Naegbọn Sinsẹ̀n Klistiani Tọn Wunmẹ Voovo Wẹ Tin?

Gbẹtọ lẹ ko yí nuplọnmẹ Jesu Klisti tọn lẹ zan nado do sinsẹ̀n Klistiani tọn voovo lẹ ai. Ṣigba, Biblu dohia dọ sinsẹ̀n Klistiani tọn nugbo wunmẹ dopo gee wẹ tin. Whẹwhinwhẹ́n susu lẹ wẹ do ehe hia, ṣigba lẹnnupọndo atọ̀n ehelẹ ji poun.

1. Jesu dọ dọ emi plọnmẹ “nugbo lọ,” podọ Klistiani dowhenu tọn lẹ ylọ sinsẹ̀n yetọn dọ sinsẹ̀n “nugbo lọ.” (Johanu 8:32; 2 Pita 2:2; 2 Johanu 4; 3 Johanu 3) Hodidọ ehelẹ dohia dọ mẹhe sin nuplọnmẹ lẹ ma sọgbe hẹ nuplọnmẹ Jesu tọn lẹ ma to sinsẹ̀n Klistiani nugbo lọ basi.

2. Biblu plọn Klistiani lẹ dọ ‘yemẹpo ni nọ dọ onú dopolọ.’ (1 Kọlintinu lẹ 1:10) Ṣigba, sinsẹ̀n Klistiani tọn susu lẹ wẹ nọ jẹagọdo nuplọnmẹ dodonu tọn lẹ he do nuhe Klistiani yinyin bẹhẹn lẹ hia. Sinsẹ̀n voovo ehe lẹpo ma sọgan yin nugbo.​—1 Pita 2:21.

3. Jesu dọ dọdai dọ mẹsusu wẹ na sọalọkọ́n dọ emi yin Klistiani, ganṣo yé na gboawupo nado setonuna gbedide emitọn lẹ podọ emi na gbẹ́ omẹ mọnkọtọn lẹ dai. (Matiu 7:21-23; Luku 6:46) Nukọntọ sinsẹ̀n tọn lẹ na hẹn sinsẹ̀n-bibasi nugbo flu nado doafọna ojlo yedetiti tọn lẹ bo na gbọnmọ dali hẹn mẹsusu buali. (Matiu 7:15) Ṣigba, mẹdevo lẹ na yiwanna sinsẹ̀n Klistiani oklọ tọn, na nuhe yé jlo na sè lẹ wẹ yè nọ dọna yé kakati nido yin nugbo Biblu tọn.​—2 Timoti 4:3, 4.

To apajlẹ Jesu tọn he gando likun po ogbé lẹ po go mẹ, e dọ dọdai dọ sinsẹ̀n nugbo Klistiani tọn na pehẹ atẹṣiṣi daho de. (Matiu 13:24-30, 36-43) Na ojlẹ dindẹn de, yè ma na yọ́n vogbingbọn to sinsẹ̀n nugbo Klistiani tọn po Klistiani lalo lẹ po ṣẹnṣẹn. Dile Jesu dọ dọdai etọn do, atẹṣiṣi lọ gbayipe taun to okú apọsteli lẹ tọn godo. (Owalọ lẹ 20:29, 30) Dile etlẹ yindọ nuplọnmẹ atẹṣitọ delẹ tọn sọgan gbọnvo na devo lẹ tọn, sinsẹ̀n Klistiani oklọ tọn voovo ehelẹ “ko jo nugbo lọ do.”​—2 Timoti 2:18.

Jesu sọ dọ dọdai dọ vogbingbọn he tin to Klistiani nugbo po lalo po ṣẹnṣẹn na wá họnwun to nukọn mẹ. Ehe ko jọ to ojlẹ mítọn he yin “vivọnu titonu de tọn” mẹ.​—Matiu 13:30, 39.