Whẹdatọ lẹ

9 To nukọn mẹ, Abimẹlẹki+ visunnu Jelubaali tọn yì nọvisunnu onọ̀ etọn tọn lẹ dè to Ṣekẹmi bo dọna yewlẹ po whédo baba-daho etọn tọn* lẹpo po dọmọ: 2 “Mì jaale bo kanse nukọntọ* Ṣekẹmi tọn lẹpo dọ, ‘Detẹ wẹ pọnte na mì hugan, sunnu 70, yèdọ visunnu Jelubaali tọn lẹpo+ ni dugán do mì ji kavi sunnu dopo ni dugán do mì ji? Amọ́ mì flindọ ohú mìtọn podọ agbasalan mìtọn* wẹ yẹn.’”

3 Enẹwutu, nọvisunnu onọ̀ etọn tọn lẹ dọ ohó etọn na nukọntọ Ṣekẹmi tọn lẹpo, bọ ahun yetọn lẹhlan Abimẹlẹki, na yé dọmọ: “Nọvisunnu mítọn titi wẹ ewọ.” 4 Enẹgodo, yé na ẹn fataka-kuẹ 70 sọn ohọ̀* Baali-bẹliti+ tọn mẹ, bọ Abimẹlẹki yí i do dà sunnu kanylantọ he ma nọ wà nude lẹ nado hodo e yì. 5 Whenẹnu, e yì owhé otọ́ etọn tọn gbè to Ofla+ bo hù nọvisunnu etọn lẹ,+ yèdọ visunnu Jelubaali tọn lẹ, sunnu 70, to zannu dopo ji. Jotami visunnu pẹvi pete Jelubaali tọn kẹdẹ wẹ pò, na ewọ họ̀n whlá wutu.

6 Enẹgodo, nukọntọ Ṣekẹmi tọn lẹpo gọna mẹhe nọ nọ̀ Bẹti-milo lẹpo pli dopọ bo yí Abimẹlẹki do doahọlu+ sẹpọ atin daho lọ, sẹpọ dòtin he to Ṣekẹmi.

7 Whenue yé na linlin Jotami, e yì to afọdopolọji bo ṣite to Osó Gelizimi ji aga+ bosọ ze ogbè daga bo dọna yé dọmọ: “Mì dotoaina mi, mì nukọntọ Ṣekẹmi tọn lẹ, to whenẹnu Jiwheyẹwhe na dotoaina mì.

8 “To ojlẹ de mẹ wayi, atin lẹ jlo na de* ahọlu de do yede ji. Enẹwutu, yé dọna atin olivie tọn dọ, ‘Dugán do mí ji.’+ 9 Ṣigba, atin olivie tọn dọna yé dọ, ‘Be yẹn na jo amì* he yẹn nọ detọ́n, ehe nọ yin yiyizan nado pagigona Jiwheyẹwhe po gbẹtọ lẹ po do nado nọ to mìmì do atin he pò lẹ ji di ahọlu wẹ?’ 10 Whenẹnu, atin lẹ dọna ovòtin dọ, ‘Wá dugán do mí ji.’ 11 Ṣigba, ovòtin dọna yé dọ, ‘Be yẹn na jo sinsẹ́n vivi po dagbe he yẹn nọ detọ́n lẹ po do nado nọ to mìmì do atin he pò lẹ ji di ahọlu wẹ?’ 12 Enẹgodo, atin lẹ dọna vẹntin dọ, ‘Wá dugán do mí ji.’ 13 Vẹntin sọ gblọnna yé dọ, ‘Be yẹn na jo ovẹn yọyọ ṣie he nọ hẹn Jiwheyẹwhe po gbẹtọ lẹ po jaya do nado nọ to mìmì do atin lẹ ji di ahọlu wẹ?’ 14 To godo mẹ, atin he pò lẹpo dọna owùntin dọ, ‘Wá dugán do mí ji.’+ 15 Enẹwutu, owùntin dọna atin lọ lẹ dọ, ‘Eyin nugbo wẹ dọ mìwlẹ to dide mi di ahọlu do mì ji, mì bo wá bo dín fibẹtado to oyẹ̀ ṣie glọ. Ṣigba, eyin e ma yinmọ, miyọ́n ni tọ́n sọn owùntin mẹ bo fiọ kedali Lẹbanọni tọn lẹ.’

16 “Todin, be nugbo po ahundopo po wẹ mìwlẹ ko yí do yinuwa bo ko yí Abimẹlẹki do doahọlu,+ podọ be dagbewà wẹ mì ko dohia Jelubaali po whédo etọn po, podọ be mì ko yinuwa hẹ ẹ sọgbe hẹ nuhe e ko wà lẹ ya? 17 Whenue otọ́ ṣie hoavùn na mì,+ e ze ogbẹ̀* etọn do owù mẹ nado whlẹn mì sọn alọ Midiani tọn mẹ.+ 18 Ṣigba, mìwlẹ ko fọ́n do whédo otọ́ ṣie tọn ji to egbé bo hù visunnu etọn lẹ, yèdọ sunnu 70, to zannu dopo ji.+ Enẹgodo, mìwlẹ yí Abimẹlẹki, visunnu afanumẹ yọnnu etọn tọn+ do doahọlu do nukọntọ Ṣekẹmi tọn lẹ ji, na ewọ yin nọvisunnu mìtọn poun wutu. 19 Mọwẹ, eyin nugbo po ahundopo po wẹ mì ko yí do yinuwa hlan Jelubaali po whédo etọn po to egbé, mì bo jaya do Abimẹlẹki ji, na ewọ lọsu ni jaya do mì ji. 20 Ṣigba, eyin e ma yinmọ, miyọ́n ni tọ́njẹgbonu sọn Abimẹlẹki mẹ bo fiọ nukọntọ Ṣekẹmi po Bẹti-milo tọn lẹ po,+ podọ miyọ́n ni tọ́njẹgbonu sọn nukọntọ Ṣekẹmi po Bẹti-milo tọn lẹ po mẹ bo fiọ Abimẹlẹki.”+

21 Whenẹnu, Jotami+ doge-wezun mẹ bo họnyi Beẹli bosọ nọ nọ̀ finẹ, na Abimẹlẹki nọvisunnu etọn tọn wutu.

22 Abimẹlẹki dugán* do Islaeli ji na owhe atọ̀n. 23 Whenẹnu, Jiwheyẹwhe dike wangbẹna de fọ́n* to Abimẹlẹki po nukọntọ Ