Kanbiọ Wehiatọ Mítọn lẹ Tọn

Fie Wẹ Awhàn Amagẹdọni Tọn Na Yin Fùnfùn Te?

Awhàn Amagẹdọni tọn ma na yin fùnfùn to awhànfuntẹn tangan depope gba. Kakatimọ, aigba blebu ji wẹ e na yin fùnfùn te. Etẹwutu? Na pipli awe he na funawhàn lọ lẹ klo sọmọ bọ nọtẹn de ma sọgan hẹn yé.

Amagẹdọni sọ yin yinyọnẹn taidi “awhàn azán daho Jiwheyẹwhe Ganhunupo tọn.” Jehovah Jiwheyẹwhe na yí Ovi etọn, Klisti Jesu zan nado bẹ awhànpa angẹli lẹ tọn pli nado hoavùn sọta awhànpa gandutọ ylankan aigba tọn lẹpo to pọmẹ.—Osọhia 16:14; 19:11-16.

Akọta lẹ nọ yin kiklọ to aliho de mẹ gbọn aovi lẹ dali nado kọnawudopọ to awhàn lọ mẹ. Biblu dọho gando “gbigbọ aovi lẹ tọn” go he to tintọ́n yì “ahọlu [gandutọ] aigba po aihọn lẹpo po tọn lẹ dè, nado bẹ yé pli . . . do ofi yè nọ ylọ Amagẹdọni to ogbè Heblu tọn mẹ.”—Osọhia 16:14-16.

Hugan owe Biblu tọn devo depope, owe Osọhia tọn ko fọ́n tadena susu dote to Biblu hiatọ madosọha lẹ ṣẹnṣẹn. Susu wehiatọ he nọ basi zẹẹmẹ paa do owe lọ ji lẹ tọn ko dlẹnalọdo nọtẹn tangan de, fie yé lẹndọ awhàn lọ na bẹjẹeji te, podọ yé nọ tindo ojlo taun to nudepope he to jijọ to lẹdo nọtẹn enẹ tọn mẹ lẹ mẹ. Linlẹn lọ dọ Amagẹdọni dlẹnalọdo nọtẹn tangan de sọgan yin mimọ to zẹẹmẹ he yin kinkàn to Glẹkigbe mẹ do owe Osọhia tọn ji to owhe kanweko ṣidopotọ W.M. gbọn Oeconomus dali, yèdọ zẹẹmẹ he dohó hugan to dehe tin-to-aimẹ lẹ mẹ.

Nado nọgodona pọndohlan he gbayipe to sinsẹ̀ngán he nọ tẹdo nuplọnmẹ hoho lẹ go lẹ ṣẹnṣẹn, John F. Walvoord, he yin anademẹtọ Wehọmẹ Sinsẹ̀n-Nuplọnmẹ Dallas tọn dọ dọ Amagẹdọni yin “awhàn mẹhusudo tọn godo tọn lọ to nudindọn egblemaku aihọn tọn he doazìn do otò he tin to whèzẹtẹn-waji Ohù Méditerranée tọn lẹ mẹ.” Walvoord dọ dọ, nọtẹn tangan he mẹ awhàn daho sọgodo tọn ehe na yin fùnfùn te wẹ “Osó Mẹgido tọn,” yèdọ osó pẹvi de he tin to agewaji Palestine tọn to agbàdo daho de tó.

Ṣigba lẹndai owe Osọhia tọn ma yin nado do nọtẹn tangan de hia mí he nọ yin yiylọ dọ Amagẹdọni gba. Na nugbo tọn, to Glẹkigbe dowhenu tọn mẹ, hogbe bẹjẹeji tọn owe lọ tọn lẹ dohia dọ numimọ lọ lẹ yin zizedonukọnna Johanu gbọn ohia dali. Enẹwutu, sọn whenu dindẹn die gbọ́n wẹ Kunnudetọ Jehovah tọn lẹ ko dọ to owe lọ Études des Écritures, Bladopọ IV he yé zinjẹgbonu mẹ dọmọ: “Mí ma dona donukun dọ gbẹtọ lẹ na yin bibẹpli do Pópló Mẹgido tọn ji to paa mẹ gba.”

Nujijọ he wá aimẹ to tòdaho Mẹgido hohowhenu tọn mẹ lẹ dohia dọ nọtẹn ehe nọ dlẹnalọdo ninọmẹ he mẹ kẹntọ Jiwheyẹwhe tọn lẹ ma sọgan họ̀ngán sọn. Enẹwutu, to Amagẹdọni, Jiwheyẹwhe na hẹn ẹn diun dọ walọ gblezọn po kanyinylan lẹpo po, yin didesẹ sọn aimẹ mahopọnna fidepope he e sọgan yin mimọ te to aigba ji.—Osọhia 21:8.

Mẹhe yiwanna Jehovah Jiwheyẹwhe po Ovi etọn, Jesu Klisti po lẹ ma dona dibuna Amagẹdọni gba. Gbẹtọvi he Jiwheyẹwhe dawhẹna taidi mẹylankan he ma lẹnvọjọ lẹ kẹdẹ wẹ awhàn enẹ na yin fùnfùn sọta. Awhàn Jiwheyẹwhe tọn ma na và mẹlẹpo sudo to pọmẹ gba. Biblu dọmọ: “[Jehovah] yọ́n le e na whlẹn ayiha wiwenọ lẹ do.” (2 Pita 2:9) Opagbe homẹmiọnnamẹ tọn de tin to Psalm 37:34 mẹ dọmọ: “Nọtepọn OKLUNỌ, bosọ to ali etọn yìn, e nasọ ze we daga nado dugu aigba tọn: whenuena yè sán mẹylankan lẹ sẹ̀, hiẹ na mọ ẹn.”