Dike Owanyi Ni Whàn We Nado to Yẹwhehodọ Zọnmii!

 1. Etẹwẹ mí sè to opli whemẹwhemẹ tọn 2023 tọn ji?

TO OPLI whemẹwhemẹ tọn 2023 tọn ji,a nukunnumọjẹnumẹ mítọn yin vivọjlado gando nuyise mítọn delẹ go, podọ mí sè nulila ojlofọndotenamẹ tọn delẹ gando lizọnyizọn mítọn go. Di apajlẹ, mí sè dọ mẹdelẹ gán tindo dotẹnmẹ hundote lọ nado wá kọnawudopọ hẹ omẹ Jehovah tọn lẹ etlẹ yin to whenue Babilọni Daho lọ ko yin vivasudo godo. Mí sọ sè dọ bẹsọn novembre 2023, wẹnlatọ lẹ ma nasọ nọ na linlin nuhe yé wà to lizọnyizọn lọ mẹ lẹpo tọn ba. Be diọdo enẹlẹ dohia dọ lizọnyizọn mítọn masọ yin nujọnu sọmọ kavi masọ yin azọ́n niyaniya tọn ba wẹ ya? Paali!

 2. Naegbọn lizọnyizọn mítọn do lẹzun onú niyaniya tọn de dile ai to hinhọ́n? (Malku 13:10)

² Dile ai to hinhọ́n, mọ wẹ lizọnyizọn mítọn to lilẹzun azọ́n niyaniya tọn dogọ do niyẹn. Etẹwutu? Na opodo lọ ko sẹpọ pete wutu. Lẹnnupọndo dọdai he Jesu dọ gando azọ́n yẹwhehodidọ tọn lọ he na yin wiwà to azán godo tọn lẹ mẹ go ji. (Hia Malku 13:10.) Sọgbe hẹ kandai Matiu tọn he dọhodo nujijọ dopolọ ji, Jesu dọ dọ wẹndagbe lọ na yin lilá to aigba fininọ lẹpo ji whẹpo “opodo lọ” nido wá. (Mat. 24:14) Hodidọ enẹ dlẹnalọdo vivọnu pete titonu ylankan Satani tọn. Jehovah ko de ‘azán gọna gànmẹ’ nujijọ he na wá aimẹ to madẹnmẹ lẹ tọn. (Mat. 24:36; 25:13; Owalọ 1:7) Eyin ai dopo họ́n, mí nọ dọnsẹpọ azán enẹ dogọ. (Lom. 13:11) Todin whẹ́, mí dona zindonukọn nado to yẹwhehodọ kakajẹ whenue opodo lọ na wá.

 3. Etẹwẹ nọ whàn mí nado dọyẹwheho?

³ Dile mí to nulẹnpọn do lizọnyizọn mítọn ji, mí na wà dagbe nado yí ahundopo do gbadopọnna kanbiọ ehe: Naegbọn mí do nọ lá wẹndagbe lọ? Do glido, owanyi wẹ nọ whàn mí nado dọyẹwheho. Nuhe mí nọ wà to azọ́n yẹwhehodidọ tọn lọ mẹ nọ do owanyi mítọn hia, enẹ wẹ owanyi mítọn na wẹndagbe lọ, owanyi mítọn na gbẹtọ lẹ, podọ hú popolẹpo, owanyi mítọn na Jehovah po yinkọ etọn po. Mì gbọ mí ni dọhodo owanyi ehelẹ dopodopo ji.

OWANYI MÍTỌN NA WẸNDAGBE LỌ NỌ WHÀN MÍ NADO DỌYẸWHEHO

 4. Nawẹ mí nọ yinuwa gbọn eyin mí sè wẹndagbe de?

⁴ Be a gán flin lehe e ṣí na we whenue a sè wẹndagbe de ya, vlavo viyẹyẹ de wẹ yin jiji to whẹndo towe mẹ, kavi azọ́n he a do hudo etọn taun de wẹ a mọ? Matin ayihaawe, a yí jeje do má owẹ̀n dagbe enẹ hẹ whẹndo po họntọn towe lẹ po. Be onú mọnkọ de jọ whenue a sè owẹ̀n dagbe hugan lọ, yèdọ wẹndagbe Ahọluduta Jiwheyẹwhe tọn lọ tọn ya?

