Ohó Jiwheyẹwhe Tọn Plọnmẹtọ lẹ Yin Tulina Nado Hẹn Azọ́ndenamẹ Yetọn Di

MẸPLỌNTỌ fọtọ́n donu kanweko lẹ wẹ pli dopọ to osun agọe tọn lẹ mẹ nado yin pinplọn. Bẹsọn mai he wayi mẹ, yé pli dopọ do nọtẹn kanweko lẹ na Plidopọ Agbegbe Kunnudetọ Jehovah tọn lẹ tọn heyin “Ohó Jiwheyẹwhe Tọn Plọnmẹtọ Lẹ” tọn lẹdo aihọn pé. Afọzedaitọ lẹ yin tudohomẹna nado plọn yedelẹ, nado pegan dogọ, bo hẹn azọ́ndenamẹ yetọn di taidi mẹplọntọ lẹ.

Be hiẹ yì dopo to plidopọ ehelẹ mẹ ya? Eyin mọwẹ, matin ayihaawe, a na ko yọ́n pinpẹn núdùdù dojo gbigbọmẹ tọn he yin ninamẹ to plidopọ ehelẹ ji na sinsẹ̀n-bibasi Jehovah, Jiwheyẹwhe nugbo lọ tọn. Naegbọn a ma na kọnawudopọ hẹ mí todin nado gbadopọnna tito-to-whinnu he plọnnumẹ plidopọ lọ tọn?

Azán Tintan—Owe-Wiwe Heyin Gbigbọdo lẹ Yin Alenọ na Mẹpinplọn

Azinponọ plidopọ lọ tọn yí zohunhun do dokuavọna afọzedaitọ lẹ po hodidọ lọ po “Mì Yin Pinplọn, Mì Ohó Jiwheyẹwhe Tọn Plọnmẹtọ Lẹ.” Na Jesu Klisti plọnnu sọn Jehovah ‘Nuplọnmẹtọ Daho’ lọ dè wutu, e lẹzun Mẹplọntọ Daho lọ. (Isaia 30:20; Matiu 19:16) Eyin mí na yinukọn taidi Ohó Jiwheyẹwhe tọn plọnmẹtọ lẹ, mílọsu dona yin pinplọn gbọn Jehovah dali.

Enẹgodo adà he hosọ etọn yin “Nuplọnmẹ Ahọluduta Tọn Nọ Dè Sinsẹ́n Dagbe Tọ́n” bọdego. Gbọn hokinkanse Ohó Jiwheyẹwhe tọn plọnmẹtọ numimọnọ lẹ dali, ayajẹ po dona gbẹtọ lẹ hinhẹnzun devi tọn po yin nùzindeji.

Hodidọ zohunhunnọ de heyin “Mì Yin Whinwhàn Gbọn ‘Azọ́n Huhlọnnọ Jiwheyẹwhe Tọn lẹ Dali’ ” bọdego. To owhe kanweko tintan whenu, “azọ́n huhlọnnọ” lẹ he gando Ahọluduta Jiwheyẹwhe tọn go whàn gbẹtọ lẹ nado yinuwa. (Owalọ lẹ 2:11) Mílọsu sọgan whàn gbẹtọ lẹ nado yinuwa gbọn “azọ́n huhlọnnọ” mọnkọtọn lẹ lilá dali taidi nuplọnmẹ Owe-wiwe tọn lẹ dogbọn ofligọ, fọnsọnku, po alẹnu yọyọ lọ po dali.

Hodidọ he bọdego na tuli mẹlẹpo dọ “Mì Mọ Homẹhunhun to Dodowiwa Jehovah Tọn Mẹ.” (Psalm 35:27) Mí yin alọgọna nado doafọna dodowiwa gbọn pinplọn nado yiwanna nuhe yin dodo bo gbẹwanna nuhe yin oylan dali, gbọn Biblu pinplọn, gbigbẹkọ nuyiwadomẹji he nọ gbleawunamẹ to gbigbọ-liho lẹ, po whiwhẹ tintindo po dali. Afọdide mọnkọtọn lẹ na gọalọ nado basi hihọ́na mí sọn gbẹdido ylankan lẹ, aṣa agbasanu bibẹpli aihọn tọn, podọ ayididedai fẹnnuwiwa po danuwiwa tọn po mẹ.

Hodidọ ayidego tọn lọ, “Mì Yin Hinhẹn Sọgbe Mlẹnmlẹn Taidi Ohó Jiwheyẹwhe Tọn Plọnmẹtọ Lẹ,” flinnu mí dọ Ohó etọn, gbigbọ wiwe etọn, po titobasinanu aigba ji tọn etọn po wẹ Jehovah yizan nado hẹn mí zun lizọnyizọnwatọ etọn he pegan lẹ. Hodọtọ lọ na ayinamẹ mí gando Ohó Jiwheyẹwhe tọn yiyizan go dọmọ: “Yanwle mítọn wẹ nado ze nuhe Biblu to didọ sọn weda etọn mẹ lẹ bo zín in do ahun todoaitọ mítọn lẹ tọn mẹ.”

Hosọ hómadọ tintan plidopọ lọ tọn wẹ “Mí Nọ Plọnnu Míde to Mẹdevo lẹ Pinplọn Whenu.” Adà tintan lọ zinnudeji dọ mí dona hodo nujinọtedo yiaga walọdagbe Klistiani tọn he mí to pinplọn mẹdevo lẹ. Adà he bọdego dotuhomẹna mí nado ‘yí ohó nugbo lọ zan ganji.’ (2 Timoti 2:15) Nado plọn mídelẹ, oplọn Biblu mẹdetiti tọn gbesisọmẹ po sọwhiwhe tọn po yin dandan, mahopọnna owhe he mí ko yí do sẹ̀n Jiwheyẹwhe. Adà hómadọ lọ tọn he gbọngodo dohia dọ Lẹgba to mí pọ́n, bo to walọyizan mọnkọtọn lẹ dín to mí mẹ taidi goyiyi, gbigbọ mẹdekannujẹ tọn, mẹdezedaga, awuwhàn, nuvẹun, fifiẹ, mẹhẹndohomẹ, po nuṣiwa dindin to mẹdevo lẹ mẹ po. Ṣigba, eyin mí diọnukunsọ Lẹgba sinsinyẹn, e na họ̀n na mí. Nado sọgan diọnukunsọ ẹ, mí dona dọnsẹpọ Jiwheyẹwhe.—Jakobu 4:7, 8.

Hodidọ he wá do ganmẹ lọ “Gbẹ́ Azọ̀n Ylankan Yẹdide Fẹnnuwiwa Aihọn Tọn Dai” do lehe mí sọgan pehẹ owù gbigbọmẹ tọn enẹ do hia mí. Yẹwhegán Habbakuk dọ gando Jehovah go dọmọ: “Hiẹ he yin nukun wiwe tọn hugan nado pọ́n oylan, podọ he ma sọgan pọ́n tasinyẹn.” (Habbakuk 1:13) Mí dona “gbẹwanna nuhe ylan.” (Lomunu lẹ 12:9) Mẹjitọ lẹ yin tudohomẹna nado nọ deanana nuhe ovi yetọn lẹ nọ pọ́n to Internet po televiziọn po ji. Hodọtọ lọ dọ dọ, mẹhe yiwanna yẹdide fẹnnuwiwa tọn lẹ dona dín alọgọ sọn họntọn he whèwhín to gbigbọmẹ de si. E nasọ yin alọgọnu de nado lẹnayihamẹpọn do wefọ he bọdego helẹ ji bo hẹn yé do ayiha mẹ: Psalm 97:10; Matiu 5:28; 1 Kọlintinu lẹ 9:27; Efesunu lẹ 5:3, 12; Kọlọsinu lẹ 3:5; po 1 Tẹsalonikanu lẹ 4:4, 5 po.

Hodidọ he bọdego lọ, “Mì Gbọ Jijọho Jiwheyẹwhe Tọn Ni Basi Hihọ́na Mì,” miọnhomẹna mí po jidenamẹ lọ po dọ to whenuena magbọjẹ do agbàn pinpẹ̀n na mí, mí sọgan ze agbàn mítọn dlan Jehovah ji. (Psalm 55:22) Eyin mí dọ nuhe tin to ahun mítọn mẹ lẹ na Jehovah to odẹ̀ mẹ, e na na mí “jijọho Jiwheyẹwhe tọn,” heyin vivo po jijọho ayiha mẹ tọn po he haṣinṣan họakuẹ mítọn hẹ ẹ nọ hẹnwa.—Filippinu lẹ 4:6, 7.

