Nawẹ Kunnudetọ Jehovah Tọn lẹ Nọ Yin Azọ́nplọn Na Lizọnyizọn Yetọn Gbọn?

Kunnudetọ Jehovah tọn lẹ nọ mọ azọ́nplọnmẹ tẹgbẹ tọn de yí to adà gbẹzan Klistiani tọn lẹpo mẹ, etlẹ yin to lizọnyizọn gbangba tọn yetọn mẹ. Lizọnyizọn ehe wẹ azọ́n he Jesu degbena hodotọ etọn lẹpo nado nọ wà, enẹ wẹ nado dọyẹwheho bosọ plọnmẹ gando wẹndagbe Ahọluduta Jiwheyẹwhe tọn go. (Matiu 24:14; 28:19, 20) Mí nọ mọ azọ́nplọnmẹ enẹ yí to opli sẹmẹsẹmẹ tọn mítọn lẹ ji podọ to plidopọ whemẹwhemẹ tọn voovo mítọn lẹ ji. Kunnudetọ Jehovah tọn he tindo azọngban to agun mẹ kavi to titobasinanu lọ mẹ lẹ nọ mọ azọ́nplọnmẹ yí yinukọn dogọ to wehọmẹ Biblu pinplọn tọn vonọtaun lẹ mẹ.

To hosọ ehe mẹ

Azọ́nplọnmẹ tẹwẹ Kunnudetọ Jehovah tọn lẹ nọ mọyi?

Opli agun tọn lẹ. To osẹ lẹpo mẹ, mí nọ yì opli awe to nọtẹn sinsẹ̀n-bibasi tọn mítọn lẹ mẹ he nọ yin yiylọdọ Plitẹnhọ Ahọluduta tọn lẹ. To paa mẹ, opli dopo nọ yin bibasi to osẹ ṣẹnṣẹn, bọ devo nọ yin bibasi to sẹfifo. Mẹlẹpo wẹ sọgan wá podọ mí ma nọ yí agbánmẹ-kuẹ.

Opli osẹ ṣẹnṣẹn tọn. Mí nọ plọn lehe mí gán hẹn wehihia, hodọdopọ, hodidọ gbangba tọn, gọna yẹwhehodidọ po mẹpinplọn mítọn po pọnte dogọ do. Mí nọ mọ azọ́nplọnmẹ ehe yí gbọn hodidọ lẹ, hodọdopọ lẹ, wadohia lẹ, podọ gbọn nuzedonukọnnamẹ video tọn lẹ gblamẹ. Azọ́nplọnmẹ ehe nọ gọalọna mí nado tindo kọdetọn dagbe dogọ dile mí to owẹ̀n Biblu tọn lá na mẹdevo lẹ bosọ to Biblu plọn hẹ jlodotọ lẹ. Mẹhe wá opli mítọn lẹpo wẹ nọ mọaleyi sọn azọ́nplọnmẹ ehe mẹ. Hú popolẹpo, opli mítọn lẹ nọ hẹn yise mítọn lodo to Jiwheyẹwhe mẹ gọna owanyi he mí do na ewọ po yisenọ hatọ mítọn lẹ po.
Opli sẹfifo tọn. Opli adà awenọ ehe nọ bẹjẹeji po hodidọ na mẹlẹpo de po, ehe nọ yin awuwlena titengbe na mẹhe ma yin kunnudetọ lẹ. Adà awetọ opli lọ tọn yin hodọdopọ kanbiọ po gblọndo po tọn he sinai do hosọ he tin to zinjẹgbonu oplọn tọn Atọ̀họ̀-Nuhihọ́ lọ Tọn de mẹ ji.a Hosọ lọ lẹ nọ dọhodo nuplọnmẹ Biblu tọn lẹ gọna nunọwhinnusẹ́n he nọ gọalọna mí to lizọnyizọn mítọn po gbẹzan egbesọ tọn mítọn lẹ mẹ po ji bosọ nọ basi zẹẹmẹ do yé ji.

