Nuhe Jesu Plọn Mí

Gando Ahọluduta Jiwheyẹwhe Tọn Go

Etẹwẹ Ahọluduta Jiwheyẹwhe tọn?

Ahọluduta Jiwheyẹwhe tọn yin gandudu de he na paṣẹ do aigba blebu ji. Jesu dọmọ: “Enẹwutu le wẹ mì ni nọ hodẹ̀ do: . . . Ahọludu towe ni wá. Ojlo towe ni yin wiwà to aigba go, dile e te to olọn mẹ.”—Matiu 6:9, 10; Daniẹli 2:44.

Mẹnu lẹ wẹ na dugán to Ahọluduta Jiwheyẹwhe tọn mẹ?

Jesu yin jiji nado sọgan wá lẹzun Gandutọ Ahọluduta Jiwheyẹwhe tọn. Angẹli de dọna onọ̀ Jesu tọn dọmọ: “[Jehovah] Jiwheyẹwhe nasọ yí ofìn Davidi otọ́ etọn tọn na ẹn. E nasọ duahọlu.” (Luku 1:30-33) Gbọnvona enẹ, Jesu de delẹ to hodotọ etọn lẹ mẹ nado dugán hẹ ẹ. E dọna apọsteli etọn lẹ dọmọ: “Mìwlẹ wẹ mẹhe ko nọte hẹ mi to whlepọn ṣie lẹ mẹ. Yẹn sọ de ahọludu de hlan mì, dile Otọ́ ṣie de hlan mi do.” (Luku 22:28, 29; Daniẹli 7:27) Hodotọ Jesu tọn 144 000 wẹ na dugán hẹ ẹ.—Osọhia 5:9, 10; 14:1.

Fie wẹ gandudu lọ na yin didoai do?

Ahọluduta Jiwheyẹwhe tọn na dugán sọn olọn mẹ. Jesu dọna devi etọn lẹ dọmọ: “Eyin yẹn yì bo wleawu otẹn de tọn dai na mì, yẹn nasọ lẹgọ, bo hẹn mì yì dee dè; na fihe yẹn te finẹ wẹ mì na nọ̀ ga. . . . Na yẹn [jei] Otọ́ ṣie dè.”—Johanu 14:2, 3, 12; Daniẹli 7:13, 14.

Etẹwẹ Ahọluduta Jiwheyẹwhe tọn na yiwà sọta oylan?

Jesu na de mẹylankan lẹ sẹ̀ sọn aigba ji mlẹnmlẹn. Jesu dọmọ: “Whenuena Ovi gbẹtọ tọn [Jesu] na wá to gigo etọn mẹ, po angẹli lẹpo po e po, whenẹnu wẹ e na sinai to ofìn gigo etọn tọn ji. Nukọn etọn wẹ yè na bẹ akọta lẹpo pli do: e nasọ klan yé dovo sọn yenọzo go . . . Podọ [mẹylankan lẹ] na juyi oyà madopodo mẹ; ṣigba dodonọ lẹ biọ ogbẹ̀ madopodo mẹ.”—Matiu 25:31-34, 46.

Mẹnu lẹ wẹ na nọ̀ aigba ji taidi mẹjidugando Ahọluduta lọ tọn lẹ?

Jesu dọmọ: “Donanọ wẹ homẹmimiọnnọ lẹ; na yé na dugu aigba tọn.” (Matiu 5:5; Psalm 37:29; 72:8) Aigba na gọ́ po mẹhe plọn nado yiwanna ode awetọ lẹ po. Jesu dọna hodotọ etọn lẹ dọmọ: “Osẹ́n yọyọ de wẹ yẹn na hlan mì, Dọ mì ni yiwanna mìnọzo: dile yẹn yiwanna mì, na mìwlẹ ga ni yiwanna mìnọzo. Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.”—Johanu 13:34, 35.

Etẹwẹ Ahọluduta Jiwheyẹwhe tọn na wà na gbẹtọvi he tin to aigba ji lẹ?

Jesu na hẹnazọ̀ngbọna gbẹtọvi lẹ. Whenue Jesu tin to aigba ji, e “dọho ahọludu Jiwheyẹwhe tọn hlan [agundaho lẹ], bosọ hẹnazọ̀ngbọna yé he jlo [nado yin] azọ̀nhẹngbọna lẹ.” (Luku 9:11) To Jesu he yin finfọnsọnku lọ mimọ to numimọ mẹ godo, apọsteli Johanu dọmọ: “Yẹn sọ mọ olọn yọyọ de, po aigba yọyọ de po: . . . Yẹn sọ sè ogbè daho de sọn olọn mẹ to didọmọ, Doayi e go, gòhọ Jiwheyẹwhe tọn tin to gbẹtọ lẹ dè, . . . Jiwheyẹwhe nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba.”—Osọhia 21:1-4.

Ahọluduta Jiwheyẹwhe tọn na hẹn Paladisi gọwá aigba ji. Ylanwatọ he yin hùhù po Jesu po de dọmọ: “Jesu, flin mi, whenuena hiẹ jẹ ahọludu towe mẹ.” Podọ Jesu dọna ẹn dọmọ: “Nugbo wẹ yẹn dọ hlan we [to egbé, NW] hiẹ na nọ̀ hẹ mi to Paladisi mẹ.”—Luku 23:42, 43; Isaia 11:4-9.

Na nudọnamẹ lẹ dogọ, pọ́n weta 8 owe Etẹwẹ Biblu Plọn Mí Taun?a tọn.

[Nudọnamẹ odò tọn]