 5. Nawẹ e ṣí na we whla tintan he a plọn nugbo lọ gando Jiwheyẹwhe go? (Sọ pọ́n yẹdide lọ lẹ.)

⁵ Lẹnnupọn pẹẹde yì godo bo flin lehe e ṣí na we whla tintan he a plọn nugbo lọ to Ohó Jiwheyẹwhe tọn mẹ. A plọn dọ Otọ́ olọn mẹ tọn towe yiwanna we bo jlo dọ a ni yin dopo to hagbẹ whẹndo etọn tọn he bẹ sinsẹ̀n-basitọ etọn lẹ hẹn mẹ, dọ e dopà nado hẹn yajiji po awufiẹsa po wá opodo, podọ dọ a gán donukun nado mọ mẹyiwanna towe he kú lẹ bọ yé na gọwá ogbẹ̀ whladopo dogọ to aihọn yọyọ de mẹ, po mọmọ po sọyi. (Malku 10:29, 30; Joh. 5:28, 29; Lom. 8:38, 39; Osọ. 21:3, 4) Nugbo enẹlẹ ko yinuwa do ji we sisosiso. (Luku 24:32) A yiwanna nuhe plọn a te lẹ taun, podọ a ma gán hẹn nugbo họakuẹ enẹlẹ na dewe!—Yijlẹdo Jelemia 20:9 go.

 6. Etẹwẹ a plọn sọn numimọ Ernest po Rose po tọn mẹ?

⁶ Lẹnnupọndo apajlẹ de ji. Nudi owhe ao wẹ mẹmẹsunnu de he nọ yin Ernestb do whenue otọ́ etọn kú. Ernest flin dọmọ: “N’kanse dee dọ: ‘Olọn mẹ wẹ e yì ya? Kavi etọn fó do finẹ ján niyẹn?’ N’nọ whànwu ovi he otọ́ yetọn pò togbẹ̀ lẹ.” Ernest nọ gbọ̀ do tẹpa mẹ bo nọ jẹklo to yọdò otọ́ etọn tọn kọ̀n, bosọ nọ hodẹ̀ dọ: “Jiwheyẹwhe, jaale, n’jlo na yọ́n fie baba ṣie te.” Nudi owhe 17 to okú otọ́ etọn tọn godo, yè ze plọnmẹ Biblu de donukọnna Ernest, bọ e kẹalọyi to afọdopolọji. Homẹ etọn hùn taun nado plọn dọ oṣiọ lẹ ma yọ́n nude, dọ e taidi amlọndọ wẹ yé te podọ dọ Biblu dopà fọnsọnku sọgodo tọn de tọn. (Yẹwh. 9:5, 10; Owalọ 24:15) To godo mẹ, e wá mọ gblọndo na kanbiọ he ko dotukla ẹ na ojlẹ dindẹn lọ lẹ! Homẹ Ernest tọn hùn taun gando nugbo Biblu tọn he e to pinplọn lẹ go. Asi etọn Rose wá hopódona ẹn to nupinplọn lọ mẹ, podọ ewọ lọsu yiwanna wẹndagbe Ahọluduta lọ tọn ga. To 1978, yé yí baptẹm. Yé yí homẹhunhun do má nuyise họakuẹ yetọn hẹ whẹndo po họntọn yetọn lẹ po, gọna mẹdepope he jlo nado dotoai. Taidi kọdetọn de, Ernest po Rose po ko gọalọna gbẹtọ 70 linlán nado yí baptẹm.

 7. Etẹwẹ nọ jọ eyin mí yiwanna nugbo Biblu tọn sọn ahun mẹ wá? (Luku 6:45)

⁷ Na nugbo tọn, eyin mí yiwanna nugbo Biblu tọn sọn ahun mẹ wá, mí ma gán nọma dọhona mẹdevo lẹ gandego. (Hia Luku 6:45.) Mí nọ do numọtolanmẹ dopolọ he devi Jesu tọn lẹ tindo to owhe kanweko tintan whenu, yé dọmọ: “Mí ma sọgan nọma dọ nuhe mí ko mọ bosọ sè lẹ.” (Owalọ 4:20) Mí yiwanna nugbo lọ sọmọ bọ mí nọ jlo na má ẹn hẹ mẹsusu dile e yọnbasi do.

