‘Alọgọ Ṣie Wá sọn Jehovah Dè’

Tlẹnnọ He Tindo Pekọ to Sinsẹ̀nzọn Jehovah Tọn mẹ Lẹ

“SUSU to mí mẹ wẹ tindo ayajẹ nujọnu tọn dile etlẹ yindọ mí ma wlealọ,” wẹ yọnnu Klistiani Espagne-nu de dọ. Etẹwutu wẹ e tindo pekọ? “Homẹ mítọn hùn dọ mí vò sọn tukla [alọwle] tọn susu si nado sọgan sẹ̀n Jiwheyẹwhe mítọn, Jehovah to gigọ́mẹ dogọ.”

Numọtolanmẹ mọnkọtọn lẹ tin to kọndopọmẹ hẹ nuhe Ohó Jiwheyẹwhe tọn dọ gando tlẹnmẹninọ go. To whenuena apọsteli Paulu to hodọdo whẹho he gando alọwle go lẹ ji, e na ayinamẹ gbọdo ehe dọmọ: “Yẹn dọhlan tlẹnnọ lẹ po asuṣiọsi lẹ po, e yọ́n na yé eyin yé gbọ bo nọ̀ dile yẹn te.” Paulu lọsu ma wlealọ. Ṣigba whẹwhinwhẹ́n tẹwẹ e na nado nọgodona tlẹnmẹninọ? E zinnudeji dọ mẹhe ko wlealọ nọ yin mimá, to whenuena sunnu kavi yọnnu he ma ko wlealọ “nọ jẹtukla na nuhe yin Oklunọ tọn lẹ.” (1 Kọlintinu lẹ 7:8, 32-34) Sinsẹ̀n-bibasi hlan Jehovah wẹ yin onú titengbe lọ he nọ hẹn tlẹnnọ de tindo ayajẹ po pekọ po.

Tlẹnmẹninọ po Lẹndai Dagbe de Po

Zẹẹmẹ Paulu tọn lẹ sọgan vẹawu nado mọnukunnujẹemẹ to lẹdo he mẹ alọwle po vijiji po nọ yin pinpọ́n taidi onú titengbe te. Etomọṣo, Jesu Klisti, mẹhe ma wlealọ ṣigba tindo ayajẹ po pekọ po, donù lẹndai dagbe de go na Klistiani he yin tlẹnnọ lẹ. E dọmọ: “Ojọ̀ delẹ . . . tin he hẹn yede zun ojọ̀ na ahọludu olọn tọn wutu. Mẹhe tin sọgan nado yí ì, gbọ e ni yí ì.”—Matiu 19:12.

To gbesisọmẹ hẹ hogbe enẹlẹ, mẹsusu ko mọdọ tlẹnmẹninọ nọ hùn dotẹnmẹ dote na yé nado sẹ̀n Jiwheyẹwhe matin ayihafẹsẹnamẹnu he alọwle nọ saba bẹhẹn lẹ. (1 Kọlintinu lẹ 7:35) Klistiani fọtọ́n susu lẹ to sinsẹ̀n-basi hlan Jehovah po ayajẹ po matin alọwlemẹ de, podọ yé nọ mọ ayajẹ to alọgigọna mẹdevo lẹ po zohunhun po mẹ.a

Klistiani he ma ko wlealọ susu mọnukunnujẹemẹ dọ e ma yin mẹhe ko wlealọ lẹ kẹdẹ wẹ nọ tindo ayajẹ gba podọ e ma yin tlẹnnọ lẹpo wẹ nọ tin to awubla mẹ gba. To adà awe lẹpo mẹ, mẹdelẹ nọ jaya kavi blawu to whedelẹnu. Na nugbo tọn, Biblu dọ po gbesisọ po dọ alọwle lọsu na ede nọ hẹn “tukla to agbasalan mẹ” wá.—1 Kọlintinu lẹ 7:28.

Tlẹnnọ Na Ninọmẹ lẹ Wutu

Mẹsusu nọ gbọtlẹn, e ma yin sọn ojlo mẹ gba ṣigba na ninọmẹ lẹ wutu. Yé sọgan jlo nado duvivi gbẹdohẹmẹ zohunhun tọn, po owanyi sisosiso he sọgan yin mimọ to tito alọwle tọn mẹ po tọn. Ṣigba na mẹdelẹ, nuhahun akuẹ tọn kavi whẹho devo lẹ sọgan zọ́n bọ yé ma sọgan wlealọ to alọnu din. Klistiani delẹ, he mẹ mẹmẹyọnnu vivẹ gbigbọnọ susu tin te, ko gbọtlẹn na yé magbe nado setonuna ayinamẹ Biblu tọn nado wlealọ “to Oklunọ mẹ kẹdẹ” wutu. (1 Kọlintinu lẹ 7:39) Yé nọ gbọn nugbonọ-yinyin dali dín alọwlemẹ to sinsẹ̀ntọ Jehovah tọn he ko klan yede do wiwe bo yí baptẹm lẹ kẹdẹ ṣẹnṣẹn.

