Opli Sinsẹ̀nzọn Kunnudegbe Tọn He Nọ Jẹ Yanwle Yetọn Kọ̀n

 1. Etẹwẹ yin lẹndai opli sinsẹ̀nzọn kunnudegbe tọn?

¹ To gbèdopo, Jesu pli hẹ 70 to devi etọn lẹ mẹ whẹpo yé do bẹ azọ́n yẹwhehodidọ tọn jẹeji. (Luku 10:1-11) Ewọ na yé tuli bo dohia dọ yé ma tin to ṣokẹdẹ gba, bosọ flinnu yé dọ “Ogán jibẹwawhé lọ tọn,” Jehovah to anadena yé. E sọ na yé anademẹ he na gọalọna yé nado wà azọ́n lọ, bosọ má yé “awe awe.” To egbehe, yanwle dopolọ wẹ opli he mí nọ basi whẹpo do tọ́n na sinsẹ̀nzọn kunnudegbe tọn nọ tindo, enẹ wẹ nado namẹ tuli, bo hẹnmẹ pegan, bosọ basi tito namẹ.

 2. Nawẹ opli sinsẹ̀nzọn kunnudegbe tọn dona dẹnsọ?

² To dai, opli sinsẹ̀nzọn kunnudegbe tọn nọ dẹn na nukunwhiwhe 10 jẹ 15, ehe nọ bẹ tito-bibasi na wẹnlatọ lẹ, aigba-denamẹ dide, po odẹ̀ po hẹn. Ṣigba, ehe ko diọ todin. Bẹsọn osun avril tọn mẹ, opli sinsẹ̀nzọn kunnudegbe tọn ma dona zẹ̀ nukunwhiwhe atọ́n yì ṣinawe go. Podọ, eyin opli ehe bọdo opli agun tọn de go tlolo, e tlẹ dona whè humọ, na mẹhe wá lẹ ṣẹṣẹ duvivi hodọdopọ sinai do Owe-wiwe lẹ ji tọn de. Opli sinsẹ̀nzọn kunnudegbe tọn he ma dẹn de bibasi na na dotẹnmẹ mẹlẹpo nado zan whenu susu dogọ to lizọnyizọn lọ mẹ. Humọ, eyin gbehosọnalitọ lẹ kavi wẹnlatọ lẹ ko jẹ yẹwhehodọ ji jẹnukọnna opli sinsẹ̀nzọn kunnudegbe tọn, ojlẹ kleun de poun wẹ yé na nọtena.

 3. Nawẹ opli sinsẹ̀nzọn kunnudegbe tọn dona yin tito-basina gbọn na e nido hẹn ale susu wá na wẹnlatọ lẹ?

³ Opli sinsẹ̀nzọn kunnudegbe tọn dona yin tito-basina to aliho de mẹ nado hẹn ale susu wá na wẹnlatọ lẹ. To agun susu lẹ mẹ, pipli sinsẹ̀nzọn kunnudegbe tọn lẹ nọ mọaleyi eyin yé pli do ofi voovo lẹ kakati nado hòpli do nọtẹn dopolọ. Ehe nọ hẹn ẹn bọawu nado yawu yì nọtẹn opli sinsẹ̀nzọn kunnudegbe tọn lọ, podọ vlavo nado yawu jẹ aigba-denamẹ lọ ji. Wẹnlatọ lẹ sọgan yawu yin mimá, podọ e nasọ bọawuna nugopọntọ pipli lẹ tọn nado na ayidonugo mẹhe tin to pipli yetọn mẹ lẹ. Pipli mẹho lẹ tọn sọgan lẹnnupọndo ninọmẹ lẹdo lọ tọn lẹ ji bo magbe tito he na yọ́n hugan tọn. Whẹpo opli lọ nado wá vivọnu po odẹ̀ kleun de po, mẹdopodopo dona ko yọ́n mẹhe e na wazọ́n hẹ po fie yé na wazọ́n te po.