OWANYI MÍTỌN NA GBẸTỌ LẸ NỌ WHÀN MÍ NADO DỌYẸWHEHO

 8. Etẹwẹ nọ whàn mí nado lá wẹndagbe lọ na mẹdevo lẹ? (Pọ́n apotin lọ “Yiwanna Gbẹtọ Lẹ—Hẹn Yé Zun Devi.”) (Sọ pọ́n yẹdide lọ.)

⁸ Taidi Jehovah po Visunnu etọn po, mí yiwanna gbẹtọ lẹ. (Howh. 8:31; Joh. 3:16) Onú mẹhe ma “tindo Jiwheyẹwhe” bo masọ tindo “todido depope” lẹ tọn nọ wàlẹblanu na mí sisosiso. (Efe. 2:12) Yé do nuhahun susu lẹ, podọ míwlẹ tindo pọngbọ lọ, enẹ wẹ wẹndagbe Ahọluduta Jiwheyẹwhe tọn. Owanyi po lẹblanu he mí do na omẹ mọnkọ lẹ po nọ whàn mí nado wà nuhe go mí pé lẹpo nado hẹn wẹndagbe lọ jẹ yé dè. Owẹ̀n họakuẹ enẹ gán zọ́n bọ yé na do todido, e nasọ gọalọna yé nado zan gbẹzan he yọ́n hugan lọ todin, podọ e na na yé todido “ogbẹ̀ nujọnu tọn lọ” tọn, enẹ wẹ ogbẹ̀ madopodo to aihọn yọyọ Jiwheyẹwhe tọn mẹ.—1 Tim. 6:19.

 9. Avase tẹwẹ mí nọ na gando sọgodo go, podọ etẹwutu? (Ezekiẹli 33:7, 8)

⁹ Owanyi he mí do na mẹdevo lẹ sọ nọ whàn mí nado na yé avase gando vivọnu aihọn ylankan ehe tọn he to dindọnsẹpọ lọ go. (Hia Ezekiẹli 33:7, 8.) Onú kọmẹnu po hagbẹ whẹndo tọn mayisenọ mítọn lẹ po tọn nọ biọlanmẹna mí. Mẹsusu nọ zan gbẹzan yetọn domọ poun bo ma tlẹ nọ yọnẹn dọ nude to nukọn ja, yèdọ “nukunbibia daho de . . . ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din, lala, e ma nasọ jọ gbede ba.” (Mat. 24:21) Mí jlo dọ yé ni yọ́n nuhe na jọ to ojlẹ whẹdida tọn enẹ whenu, enẹ wẹ yindọ sinsẹ̀n lalo na yin didesẹ bọ vasudo mlẹnmlẹn titonu ylankan ehe blebu tọn na bọdego to Amagẹdọni whenu. (Osọ. 16:14, 16; 17:16, 17; 19:11, 19, 20) Odẹ̀ mítọn wẹ yindọ mẹsusu dile e yọnbasi do ni kẹalọyi avase lọ bo wá kọnawudopọ hẹ mí to sinsẹ̀n-bibasi wiwe-ṣeke mẹ todin. Amọ́, nawẹ nulẹ na yì do na mẹhe ma payi avase lọ go to ojlẹ ehe mẹ lẹ, ehe bẹ hagbẹ whẹndo tọn yiwanna mítọn lẹ hẹn?

10. Naegbọn e do yin onú niyaniya tọn de nado to avase na gbẹtọ lẹ zọnmii?

¹⁰ Dile hosọ he jẹnukọn dohia do, Jehovah gán jlo nado whlẹn mẹhe diọlinlẹn whenue yé mọ vasudo Babilọni Daho lọ tọn godo lẹ. Eyin mọ wẹ, nujọnu taun wẹ e yin hugan gbede pọ́n nado zindonukọn bo to avase na gbẹtọ lẹ. Lẹnnupọndo ehe ji: Yé gán wá lẹnnupọndo nuhe mí nọ dọna yé todin lẹ ji to whenẹnu. (Yijlẹdo Ezekiẹli 33:33 go.) Vlavo yé gán wá flin avase he mí na yé bo yin whinwhàn nado kọnawudopọ hẹ mí to sinsẹ̀n-bibasi wiwe-ṣeke mẹ whẹpo whenu nido fẹ́. Taidi gàntọ-ṣọ́tọ lọ to Filipi, yèdọ mẹhe wá diọlinlẹn kiki to whenue “aigba sisọsisọ daho de jọ” godo, vlavo mẹdelẹ he ma kẹalọyi owẹ̀n lọ todin gán wá diọlinlẹn to whenue Babilọni Daho lọ na yin vivasudo, yèdọ nujijọ de he na dán aihọn lọ blebu.—Owalọ 16:25-34.