Plidopọ lẹdo tọn po plidopọ daho lẹ po. To whemẹwhemẹ, mí nọ basi plidopọ voovo atọ̀n, bọ agun susu lẹ nọ wá. Nujijọ ayajẹnọ ehelẹ nọ zinnudo hosọ Biblu tọn tangan de ji bo nọ bẹ hodidọ, wadohia, hokansemẹ, po video lẹ po hẹn. Dile e nọ yindo na opli agun tọn mítọn lẹ, plidopọ lẹdo tọn po plidopọ daho lẹ po nọ yidogọna oyọnẹn Biblu tọn mítọn bosọ nọ gọalọna mí nado yin yẹwhehodọtọ podọ mẹplọntọ kọdetọn dagbenọ lẹ. Whladopo dogọ, mẹlẹpo wẹ vò nado wá podọ agbánmẹ-kuẹ depope ma nọ yin nina.

Wehọmẹ Biblu pinplọn tọn lẹ na Kunnudetọ Jehovah tọn lẹ

Nado mọ azọ́nplọnmẹ devo lẹ yí dogọ, Kunnudetọ Jehovah tọn delẹ nọ yin oylọ-basina wá wehọmẹ Biblu pinplọn tọn voovo lẹ. Wehọmẹ tẹlẹ wẹ? Etẹwẹ yin yanwle yetọn podọ ojlẹ nẹmu wẹ yé nọ dẹn na? Podọ mẹnu lẹ wẹ gán yí wehọmẹ enẹlẹ?

Wehọmẹ Sinsẹ̀nzọn Gbehosọnalitọ Tọn

Yanwle: Nado plọnazọ́n lizọnyizọnwatọ whenu-gigọ́ tọn lẹ he nọ yin yiylọdọ gbehosọnalitọ lẹ,b nado yin kọdetọn dagbenọ dogọ to azọ́n yẹwhehodidọ po mẹpinplọn tọn po mẹ. Azọ́nplọnmẹ lọ nọ bẹ hodọdopọ klasi tọn, wadohia, hodidọ, gọna azọ́n pọmẹ tọn lẹ hẹn.
Ojlẹ he e nọ dẹn na: Azán ṣidopo.
Mẹhe gán yì lẹ: Mẹhe ko fó owhe tintan yetọn taidi gbehosọnalitọ lẹ wẹ nọ yin oylọ-basina wá wehọmẹ lọ. Gbehosọnalitọ ojlẹ dindẹn tọn he ma yì wehọmẹ lọ to owhe atọ́n he wayi lẹ gblamẹ, gán vọ́ yin oylọ-basina wá wehọmẹ lọ.

Wehọmẹ Wẹndagbe-Jlatọ Ahọluduta lọ Tọn lẹ Tọn

Yanwle: Nado na azọ́nplọnmẹ vonọtaun lizọnyizọnwatọ whenu gigọ́ tọn numimọnọ lẹ. Wehọmẹvi lẹ nọ hẹn nugopipe yẹwhehodidọ po mẹpinplọn tọn yetọn lẹ po pọnte, bosọ nọ plọn hosọ Biblu tọn lẹ sisosiso. Susu gbedewema yitọ lẹ tọn nọ yin didohlan fihe nuhudo wẹndagbe-jlatọ lẹ tọn sù te lẹ.
Ojlẹ he e nọ dẹn na: Osun awe.
Mẹhe gán yì lẹ: Gbehosọnalitọ lẹ gán doalọwemẹ nado yì eyin yé jẹ nubiọtomẹsi delẹ kọ̀n bọ ninọmẹ yetọn gán na yé dotẹnmẹ nado sẹ̀n to fidepope he nuhudo tin te.

Wehọmẹvi lẹ ze alọ daga nado na gblọndo to Wehọmẹ Wẹndagbe-Jlatọ Ahọluduta lọ tọn de whenu.

