2 Ahọlu lẹ

23 Ahọlu sọ dowẹn hlan, bọ yé ylọ mẹho Juda po Jelusalẹm po tọn lẹpo pli.+ 2 Enẹgodo, ahọlu hẹji yì ohọ̀ Jehovah tọn mẹ to pọmẹ hẹ mẹho Juda tọn lẹpo, mẹhe nọ nọ̀ Jelusalẹm lẹpo, yẹwhenọ lẹ po yẹwhegán lẹ po—yèdọ gbẹtọ lọ lẹpo, sọn yọpọ ji jẹ mẹho ji. E sọ hia nuhe to owe+ alẹnu+ tọn lọ he ko yin mimọ to ohọ̀ Jehovah tọn mẹ lẹpo na yé.+ 3 Ahọlu nọte to dòtin lọ pá bo basi alẹnu de* to Jehovah nukọn+ dọ ewọ na yí ahun lẹpo po alindọn* lẹpo po do hodo Jehovah bo payi gbedide etọn lẹ, nuflinmẹ etọn lẹ po osẹ́ndoai etọn lẹ po go gbọn tonusisena ohó alẹnu lọ tọn lẹ dali, ehe ko yin kinkan do owe ehe mẹ. Gbẹtọ lọ lẹpo sọ yigbena alẹnu lọ.+

4 Whenẹnu, ahọlu degbena Hilkia+ yẹwhenọ daho lọ, yẹwhenọ he bọdego lẹ po họ̀njinọtọ lẹ po nado bẹ nuyizan he yin bibasi na Baali, na dòtin wiwe* lọ+ podọ na awhànpa olọn tọn lẹpo sẹ̀ sọn tẹmpli Jehovah tọn mẹ. Ewọ sọ mẹ̀ yé to gbonu Jelusalẹm tọn to ogle Kidlọni tọn mẹ bo bẹ afín yetọn lẹ yì Bẹtẹli.+ 5 Enẹwutu, e yàn yẹwhenọ yẹwhe-jonọ tọn lẹ sẹ̀, mẹhe ahọlu Juda tọn lẹ ko de nado nọ basi avọ́sinsan mimẹ̀ to ofi yiaga lẹ to tòdaho Juda tọn lẹ mẹ podọ to lẹdo Jelusalẹm tọn lẹ mẹ, gọna mẹhe nọ basi avọ́sinsan mimẹ̀ na Baali, owhè, osun, pipli sunwhlẹvu lẹ tọn lẹ po awhànpa olọn tọn lẹpo po lẹ.+ 6 E ze dòtin wiwe* lọ+ sẹ̀ sọn ohọ̀ Jehovah tọn mẹ jẹ gbonu Jelusalẹm tọn, to Agbàdo Kidlọni tọn mẹ, e sọ mẹ̀ ẹn+ to Agbàdo Kidlọni tọn mẹ bo lì i pọ́dọ́pọ́dọ́ bosọ vúnvún kọ́gudu etọn do yọdò omẹ paa lẹ tọn ji.+ 7 Humọ, e họ́ ohọ̀ sunnu galọtọ tẹmpli mẹ tọn+ lẹ tọn lẹ liai, yèdọ ehe ko to ohọ̀ Jehovah tọn mẹ bọ yọnnu lẹ nọ lọ̀n tẹmpli pẹvi lẹ to finẹ na dòtin wiwe* lọ.

