Dẹ̀hiho po Ayihamẹlinlẹnpọn po Yin Dandan Na Lizọnyizọnwatọ Zohunhunnọ Lẹ
1. Etẹwẹ gọalọna Jesu ma nado yin ayihafẹsẹna sọn azọ́n titengbe etọn ji?
1 Jesu ko yí whèjai de zan nado gbọazọ̀nna gbẹtọ lẹ bo yàn aovi lẹ jẹgbonu. To whenue devi etọn lẹ mọ ẹn to wunkẹngbe, yé dọmọ: “Mẹlẹpo wẹ to dindin we,” bo gbọnmọ dali to tulina ẹn nado zindonukọn to azọ́n jiawu etọn wiwà mẹ. Ṣigba, Jesu ma yin ayihafẹsẹna sọn azọ́n titengbe etọn ji gba, enẹ wẹ yẹwheho wẹndagbe lọ tọn didọ. E gblọn dọmọ: “Mì gbọ mí ni yì fidevo, yèdọ glètoho he sẹpọ lẹ mẹ, na yẹn nido dọyẹwheho to finẹ ga, na lẹndai ehe wutu wẹ yẹn do tọ́n.” Etẹwẹ gọalọna Jesu nado hẹn yanwle etọn do ayiha mẹ? E ko fọ́n to afọnnu fuu nado hodẹ̀ bo lẹnayihamẹpọn. (Malku 1:32-39) Nawẹ dẹ̀hiho po ayihamẹlinlẹnpọn po sọgan gọalọna mílọsu nado yin lizọnyizọnwatọ zohunhunnọ lẹ gbọn?
2. Ayihamẹlinlẹnpọn do etẹlẹ ji wẹ sọgan gọalọna mí nado hẹn zohunhun mítọn go to lizọnyizọn lọ mẹ?
2 Etẹlẹ Ji Wẹ Mí Sọgan Lẹnayihamẹpọn Do? Jesu doayi e go dọ gbẹtọ lẹ yin “hinhẹn jẹ agbá bosọ yin kọgbẹ́ e go taidi lẹngbọ lẹ he ma tindo lẹngbọhọtọ de.” (Mat. 9:36) Mọdopolọ, mí sọgan lẹnayihamẹpọn do lehe gbẹtọ lẹ tindo nuhudo wẹndagbe lọ tọn do sọ ji. Mí sọgan lẹnayihamẹpọn do niyaniya-yinyin ojlẹ lẹ tọn ji. (1 Kọl. 7:29) Mí sọgan lẹnayihamẹpọn do azọ́n po jẹhẹnu Jehovah tọn lẹ po, lẹblanulọkẹyi he mí tindo nado yin Kunnudetọ Jehovah tọn lẹ, po adọkunnu họakuẹ gbigbọmẹ tọn he mí plọn to Ohó Jiwheyẹwhe tọn mẹ lẹ bọ gbẹtọ he tin to aigba-denamẹ mítọn ji lẹ ma yọnẹn po ji.—Ps. 77:11-13; Isa. 43:10-12; Mat. 13:52.
3. Whetẹnu wẹ mí sọgan lẹnayihamẹpọn?
3 Whetẹnu Wẹ Mí Sọgan Lẹnayihamẹpọn? Dile Jesu wà do, mẹdelẹ nọ fọ́n to afọnnu fuu to whenue filẹpo to abọẹ. Mẹdevo lẹ mọdọ e yọ́n hugan nado nọ lẹnayihamẹpọn to whèjai whẹpo do yì damlọn. (Gẹn. 24:63) Mí sọgan dín whenu nado nọ lẹnayihamẹpọn, eyin tito mítọn tlẹ ján. Mẹdelẹ nọ wà ehe to whenue yé do mọto. Mẹdevo lẹ nọ yí apadewhe gbọjẹyíyí whèmẹ tọn yetọn zan nado lẹnayihamẹpọn matin ayihafẹsẹnamẹ. Mẹsusu mọdọ ayihamẹlinlẹnpọn, etlẹ yin na ojlẹ kleun de, whẹpo do tindo mahẹ to lizọnyizọn lọ mẹ nọ gọalọna yé nado yí zohunhun po adọgbigbo po do dọyẹwheho.
4. Naegbọn mí dona nọ lẹnayihamẹpọn?
4 Dẹ̀hiho po ayihamẹlinlẹnpọn po na hẹn ojlo mítọn nado sẹ̀n Jehovah siso dogọ, gọalọna mí nado yí nukun nujọnu tọn do pọ́n sinsẹ̀n-bibasi mítọn bo na huhlọn gbemima mítọn nado to yẹwhehodọ zọnmii. Jesu, yèdọ Lizọnyizọnwatọ-gán Jiwheyẹwhe tọn, mọaleyi sọn ayihamẹlinlẹnpọn mẹ, podọ mọ wẹ e na yin na mílọsu lẹ ga.