Jijọho—Nawẹ Hiẹ Sọgan Tindo E Gbọn?

NA MÍ to gbẹnọ to aihọn hunyanhunyan tọn de mẹ wutu, mí dona dovivẹnu sinsinyẹn nado tindo jijọho. Ṣigba, eyin mí tlẹ tindo jijọho jẹ obá de mẹ, mí nọ saba vánkan nado hẹn e go. Etẹwẹ Ohó Jiwheyẹwhe tọn dọ he sọgan gọalọna mí nado tindo jijọho he nọ dẹn-to-aimẹ? Podọ, nawẹ mí sọgan gọalọna mẹdevo lẹ nado wàmọ gbọn?

Mí sọgan dọ dọ mí tindo jijọho nujọnu tọn kiki eyin mí tindo numọtolanmẹ hihọ́ po dagbemẹninọ po tọn. Mí sọ dona wleawuna họntọnjiji he lodo de hẹ mẹdevo lẹ. Hú popolẹpo, mí dona jihọntọn pẹkipẹki hẹ Jiwheyẹwhe nado tindo jijọho he na dẹn-to-aimẹ. Nawẹ mí sọgan wà enẹ gbọn?

Eyin mí nọ setonuna gbedide po nunọwhinnusẹ́n dodo Jehovah tọn lẹ po, mí nọ dohia dọ mí dejido ewọ go, bosọ jlo na tindo haṣinṣan jijọho tọn de hẹ ẹ. (Jel. 17:7, 8; Jak. 2:22, 23) Taidi kọdetọn de, e nọ dọnsẹpọ mí, bo nọ na mí jijọho ahun mẹ tọn. Isaia 32:17 dọmọ: “Ale he dodowiwa nugbo na hẹnwa wẹ jijọho, podọ sinsẹ́n he dodowiwa nugbo na detọ́n wẹ vivomẹninọ po hihọ́ he nọ dẹn-to-aimẹ po.” Mí sọgan tindo jijọho ahun mẹ tọn nujọnu tọn eyin mí nọ setonuna Jiwheyẹwhe sọn ahun mẹ wá.—Isa. 48:18, 19.

Otọ́ olọn mẹ tọn mítọn sọ na mí nunina ayidego tọn devo he na gọalọna mí nado wleawuna jijọho he nọ dẹn-to-aimẹ, enẹ wẹ gbigbọ wiwe etọn.—Owalọ 9:31.

Apọsteli Paulu slẹ jijọho taidi adà “sinsẹ́n gbigbọ tọn” atọ̀ntọ. (Gal. 5:22, 23) Na jijọho nujọnu tọn nọ wá sọn gbigbọ Jiwheyẹwhe tọn mẹ wutu, mí dona joawuna nuyiwadomẹji gbigbọ wiwe tọn nado sọgan wleawuna ẹn. Mì gbọ mí ni gbadopọnna aliho awe he mẹ gbigbọ Jiwheyẹwhe tọn sọgan gọalọna mí nado tindo jijọho te.

Tintan, Ohó gbọdo Jiwheyẹwhe tọn hihia to gbesisọ mẹ nọ gọalọna mí nado wleawuna jijọho. (Salm. 1:2, 3) Dile mí to ayihamẹlẹnpọn do owẹ̀n Biblu tọn ji, gbigbọ Jiwheyẹwhe tọn nọ gọalọna mí nado mọnukunnujẹ pọndohlan Jehovah tọn gando whẹho susu lẹ go mẹ. Di apajlẹ, mí nọ mọ lehe e hẹn jijọho etọn go do, gọna nuhewutu jijọho do yin nujọnu na ẹn sọmọ. Eyin mí yí nuplọnmẹ he mí mọ to Ohó Jiwheyẹwhe tọn mẹ enẹlẹ do yizan mẹ, mí nọ duvivi jijọho tọn dogọ to gbẹzan mítọn mẹ.—Howh. 3:1, 2.

Awetọ, mí dona nọ biọ gbigbọ wiwe Jiwheyẹwhe tọn to odẹ̀ mẹ. (Luku 11:13) Jehovah dopà dọ eyin mí nọ biọ alọgọ emitọn, “jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun [mítọn] po nugopipe apọ̀nmẹ tọn [mítọn] po gbọn Klisti Jesu gblamẹ.” (Flp. 4:6, 7) Eyin mí nọ ganjẹ gbigbọ Jehovah tọn go to odẹ̀ mẹ, Jiwheyẹwhe mítọn na na mí jijọho ahun mẹ tọn de he mẹhe jihọntọn hẹ ewọ pẹkipẹki lẹ kẹdẹ nọ tindo.—Lom. 15:13.