8 Enẹgodo, e de yẹwhenọ lọ lẹpo sẹ̀ sọn tòdaho Juda tọn lẹ mẹ bo hẹn ofi yiaga he yẹwhenọ lọ lẹ ko nọ basi avọ́sinsan mimẹ̀ te lẹ zun fie ma jẹna sinsẹ̀n-bibasi, yèdọ sọn Geba+ kaka yì Beẹli-ṣeba.+ E sọ họ́ ofi yiaga họngbo ji tọn lẹ he to họngbo Jọṣua ogán tòdaho lọ tọn tọn ji bo to amiyọnwhé eyin yè gbọn họngbo lọ nù biọ tòdaho lọ mẹ. 9 Yẹwhenọ ofi yiaga lọ lẹ tọn ma nọ sẹ̀n to agbà Jehovah tọn kọ̀n to Jelusalẹm,+ ṣigba yé nọ dù akla madotọ́n dopọ hẹ nọvisunnu yetọn lẹ. 10 E sọ hẹn Tofẹti+ he to Agbàdo Visunnu Hinọmi tọn* lẹ tọn+ mẹ zun fie ma jẹna sinsẹ̀n-bibasi, na mẹdepope nikaa hẹn visunnu etọn kavi viyọnnu etọn jugbọn miyọ́n mẹ na Molẹki.+ 11 Humọ, e dosẹ́n dọ osọ́ he ahọlu Juda tọn lẹ ko klandovo na sinsẹ̀n-bibasi hlan* owhè lẹ ma dona nọ gbọn họ̀nù* Natani-melẹki ahọluzọnwatọ họ̀nmẹ tọn lọ tọn he to agbàsẹnu lọ mẹ biọ ohọ̀ Jehovah tọn mẹ; e sọ yí miyọ́n do fiọ osọ́-kẹkẹ he tin na sinsẹ̀n-bibasi owhè tọn+ lọ lẹ. 12 Podọ ahọlu họ́ agbà he ahọlu Juda tọn lẹ ko doai do họta+ abò aga tọn Ahazi tọn lẹ, gọna agbà he Manasse ko doai do awánu ohọ̀ Jehovah tọn awe mẹ lẹ.+ E gídí yé bo vúnvún kọ́gudu yetọn do Agbàdo Kidlọni tọn mẹ. 13 Ahọlu sọ hẹn ofi yiaga he to Jelusalẹm nukọn lẹ zun fie ma jẹna sinsẹ̀n-bibasi, yèdọ ofi yiaga he to hùwaji* na Osó Gbakija tọn* he Sọlomọni ahọlu Islaeli tọn ko doai na Aṣitolẹti he yin yẹwhe-yọnnu hiọawu Sidoninu lẹ tọn; podọ na Kemọṣi he yin yẹwhe hiọawu Moabi tọn; podọ na Milkomi+ he yin yẹwhe hiọawu Amọninu lẹ tọn.+ 14 E gbà dòtin wiwe zannu tọn lọ lẹ hányán bo sán dòtin wiwe* lẹ liai+ bosọ bẹ ohú gbẹtọ tọn lẹ gọ́ otẹn yetọn mẹ. 15 E sọ họ́ agbà he to Bẹtẹli lọ liai, gọna ofi yiaga he Jeloboami visunnu Nebati tọn ko basi, ehe hẹn Islaeli nado waylando.+ To whenue e ko họ́ agbà lọ po ofi yiaga lọ po godo, e mẹ̀ ofi yiaga lọ bo lì i pọ́dọ́pọ́dọ́ bosọ fiọ dòtin wiwe* lọ.+

16 Whenue Josia lilẹ́ bo mọ yọdò he to osó lọ ji lẹ, e biọ dọ ohú lẹ ni yin bibẹ sọn yọdò lọ lẹ mẹ bo yin mimẹ̀ to agbà lọ ji nado hẹn ẹn zun fie ma jẹna sinsẹ̀n-bibasi, sọgbe hẹ ohó Jehovah tọn he ko yin didọ gbọn omẹ Jiwheyẹwhe nugbo lọ tọn dali, mẹhe ko dọ dọdai dọ onú ehelẹ na jọ.+ 17 Enẹgodo, e dọmọ: “Zannu he nọ nọ̀ yọdò nù tẹ mọ wẹ n’te to dọ́n?” Sunnu tòdaho lọ tọn lẹ dọna ẹn dọmọ: “Yọdò omẹ Jiwheyẹwhe nugbo lọ tọn he wá sọn Juda+ bo dọ dọdai nuhe a wà sọta agbà Bẹtẹli tọn lọ tọn wẹ.” 18 Ewọ sọ dọmọ: “Mì jo e do whii. Mì dike mẹdepope dotukla ohú etọn lẹ blo.” Enẹwutu, yé ma dotukla ohú etọn lẹ gọna ohú yẹwhegán he ko wá sọn Samalia lọ tọn lẹ.+

19 Josia sọ de ohọ̀ sinsẹ̀n-bibasi tọn he to ofi yiaga he to tòdaho Samalia tọn mẹ lẹpo sẹ̀,+ ehe ahọlu Islaeli tọn lẹ ko gbá nado hẹn homẹgble Jiwheyẹwhe, e sọ wà hẹ yé kẹdẹdile e ko wà to Bẹtẹli do.+ 20 E sọ yí yẹwhenọ ofi yiaga lọ lẹ tọn he to finẹ lẹpo do sanvọ́ to agbà lọ lẹ ji bo mẹ̀ ohú gbẹtọ tọn lẹ to yé ji.+ Enẹgodo, e lẹkọyi Jelusalẹm.

21 Todin, ahọlu degbena gbẹtọ lọ lẹpo dọmọ: “Mì basi hùnwhẹ Juwayi tọn+ hlan Jehovah Jiwheyẹwhe mìtọn dile e yin kinkan do owe alẹnu tọn lọ mẹ do.”+ 22 Hùnwhẹ Juwayi tọn ehe nkọ de ma ko yin bibasi sọn ojlẹ he mẹ whẹdatọ lẹ to whẹda to Islaeli, kavi to azán ahọlu Islaeli tọn lẹ tọn gọna ahọlu Juda tọn lẹ tọn lẹpo gbè.+ 23 Ṣigba, to owhe 18tọ Ahọlu Josia tọn mẹ, Juwayi ehe yin bibasi hlan Jehovah to Jelusalẹm.