 4. Naegbọn mí ma dona nọ pọ́n opli sinsẹ̀nzọn kunnudegbe tọn taidi opli he ma yin nujọnu sọ opli agun tọn devo lẹ?

⁴ Nọ Yí Nukun Nujọnu Tọn Do Pọ́n Ẹn Taidi Opli Agun Tọn Lẹ: Na opli sinsẹ̀nzọn kunnudegbe tọn lẹ nọ yin bibasi nado hẹn ale wá na mẹhe jlo na tọ́n na kunnudegbe lẹ wutu, e ma yin hagbẹ agun lọ tọn lẹpo wẹ na wá. Ṣigba, enẹ ma dohia dọ mí dona nọ yí nukunpẹvi do pọ́n opli enẹlẹ kavi dọ yé ma yin nujọnu di opli agun tọn devo lẹ. Taidi opli agun tọn mítọn lẹpo, opli sinsẹ̀nzọn kunnudegbe tọn yin awuwledainanu de sọn Jehovah dè, ehe nọ gọalọna mí nado whàn ode awetọ hlan owanyi po azọ́n dagbe lẹ po kọ̀n. (Heb. 10:24, 25) Enẹwutu, mẹhe na deanana opli lọ dona wleawu ganji na hodọdopọ lọ nido gbògbéna Jehovah bosọ hẹn ale wá na mẹhe wá lẹ. Wẹnlatọ he jlo na yì kunnudegbe lẹ dona nọ dovivẹnu nado wá opli lọ tẹnmẹ.

 5. (a) Azọngban tẹwẹ nugopọntọ sinsẹ̀nzọn tọn tindo nado basi titona opli sinsẹ̀nzọn kunnudegbe tọn lẹ? (b) Nawẹ mẹmẹyọnnu de dona deanana opli sinsẹ̀nzọn kunnudegbe tọn de gbọn?

⁵ Lehe Anademẹtọ lọ Na Wleawu Do: Whẹpo mẹde nado wleawuna adà opli tọn de ganji bo ze e donukọnna mẹplidopọ lẹ, e dona ko mọ azọ́ndenamẹ lọ yí jẹnukọn. Nudopolọ wẹ e dona yin na opli sinsẹ̀nzọn kunnudegbe tọn. Nugbo wẹ dọ, to whenue pipli kunnudegbe tọn lẹ pli to nọtẹn voovo lẹ, nugopọntọ pipli kunnudegbe tọn lẹ kavi alọgọtọ yetọn lẹ wẹ nọ deanana opli lọ. Ṣigba, to whenue agun lọ blebu pli dopọ na opli sinsẹ̀nzọn kunnudegbe tọn, nugopọntọ sinsẹ̀nzọn tọn dona de mẹde nado deanana opli lọ. Nugopọntọ sinsẹ̀nzọn tọn delẹ nọ má tito-to-whinnu anadidena opli lọ tọn na mẹhe nọ deanana opli lọ lẹpo bo nọ tẹ́ ẹ do owhlẹ nudọnamẹ tọn ji. Nugopọntọ sinsẹ̀nzọn tọn dona nọ yí wuntuntun zan to whenue e to mẹhe na deanana opli lọ lẹ de, bo nọ hẹn do ayiha mẹ dọ kọdetọn dagbe opli ehe tọn sọ sinai do nugopipe mẹpinplọn tọn gọna aliho he mẹ mẹlọ lẹ nọ basi tito nanú te ji. Eyin mẹho, devizọnwatọ lizọnyizọnwiwa tọn, kavi mẹmẹsunnu he pegan de ma tin nado yin dide na azán delẹ, nugopọntọ sinsẹ̀nzọn tọn sọgan de mẹmẹyọnnu he penugo de nado deanana.—Pọ́n hosọ lọ “Eyin Mẹmẹyọnnu de Dona Deanana.”