Nawẹ ayinamẹ Owe-wiwe lẹ tọn enẹ yíyí-do-yizan mẹ gọna diọdo he jẹ lẹ bibasi ko gọalọna mẹdelẹ nado duvivi jijọho he nọ dẹn-to-aimẹ tọn—hẹ Jehovah, yedetiti po gbẹtọvi hatọ yetọn lẹ po gbọn?

Agun Klistiani egbezangbe tọn bẹ mẹdelẹ hẹn he nọ “yawu gblehomẹ” to ojlẹ de mẹ wayi, ṣigba todin, yé nọ homẹtọnpọn, jọmẹ, fahomẹ bo nọ yinuwa hẹ mẹdevo lẹ to jijọho mẹ.a (Howh. 29:22) Pọ́n lehe enẹ ko yin nugbo to whẹho wẹnlatọ Ahọluduta lọ tọn awe delẹ tọn mẹ do, mẹhe mọ alọgọ yí nado duto homẹgble ji bo wleawuna jijọho mẹ ninọ hẹ mẹdevo lẹ.

Walọyizan ylankan David tọn yinuwado aliho he mẹ e nọ dọho te ji. Whẹpo ewọ do klan ede do wiwe hlan Jiwheyẹwhe, e nọ saba mọhodọdo mẹdevo lẹ go bo nọ zan hogbe whánsọmẹ tọn lẹ to whẹndo mẹ. Dile ojlẹ to yìyì, David mọdọ emi dona diọ jijọ bo lẹzun gbẹtọ jijọhonọ. Nawẹ ewọ wleawuna jijọho gbọn? E dọmọ: “N’jẹ nunọwhinnusẹ́n Biblu tọn lẹ yí do yizan mẹ ji to gbẹzan ṣie mẹ, podọ taidi kọdetọn de, sisi he yẹn po hagbẹ whẹndo tọn ṣie lẹ po tindo na míde jideji.”

Ninọmẹ he mẹ Rachel whẹ́n te yinuwado walọyizan etọn ji. E yigbe dọmọ: “Etlẹ yin kakajẹ din, n’gbẹ́ to ahidi hẹ numọtolanmẹ homẹgble tọn, na n’yin pinplọn whẹ́n to whẹndo he mẹ mẹlẹpo nọ to homẹgble ji te de mẹ wutu.” Etẹwẹ gọalọna ẹn nado yin jijọhonọ dogọ? E gblọn dọmọ: “Ginganjẹ Jehovah go to odẹ̀ mẹ wẹ.”

David po Rachel po yin apajlẹ awe poun he dohia dọ, mí nọ tindo jijọho eyin mí nọ yí nunọwhinnusẹ́n gbọdo Owe-wiwe tọn lẹ do yizan mẹ, bo nọ ganjẹ gbigbọ Jiwheyẹwhe tọn go nado mọ alọgọ. E họnwun dọ mí sọgan tindo jijọho ahun mẹ tọn he nọ yidogọna kọndopọ to whẹndo mẹ podọ to Klistiani hatọ lẹ ṣẹnṣẹn, mahopọnna dọ mí to gbẹnọ to aihọn ylankan de mẹ. Ṣigba, Jehovah dotuhomẹna mí nado “nọ nọ̀ jijọho mẹ hẹ gbẹtọ lẹpo.” (Lom. 12:18) Be enẹ yọnbasi nugbonugbo ya, podọ ale tẹlẹ wẹ vivẹnudido mítọn nado nọ dín jijọho nọ hẹnwa?

Gbọn lizọnyizọn mítọn gblamẹ, mí nọ basi oylọna gbẹtọ lẹ nado mọaleyi sọn owẹ̀n jijọho tọn he lá mí te gando Ahọluduta Jiwheyẹwhe tọn go lọ mẹ. (Isa. 9:6, 7; Mat. 24:14) Homẹ mítọn hùn dọ mẹsusu wẹ nọ kẹalọyi i. Taidi kọdetọn de, numọtolanmẹ todido matindo tọn masọ nọ húagbọ́ yé ba, mọ yé masọ nọ gblehomẹ gando nuhe to jijọ lẹdo yé lẹ go ba. Kakatimọ, yé tindo todido nujọnu tọn de na sọgodo todin, bo nọ yin whinwhàn nado nọ “dín jijọho bosọ nọ doafọna ẹn.”—Salm. 34:14.