Azán tintan yin tadona to aliho ayajẹ titengbe tọn de mẹ po hosọ lọ po “Jehovah Nọ Yí Hinhọ́n do Doaṣọ́na Omẹ Etọn Lẹ,” ehe basi zẹẹmẹ hẹndi Isaia weta 60 tọn. To zinvlu aihọn dintọn lọ tọn ṣẹnṣẹn, ‘jonọ lẹ’—gbẹtọ susugege lẹngbọ devo lẹ tọn he to susudeji lẹ to vivi hinhọ́n Jehovah tọn dù to pọmẹ hẹ Klistiani yiamisisadode lẹ. To alọdindlẹndo wefọ 19 po 20 po mẹ, hodọtọ lọ basi zẹẹmẹ dọmọ: “Jehovah ma na ‘biọ’ di owhè kavi ‘yì zinvlu mẹ’ di osun gba. E na zindonukọn nado nọ doaṣọ́na omẹ etọn lẹ gbọn hinhọ́n titá do yé ji dali. Jidenamẹ jiawu nankọ die ehe yin na mí dile mí to gbẹ̀nọ to azán godo tọn lẹ mẹ to aihọn zinvlu tọn ehe mẹ!” To vivọnu hodidọ lọ tọn, hodọtọ lọ lá didetọ́n owe Dọdai Isaia Tọn—Hinhọ́n de na Gbẹtọvi Lẹpo, Bladopọ Awetọ tọn. Be a ko hia owe yọyọ ehe fó ya?

Azán Awetọ—Yin Hinhẹn Pegan Mlẹnmlẹn Nado Plọn Mẹdevo Lẹ

To hodidọ do wefọ egbesọ azán awetọ lọ tọn ji pó godo, mí dotoai po sọwhiwhe po na hómadọ awetọ plidopọ lọ tọn, “Lizọnyizọnwatọ He Hẹn Mẹdevo lẹ Zun Yisenọ.” Hodọtọ atọ̀n he dọhodo adà hómadọ lọ tọn dopodopo ji lẹ zinnudo afọdide voovo atọ̀n he alọgigọna gbẹtọ lẹ nado lẹzun yisenọ bẹhẹn lẹ ji—lilá owẹ̀n Ahọluduta lọ tọn, afọdidona mẹhe do ojlo hia lẹ, po nupinplọn jlodotọ lẹ nado payi nuhe Klisti degbè etọn lẹ go po. Hokansemẹ po wadohia yetọn lẹ vivọ́ basi po gọalọna mí taun nado mọ lehe mí sọgan plọn mẹdevo lẹ nado lẹzun devi lẹ do.

Hosọ adà he bọdego tọn wẹ “Yí Mẹdezejo Jijọ-di-Jiwheyẹwhe Tọn Dogọ Akọ́ndonanu Towe.” Hodọtọ lọ dohia dọ nuhe yin nujọnu hugan wẹ ‘nado doakọnna kakajẹ opodo.’ (Matiu 24:13) Mí dona yí nuhe Jiwheyẹwhe ko wleawuna lẹpo zan—yèdọ odẹ̀, oplọn mẹdetiti tọn, opli lẹ, po lizọnyizọn lọ po, nado wleawuna mẹdezejo jijọ-di-Jiwheyẹwhe tọn. Mí dona glọnalina ojlo po nuwiwa aihọn tọn lẹ po ma nado hẹn mẹdezejo jijọ-di-Jiwheyẹwhe tọn mítọn gble.

Nawẹ mẹhe to yaji bo yin agbàn pinpẹn dó na lẹ sọgan mọ kọfanamẹ gbọn? Hosọ lọ “Kọfanamẹ Mimọ to Zẹgẹ Klisti Tọn Glọ” na gblọndo kanbiọ enẹ tọn. Jesu gbọn homẹdagbe dali basi oylọna hodotọ etọn lẹ nado kẹalọyi zẹgẹ etọn bo plọnnu sọn e dè. (Matiu 11:28-30) Mí sọgan kẹalọyi zẹgẹ Jesu tọn gbọn hihodo apajlẹ etọn pẹkipẹki to gbẹzan he bọawu bo to jlẹkaji de zinzan mẹ dali. Nuagokun nuzedonukọnnamẹ ehe tọn lẹ yin hinhẹn họnwun gbọn hokinkanse mẹhe ko hẹn gbẹzan yetọn bọawu lẹ dali.