 6. Naegbọn e do yin dandannu na mẹhe jlo na deanana opli lọ nado wleawu ganji?

⁶ To whenue mí mọ azọ́ndenamẹ yí to Wehọmẹ Lizọnyizọn Yẹwhehọluduta Tọn kavi to Opli Sinsẹ̀nzọn tọn, mí nọ ylọ ẹ dọ nujọnu bosọ nọ wleawuna ẹn ganji. Omẹ vude poun to mí mẹ wẹ na nọte kakajẹ whenue yé jei opli whẹpo do jẹ awuwlena azọ́n yetọn ji. Nukun dopolọ wẹ mí dona nọ yí do pọ́n anadidena opli sinsẹ̀nzọn kunnudegbe tọn. Todin he gànmẹ opli lọ tọn ko yin didepo, dandannu wẹ e yin nado nọ wleawu ganji, na opli lọ nido hẹn ale wá bosọ fó do mẹwhenu. Awuwiwle ganji sọ biọ dọ mẹhe jlo na deanana lọ ni ko mọ aigba-denamẹ he ji yé na wazọ́n te yí jẹnukọn.

 7. Etẹlẹ ji wẹ anademẹtọ lọ sọgan dọhodo?

⁷ Nuhe Ji Mí Na Dọhodo: To whenuena e yindọ ninọmẹ aigba-denamẹ dopodopo tọn nọ gbọnvo, ‘afanumẹ nugbonọ lọ’ ma wleawuna todohukanji tangan de na opli sinsẹ̀nzọn kunnudegbe tọn dopodopo. Apotin lọ “To Opli Sinsẹ̀nzọn Kunnudegbe Tọn de Whenu, Hiẹ Sọgan Gbadopọnna” slẹ nuhe ji yè sọgan dọhodo delẹ. To paa mẹ, opli lọ na yin anadena to aliho hodọdopọ tọn de mẹ. To whedelẹnu, e sọgan bẹ wadohia he yin awuwlena ganji de hẹn kavi nado pọ́n video he yọ́n-na-yizan de sọn jw. org ji. To whenue anademẹtọ lọ to awuwlena opli sinsẹ̀nzọn kunnudegbe tọn, e dona lẹnnupọndo nuhe na na tulimẹ gọna nuhe na hẹn mẹhe jlo na yì kunnudegbe to gbenẹgbe lẹ pegan ji.

 8. Nuhe sọgan hẹn ale wá hugan tẹlẹ wẹ sọgan yin hodọdeji to opli sinsẹ̀nzọn kunnudegbe tọn lẹ whenu to Sibigbe po Sẹgbe po?

⁸ Di apajlẹ, to Sibigbe lẹ, suhugan wẹnlatọ lẹ tọn wẹ nọ ze Atọ̀họ̀-Nuhihọ́ lọ Tọn po Réveillez-vous! po donukọnnamẹ. Mẹsusu he nọ tọ́n to Sibigbe lẹ ma nọ tọ́n to osẹ ṣẹnṣẹn, enẹwutu e sọgan vẹawuna yé nado flin nuzedonukọnnamẹ he yé wleawuna to sinsẹ̀n-bibasi whẹndo tọn whenu. Enẹwutu, e sọgan hẹn ale wá eyin anademẹtọ lọ vọ́ dogbapọnna dopo to nuzedonukọnnamẹ he tin to godo na Lizọnyizọn Ahọluduta Tọn Mítọn lẹ mẹ. Ayinamẹ devo wẹ nado dọhodo onú ehelẹ ji: lehe mí sọgan yí linlin lẹdo lọ mẹ tọn de zan, nujijọ de, kavi whedudu de, nado ze linlinnamẹwe donukọnnamẹ, kavi nuhe mí sọgan dọ nado ze dodonu de dai na dlapọn he na bọdego eyin whétọ lọ kẹalọyi linlinnamẹwe lọ lẹ. Eyin mẹdelẹ to mẹhe wá opli sinsẹ̀nzọn kunnudegbe tọn lẹ mẹ ko do linlinnamẹwe lọ lẹ gbonu to osun lọ mẹ, anademẹtọ lọ sọgan biọ to yé si nado na ayinamẹ kleun delẹ kavi numimọ tulinamẹ tọn delẹ. To Sẹgbe lẹ, anademẹtọ lọ sọgan wà nudopolọ gando nuzedonukọnnamẹ osun lọ tọn go. Nuplọnmẹwe mítọn lẹ, taidi alọnuwe lọ lẹ Wẹndagbe de po Dotoaina Jiwheyẹwhe po gọna owe Biblu Plọn Mí sọgan yin zizedonukọnnamẹ to azán depope ji, enẹwutu anademẹtọ lọ sọgan gbadopọnna to kleun mẹ lehe dopo to zinjẹgbonu ehelẹ mẹ sọgan yin zizedonukọnnamẹ do.

