Nọ Gbadopọnna Ohó Jiwheyẹwhe Tọn Kitokito

1, 2. Aliho dagbe hugan tẹ mẹ wẹ mí gán hia Biblu bosọ plọn ẹn te? Na apajlẹ.

MÍ NI dọ dọ a to linlẹn nado họ̀ owhé de. Etẹlẹ wẹ e na jlo we dọ a ni pọ́n whẹpo do basi nudide towe? Be fọto he do nukọn owhé lọ tọn kẹdẹ hia wẹ ya? Ayihaawe ma tin dọ a na jlo na mọ owhé lọ nukun sọ nukun, zinzọnlin lẹdo e, biọ e mẹ bo yí sọwhiwhe do pọ́n ohọ̀ he to e mẹ lẹ bosọ pọ́n adà etọn lẹpo. E na tlẹ yọ́n hugan eyin a gán dọho hẹ mẹde he yọ́n lehe ohọ̀ lọ yin gbigbá do. E họnwun dọ a na jlo nado mọ lehe owhé he a jlo na họ̀ lọ te to adà etọn lẹpo mẹ.

² Mí gán wà nudopolọ whenue mí to Biblu hia bosọ to pinplọn ẹn. Weyọnẹntọ de yí owẹ̀n Biblu tọn jlẹdo “ohọ̀ daho he yiaga taun bọ dodonu etọn lẹ sọ hẹnai taun de” go. Eyin mọ wẹ, nawẹ mí gán jẹakọ hẹ nuhe to Biblu mẹ lẹpo gbọn? Eyin a nọ nọ̀ plaplaji nado hia ẹ poun, nugbo dodonu tọn lẹ janwẹ a gán plọn, yèdọ “onú dodonu nulila wiwe Jiwheyẹwhe tọn lẹ tọn.” (Heb. 5:12) Kakatimọ, kẹdẹdile a dona biọ owhé lọ gbè nado yọ́n lehe e te do nugbonugbo, nọ gbadopọnna nudọnamẹ họakuẹ he to e mẹ lẹ kitokito. Dopo to aliho dagbe hugan nado plọn Biblu lẹ mẹ wẹ nado mọ lehe adà voovo he e bẹhẹn lẹ tindo kanṣiṣa hẹ yede do. Nọ dovivẹnu nado mọnukunnujẹ nugbo he a yise lẹ gọna nuhewutu a do yí yé sè lẹ mẹ.

 3. Etẹwẹ apọsteli Paulu dotuhomẹna Klistiani hatọ etọn lẹ nado wà, podọ etẹwutu? (Efesunu lẹ 3:14-19)

³ Nado mọnukunnujẹ Ohó Jiwheyẹwhe tọn mẹ to adà etọn lẹpo mẹ, mí dona nọ yí sọwhiwhe do plọn nugbo sisosiso Biblu tọn lẹ. Apọsteli Paulu dotuhomẹna mẹmẹsunnu po mẹmẹyọnnu etọn lẹ po nado nọ yí sọwhiwhe do plọn Ohó Jiwheyẹwhe tọn, na yé nido sọgan “mọnukunnujẹ nuhe gbigblo, tedidi, jiyiyi po sisosiso” nugbo lọ tọn po yin mẹ “to gigọ́ mẹ.” To whenẹnu, yé na “doadọ̀do bo yin hinhẹn lodo” to yise mẹ. (Hia Efesunu lẹ 3:14-19.) Mílọsu dona wà nudopolọ. Mì gbọ mí ni pọ́n lehe mí gán gbadopọnna Ohó Jiwheyẹwhe tọn do nado mọnukunnujẹ zẹẹmẹ họakuẹ he e bẹhẹn lẹ mẹ to gigọ́ mẹ.

 4. Etẹwẹ mí gán wà nado dọnsẹpọ Jehovah dogọ? Na apajlẹ delẹ.

⁴ Taidi Klistiani lẹ, mí ma nọ nọtedo nukunnumimọjẹ onú dodonu tọn Biblu tọn lẹ kẹdẹ mẹ ji. Po alọgọ gbigbọ wiwe Jiwheyẹwhe tọn po, mí nọ to jejeji nado plọn “etlẹ yin onú sisosiso Jiwheyẹwhe tọn lẹ.” (1 Kọl. 2:9, 10) Naegbọn a ma na ze tito oplọn mẹdetiti tọn he na dọ̀n we sẹpọ Jehovah dogọ de dai? Di apajlẹ, a gán gbadopọnna lehe e do owanyi etọn hia devizọnwatọ etọn hohowhenu tọn lẹ do, gọna lehe enẹ dohia dọ e yiwanna hiẹ lọsu do. A gán gbadopọnna tito he Jehovah zedai na sinsẹ̀n-bibasi to Islaeli bo yí i jlẹdo dehe tin-to-aimẹ to egbehe na Klistiani lẹ go. Kavi vlavo a gán yí sọwhiwhe do gbadopọnna dọdai he Jesu hẹndi to gbẹzan po lizọnyizọn aigba ji tọn etọn po whenu lẹ.

 5. Be hosọ de tin he ji a jlo na basi dodinnanu do to oplọn mẹdetiti tọn towe whenu ya?

⁵ Mẹhe nọ yí sọwhiwhe do plọn Biblu delẹ donù onú sisosiso he yé na jlo nado gbadopọnna to gigọ́ mẹ to Ohó Jiwheyẹwhe tọn mẹ lẹ go. Delẹ to nuhe yé dọ lẹ mẹ yin sislẹ do apotin lọ “Hosọ Delẹ Na Oplọn Mẹdetiti Tọn” mẹ. Homẹ towe na hùn taun eyin a yí Index des publications Watch Tower kavi Anademẹwe Dodinnanu Tọn do gbadopọnna hosọ mọnkọ lẹ. Sọwhiwhe yíyí do plọn Biblu gán hẹn yise towe lodo, bo gọalọna we nado “mọ oyọnẹn Jiwheyẹwhe tọn.” (Howh. 2:4, 5) Todin, mì gbọ mí ni dọhodo delẹ to nugbo Biblu tọn sisosiso he mí gán gbadopọnna lẹ mẹ ji.

 6. (a) Vogbingbọn tẹwẹ to tito de po lẹndai de po ṣẹnṣẹn? (b) Naegbọn mí gán dọ dọ lẹndai Jehovah tọn na gbẹtọvi lẹ po aigba po yin “madopodo”? (Efesunu lẹ 3:11)

⁶ Di apajlẹ, lẹnnupọndo nuhe Biblu dọ gando lẹndai Jiwheyẹwhe tọn go ji. Vogbingbọn daho de tin to tito de po lẹndai de po ṣẹnṣẹn. Tito de gán yin yiyijlẹdo ali tangan de he gán plan we yì fie a jei de go. Amọ́, tito lọ gán gboawupo eyin aliglọnnamẹnu delẹ to ali lọ ji. Lẹndai de gán yin yiyijlẹdo fie a jei lọ lọsu go. Mí yọ́n fie mí jei to gbejizọnlin mítọn whenu lọ pẹẹ, amọ́ fisusu wẹ mí gán gbọn sọyi. Eyin ali de ján, mí gán ze devo. Mí dopẹ́ dọ Jehovah ko de “lẹndai madopodo” etọn hia mí vudevude to Biblu mẹ. To aliho de kavi devo mẹ, ewọ nọ do kọdetọn dagbe janwẹ, na e “ko hẹn nulẹpo nado wazọ́n na hẹndi lẹndai etọn tọn.” (Howh. 16:4) Podọ kọdetọn nuhe Jehovah nọ wà lẹ tọn na nọ aimẹ kakadoi. Etẹwẹ yin lẹndai Jehovah tọn, podọ diọdo tẹlẹ wẹ e ko basi nado hẹn ẹn di?

 7. Whenue gbẹtọvi tintan lẹ ṣiatẹ godo, nawẹ Jehovah diọadana aliho he mẹ e na hẹn lẹndai etọn di te gbọn? (Matiu 25:34)

⁷ Jiwheyẹwhe dọna gbẹtọvi tintan lẹ nuhe lẹndai etọn na yé bẹhẹn. Yé dona ‘yin sinsẹ́nnọ bo sudeji bosọ gọ́ aigba ji bo dugán do nudida he to aigba ji lẹpo ji.’ (Jen. 1:28) Whenue Adam po Evi po vẹtoli, bọ ylando biọ whẹndo gbẹtọvi tọn mẹ, ehe ma bẹpla lẹndai Jehovah tọn. E diọada gando aliho he mẹ lẹndai etọn na mọ hẹndi te go. To afọdopolọji, e de nado do Ahọluduta de ai to olọn mẹ he na hẹn lẹndai dowhenu tọn etọn na gbẹtọvi lẹ po aigba po di. (Hia Matiu 25:34.) To ojlẹ sisọ etọn mẹ, Jehovah gbọn owanyi dali do Visunnu plọnji etọn hlan aigba ji nado plọnnu mẹlẹ gando Ahọluduta lọ go bo ze ogbẹ̀ etọn jo nado whlẹn mí sọn ylando po okú po si. Enẹgodo, Jesu yin finfọnsọnku do olọn mẹ nado dugán taidi Ahọlu na Ahọluduta Jiwheyẹwhe tọn. Amọ́, nususu gbẹ́ pò gando lẹndai Jiwheyẹwhe tọn go he ji mí gán lẹnnupọndo sisosiso.

 8. (a) Etẹwẹ yin hosọ tangan Biblu tọn? (b) Dile Efesunu lẹ 1:8-11 basi zẹẹmẹ etọn do, etẹwẹ yin lẹndai titengbe hugan Jehovah tọn? (Pọ́n yẹdide he to wepa ji.)

⁸ Hosọ tangan Biblu tọn wẹ yindọ yinkọ Jehovah tọn na yin whẹsuna dile ewọ to lẹndai etọn na aigba hẹndi gbọn Ahọluduta etọn he to anademẹ Klisti tọn glọ lọ gblamẹ. Lẹndai Jehovah tọn ma gán diọ. E ko hẹn mí deji mlẹnmlẹn dọ emi na hẹn ẹn di po kọdetọn dagbe po. (Isa. 46:10, 11, nudọnamẹ odò tọn lẹ; Heb. 6:17, 18) To nukọn mẹ, aigba lọ na yin didiọzun paladisi fie ovivi pipé podọ dodonọ Adam po Evi po tọn lẹ na “duvivi ogbẹ̀ tọn kakadoi” te. (Salm. 22:26) Podọ, Jehovah tlẹ sọ do lẹndai he gbloadà humọ de to linlẹn mẹ. Lẹndai titengbe hugan etọn wẹ nado kọ̀n nudida nuyọnẹntọ etọn he to olọn mẹ po dehe to aigba ji lẹ po dopọ. To whenẹnu, mẹlẹpo na yí nugbonọ-yinyin do litaina ewọ taidi Nupojipetọ yetọn. (Hia Efesunu lẹ 1:8-11.) Be aliho dagbedagbe he mẹ Jehovah nọ hẹn lẹndai etọn di te ma jiawu na we ya?

 9. Eyin mí nọ hia Biblu, obá tẹ mẹ wẹ mí gán yọ́n nuhe na jọ to sọgodo lẹ jẹ?

⁹ Lẹnnupọndo dọdai he Jehovah dọ to jipa Edẹni tọn mẹ ji, ehe yin kinkandai to Jenẹsisi 3:15 mẹ.b Dọdai lọ donù nujijọ delẹ he na hẹn lẹndai etọn di go, amọ́ bo na wá aimẹ to owhe fọtọ́n susu lẹ godo. Nujijọ ehelẹ bẹ awuwiwlena kúnkan Ablaham tọn, enẹ wẹ hukan whẹndo tọn he mẹ Klisti lọ na wá sọn hẹn. (Jen. 22:15-18) Enẹgodo, to owhe 33 W.M. tọn, yè hẹ̀nadú afọgbẹ̀n Jesu tọn dile dọdai etọn ko yin didọ do. (Owalọ 3:13-15) Nujijọ godo tọn dọdai enẹ tọn, enẹ wẹ ota Satani tọn sisó, na wá aimẹ to owhe 1000 lọ godo. (Osọ. 20:7-10) Podọ Biblu de nususu hia gando nuhe na jọ to whenue okẹ̀n he to titonu Satani tọn po titobasinanu Jehovah tọn po ṣẹnṣẹn na sinyẹn pete go.

10. (a) Nujijọ sọgodo tọn tẹlẹ wẹ na wá aimẹ to madẹnmẹ? (b) Nawẹ mí gán wleawuna ayiha po ahun mítọn po gbọn? (Pọ́n nudọnamẹ odò tọn.)