Dopo to onú ayidego tọn he nọ jọ to pipli daho Kunnudetọ Jehovah tọn lẹ tọn tẹnmẹ wẹ baptẹm devizọnwatọ Jiwheyẹwhe tọn he ṣẹṣẹ klan yedelẹ do wiwe lẹ tọn. Mẹmẹsunnu he dọhodo hosọ lọ “Baptẹm Nọ Planmẹ jẹ Lẹblanulọkẹyi Mẹpinplọn Daho Tọn lẹ Kọ̀n” ji yí zohunhun do dokuavọna mẹhe jlo na yí baptẹm lẹ bo basi oylọna yé nado tindo mahẹ to lẹblanulọkẹyi daho sinsẹ̀nzọn tọn lẹ mẹ. Ohó Jiwheyẹwhe tọn plọnmẹtọ he ṣẹṣẹ yí baptẹm bo jẹ nubiọtomẹsi Owe-wiwe tọn kọ̀n lẹ sọgan dovivẹnu na azọngban voovo lẹ to agun mẹ.

Hosọ hodidọ tintan whèmẹ lọ tọn yin “Hodo Apajlẹ Mẹplọntọ Daho lọ Tọn.” Jesu ko yí owhe madosọha lẹ zan nado plọnnu bo hodo apajlẹ Otọ́ etọn tọn po sọwhiwhe po to olọn mẹ, bo gbọnmọ dali lẹzun Mẹplọntọ Daho lọ. To whenuena e to aigba ji, e yí aliho mẹpinplọn kọdetọn dagbenọ lẹ zan, taidi kanbiọ he nọ biọ ahun mẹ lẹ po apajlẹ he bọawu bo họnwun lẹ po. Jesu ze nuplọnmẹ etọn sinai do Ohó Jiwheyẹwhe tọn ji bo yí zohunhun, awuyadomẹ, po huhlọn po do dọho. Be mí ma yin whinwhàn nado hodo apajlẹ Mẹplọntọ Daho lọ tọn ya?

“Be Hiẹ to Jijlo Nado Wadevizọn na Mẹdevo lẹ Ya?” yin hosọ ojlofọndotenamẹ tọn devo he na tuli mí nado hodo apajlẹ Jesu tọn to devizọnwiwa na mẹdevo lẹ mẹ. (Johanu 13:12-15) Hodọtọ lọ dotuhomẹna sunnu he pegan lẹ tlọlọ nado taidi Timoti to dotẹnmẹ hundote lẹ yiyizan nado gọalọna mẹdevo lẹ mẹ. (Filippinu lẹ 2:20, 21) Mẹjitọ lẹ yin tulina nado hodo apajlẹ Ẹlkana po Hanna po tọn nado gọalọna ovi yetọn lẹ nado ze sinsẹ̀nzọn whenu-gigọ́ tọn do yanwle mẹ. Podọ jọja lẹ yin tudohomẹna nado hodo apajlẹ Jesu Klisti po jọja Timoti po tọn gbọn yedelẹ zizejo dali. (1 Pita 2:21) Hodidọ mẹhe ko yí dotẹnmẹ hundote lẹ zan nado wadevizọn na mẹdevo lẹ tọn sọ whàn mí ga.