Wehọmẹ Mẹho Agun Tọn lẹ Tọn

Yanwle: Nado gọalọna mẹhoc agun tọn lẹ nado penukundo azọngban yetọn lẹ go to agun mẹ taidi mẹpinplọn po azọ́n lẹngbọhọtọ tọn po, bosọ hẹn owanyi yetọn na Jiwheyẹwhe po yisenọ hatọ yetọn lẹ po tọn siso dogọ.—1 Pita 5:2, 3.
Ojlẹ he e nọ dẹn na: Azán atọ́n.
Mẹhe gán yì lẹ: Mẹhe ṣẹṣẹ yin pipà taidi mẹho agun tọn lẹ gọna mẹho agun tọn numimọnọ he ma yì wehọmẹ lọ to owhe atọ́n he wayi lẹ gblamẹ lẹ wẹ nọ yin oylọ-basina.

Wehọmẹ Nugopọntọ Lẹdo Tọn po Asi Yetọn lẹ po Tọn

Yanwle: Nado plọnazọ́n lizọnyizọnwatọ tomẹyitọ lẹ, he nọ yin yiylọdọ nugopọntọd lẹdo tọn lẹ, nado penukundo azọngban yetọn lẹ go po kọdetọn dagbe po dogọ. (1 Timoti 5:17) Tito azọ́nplọnmẹ tọn lọ sọ nọ gọalọna mẹho agun tọn ehelẹ po asi yetọn lẹ po nado mọ nuplọnmẹ yí dogọ gando Owe-Wiwe lẹ go.
Ojlẹ he e nọ dẹn na: Osun dopo.
Mẹhe gán yì lẹ: Nugopọntọ lẹdo tọn yọyọ po asi yetọn lẹ po nọ yin oylọ-basina to whenue yé ko basi owhe dopo to azọ́ndenamẹ yetọn mẹ godo. Enẹgodo, yé sọ nọ yin oylọ-basina to nudi owhe atọ́n lẹpo godo.

Wehọmẹ Lizọnyizọn Ahọluduta Tọn

Yanwle: Nado gọalọna mẹho agun tọn po devizọnwatọ lizọnyizọnwiwa tọn lẹ poe nado penukundo azọngban yetọn lẹ go sọgbe hẹ ninọmẹ, ayilinlẹn po nuhudo alọnu tọn lẹ po. (2 Timoti 3:1) Wehọmẹ lọ nọ yin bibasi to owhe kleun lẹ gblamẹ.
Ojlẹ he e nọ dẹn na: E nọ diọ, e nọ saba yin azán dopo.
Mẹhe gán yì lẹ: Nugopọntọ lẹdo tọn lẹ, mẹho agun tọn po devizọnwatọ lizọnyizọnwiwa tọn lẹ po.

Wehọmẹ Sinsẹ̀nzọn Bẹtẹli Tọn

Yanwle: Nado gọalọna mẹhe to Bẹtẹlif lẹ nado tindo kọdetọn dagbe to azọ́n yetọn mẹ bosọ hẹn owanyi yetọn na Jiwheyẹwhe po ode awetọ po siso deji.
Ojlẹ he e nọ dẹn na: Azán atọ́n daa.
Mẹhe gán yì lẹ: E nọ yin bibiọ to hagbẹ whẹndo Bẹtẹli tọn yọyọ lẹ si nado yì wehọmẹ enẹ. Hagbẹ whẹndo Bẹtẹli tọn ojlẹ dindẹn tọn he ma ko yì wehọmẹ lọ to owhe atọ́n he wayi lẹ gblamẹ sọ nọ yin oylọ-basina ga.

Wehọmẹ Biblu Pinplọn Giliadi Tọn

Yanwle: Nado gọalọna wehọmẹvi lọ lẹ nado wleawuna pinpẹn-nutọn-yinyọnẹn sisosiso na Ohó Jiwheyẹwhe tọn na yé nido yí nuhe yé plọn lẹ zan. (1 Tẹsalonikanu lẹ 2:13) Klistiani he whèwhín to gbigbọmẹ he nọ yin didohlan Giliadi lẹ tlẹ sọ nọ yọ́n-na-yizan dogọ na titobasinanu Jehovah tọn po azọ́n Biblu pinplọnmẹ lẹdo aihọn pé tọn lọ po. Mẹhe yí gbedewema lẹ gán yin didohlan aigba-denamẹ de ji kavi wekantẹn alahọ tọn de, vlavo to otò yetọn titi mẹ kavi to otò devo mẹ.
Ojlẹ he e nọ dẹn na: Osun atọ́n.
Mẹhe gán yì lẹ: Wekantẹn alahọ tọn lẹ nọ biọ to lizọnyizọnwatọ whenu gigọ́ tọn he yin dide delẹ si nado doalọwemẹ. Wehọmẹ lọ nọ yin bibasi to États-Unis to Nọtẹn Nupinplọn tọn Watchtower tọn to Patterson, New York.

