ todaho devo mẹ.” Paulu zindonukọn nado dọ lehe e mọ numimọ mẹwhantọ de to ehe mẹ Jesu heyin finfọnsọnku lọ kanse e te dọmọ: “Etẹwutu wẹ hiẹ to homẹkẹndo mi? E sinyẹnawu na we nado sẹwhẹ atintlọ́ntlọ́n.”a—Owalọ lẹ 26:4-14.

Enẹgodo Jesu deazọ́nna Saulu nado dekunnu na gbẹtọ akọta lẹpo tọn gando “onú he hiẹ mọ tọn, po onú he yẹn na yí awuhia we na tọn lẹ po” go. Paulu dọ dọ emi dovivẹnu po sọwhiwhe po nado hẹn azọ́ndenamẹ emitọn di. Ṣogan, “na onú helẹ wutu,” wẹ e dọna Aglipa, “wẹ Ju lẹ wle mi to tẹmpli mẹ, bosọ to díndín nado hù mi.” To ojlo Aglipa tọn finfọndote to sinsẹ̀n Ju lẹ tọn mẹ, Paulu zinnudeji dọ kunnudide etọn na nugbo tọn ma bẹ ‘onú devo de didọ hẹn hugan onú he Yẹwhegan lẹ po Mose po ko dọ gando okú po fọnsọnku Mẹssia lọ tọn po’ go gba.—Owalọ lẹ 26:15-23.

Festu dádemẹ. “Wepinplọn glanglan hẹn we lunú!” wẹ e dawhá dọ. Paulu gblọn dọmọ: “Yẹn ma lunú gba, Festu, gigonọ daho; ṣigba ohó nugbo po owunza po tọn wẹ yẹn to didọ jẹgbonu.” Enẹgodo Paulu dọ dogbọn Aglipa dali dọmọ: “Na ahọlu yọnẹn sọn onú helẹ mẹ, mẹhe nukọn yẹn mọ vivo te ga do to hodọ: na ayiha ṣie dọ na mi dọ, yè ma wà onú helẹ de to nuglọ gba.”—Owalọ lẹ 26:24-26.

Enẹgodo Paulu dọho hlan Aglipa tlọlọ. “Ahọlu Aglipa, be hiẹ yí yẹwhegan lẹ se?” Matin ayihaawe kanbiọ lọ dotukla Aglipa. To popolẹpo mẹ, e dona basi hihọ́na yindidi etọn, podọ nado kọngbedopọ hẹ Paulu na zẹẹmẹdo gbekọndopọ hẹ nuhe Festu ylọ dọ ‘nulú.’ Vlavo to yinyọ́n awuwhiwhle Aglipa tọn mẹ, Paulu na gblọndo na kanbiọ ede tọn. ‘Yẹn yọnẹn dọ hiẹ yise,’ wẹ e dọ. Enẹgodo Aglipa dọho, ṣigba e ma hẹn hodidọ etọn lẹ yin nujikudo tọn gba. “Hoyidodọnmẹ pẹẹde dogọ,” wẹ e dọ hlan Paulu, “hiẹ do jlo yí homẹhunhun do hẹn mi yin Klistiani de.”—Owalọ lẹ 26:27, 28.

Paulu yí hodidọ he ma họnwun tlọlọ Aglipa tọn zan nado do nuagokun huhlọnnọ de hia. “Yẹn to jijlo to Jiwheyẹwhe dè,” wẹ e dọ, “dọ eyin po vude po kavi po susu po, hiẹ ṣokẹdẹ ma gba, ṣigba mẹhe sèhó ṣie to egbe lẹpo, do lẹzun mẹhunkọ yẹn yin, ogàn helẹ ndèhlan.”—Owalọ lẹ 26:29.

Aglipa po Festu po ma mọ nudepope he hẹn Paulu jẹ na okú kavi ganpamẹninọ gba. Ṣogan, obiọ etọn nado hẹn whẹho etọn yì Sesali nukọn ma sọgan yin gbigbẹ́ gba. Enẹwutu wẹ Aglipa dọ na Festu dọmọ: “Eyin dawe he ma ko yí owhẹ̀ etọn hlan Sesali gba, be yè do dè e do ote.”—Owalọ lẹ 26:30-32.

Nuplọnmẹ na Míwlẹ

Aliho kunnudide Paulu tọn to omẹ gbóogbó lẹ nukọn wleawu apajlẹ vonọtaun de tọn na míwlẹ. To hodidọ hlan Ahọlu Aglipa mẹ, Paulu yí wuntuntun zan. Matin ayihaawe e yọnẹn dogbọn walọyizan ylankan he lẹdo Aglipa po Belnike po dali. Kọndopọ yetọn yin hẹnnumẹ sẹpọmẹ tọn de, na Belnike na nugbo tọn yin nọviyọnnu Aglipa tọn. Ṣigba to nujijọ ehe mẹ Paulu ma dè nado dọho do walọ dagbe ji gba. Kakatimọ, e zinnudo nuagokun he ewọ po Aglipa po magbè deji lẹ ji. Humọ, dile etlẹ yindọ Paulu yin nuplọn dogbọn Falesi weyọnẹntọ Gamalieli dali do, ewọ yigbe dọ Aglipa yin azọ́nyọnẹntọ to aṣa Ju lẹ tọn mẹ. (Owalọ lẹ 22:3) Mahopọnna walọ mẹdetiti Aglipa tọn lẹ, Paulu dọho na ẹn po sisi po na Aglipa tin to otẹn aṣẹpipa tọn de mẹ wutu.—Lomunu lẹ 13:7.

Dile míwlẹ to kunnude po adọgbigbo po dogbọn nuyise mítọn lẹ dali, e mayin yanwle mítọn nado hùngona kavi gblewhẹdo nuyiwa mawé todoaitọ mítọn lẹ tọn gba. Kakatimọ, nado sọgan hẹn ẹn bọawu na yé nado kẹalọyi nugbo lọ, mí dona zinnudo adà pọndohlan dagbe wẹndagbe lọ tọn lẹ ji, bo zinnudo todido he mí tindo to pọmẹ lẹ ji. To whenuena yè to hodọ hẹ mẹhomẹ lẹ kavi mẹhe tin to otẹn aṣẹpipa tọn mẹ lẹ, mí dona yọ́n otẹn yetọn. (Levitiku 19:32) To aliho ehe mẹ, mí sọgan hodo apajlẹ Paulu tọn, mẹhe dọmọ: “Yè yí mi do basi onú popo hlan gbẹtọ lẹpo, na yẹn nido gbọn onú popo mẹ whlẹn pẹvide gán.”—1 Kọlintinu lẹ 9:22.

[Nudọnamẹ Odò Tọn]