24 Josia sọ de afinyọnnọ lẹ, dọṣẹdọtọ lẹ,+ boṣiọ tẹlafimi tọn* lẹ,+ yẹwhe hiọawu* lẹ gọna awuhiọnu he to aigba Juda po Jelusalẹm po tọn ji lẹpo sẹ̀ nado hẹn ohó Osẹ́n lọ tọn lẹ+ he yin kinkan do owe he Hilkia yẹwhenọ lọ ko mọ to ohọ̀ Jehovah tọn mẹ+ lọ mẹ di. 25 Ahọlu ewọ nkọ de ma ko tin jẹnukọnna ẹn he yí ahun etọn lẹpo, alindọn* etọn lẹpo+ po huhlọn etọn lẹpo po do lẹkọ do Jehovah dè, sọgbe hẹ Osẹ́n Mose tọn pete; mọjanwẹ mẹdevo depope masọ fọ́n to godo etọn bo taidi ewọ do niyẹn.

26 Ṣogan, Jehovah ma lẹ́ sọn homẹgble sinsinyẹn etọn he jizò do Juda ji lọ mẹ, na homẹgblenu he Manasse ko wà nado hẹn homẹgble E lẹpo wutu.+ 27 Jehovah dọmọ: “Yẹn na de Juda lọsu sẹ̀ sọn nukọn ṣie,+ kẹdẹdile yẹn ko de Islaeli sẹ̀ do;+ podọ yẹn na gbẹkọ tòdaho he yẹn ko de ehe go, yèdọ Jelusalẹm, gọna ohọ̀ lọ he yẹn ko dọ gandego dọ, ‘Oyín ṣie na to finẹ tẹgbẹ.’”+

28 Na nuhe dù otàn Josia tọn he pò, yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya? 29 To azán etọn lẹ gbè, Falo Neko ahọlu Egipti tọn wá nado pé ahọlu Asilia tọn to Tọ̀sisa Euflate kọ̀n, Ahọlu Josia sọ tọ́nyi nado tọ́nawhàn ẹn; ṣigba to whenue Neko mọ ẹn, e hù i to Mẹgido.+ 30 Devizọnwatọ etọn lẹ sọ ze oṣiọ etọn do osọ́-kẹkẹ de mẹ sọn Mẹgido wá Jelusalẹm bo dì i do yọdò etọn mẹ. Enẹgodo, mẹhe to aigba lọ ji lẹ de Jehoahazi visunnu Josia tọn bo yiamisisadode e bosọ yí i do doahọlu do otẹn otọ́ etọn tọn mẹ.+

31 Owhe 23 wẹ Jehoahazi+ tindo to whenue e duahọlu, e sọ dugán to Jelusalẹm na osun atọ̀n. Oyín onọ̀ etọn tọn wẹ Hamutali+ viyọnnu Jelemia tọn sọn Libna. 32 E sọ jẹ nuhe ylan to nukun Jehovah tọn mẹ lẹ wà ji, sọgbe hẹ nuhe tọgbo etọn lẹ ko wà lẹpo.+ 33 Falo Neko+ wle e sú do Libla+ to aigba Hamati tọn ji nado glọnalina ẹn ma nado dugán to Jelusalẹm, e sọ gbò akuẹ talẹnti* fataka tọn 100 po talẹnti sika tọn dopo po na otò lọ.+ 34 Humọ, Falo Neko yí Eliakimi visunnu Josia tọn do doahọlu do otẹn otọ́ etọn Josia tọn mẹ bo diọ oyín etọn zun Jehoiakimi; ṣigba e hẹn Jehoahazi yì Egipti,+ bọ ewọ wá kú do finẹ.+ 35 Jehoiakimi bẹ fataka po sika lọ po jo na Falo, ṣigba e dona biọ takuẹ to otò lọ si whẹpo do penugo nado bẹ fataka he Falo biọ lọ jo. E gbò fataka po sika po sọha de na mẹhe to aigba lọ ji lẹ dopodopo nado sọgan bẹ jo na Falo Neko.

36 Owhe 25 wẹ Jehoiakimi+ tindo to whenue e duahọlu, e sọ dugán to Jelusalẹm na owhe 11.+ Oyín onọ̀ etọn tọn wẹ Zebida viyọnnu Pedaia tọn sọn Luma. 37 E zindonukọn nado to nuhe ylan to nukun Jehovah tọn mẹ lẹ wà,+ sọgbe hẹ nuhe tọgbo etọn lẹ ko wà lẹpo.+