To whedelẹnu, delẹ to omẹ ehelẹ mẹ nọ tindo numọtolanmẹ ṣokẹdẹninọ tọn. To whenuena Klistiani tlẹnnọ de ko yigbe dọ emi nọ tindo numọtolanmẹ mọnkọtọn godo, e dọmọ: “Mí yọ́n osẹ́n Jehovah tọn bo ma na jlo nado wà nuhe Jehovah gbẹwanna to aliho depope mẹ. Mí sọgan jlo gbẹdohẹmẹ alọwlemẹ de tọn, ṣigba mahopọnna whla nẹmu he gbẹtọ lẹ to aihọn mẹ na tẹnpọn nado mọ alọwlemẹ de na mí, mí nọ nọtegli. Mí ma tlẹ nọ jlo nado dogbẹ́ hẹ mayisenọ sunnu kavi yọnnu.” Klistiani enẹlẹ jẹna pipà na ayinamẹ Biblu tọn yíyí do yizan mẹ podọ na nujinọtedo yiaga walọ dagbe tọn go hinhẹn nado sọgan hẹn homẹ Jehovah tọn hùn mahopọnna oyà depope he yé sọgan ji to numọtolanmẹ-liho.

Jiwheyẹwhe Nọ Gọalọ Taun

Jehovah nọ yin nugbonọ na mẹhe nọ do nugbonọ-yinyin yetọn na ẹn hia to whẹho mọnkọtọn lẹ mẹ taidi gbigbẹ́ nado wlealọ hẹ mẹhe ma nọ sẹ̀n ẹn lẹ. Sọn numimọ edetiti tọn mẹ, Ahọlu Davidi sọgan dekunnu dọmọ: ‘Hẹ nugbonọ Jehovah na do ede hia di nugbonọ.’ (Psalm 18:25) Podọ Jiwheyẹwhe dopagbe na mẹhe nọ setonuna ẹn po nugbonọ-yinyin po lẹ dọmọ: “Yẹn ma to na jo we dai gbede, kavi gbẹ́ we gba.” (Heblu lẹ 13:5) Gbọn apajlẹ Jehovah tọn hihodo dali, mí sọgan nọ gbọn homẹdagbe dali pà Klistiani tlẹnnọ he tindo owhe voovo lẹ he tẹdo Ohó Jiwheyẹwhe tọn go po nugbonọ-yinyin po. Mí sọ sọgan nọ hodẹ̀ dọ Jehovah ni na yé huhlọn nado duto avùnnukundiọsọmẹnu yetọn lẹ ji.—Whẹdatọ 11:30-40.

Klistiani tlẹnnọ susu mọdọ mahẹ tintindo to azọ́n Biblu pinplọnmẹ tọn mẹ to gigọ́mẹ nọ hẹn gbẹzan yetọn gọ́ na zẹẹmẹ. Di apajlẹ, lẹnnupọndo Patricia ji, yọnnu tlẹnnọ owhe 35 nkọ mẹvi de he yin gbehosọnalitọ, kavi wẹndagbe-jlatọ whenu-gigọ́ tọn. E dọmọ: “Dile etlẹ yindọ whlepọn susu nọ zọnpọ hẹ tlẹnmẹninọ, e ko hùn dotẹnmẹ dote na mi nado lẹzun gbehosọnalitọ whepoponu tọn. Na yẹn yin tlẹnnọ wutu, tito-to-whinnu ṣie sọgan nọ yin didiọ po awubibọ po, podọ ehe nọ hẹn mi tindo whenu susu dogọ nado plọnnu. Yẹn sọ plọn nado nọ ganjẹ Jehovah go hugan, titengbe to ojlẹ sinsinyẹn lẹ mẹ.”

Hodidọ mọnkọtọn lẹ sinai do opagbe jidevọnamẹ Biblu tọn ji he dọmọ: “Jo ali towe do alọ OKLUNỌ tọn mẹ, dotudo e go ga; ewọ nasọ basi i.” (Psalm 37:5) Na nugbo tọn, sinsẹ̀ntọ nugbonọ Jehovah tọn lẹpo, yèdọ tlẹnnọ kavi mẹhe ko wlealọ, sọgan mọ homẹmiọn po huhlọn po yí sọn hogbe gbọdo lọ lẹ mẹ he dọmọ: ‘Alọgọ ṣie wá sọn Jehovah dè.’—Psalm 121:2.

[Nudọnamẹ odò tọn]

[Blurb on page 9]

“Mẹhe gbọtlẹn nọ jẹtukla na nuhe yin Oklunọ tọn lẹ, le e na wà nuhe jlo Oklunọ do.”​—1 KỌLINTINU LẸ 7:32

[Apotin to weda 9]

Alemimọyi sọn Tlẹnmẹninọ Mẹ

Jesu, he ma wlealọ pọ́n gbede dọmọ: “Núdùdù ṣie wẹ nado wà ojlo mẹhe do mi hlan tọn podọ nado dotana azọ́n etọn.”—Johanu 4:34.

Viyọnnu Filipi tọn ẹnẹ he ma wlealọ lẹ hẹn alọnu ján to ‘dọdai didọ’ mẹ.—Owalọ lẹ 21:8, 9.

Mẹmẹyọnnu Klistiani tlẹnnọ he nọ lá owẹ̀n Ahọluduta lọ tọn lẹ tin to ‘agun daho yọnnusi he to owẹ̀n lọ lá lẹ’ tọn mẹ.—Psalm 68:11.