Hosọ hómadọ atọ̀ntọ lọ tọn wẹ “Mọaleyi to Gigọ́mẹ sọn Nuplọnmẹ Yẹwhehọluduta Tọn Mẹ.” Hodọtọ tintan zinnudo lehe e yin nujọnu nado hẹn ayidonugo mítọn jideji do ji. Nado jẹ yanwle enẹ kọ̀n, mí sọgan bẹjẹeji po adà oplọn mẹdetiti tọn he whègli po bo tẹnpọn nado hẹn ẹn dite dogọ. E sọ na tuli mẹplidopọ lẹ nado nọ hùn wefọ lẹ bo nọ basi kandai to opli lẹ whenu. Hodọtọ awetọ hẹn mí tin to aṣeji nado tẹdo “ohia ohó tọn he pegan lọ go” gligli. (2 Timoti 1:13, 14) Nado sọgan basi hihọ́na mídelẹ sọn fẹnnuwiwa he nọ yin didohia lẹ, tamẹnuplọnmẹ gbẹtọvi tọn lẹ, homọdọdomẹgo sinsinyẹn lẹ, po nuplọnmẹ atẹṣitọ lẹ tọn po si, mí dona fli ojlẹ na oplọn mẹdetiti tọn po opli lẹ yìyì po. (Efesunu lẹ 5:15, 16) Hodọtọ he gbọngodo to hómadọ lọ mẹ zinnudo nuhudo lọ ji nado nọ yí nuhe yin pinplọn lẹ do yizan mẹ na mí nido mọaleyi to gigọ́mẹ sọn wepinplọn yẹwhehodidọ tọn mẹ.—Filippinu lẹ 4:9.

Lehe todidoai na hodidọ lọ “Awuwledainanu Yọyọ lẹ na Nukọnyiyi Gbigbọmẹ Tọn Mítọn” fọnjlodotena mí do sọ! Homẹ mítọn hùn nado sè dọ owe yọyọ lọ Mọaleyi sọn Wehọmẹ Lizọnyizọn Yẹwhehọluduta Tọn Mẹ na yin didetọ́n to madẹnmẹ. Nukundido mítọn jideji dile hodọtọ lọ slẹ hosọ he e bẹhẹn lẹ. Hodọtọ lọ dọ gando adà owe lọ tọn he bẹ jẹhẹnu hodidọ tọn lẹ hẹn go dọmọ: “Nuplọnmẹwe ehe ma dọhodo adà 53 wehihia dagbe, hodidọ, po mẹpinplọn tọn lẹ po ji di owe aihọn tọn lẹ gba. Owe ehe yin zize sinai do nunọwhinnusẹ́n Owe-wiwe tọn lẹ ji.” Owe lọ na do lehe yẹwhegán lẹ, Jesu, po devi etọn lẹ po yí azọ́nyinyọnẹn mẹpinplọn tọn zan ganji do hia. Mọwẹ, nuplọnmẹwe ehe po adà yọyọ Wehọmẹ Lizọnyizọn Yẹwhehọluduta tọn lẹ po na gọalọna mí nado yin Ohó Jiwheyẹwhe tọn plọnmẹtọ dagbe lẹ.

Azán Atọ̀ntọ—Mì Yin Mẹplọntọ to Pọndohlanmẹ Na Ojlẹ He mẹ Mí Tin Te

To hodidọ do oplọn egbesọ azán godo tọn lọ ji godo, mẹlẹpo wẹ na ayidonugo sọwhiwhe tọn hlan hómadọ plidopọ lọ tọn he gbọngodo, “Dọdai Malaki Tọn to Awuwlena Mí na Azán Jehovah Tọn.” Malaki dọ dọdai to nudi owhe kanweko to kọlilẹ Ju lẹ tọn sọn Babilọni godo. Whladopo dogọ yé ko sọ tlọ́ biọ atẹṣiṣi po ylanwiwa po mẹ, bo to masin kọ̀n do oyín Jehovah tọn go gbọn osẹ́n dodowiwa etọn lẹ gbigbẹdai podọ hinhẹn kanlin nukuntọ́nnọ, sẹkunọ, po awutunọ lẹ po wá na avọ́sinsan dali. Humọ, yé nọ gbẹ́ asi ovu whenu tọn yetọn lẹ dai, vlavo nado sọgan dà yọnnu kosi lẹ.

Weta tintan dọdai Malaki tọn na jide mí dọ Jehovah yiwanna omẹ etọn lẹ. E zinnudo nuhudo lọ ji na sisi sisosiso tintindo na Jiwheyẹwhe podọ pinpẹn-nutọn-yinyọnẹn na onú wiwe lẹ. Jehovah nọ donukun dọ mí ni wà nuhe go mí pé lẹpo na emi, bo nọ sẹ̀n ẹn sọn owanyi matin ṣejannabi mẹ. Sinsẹ̀nzọn wiwe mítọn ma dona yin nuwiwa aṣa tọn poun gba, podọ mí dona dogbè na Jiwheyẹwhe.