OWANYI MÍTỌN NA JEHOVAH PO OYÍN ETỌN PO NỌ WHÀN MÍ NADO DỌYẸWHEHO

11. Nawẹ mí nọ na Jehovah gigo, gbégbò po huhlọn po gbọn? (Osọhia 4:11) (Sọ pọ́n yẹdide lọ lẹ.)

¹¹ Whẹwhinwhẹ́n titengbe he wutu mí nọ lá wẹndagbe lọ wẹ owanyi mítọn na Jehovah Jiwheyẹwhe po oyín wiwe etọn po. Mí nọ pọ́n lizọnyizọn mítọn hlan taidi aliho de nado pà Jiwheyẹwhe mítọn he mí yiwanna lọ. (Hia Osọhia 4:11.) Mí nọ yí ahundopo do kọngbedopọ dọ Jehovah Jiwheyẹwhe wẹ jẹ nado mọ gigo, gbégbò po huhlọn po yí sọn sinsẹ̀n-basitọ nugbonọ etọn lẹ dè. Mí nọ na ewọ gigo po gbégbò po whenue mí má kunnudenu he họnwun lọ hẹ mẹdevo lẹ dọ ewọ wẹ “dá nulẹpo,” podọ ewọ wẹ zọ́n bọ mí do togbẹ̀. Mí nọ na ẹn huhlọn, enẹ wẹ nugopipe mítọn whenue mí yí whenu, huhlọn po nutindo mítọn lẹ po zan nado do mahẹ to lizọnyizọn lọ mẹ to gigọ́ mẹ dile ninọmẹ mítọn na mí dotẹnmẹ etọn do. (Mat. 6:33; Luku 13:24; Kol. 3:23) Do glido, mí nọ yiwanna nado dọho gando Jiwheyẹwhe he mí yiwanna lọ go. Mí sọ nọ yin whinwhàn nado dọhona mẹdevo lẹ gando yinkọ etọn, podọ gando omẹ alọpa he e yin go. Etẹwutu?

12. Nawẹ mí nọ klan yinkọ Jehovah tọn do wiwe to lizọnyizọn mítọn mẹ gbọn?

¹² Owanyi he mí do na Jehovah nọ whàn mí nado klan yinkọ etọn do wiwe. (Mat. 6:9) Mí nọ jlo na yí adà de wà nado klọ masin he Satani gbọn lalo ylankan lẹ dali kọ̀n do oyín etọn go sẹ̀. (Jen. 3:1-5; Jobu 2:4; Joh. 8:44) To lizọnyizọn mítọn mẹ, mí nọ to jejeji nado yiavùnlọna Jiwheyẹwhe mítọn bo nọ dọ nugbo lọ gando ewọ go na mẹhe jlo na dotoai lẹpo. Mí nọ jlo dọ mẹlẹpo ni yọnẹn dọ jẹhẹnu titengbe etọn wẹ owanyi, podọ aliho gandudu tọn etọn yin dodo bosọ sọgbe, bọ Ahọluduta etọn na doalọtena yajiji lẹpo to madẹnmẹ bosọ hẹn jijọho po ayajẹ po wá na whẹndo gbẹtọvi tọn. (Salm. 37:10, 11, 29; 1 Joh. 4:8) Eyin mí yiavùnlọna yinkọ dagbe Jehovah tọn to lizọnyizọn mítọn mẹ, mí nọ klan oyín etọn do wiwe. Homẹ mítọn sọ nọ hùn, na mí to nuhe mí dona wà lọ wà taidi Kunnudetọ Jehovah tọn lẹ wutu. Gbọnna?