¹⁰ Lẹnnupọndo nujijọ ayidego tọn he Biblu dọ dọdai yetọn ehelẹ ji. Jẹnukọn whẹ́, akọta lẹ na lá “jijọho po hihọ́ po!” (1 Tẹs. 5:2, 3) “To afọdopolọji,” nukunbibia daho lọ na bẹjẹeji whenue akọta lẹ na yangbé sinsẹ̀n lalo lẹpo to pọmẹ tọn. (Osọ. 17:16) Enẹgodo, awusọhia gigonọ “Visunnu gbẹtọ tọn [he] ja to aslọ olọn tọn lẹ mẹ to huhlọn po gigo daho po mẹ” gán wá aimẹ. (Mat. 24:30) Jesu na dawhẹna gbẹtọvi lẹ bo klan lẹngbọ lẹ dovo na gbọgbọẹ lẹ. (Mat. 25:31-33, 46) Amọ́, Satani ma na blá alọ dogo poun. Na e gbẹwanna sinsẹ̀n-basitọ nugbo Jehovah tọn lẹ taun wutu, e na sisẹ́ bẹplidopọ akọta lẹ tọn de he Biblu ylọdọ Gọgi aigba Magọgi tọn nado yangbé yetọn. (Ezek. 38:2, 10, 11) To ojlẹ de mẹ, pipotọ mẹyiamisisadode lẹ tọn na yin bibẹpli do olọn mẹ nado kọnawudopọ hẹ Klisti po awhànpa olọn tọn etọn lẹ po nado funawhàn Amagẹdọni tọn, enẹ wẹ adà godo tọn nukunbibia daho lọ tọn.c (Mat. 24:31; Osọ. 16:14, 16) Enẹgodo, Gandudu Owhe Fọtọ́n tọn Klisti tọn do aigba ji na bẹjẹeji.—Osọ. 20:6.

11. Etẹwẹ todido ogbẹ̀ madopodo tọn zẹẹmẹdo na we? (Sọ pọ́n yẹdide lọ.)

¹¹ Todin, yí nukun homẹ tọn do pọ́n sọgodo hlan. Biblu dọ dọ Mẹdatọ mítọn “tlẹ ko yí madopodo do ahun [mítọn] mẹ.” (Yẹwh. 3:11) Pọ́n nuhe enẹ na zẹẹmẹdo na we podọ kọdetọn he e na tindo do haṣinṣan towe hẹ Jehovah ji. Owe lọ Dọnsẹpọ Jehovah weda 319 dọ ẹ to aliho he whànmẹ de mẹ dọmọ: “To whenuena mí na ko nọgbẹ̀ na owhe kanweko lẹ, fọtọ́n lẹ, livi lẹ, podọ etlẹ yin liva lẹ godo, mí na yọ́n onú susu gando Jehovah Jiwheyẹwhe go hú lehe mí yọnẹn do todin. Etomọṣo, mí na gbẹ́ sọ mọdọ onú jiawu susugege lẹ gbẹ́ pò he mí ma ko yọnẹn. . . . Ogbẹ̀ mavọmavọ na gọ́ na ayajẹ bo na bẹ onú voovo lẹ hẹn—podọ dindọnsẹpọ Jehovah wẹ na yin adà he nọ hẹn ale wá hugan lọ.” Todin whẹ́, dile mí zindonukọn nado to Ohó Jiwheyẹwhe tọn plọn, nudevo tẹlẹ wẹ mí gán gbadopọnna?

12. Nawẹ mí gán ze nukun mítọn lẹ daga hlan olọn gbọn? Na apajlẹ.

¹² Ohó Jiwheyẹwhe tọn na mí dohia kleun de gando fie Jehovah nọ nọ̀ to “oji aga” go. (Isa. 33:5) Biblu de onú jiawu lẹ hia gando Jehovah po adà olọn mẹ tọn titobasinanu etọn tọn po go. (Isa. 6:1-4; Dan. 7:9, 10; Osọ. 4:1-6) Di apajlẹ, mí gán hianu gando onú jiawu he Ezekiẹli mọ delẹ go whenue “olọn hùndonuvo bọ [e] sọ jẹ numimọ lẹ mọ ji sọn Jiwheyẹwhe dè.”—Ezek. 1:1.