Wehọmẹ Hagbẹ Wedegbẹ́ Alahọ Tọn lẹ po Asi Yetọn lẹ po Tọn

Yanwle: Nado plọnazọ́n Hagbẹ Wedegbẹ́ Alahọg tọn lẹ nado deanana azọ́n he nọ yin wiwà to wekantẹn alahọ tọn de, gọna nuwiwa gbigbọmẹ tọn Kunnudetọ Jehovah tọn lẹ tọn to otò kavi otò voovo he alahọ yetọn to anadena lẹ mẹ.
Ojlẹ he e nọ dẹn na: Osun awe.
Mẹhe gán yì lẹ: Tatọ́-Tẹnnọ Kunnudetọ Jehovah tọn lẹ tọn wẹ nọ basi oylọna Hagbẹ Wedegbẹ́ Alahọ tọn delẹ po asi yetọn lẹ po nado wá wehọmẹ lọ, ehe nọ yin bibasi to États-Unis to Nọtẹn Nupinplọn tọn Watchtower tọn to Patterson, New York.

Etẹ ji wẹ azọ́nplọnmẹ he nọ yin nina Kunnudetọ lọ lẹ nọ sinai do?

Biblu wẹ yin owe tangan he ji azọ́nplọnmẹ he Kunnudetọ Jehovah tọn lẹ tọn nọ mọyi lẹ nọ sinai do. Mí yise dọ Biblu yin gbigbọdo gbọn Jiwheyẹwhe dali podọ e bẹ anademẹ he yọ́n hugan lẹ hẹn na adà gbẹzan Klistiani tọn lẹpo.—2 Timoti 3:16, 17.

Be Kunnudetọ Jehovah tọn lẹ dona suahọ na azọ́nplọnmẹ yetọn wẹ ya?

Lala. Vọnu wẹ nupinplọn lọ. Nuwiwa Kunnudetọ Jehovah tọn lẹ tọn nọ yin godonọna gbọn nunina sọn ojlo mẹ wá lẹ dali.—2 Kọlintinu lẹ 9:7.

a Biblu po owe sinai do Biblu ji mítọn lẹ po, gọna video mítọn lẹ tin to aimẹ to nọtẹn Intẹnẹt tọn mítọn jw.org ji.

b Gbehosọnalitọ de yin Kunnudetọ he ko yí baptẹm apajlẹ dagbenọ de, enẹ wẹ sunnu kavi yọnnu bo tindo ojlo lọ nado yí gànmẹ sọha de zan to osun dopodopo mẹ nado má owẹ̀n Biblu tọn hẹ mẹdevo lẹ.

c Mẹho agun tọn lẹ yin Klistiani sunnu he whẹ́n to gbigbọ-liho lẹ he nọ plọnnumẹ sọn Owe-wiwe lẹ mẹ bosọ nọ basi hihọ́na omẹ Jehovah tọn lẹ gbọn ayinamẹ po tuli nina yé po dali. Yè ma nọ suahọ yé na azọ́n yetọn.

d Nugopọntọ lẹdo tọn yin lizọnyizọnwatọ whenu gigọ́ tọn de he nọ dla agun voovo he to lẹdo etọn mẹ lẹ pọ́n to sẹmẹsẹmẹ. E nọ na tuli mẹmẹsunnu po mẹmẹyọnnu gbigbọmẹ tọn etọn lẹ po gbọn hodidọ sinai do Biblu ji lẹ dali bosọ nọ wazọ́n hẹ yé to lizọnyizọn lọ mẹ.

