Hẹn Lizọnyizọn Towe Pọnte Dogọ—Hodọdopọ de Bibẹjẹeji Nado Dekunnu to Aliho Mayin Aṣa Tọn Mẹ

Nuhewutu E Do Yin Nujọnu: Eyin mí to yẹwhehodọ sọn whédegbè jẹ whédegbè, mí ma nọ saba mọ mẹsusu to whégbè. Ṣigba, mí sọgan dukosọna yé to whenue mí dohún kavi to tenọpọn dotó to azọ́nwatẹn etọn, to whenue mí to gbigbọjẹ to azọ́nmẹ kavi to wehọmẹ, po mọmọ po sọyi. Ojlo Jehovah tọn wẹ yindọ mẹlẹpo ni sè owẹ̀n Ahọluduta lọ tọn. (1 Tim. 2:3, 4) To paa mẹ, kunnudide nọ biọ dọ mí ni ze afọdide tintan bo bẹ hodọdopọ de jẹeji.

Lehe Mí Sọgan Wàmọ Do:

• Nọ yí sọwhiwhe do pọ́n mẹhe a jlo na dọhona lọ. Be mẹlọ na yọ́n dọnsẹpọ ya? Be e na yọnbasi na mì nado tindo hodọdopọ dagbe de ya? Wẹnlatọ delẹ nọ tẹnpọn bọ nukun yetọn po mẹlọ tọn po nọ dukosọ bọ yé nọ konu do e. Eyin mẹlọ lọsu konu, yé nọ tẹnpọn nado bẹ hodọdopọ de jẹeji hẹ ẹ.

• Eyin obu to dìdì we, nọ hodẹ̀ kleun de to ahun mẹ.—Nẹh. 2:4; Owalọ 4:29.

• Nọ bẹjẹeji po ohó kleun de po. To whenue Jesu jlo na dọho hẹ nawe Samalianu lọ, e ma bẹjẹeji po hodidọ do Ahọluduta lọ ji po. (Joh. 4:7) To whedelẹnu, mí sọgan bẹjẹeji po mẹpipa de po taidi: “Amọ́, ovi mìtọn lẹ yí oplọn mọọ!” kavi po kanbiọ de po taidi: “Be mì sè nuhe jọ to osọ ya?”

• To whenue mẹlọ lọsu jẹ hodọ hẹ we ji, dín aliho de nado dọyẹwheho na ẹn, amọ́ ni ma yin tlolo he hodọdopọ lọ bẹjẹeji blo. Dike hodọdopọ lọ ni yì to jọwamọ-liho. A sọgan dọho de he na fọnjlodotena mẹlọ bo na whàn ẹn nado kanhose. Di apajlẹ, eyin mì to hodọdo whẹndo ji, a sọgan dọ dọ, “N’mọ ayinamẹ dagbe delẹ do lehe yè sọgan plọn ovi lẹ do ji.” Eyin nujijọ agọe tọn de ji wẹ a to hodọ hẹ ẹ do, a sọgan dọ dọ, “To agọe, n’hia onú dagbedagbe delẹ he dohia dọ to madẹnmẹ nulẹ na pọnte.” Eyin a ma tlẹ penugo bo dekunnu whẹpo hodọdopọ lọ do wá vivọnu, ma gbọjọ blo.

• Nọ hẹn linlinnamẹwe kavi alọnuwe pẹvi he a sọgan na mẹhe do ojlo hia lẹ.

Tẹ́n Ehe Pọ́n to Osun lọ Mẹ:

• To osẹ dopodopo mẹ, tẹnpọn nado nọ bẹ hodọdopọ de jẹeji po yanwle lọ po nado dekunnu to aliho mayin aṣa tọn mẹ.