To weta awetọ Malaki tọn yiyijlẹdo azán mítọn gbè go, mẹhe dọhodo hómadọ awetọ lọ ji kanse dọmọ: “Be dopodopo mítọn lẹ nọ tin to aṣeji bọ ‘dodomawa depope ni ma yin mimọ to nùflo mítọn lẹ ji ya’?” (Malaki 2:6) Mẹhe nọ plọnmẹ lẹ dona hẹn ẹn diun dọ nuhe yé dọ lẹ yin zize sinai mlẹnmlẹn do Ohó Jiwheyẹwhe tọn ji. Mí dona gbẹwanna walọ oklọ tọn mọnkọtọn lẹ taidi gbẹdai he ma sọgbe hẹ osẹ́n lẹ bibasi.—Malaki 2:14-16.

Hodọtọ he dọhodo adà godo tọn hómadọ lọ tọn he yin “Mẹnu lẹ Wẹ Na Lùn Azán Jehovah Tọn Tọ́n?” ji gọalọna mí nado wleawudai na azán Jehovah tọn. Hodọtọ lọ lá dọmọ: “Lehe e nọ miọnhomẹna devizọnwatọ Jehovah tọn lẹ do sọ nado yọnẹn dọ Malaki weta 3, wefọ 17, to hẹndi tangan etọn tindo do yewlẹ ji!” Wefọ lọ dọmọ: “Yé nasọ yin ṣie, wẹ OKLUNỌ awhànpa lẹ tọn dọ, to azán lọ mẹ ehe mẹ yẹn basi adọkunnu alọpa de he te; yẹn na hla yé dai, dile omẹ de nọ hla visunnu etọn titi he to sinsẹ̀n ẹn dai do.”

Adà ojlofọndotenamẹ plidopọ lọ tọn devo wẹ nupinpọn-do-plọnnu hohowhenu tọn lọ “Mì Na Sisi Aṣẹpipa Jehovah Tọn,” he sinai do visunnu Kola tọn lẹ ji. Mahopọnna walọ atẹṣiṣi otọ́ yetọn tọn sọta Mose po Aalọn po, yé yin nugbonọ hlan Jehovah po afọzedaitọ etọn lẹ po. To whenuena Kola po hodotọ etọn lẹ po yin vivasudo, visunnu Kola tọn lẹ luntọ́n. Hodidọ he bọdego lọ, “Litaina Aṣẹpipa Jiwheyẹwhe Tọn po Nugbonọ-Yinyin Po” do lehe nupinpọn-do-plọnnu lọ gando dopodopo mítọn lẹ go do hia. Hodọtọ lọ na avase mí gando onú ṣidopo he mẹ Kola po hodotọ etọn lẹ po gboawupo te go: yé ma nọgodona aṣẹpipa Jehovah tọn po nugbonọ-yinyin po; dike goyiyi, ojlo zogbe nado diyin, po awuwhàn po dùto yé ji, ze ayidonugo do mapenọ-yinyin mẹhe Jehovah dè lẹ tọn ji, wleawuna walọ lewuwu tọn, lẹzun pekọ matindonọ to lẹblanulọkẹyi sinsẹ̀nzọn tọn yetọn lẹ mẹ, podọ bo dike na kanṣiṣa họntọnjiji kavi whẹndo tọn lẹ ni yitẹn to nugbonọ-yinyin na Jehovah si.

Hosọ hodidọ gbangba lọ tọn yin “Mẹnu lẹ Wẹ to Nugbo lọ Plọn Akọta Lẹpo?” Nugbo he yin hodọdeji lọ ma yin nugbo paa lẹ gba, ṣigba nugbo lọ dogbọn lẹndai Jehovah tọn he Jesu Klisti dekunnu na dali. Hodọtọ lọ dọhodo nugbo he gando nuyise lẹ go, nugbo he tindo kanṣiṣa hẹ aliho sinsẹ̀n-bibasi tọn, po nugbo he dù walọyizan mẹdetiti tọn po ji. Gbọn Klistiani owhe kanweko tintan whenu tọn lẹ yiyijlẹdo Kunnudetọ Jehovah tọn egbezangbe tọn lẹ go dali, nujikudo mítọn dọ ‘Jiwheyẹwhe tin to mí ṣẹnṣẹn nugbo’ yin hinhẹn lodo.—1 Kọlintinu lẹ 14:25.