 9. Etẹwẹ sọgan yin hodọdeji to whenue agun lọ to mahẹ tindo to nujijla vonọtaun de mẹ to sẹfifo de?

⁹ Eyin agun lọ to mahẹ tindo to nujijla vonọtaun de mẹ to sẹfifo de, anademẹtọ lọ sọgan dọhodo lehe linlinnamẹwe yọyọ lọ lẹ po oylọ-basinamẹwe lọ kavi alọnuwe pẹvi lọ po sọgan yin zizedonukọnnamẹ do ji, kavi e sọgan dọhodo nuhe sọgan yin wiwà eyin mẹde do ojlo hia ji. Ayinamẹ devo wẹ nado biọ to mẹhe wá lẹ si nado dọ numimọ he do nujọnu-yinyin nujijla mọnkọtọn lẹ tọn hia.

10, 11. Naegbọn awuwiwle wẹnlatọ lẹ tọn do yin nujọnu na opli sinsẹ̀nzọn kunnudegbe tọn nido tindo kọdetọn dagbe?

¹⁰ Lehe Wẹnlatọ lẹ Na Wleawu Do: Wẹnlatọ he wá opli sinsẹ̀nzọn kunnudegbe tọn lẹ lọsu nọ yí adà de wà na opli lọ nido tindo kọdetọn dagbe. Eyin wẹnlatọ lẹ nọ wleawuna lizọnyizọn kunnudegbe tọn jẹnukọn, vlavo to sinsẹ̀n-bibasi whẹndo tọn whenu, yé sọgan tindo nude nado dọ to opli lọ whenu kavi nado má hẹ mẹhe yé to azọ́nwa hẹ lẹ. Awuwiwle ganji sọ nọ biọ dọ mí ni ko yí linlinnamẹwe po owe lẹ po jẹnukọn whẹpo do wá opli sinsẹ̀nzọn kunnudegbe tọn tẹnmẹ, ehe na zọ́n bọ mẹlẹpo na dedo aigba-denamẹ lọ ji ma dọngbàn.