13. Naegbọn homẹ mítọn do nọ hùn nado yin yiylọdọ Kunnudetọ Jehovah tọn lẹ? (Isaia 43:10-12)

¹³ Jehovah ko de mí taidi “kunnudetọ” etọn lẹ. (Hia Isaia 43:10-12.) To owhe delẹ die wayi, wekanhlanmẹ de sọn Hagbẹ Anademẹtọ lọ dè dọmọ: “Gbégbò daho hugan he depope to mímẹ gán tindo wẹ nado yin yiylọdọ Kunnudetọ Jehovah tọn de.”c Naegbọn mí do dọ mọ? Lẹnnupọndo apajlẹ ehe ji. Eyin a do hudo mẹhe na yin kunnudetọ towe to owhẹ̀ nukọn de tọn, mẹhe a yọnẹn bo dejidego wẹ a na de, enẹ wẹ mẹde he yinkọ dagbe etọn na zọ́n bọ mẹlẹ na ganjẹ kunnudide etọn go. Eyin Jehovah de mí nado yin Kunnudetọ etọn lẹ, na e yọ́n mí ganji bosọ deji dọ mí na dekunnu dọ emilẹ wẹ yin Jiwheyẹwhe nugbo dopo kẹdẹ lọ wutu wẹ. Mí nọ mọdọ gbégbò daho wẹ e yin nado yin Kunnudetọ etọn lẹ, enẹwutu, mí nọ yí dotẹnmẹ he hundote lẹpo zan nado hẹn yinkọ etọn zun yinyọnẹn, podọ nado dohia dọ onú ylankan he yin didọ dokọna ẹn lẹ depope ma yin nugbo. Eyin mí wàmọ, mí nọ nọgbẹ̀ sọgbe hẹ yinkọ he homẹ mítọn hùn dọ mí tindo to ota lọ, enẹ wẹ Kunnudetọ Jehovah tọn lẹ.—Salm. 83:18; Lom. 10:13-15.

MÍ NA TO YẸWHEHODỌ KAKAJẸ OPODO

14. Onú dagbe tẹlẹ wẹ mí to jejeji nado mọ to sọgodo?

¹⁴ Lehe mí to jejeji nado mọ nujijọ he to nukọn ja lẹ do sọ! Po dona Jehovah tọn po, todido mítọn wẹ yindọ mẹsusu dogọ ni kẹalọyi nugbo lọ whẹpo nukunbibia daho lọ nido bẹjẹeji. Humọ, homẹ mítọn hùn dọ etlẹ yin to nukunbibia daho lọ whenu, enẹ wẹ to ojlẹ he dobu hugan to whenuho gbẹtọvi tọn mẹ lọ mẹ, mẹsusu gán gbẹ́ tọ́n sọn aihọn ylankan Satani tọn mẹ bo na wá gọ́ na mí nado pà Jehovah!—Owalọ 13:48.

15, 16. Etẹwẹ mí dona zindonukọn nado to wiwà, podọ kakajẹ whetẹnu?

¹⁵ Todin whẹ́, mí do azọ́n bo na wà. Mí do lẹblanulọkẹyi lọ nado do mahẹ to azọ́n he ma na vọ́ yin wiwà gbede de mẹ, enẹ wẹ wẹndagbe Ahọluduta Jiwheyẹwhe tọn lilá gbọn aigba lọ blebu ji. To ojlẹ dopolọ mẹ, mí dona zindonukọn nado to avase na gbẹtọ lẹ. Mẹlẹ dona yọnẹn dọ vivọnu titonu ylankan ehe tọn to dindọnsẹpọ po awuyiya po. To whenẹnu, eyin ojlẹ whẹdida tọn lọ wá, yé na yọnẹn dọ Jehovah Jiwheyẹwhe dè wẹ owẹ̀n he mí lá lọ wá sọn.—Ezek. 38:23.

¹⁶ To whelọnu lo, etẹwẹ mí magbe nado wà? Na owanyi nọ whàn mí wutu, enẹ wẹ owanyi na wẹndagbe lọ, owanyi na gbẹtọ lẹ podọ hú popolẹpo owanyi na Jehovah Jiwheyẹwhe po oyín etọn po, mí na zindonukọn nado yí homẹhunhun, linlẹn niyaniya-yinyin tọn po zohunhun po do to yẹwhehodọ kakajẹ whenue Jehovah na dọ dọ “E pé!”