Kanbiọ lẹ sọn Wehiatọ lẹ Dè — WESẸDOTẸN INTẸNẸT JI TỌN Watchtower Tọn

Kanbiọ lẹ sọn Wehiatọ lẹ Dè

Naegbọn Eliṣa do biọ “yẹndawe” gbigbọ Elija tọn?

Ojlẹ vude poun whẹpo Elija nido dotana azọ́ndenamẹ etọn taidi yẹwhegán to Islaeli, yẹwhegán jọja Eliṣa biọ ẹ dọmọ: “Yẹn vẹ̀ we, gbọ mimá yẹndawe gbigbọ towe tọn de ni tin to oji e.” (2 Ahọlu lẹ 2:9) To gbigbọ-liho, e họnwun dọ mimá awe he Eliṣa to bibiọ lọ taidi dehe nọ yin mimá na visunnu plọnji de nkọ. (Deutelonomi 21:17) Dogbapọnna otàn lọ to kleun mẹ na hẹn ehe họnwun bo nasọ gọalọna mí nado plọnnu sọn nuhe jọ lọ mẹ.

To anademẹ Jehovah tọn glọ, yẹwhegán Elija ko yiamisisadode Eliṣa taidi mẹjẹmẹtẹnmẹ etọn. (1 Ahọlu lẹ 19:19-21) Eliṣa ko wadevizọn na Elija po nugbonọ-yinyin po na nudi owhe ṣidopo bo ko sọ magbe nado zindonukọn kakajẹ opodo. Eliṣa wazọ́n dopọ hẹ azọ́nplọnmẹtọ etọn Elija kakajẹ gbeegbe e dotana azọ́n etọn taidi yẹwhegán de to Islaeli. Dile etlẹ yindọ Elija dọna Eliṣa nado lẹkọ sọn godona ẹn, yẹwhegán jọja lọ dọna ẹn whlaatọ̀n dọmọ: “Yẹn ma na jo we do gba.” (2 Ahọlu lẹ 2:2, 4, 6; 3:11) Na nugbo tọn, Eliṣa pọ́n yẹwhegán yọnhonọ lọ hlan di otọ́ etọn gbigbọmẹ tọn.—2 Ahọlu lẹ 2:12.

Ṣigba, e mayin Eliṣa kẹdẹ wẹ yin visunnu gbigbọmẹ tọn na Elija gba. Elija po Eliṣa po ko kọnawudopọ hẹ pipli sunnu devo lẹ tọn he yin yiylọdọ “visunnu yẹwhegán lẹ tọn lẹ.” (2 Ahọlu lẹ 2:3) Kandai Ahọlu lẹ Awetọ tọn dohia dọ “visunnu” ehelẹ sọ tindo kanṣiṣa pẹkipẹki hẹ otọ́ gbigbọmẹ tọn yetọn, Elija ga. (2 Ahọlu lẹ 2:3, 5, 7, 15-17) Etomọṣo, taidi mẹjẹmẹtẹnmẹ yiamisisadode lọ, Eliṣa wẹ yin tintan to visunnu gbigbọmẹ tọn Elija tọn lẹ mẹ—ewọ wẹ taidi viplọnji lọ. To Islaeli hohowhenu tọn mẹ, visunnu plọnji nọ yí mimá awe to ogú otọ́ etọn tọn lẹ mẹ, bọ visunnu he pò lẹ nọ yí mimá dopodopo. Enẹwutu, Eliṣa biọ yẹndawe ogú gbigbọmẹ tọn Elija tọn.

Naegbọn Eliṣa do basi obiọ ehe to ojlẹ tangan enẹ mẹ? Na azọngban pinpẹn de wẹ e jlo na didá wutu—yèdọ nado jẹ otẹn Elija tọn mẹ taidi yẹwhegán to Islaeli. Eliṣa yọnẹn dọ nado sọgan hẹn azọngban he azọ́ndenamẹ sẹhundaga ehe bẹhẹn lẹ di, emi tindo nuhudo huhlọn gbigbọmẹ tọn he zẹ̀ nugopipe emitọn titi lẹ go, yèdọ huhlọn de he Jehovah kẹdẹ wẹ sọgan namẹ. E dona tindo adọgbigbo di Elija. (2 Ahọlu lẹ 1:3, 4, 15, 16) Enẹwutu wẹ e do biọ yẹndawe gbigbọ Elija tọn, yèdọ gbigbọ adọgbigbo tọn he na hẹn ẹn yin ‘awuwhàntọ tlala na Jehovah’—jẹhẹnu dagbe he gbigbọ Jiwheyẹwhe tọn nọ wleawuna lẹ. (1 Ahọlu lẹ 19:10, 14) Etẹwẹ yin gbeyiyi Elija tọn?

Elija yọnẹn dọ nuhe Eliṣa biọ lọ mayin nuhe emi sọgan basi gba adavo Jiwheyẹwhe kẹdẹ. Enẹwutu Elija yí whiwhẹ do gblọn dọmọ: “Hiẹ ko biọ onú sinsinyẹn de: ṣogan, eyin hiẹ mọ mi whenuena yè to zize mi sọn dè we e na yinmọ hlan we.” (2 Ahọlu lẹ 2:10) Podọ na nugbo tọn, Jehovah dike Eliṣa mọ whenue Elija hẹji to jẹhọn lẹpénọ de mẹ. (2 Ahọlu lẹ 2:11, 12) Nuhe Eliṣa biọ lọ yin nina ẹn. Jehovah na ẹn gbigbọ he e dona tindo nado bẹ azọ́ndenamẹ yọyọ etọn jẹeji podọ nado pehẹ whlepọn he na bọdego lẹ.

Klistiani yiamisisadode lẹ (he nọ yin yiylọ to whedelẹnu dọ hagbẹ Eliṣa tọn) po devizọnwatọ Jiwheyẹwhe tọn lẹ po to paa mẹ sọgan mọ tulinamẹ susu yí sọn kandai Biblu tọn ehe mẹ to egbehe. To ojlẹ delẹ mẹ, mí nọ dibu bo tlẹ nọ mọdọ mí ma pegan to whenuena azọngban yọyọ de yin nina mí, kavi adọgbigbo he mí tindo nado zindonukọn to azọ́n yẹwhehodidọ Ahọluduta tọn mẹ sọgan jẹ didepo ji dile ojlo matindo po agọjẹdomẹ po to susudeji to aigba-denamẹ mítọn ji. Ṣogan, eyin mí biọ alọgọ Jehovah tọn, e na na mí gbigbọ wiwe etọn jẹ obá he mẹ mí tindo nuhudo etọn jẹ nado pehẹ avùnnukundiọsọmẹ po ninọmẹ yọyọ lẹ po. (Luku 11:13; 2 Kọlintinu lẹ 4:7; Filippinu lẹ 4:13) Mọwẹ, kẹdẹdile Jehovah hẹn Eliṣa lodo na azọngban pinpẹn etọn lẹ do, e nasọ gọalọna mímẹpo, yọpọvu po mẹho po, nado hẹn lizọnyizọn mítọn di.—2 Timoti 4:5.