Ṣigba, e ma yin mẹlẹpo wẹ nọ kẹalọyi owẹ̀n mítọn, e whè gbau to tintan whenu. (Joh. 3:19) Eyin etlẹ yinmọ, gbigbọ Jiwheyẹwhe tọn nọ gọalọna mí nado ze wẹndagbe lọ donukọnna yé to aliho jijọho po sisi po tọn mẹ. Gbọnmọ dali, mí nọ hodo anademẹ he Jesu na gando lizọnyizọn lọ go to Matiu 10:11-13 mẹ, fie e na mí ayinamẹ te dọmọ: “Eyin mì biọ owhé de gbè, mì dọnudo whédo lọ. Eyin owhé lọ jẹ, na jijọho he mì jlo na ẹn ni wá e ji; ṣigba eyin e ma jẹ, na jijọho mìtọn ni gọ̀ do mì dè.” Eyin mí hodo ayinamẹ Jesu tọn, mí sọgan lẹkọ to jijọho mẹ, po todido lọ po dọ mí sọgan wá gọalọna mẹlọ to nukọn mẹ.

Mí sọ nọ yidogọna jijọho to whenue mí dọnsẹpọ aṣẹpatọ lẹ po sisi po—etlẹ yin mẹhe sọgan diọnukunsọ azọ́n mítọn lẹ. Di apajlẹ, to otò Aflika tọn de mẹ, aṣẹpatọ lẹ dike bọ nuvẹun glọnalina yé nado nagbè mí nado gbá Plitẹnhọ Ahọluduta tọn lẹ. Po todido lọ po dọ whẹho lọ na yin dididẹ to jijọho mẹ, mẹmẹsunnu de he ko sẹ̀n wayi taidi mẹdehlan to otò Aflika tọn enẹ mẹ, yin azọ́ndena nado yì Afọzedaitọ-gán otò lọ tọn dè to Londres, Angleterre. E dona dọhona aṣẹpatọ lọ gando azọ́n jijọho tọn he Kunnudetọ Jehovah tọn lẹ to wiwà to otò enẹ mẹ go. Etẹwẹ yin kọdetọn lọ?

E dọmọ: “Whenue n’jẹ azọ́nwatẹn lọ, nusisọ́ nawe he nọ dokuavọ namẹ lọ tọn zọ́n bọ n’mọdọ akọ̀ he sin ogbè n’plọn lọ mẹ wẹ e wá sọn. Enẹwutu, n’dọnudo e to ogbè etọn titi mẹ. E paṣa ẹ taun, bọ e kanse mi dọ, ‘Mì jaale, etẹwẹ hẹn mì wá?’ N’dọna ẹn po sisi po dọ n’jlo na mọ Afọzedaitọ-gán lọ wẹ. E tẹkan hlan ogán lọ, mẹhe wá pé mi bo dọnudo mi to ogbè lọ mẹ. Enẹgodo, e dotoaina mi po sọwhiwhe po dile n’to zẹẹmẹ basina ẹn gando azọ́n jijọho tọn Kunnudetọ lẹ tọn go.”

Zẹẹmẹ he mẹmẹsunnu lọ basi po sisi po jla nukunnumọjẹnumẹ agọ̀ po nuvẹun he ogán lọ tindo dai gando azọ́n mítọn go po do. To ojlẹ de godo, gandudu otò Aflika tọn enẹ tọn dealọ sọn alọhẹndotenamẹ họ̀gbigbá tọn lọ lẹ ji. Lehe mẹmẹsunnu lẹ jaya gando kọdetọn jijọho tọn enẹ go do sọ! Na nugbo tọn, nuyiwa hẹ mẹdevo lẹ po sisi po nọ hẹn ale dagbe susu wá—ehe bẹ jijọho hẹn.

To egbehe, omẹ Jehovah tọn lẹ nọ duvivi paladisi gbigbọmẹ tọn de tọn, ehe mẹ jijọho pavava te. A na yidogọna jijọho enẹ dile a to vivẹnudo nado wleawuna adà sinsẹ́n gbigbọ tọn ehe to gbẹzan towe mẹ. Hú popolẹpo, a na tindo nukundagbe Jehovah tọn bo na tindo jijọho susugege podọ tẹgbẹ tọn to aihọn yọyọ Jiwheyẹwhe tọn mẹ.—2 Pita 3:13, 14.