Lilatọ Ahọluduta Tọn lẹ Na Linlin

Yise Yetọn Yin Ahọsuna

APỌSTELI PAULU yin dawe he tindo yise vonọtaun de, podọ e dotuhomẹna yisenọ hatọ lẹ ga nado wleawuna yise. E dọmọ: “Ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6) Numimọ he bọdego helẹ sọn Mozambique do lehe Jehovah nọ suahọ na yise sinsinyẹn bo nọ na gblọndo na odẹ̀ vẹkuvẹku lẹ do hia.

• Mẹmẹyọnnu asuṣiọsi de sọn ayimatẹn agewaji Niassa tọn mẹ yin ahunmẹduna dogbọn lehe ewọ po ovi etọn ṣidopo lẹ po na yì Plidopọ Agbegbe “Aliho Jiwheyẹwhe Tọn na Gbẹninọ” tọn do dali. Asisa akuẹ mimọ tọn dopo gee etọn wẹ nado sà onú lẹ to ahì lẹdo lọ tọn mẹ, ṣigba to whenuena azán plidopọ lọ tọn sẹpọ, húndokuẹ pínpàn tọn na yìyì ewọ po whẹndo etọn tọn po kẹdẹ wẹ e tindo. Etomọṣo, e magbè nado ze jidide etọn do awuwledainanu Jehovah tọn lẹ mẹ bosọ zindonukọn to tito etọn lẹ mẹ nado tin to plidopọ lọ ji.

E do pínpàn lọ po ovi etọn ṣidopo lẹ po. To gbejizọnlin lọ whenu húnkuẹ-ṣinyantọ lọ dọnsẹpọ ẹ na tike etọn. To ayidido kalti akọnnu tọn etọn go mẹ, e kàn wunmẹ kalti mẹdohia tọn he e do lọ sè e. Mẹmẹyọnnu lọ dọna ẹn dọ lẹndai etọn wẹ nado do e hia taidi afọzedaitọ de yì plidopọ agbegbe Kunnudetọ Jehovah tọn lẹ tọn tẹnmẹ. “Fie wẹ plidopọ ehe na yin bibasi te?” wẹ húnkuẹ-ṣinyantọ lọ kanse. To yinyọnẹn dọ plidopọ ehe tin to ayimatẹn he sẹpọ Nampula tọn mẹ godo, to nudi kilomẹtlu 300 lẹ, po nupaṣamẹ po e biọ ẹ odaa akuẹ tike lọ tọn poun! Enẹgodo e yí odaa húndokuẹ he pò etọn tọn do na ewọ po whẹndo etọn po tike kọlilẹ tọn. Lehe homẹ etọn hùn do sọ nado ko ze jidide etọn do Jehovah mẹ!—Psalm 121:1, 2.

• Na nudi owhe 25, yọnnu sinsẹ̀nnọ de hodẹ̀ hlan Jiwheyẹwhe nado do aliho he sọgbe nado basi sinsẹ̀n hlan ewọ hia ẹ. Ṣọṣi he e nọ yì nọ kọ̀n hùnwhẹ sinsẹ̀n tọn lẹ dopọ hẹ nuyiwa aṣa tọn lẹ, podọ ewọ tindo ayihaawe eyin wunmẹ sinsẹ̀n-bibasi tọn ehe nọ hẹn homẹ Jiwheyẹwhe tọn hùn.

E basi zẹẹmẹ dọmọ: “Yẹn ko nọ saba flin hogbe Jesu tọn lẹ heyin kinkàndai to Matiu 7:7 mẹ dọmọ: ‘Mì biọ, yè na na mì, mì dín, mì na mọ, mì húhúhọ̀n, yè nasọ hùn in hlan mì.’ Po wefọ ehe po to ayiha mẹ, yẹn nọ hodẹ̀ hlan Jiwheyẹwhe to whepoponu nado plan mi jẹ nugbo lọ kọ̀n. To gbèdopo ṣọṣi-gán mítọn biọ to mẹhe nọ wazọ́n to ahi lẹdo lọ tọn mẹ lẹpo si nado hẹn akuẹ sọha tangan de po delẹ to nuhe yé nọ sà lẹ po mẹ wá na ẹn na ewọ nido sọgan kọ̀n dona do yé ji. Yẹn pọ́n obiọ ehe hlan taidi nuhe jẹagọdo Owe-wiwe, enẹwutu yẹn ma hẹn nudepope wá. To whenuena sinsẹ̀ngán lọ mọdọ yẹn ma hẹn ‘nunina’ de wá, e jẹ zùnzùn mi ji to hagbẹ ṣọṣi lọ tọn lẹpo nukọn. To gbenẹgbe yẹn yọnẹn dọ e mayin aliho he mẹ Jiwheyẹwhe jlo dọ yè ni basi sinsẹ̀n hlan ewọ te die gba, enẹwutu yẹn tọ́nsọn ṣọṣi lọ mẹ. To ojlẹ enẹ lẹpo mẹ, yẹn sinyẹnlin to odẹ̀ mẹ nado mọ nugbo lọ.

“To godo mẹ, yẹn wleawuna adọgbigbo bosọ dọnsẹpọ hẹnnumẹ de heyin dopo to Kunnudetọ Jehovah tọn lẹ mẹ. Ewọ ze alọnuwe pẹvi de donukọnna mi, podọ to hihia ẹ mẹ yẹn yọnẹn to afọdopolọji dọ Jiwheyẹwhe to gblọndo na hlan odẹ̀ ṣie lẹ. To madẹnmẹ, gbẹdohẹmẹtọ ṣie lọsu jẹ nukunnumọjẹ nugbo Biblu tọn lẹ mẹ ji, podọ mí hẹn alọwle mítọn sọgbe hẹ osẹ́n. Nalete, to godo mẹ, asu ṣie jẹazọ̀n sinsinyẹn. Ṣigba kakajẹ okú etọn, e na tuli mi nado sinyẹnlin to aliho nugbo lọ tọn ji na mí nido sọgan pé whladopo dogọ to Paladisi mẹ.

“Yẹn na to pẹdona Jehovah tẹgbẹ̀ na gblọndo nina hlan odẹ̀ ṣie lẹ podọ dido aliho he sọgbe lọ nado basi sinsẹ̀n hlan ẹn hia mi. Odẹ̀ ṣie lẹ ko sọ mọ gblọndo yí ga to enẹ mẹ dọ yẹn ko mọ ovi ṣie ṣinatọ̀n lẹpo lẹzun devizọnwatọ klandowiwe Jehovah tọn lẹ.”