13. Etẹwẹ a yiwanna gando azọngban Jesu tọn to olọn mẹ go, dile Heblu lẹ 4:14-16 basi zẹẹmẹ etọn do?

¹³ Sọ lẹnnupọndo azọngban Jesu tọn to olọn mẹ taidi Ahọlu mítọn he to gandu, podọ taidi Yẹwhenọ Daho mẹtọnhopọntọ de ji. Gbọn ewọ gblamẹ, mí gán dọnsẹpọ “ofìn nukundagbe majẹhẹ tọn” Jiwheyẹwhe tọn lọ to odẹ̀ mẹ, bo biọ lẹblanu po alọgọ po “to ojlẹ sisọ mẹ.” (Hia Heblu lẹ 4:14-16.) Mì gbọ mí ni ma dike azán dopo tata ni juwayi bọ mí ma na lẹnnupọndo nuhe Jehovah po Jesu po ko wà bo gbẹ́ sọ to wiwà na mí sọn olọn mẹ lẹ ji gbede blo. Owanyi he yé do na mí dona whàn ahun mítọn sisosiso bo sisẹ́ mí nado yin zohunhunnọ to sinsẹ̀nzọn po sinsẹ̀n-bibasi mítọn po mẹ.—2 Kọl. 5:14, 15.

14. Etẹwẹ yin dopo to nudagbe hugan he mí gán wà lẹ mẹ nado do obá he mẹ mí yiwanna Jehovah po Jesu po jẹ hia? (Sọ pọ́n yẹdide lọ lẹ.)

¹⁴ Dopo to aliho dagbe hugan nado do obá he mẹ mí yiwanna Jiwheyẹwhe mítọn po Visunnu etọn po jẹ hia lẹ mẹ wẹ nado dovivẹnu bo gọalọna mẹdevo lẹ nado lẹzun Kunnudetọ Jehovah tọn podọ devi Jesu tọn lẹ. (Mat. 28:19, 20) Nuhe apọsteli Paulu wà niyẹn nado dohia dọ emi yọ́n pinpẹn nuhe Jiwheyẹwhe po Klisti po wà na emi tọn. E yọnẹn dọ ojlo Jehovah tọn wẹ yindọ “gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:3, 4) E wazọ́n sinsinyẹn to lizọnyizọn etọn mẹ nado gọalọna mẹsusu dile e penugo do, na e nido sọgan “gbọn aliho he yọnbasi lẹpo mẹ whlẹn mẹdelẹ gán.”—1 Kọl. 9:22, 23.

15. Sọgbe hẹ Salmu lẹ 1:2, etẹwẹ na hẹn ayajẹ wá na mí?

¹⁵ Po gbesisọ po, salmu-kantọ lọ basi zẹẹmẹ gbẹtọ ayajẹnọ he nọ do kọdetọn dagbe de tọn taidi mẹde he ‘nọ mọ awuvivi to osẹ́n Jehovah tọn mẹ,’ bosọ “nọ to ayihamẹlẹnpọn do osẹ́n Etọn ji to okle po ozán po.” (Salm. 1:1-3; Odò.) To whenue lẹdogbedevomẹ-basitọ Joseph Rotherham to zẹẹmẹ basi do wefọ ehe ji, e dọ to owe etọn de mẹ dọ, gbẹtọ dona “do ojlo sinsinyẹn to anademẹ Jiwheyẹwhe tọn mẹ sọmọ bo na nọ dín in, nọ plọn ẹn bosọ nọ yí whenu susu zan nado lẹnnupọn deji.” E yidogọ dọ Biblu-hiatọ de gán “nọ pọ́n azán depope he gbè e ma hia Biblu te taidi azán de he e hẹngu.” (Studies in the Psalms) A gán nọ mọ awuvivi susu to Biblu pinplọn mẹ eyin a nọ na ayidonugo nudọnamẹ họakuẹ etọn lẹpo dile a penugo do bosọ nọ mọ kanṣiṣa he to ṣẹnṣẹn yetọn lẹ. Ayajẹ nankọ die nado nọ gbadopọnna Ohó Jiwheyẹwhe tọn kitokito!

16. Etẹwẹ mí na gbadopọnna to hosọ he bọdego mẹ?

¹⁶ Nugbo họakuẹ he Jehovah nọ plọn mí to Ohó etọn mẹ lẹ ma vẹawu gbau nado mọnukunnujẹemẹ. To hosọ he bọdego mẹ, mí na gbadopọnna dopo to nugbo sisosiso lọ lẹ mẹ, enẹ wẹ tẹmpli daho gbigbọmẹ tọn Jehovah tọn, he Paulu basi zẹẹmẹ etọn to wekanhlanmẹ etọn hlan Klistiani Heblu lẹ mẹ. Odẹ̀ mítọn wẹ yindọ dogbigbapọnna hosọ ehe ni hẹn awuvivi susu wá na we.