Kanbiọ lẹ sọn Wehiatọ lẹ Dè

Sọgbe hẹ Osọhia 20:8, be mí dona wá tadona kọ̀n dọ sọha daho susugege gbẹtọ lẹ tọn wẹ na yin kiklọ gbọn Satani dali to mẹtẹnpọn godo tọn lọ whenu ya?

Osọhia 20:8 basi zẹẹmẹ mẹgbeyinyan godo tọn he Satani na basi do gbẹtọ lẹ ji to vivọnu owhe fọtọ́n gandudu Ahọluduta Mẹssia tọn whenu. Wefọ lọ dọ gando Satani go dọmọ: “E nasọ tọ́n yì nado klọ akọta he tin to adà ẹnẹ aigba tọn lẹ mẹ, Gọgi po Magọgi po, nado bẹ yé plidopọ hlan awhàn: sọha yé mẹhe tọn taidi tọkẹ́n ohù tọn.”

Mahopọnna nukọnyiyi he ko tin to aliho lẹnunnuyọnẹn tọn po azọ́nwanu lẹ po mẹ, sọha “tọkẹ́n ohù tọn” ma ko yin yinyọnẹn gba. Enẹwutu, mí sọgan dọ dọ hogbe lọ nọtena sọha he mayin yinyọnẹn de. Ṣigba be ehe do sọha daho, he sẹhundaga, bo tlẹ sù hugan nuhe mí sọgan yise de hia wẹ ya, kavi e yin sọha he mayin yinyọnẹn ṣogan bo sù poun de wẹ ya?

To Biblu mẹ, hogbe lọ “taidi tọkẹ́n ohù tọn” yin yiyizan to aliho susu mẹ. Di apajlẹ, to Gẹnẹsisi 41:49, mí hia dọmọ: “Josẹfu sọ bẹ gbado pli di tọkẹ́n ohù tọn, gbaugbau, kaka e do gbọ sọha hia na; na e yin matin sọha.” Tofi, nùzindonuji lọ yin zizedo sọha matindo etọn ji. Mọdopolọ, Jehovah dọmọ: “Le awhànpa olọn tọn lẹ ma sọgan yin hihia do, kavi tọkẹ́n ohù tọn jijlẹ; mọwẹ yẹn na hẹn okún Davidi devi ṣie tọn sudeji.” Dile sunwhlẹvu olọn tọn lẹ po tọkẹ́n ohù tọn po ma sọgan yin hihia gbede do, mọwẹ opagbe Jehovah tọn hlan Davidi ma na gboawupo gbede do niyẹn.—Jẹlemia 33:22.

Hogbe lọ “ tọkẹ́n ohù tọn” nọ saba dlẹnalọdo sọha kavi nuhe klo taun bo sẹhundaga. Islaelivi he tin to Gilgali lẹ to nuhà badabada na awhànpa Filistini tọn he pli do Mikmaṣi lẹ, he tin “di tọkẹ́n he tin to ohùtó to gege mẹ.” (1 Samuẹli 13:5, 6; Whẹdatọ 7:12) Podọ “Jiwheyẹwhe sọ na nuyọnẹn po wuntuntun po Sọlọmọni gege gbọ̀pọ̀, po okló ayiha tọn po, yèdọ di [tọkẹ́n] he tin to ohùtó.” (1 Ahọlu lẹ 4:29) Dile etlẹ yindọ nuhe yin hodọdego to whẹho dopodopo mẹ yin onú he sù taun, e gbẹsọ tindo dogbó.

“Tọkẹ́n ohù tọn” sọgan sọ zẹẹmẹdo sọha he mayin yinyọnẹn de, matin linlẹn susu-yinyin tọn dandan. Jehovah dọna Ablaham dọmọ: “Yẹn na hẹn okún towe jideji susugege di sunwhlẹvu olọn tọn lẹ, podọ di tọkẹ́n he tin to ohùtó.” (Gẹnẹsisi 22:17) To opagbe ehe vivọdọna ovivi Ablaham tọn Jakobu mẹ, Jehovah yí hogbe lọ “kọ́gudu aigba tọn” zan, ehe Jakobu wá ylọdọ “tọkẹ́n ohù tọn.” (Gẹnẹsisi 28:14; 32:12) Dile whẹho lẹ wá yì do, gbọnvona Jesu Klisti, “okún” Ablaham tọn wá yin 144 000, ehe Jesu ylọdọ “lẹngbọpa pẹvi.”—Luku 12:32; Galatianu lẹ 3:16, 29; Osọhia 7:4; 14:1, 3.

Etẹwẹ mí plọn sọn apajlẹ ehelẹ mẹ? Dọ hogbe lọ “taidi tọkẹ́n ohù tọn” ma nọ zẹẹmẹdo sọha he ma tindo dogbó, he yiaga tlala de to whepoponu gba; mọjanwẹ e ma nọ yin yiyizan to whepoponu nado basi zẹẹmẹ nuhe sù kavi he sẹhundaga tlala de tọn do niyẹn. E nọ saba nọtena sọha he mayin yinyọnẹn de ṣigba he sù. Enẹwutu, e sọgbe hẹ lẹnpọn dagbe nado yise dọ gbẹtọgun atẹṣitọ he na nọgodona Satani to mẹgbeyinyan godo tọn etọn do omẹ Jiwheyẹwhe tọn lẹ ji mẹ lẹ ma na sù tlala kavi sẹhundaga gba, ṣigba na sù jẹ obá lọ mẹ nado dobunamẹ. Nalete, mí ma yọ́n sọha lọ todin gba.