Lilatọ Ahọluduta Tọn lẹ Na Linlin

Latvia Yigbena Wẹndagbe Lọ

BIBLU dohia hezeheze dọ ojlo Jiwheyẹwhe tọn wẹ e yin dọ ‘gbẹtọ wunmẹ lẹpo ni yin whinwhlẹngán bosọ wá oyọnẹn he pegan nugbo lọ tọn kọ̀n.’ (1 Timoti 2:4) Mẹhe ma ko tindo dotẹnmẹ hundote nado sè wẹndagbe lọ na owhe susu lẹ to sisè e todin! To Latvia, dile e yin do to adà aihọn tọn devo lẹ mẹ, mẹhe tindo owhe voovo bosọ wá sọn dodonu voovo mẹ lẹpo wẹ to gbeyi hlan owẹ̀n lọ, dile numimọ he bọdego lẹ dohia do.

• To Rēzekne, yèdọ tòdaho de to whèzẹtẹn-waji Latvia tọn mẹ, onọ̀ de po viyọnnu aflanmẹ etọn po kàn aliho sè yọnnu de to tòhomẹ-liho lọ ji. To nudọnamẹ lọ didọna yé godo, yọnnu lọ, he yin dopo to Kunnudetọ Jehovah tọn lẹ mẹ, basi oylọ na yé nado wá opli Kunnudetọ lẹ tọn ji.

To whenuena e yindọ onọ̀ po viyọnnu lọ po tindo ojlo to sinsẹ̀n mẹ, yé de nado yì opli lọ. To aliho ji, yé magbe dọ eyin yé sọgan mọ nuhe ma sọgbe depope to finẹ, yé na tọ́nyi to afọdopolọji. Ṣigba, opli lọ fọnjlodotenamẹ sọmọ bọ linlẹn tintọ́nyì tọn ma tlẹ wá ayiha mẹ na yé. Yé kẹalọyi nuzedonukọnnamẹ de nado plọn Biblu bosọ jẹ opli lẹ yì ji to gbesisọmẹ. To osun atọ̀n poun gblamẹ, yé de ojlo hia nado kọnawudopọ to azọ́n yẹwhehodidọ tọn mẹ bosọ to nukọnpọnhlan na yinyin bibaptizi.

• To tòdaho he tin to whèyihọ-waji Latvia tọn de mẹ, Kunnudetọ de dukosọ hẹ Anna owhe 85-mẹvi, he do ojlo nujọnu tọn hia bosọ kẹalọyi plọnmẹ Biblu de. Viyọnnu etọn po hagbẹ whẹndo lọ tọn devo lẹ po diọnukunsọ ẹ sinsinyẹn. Ṣigba Anna ma dike nukundiọsọmẹ enẹ kavi yọnhowhe etọn po madogán agbasa tọn po ni glọnalina ẹn sọn nukọnzinzindo to Biblu pinplọn etọn mẹ gba.

To gbèdopo, Anna dọna viyọnnu etọn dọ emi jlo na yin bibaptizi. “Eyin hiẹ yin bibaptizi, yẹn na do we hlan owhé mẹgopọntẹn tọn de gbè,” wẹ viyọnnu Anna tọn gblọn dọ. Ṣigba, budonamẹ ehe ma glọnalina Anna gba. Na ninọmẹ agbasamẹ tọn etọn wutu, e yin bibaptizi to owhé etọn titi gbè.

Nawẹ viyọnnu Anna tọn yinuwa hlan ehe gbọn? Walọyizan etọn ko diọ, podọ e sọ wleawuna núdùdù vonọtaun de na onọ̀ etọn to baptẹm lọ godo. Enẹgodo e kanse onọ̀ etọn dọ, “Todin he hiẹ ko yin bibaptizi, etẹwẹ yin numọtolanmẹ towe?” Etẹwẹ yin gblọndo Anna tọn? “Yẹn taidi oviyẹyẹ de!”

• To décembre 1998, Kunnudetọ awe dukosọ hẹ awhàngán Union Soviétique tọn dai tọn de he ko tin to gbọjẹ whenu gaa tọn mẹ. To whenuena e yindọ ewọ yise to Mẹdatọ de mẹ, e kẹalọyi plọnmẹ Biblu de, bọ asi etọn sọ kọnawudopọ to godo mẹ. Yé tindo nukọnyiyi awuyiya tọn bosọ lẹzun wẹnlatọ he ma ko yí baptẹm to madẹnmẹ. To alúnlùn he bọdego mẹ, awhàngán dai tọn lọ yin bibaptizi. Owanyi daho asu po asi po ehe tọn na onú gbigbọmẹ tọn lẹ ko yin tuli de na mẹhe tin to agun lọ mẹ lẹpo. Humọ, yé yí yedelẹ zan taun to azọ́n owhé de lilẹzun Plitẹnhọ Ahọluduta tọn dagbe de mẹ.