To bladopọ hosọ oplọn Atọ̀họ̀-Nuhihọ́ Lọ Tọn na osẹ lọ godo, hodidọ godo tọn lọ “Hinhẹn Azọ́ndenamẹ Mẹpinplọn Tọn Mítọn Di to Niyaniya Mẹ” whàn ohó Jiwheyẹwhe tọn plọnmẹtọ he tin to finẹ lẹpo nado yinuwa. Dogbapọn kleun na tito-to-whinnu lọ zinnudo nujọnu-yinyin yíyí Owe-wiwe zan to mẹpinplọn whenu, aliho he mẹ mí sọgan lẹzun mẹplọntọ he pegan te lẹ, podọ nuhudo lọ nado tindo jide to nugbo he mí nọ plọn mẹdevo lẹ mẹ ji. Hodọtọ lọ dotuhomẹna mí nado hẹn ‘nukọnyiyi mítọn sọawuhia’ podọ nado ‘nọ payi mídelẹ po nuplọnmẹ mítọn lẹ po go to whepoponu.’—1 Timoti 4:15, 16.

Lehe mí duvivi núdùdù dojo gbigbọmẹ tọn to Plidopọ Agbegbe “Ohó Jiwheyẹwhe Tọn Plọnmẹtọ Lẹ” tọn lọ ji do sọ! Mì gbọ mí ni hodo apajlẹ Nuplọnmẹtọ Daho mítọn yèdọ Jehovah, po Mẹplọntọ Daho mítọn, Jesu Klisti tọn po, to ohó Jiwheyẹwhe tọn pinplọn mẹdevo lẹ mẹ.

[Apotin to weda 28]

Owe Yọyọ Lẹ Nado Pehẹ Nuhudo Vonọtaun Lẹ

Afọzedaitọ he wá Plidopọ Agbegbe “Ohó Jiwheyẹwhe Tọn Plọnmẹtọ Lẹ” tọn lẹ yí zohunhun do kẹalọyi owe awe he na gọalọna yé taun to nugbo Owe-wiwe tọn pinplọn gbẹtọ lẹ to adà tangan aihọn tọn delẹ mẹ. Alọnuwe-pẹvi he hosọ etọn yin Be Hiẹ Tindo Gbigbọ Jọmaku de Wẹ Ya? na yin azọ́nwanu dagbe de nado bẹ hodọdopọ lẹ jẹeji hẹ mẹhe nọ nọ̀ otò he mẹ ogbè yetọn lẹ ma do vogbingbọn hia to “alindọn” po “gbigbọ” po ṣẹnṣẹn lẹ. Alọnuwe-pẹvi yọyọ lọ dohia hezeheze dọ huhlọn gbigbọnọ de gbọnvona nudida gbigbọnọ de podọ gbẹtọ lẹ ma nọ lẹzun nudida gbigbọnọ lẹ to whenuena yé kú gba.

Alọnuwe lọ Une vie pleinement satisfaisante: comment? yin didetọn to vivọnu azán awetọ plidopọ lọ tọn. Alọnuwe ehe yin awuwlena po lẹndai lọ po nado bẹ plọnmẹ Biblu lẹ jẹeji hẹ mẹhe ma yọ́n nudepope dogbọn gbẹtọ-yinyin Mẹdatọ lọ tọn po owe gbọdo etọn po dali lẹ. Be a ko penugo nado yí owe yọyọ ehelẹ zan to lizọnyizọn towe mẹ ya?

[Yẹdide to weda 26]

To Milan, Italie, podọ to plidopọ agbegbe lẹ ji lẹdo aihọn pé, omẹ kanweko susu wẹ yin bibaptizi

[Yẹdide to weda 29]

Nupinpọn-do-plọnnu lọ “Mì Na Sisi Aṣẹpipa Jehovah Tọn” whàn mẹplidopọ lẹ