¹¹ Nujọnu wẹ e sọ yin nado nọ wá opli sinsẹ̀nzọn kunnudegbe tọn ojlẹ de whẹpo nido bẹjẹeji. Na nugbo tọn, mí nọ dovivẹnu nado wá opli agun tọn lẹpo do mẹwhenu. Ṣigba, eyin mí nọ gbọwhenu wá opli sinsẹ̀nzọn kunnudegbe tọn, nulẹ ma na yì kannukannu. Gbọnna? Mẹmẹsunnu he deanana opli lọ nọ lẹnnupọndo onú delẹ ji whẹpo do basi titona pipli lọ. Eyin wẹnlatọ vude wẹ wá do mẹwhenu, e sọgan do yemẹpo hlan aigba-denamẹ he ji yè ko wazọ́n te bo ma ko fó de ji. Eyin mẹdelẹ zọ̀n afọ wá opli lọ bọ aigba-denamẹ lọ dẹn, e sọgan má wẹnlatọ ehelẹ po mẹhe tindo mọto kavi kẹkẹ lẹ po. Eyin aigba-denamẹ lọ yin lẹdo he mẹ danuwiwa sù te, e sọgan de mẹmẹsunnu lẹ nado wazọ́n hẹ mẹmẹyọnnu lẹ kavi dọ yé ni ma dẹn do fie pipli mẹmẹyọnnu lẹ tọn te blo. Wẹnlatọ madogánnọ lẹ sọgan yin dide nado wazọ́n to ali he ma tindo odò lẹ ji kavi owhé he ma tindo pèkán he yiaga lẹ. Wẹnlatọ yọyọ lẹ sọgan wazọ́n hẹ mẹhe tindo numimọ hugan lẹ. Ṣigba, eyin wẹnlatọ lẹ gbọwhenu wá, tito lẹ nọ wlu bo nọ saba yin vivọjlado kavi vivọbasi, na mẹhe gbọwhenu wá lẹ nido mọ mẹhe yé na wazọ́n hẹ. Nugbo wẹ dọ, mí sọgan tindo whẹwhinwhẹ́n dagbe nado gbọwhenu to whedelẹnu. Ṣigba, eyin aṣa mítọn wẹ nado nọ gbọwhenu, mí sọgan kanse míde eyin pinpẹn opli sinsẹ̀nzọn kunnudegbe tọn mayọnẹn wẹ zọ́n, kavi mí ma nọ basi tito ganji.

12. Eyin a nọ saba basi tito hẹ mẹhe na wazọ́n hẹ we, etẹlẹ ji wẹ a sọgan lẹnnupọndo?

¹² Wẹnlatọ he wá opli lọ lẹ sọgan basi tito hẹ mẹhe yé na wazọ́n hẹ whẹpo opli lọ nido bẹjẹeji kavi mẹde sọgan yin didena yé. Eyin a nọ saba basi tito nado tọ́n hẹ mẹde, be hiẹ sọgan “hùndonuvo” nado wazọ́n hẹ wẹnlatọ voovo lẹ kakati nido yin mẹdopolọ to whelẹponu ya? (2 Kọl. 6:11-13) Be hiẹ sọgan nọ basi tito nado wazọ́n hẹ wẹnlatọ yọyọ de bo gọalọna ẹn nado hẹn nugopipe mẹpinplọn tọn etọn pọnte dogọ ya? (1 Kọl. 10:24; 1 Tim. 4:13, 15) Nọ dotoai ganji na anademẹ he a mọyi lẹ, ehe bẹ fie a na bẹ yẹwhehodidọ jẹeji te hẹn. Eyin opli lọ ko wá vivọnu, ma tẹnpọn nado diọ tito lẹ blo; dedo aigba-denamẹ lọ ji to afọdopolọji.

13. Eyin mẹlẹpo ylọ opli ehe dọ nujọnu bo yí adà yetọn wà, nawẹ opli sinsẹ̀nzọn kunnudegbe tọn na hẹn ale wá na mí gbọn?

¹³ To whenue devi 70 he Jesu dohlan lọ lẹ ko dọyẹwheho godo, yé “lẹkọwa po ayajẹ po.” (Luku 10:17) Matin ayihaawe, opli he Jesu basi hẹ yé whẹpo yé do yì dọyẹwheho gọalọna yé nado tindo kọdetọn dagbe. To egbehe, opli sinsẹ̀nzọn kunnudegbe tọn sọgan hẹn ale dopolọ wá. Eyin mẹlẹpo ylọ opli ehe dọ nujọnu bo yí adà yetọn wà, opli sinsẹ̀nzọn kunnudegbe tọn na namẹ tuli, hẹnmẹ pegan bo na basi tito namẹ nado hẹn azọ́ndenamẹ mítọn di, enẹ wẹ nado ‘dekunnuna akọta lẹpo.’​—Mat. 24:14.