e Devizọnwatọ lizọnyizọnwiwa tọn lẹ nọ hẹn azọ́ndenamẹ voovo lẹ di do ota mẹmẹsunnu po mẹmẹyọnnu yetọn lẹ po tọn mẹ. Ehe nọ hẹn yọnbasi na mẹho lẹ nado mọ whenu dogọ na azọ́n mẹpinplọn po lẹngbọhọtọ tọn po.

f Bẹtẹli wẹ yinkọ he yin nina wekantẹn alahọ tọn Kunnudetọ Jehovah tọn lẹ tọn. Lizọnyizọnwatọ whenu gigọ́ tọn he nọ sẹ̀n to finẹ lẹ nọ nọgodona nuwiwa kunnudetọ he to aigba-denamẹ he to alahọ lọ glọ lẹ tọn.

g Wedegbẹ́ Alahọ tọn nọ bẹ sunnu gbigbọnọ he pegan atọ̀n kavi humọ hẹn.

Nawẹ Kunnudetọ Jehovah tọn lẹ ko mọaleyi sọn azọ́nplọnmẹ yetọn mẹ gbọn?

“Na n’nọ kuwinyan wutu, e nọ vẹawuna mi nado dọho hẹ mẹhe n’ma jẹakọ hẹ lẹ gando Biblu go. Amọ́, azọ́nplọnmẹ he n’mọyi to opli osẹ ṣẹnṣẹn tọn ji lẹ ko zọ́n bọ n’wleawuna adọgbigbo podọ ehe ko hẹn azọ́nyinyọnẹn po mẹpinplọn ṣie po pọnte dogọ. Hodọdopọ ṣie hẹ hagbẹ agun lọ tọn gọna azọ́nwatọgbẹ́ ṣie lẹ ko sọ pọnte dogọ.”—Natasha, États-Unis.
“Wehọmẹ Wẹndagbe-Jlatọ Ahọluduta lọ tọn lẹ tọn he n’yì gọalọna mi nado wleawuna jẹhẹnu jijọ-di-Jiwheyẹwhe tọn delẹ taidi owanyi, homẹfa po dagbewà po. Taidi kọdetọn de, n’tindo numọtolanmẹ lọ dọ n’lẹzun Klistiani, họntọn po kọmẹnu he pọnte dogọ de po todin. Wehọmẹ lọ sọ plọn mi lehe yè nọ basi dodinnanu do hosọ Biblu tọn lẹ ji gọna lehe yè nọ basi zẹẹmẹ do Ohó Jiwheyẹwhe tọn ji bọ e na jẹ ahun mẹdevo lẹ tọn mẹ do.”—Stephen, Nigéria.
“Wehọmẹ Mẹho Agun Tọn lẹ tọn he n’yì gọalọna mi nado wleawuna whiwhẹ he sin hudo n’do nado sẹ̀n taidi mẹho agun tọn de. Hodidọ lọ lẹ whàn mi nado mọdọ nujọnu wẹ e yin nado hodo apajlẹ Jesu tọn.”—Luca, Italie.
“Wehọmẹ Lizọnyizọn Ahọluduta tọn lọ plọn mi dọ nujọnu wẹ e yin nado yọ́n dọnsẹpọ, jọmẹ, bosọ nọ yin zohunhunnọ to nuyiwa ṣie hẹ mẹdevo lẹ mẹ. N’plọn dọ nuwiwa ṣie hẹ mẹdevo lẹ dona nọ gọna owanyi e ma dona yin nuwiwa mọmọ tọn de poun.”—Samuel, Royaume-Uni.
“Wehọmẹ Giliadi tọn gọalọna mí nado yí Ohó Jiwheyẹwhe tọn do gbeje míde pọ́n. (Jakọbu 1:22-25) Gbọnmọ dali, mí mọ fihe mí dona basi vọjlado te lẹ, na nuhe dù gbẹtọ-yinyin mítọn gọna sinsẹ̀nzọn mítọn na Jehovah. Mí sọ plọn nado nọ lẹn dagbe mẹdevo lẹ tọn pọ́n hugan mítọn titi bosọ nọ na dotẹnmẹ owanyi nado nọ deanana mí to nuhe mí nọ dọ bosọ nọ wà lẹpo mẹ.”—Elnathan po Princess po, Philippines.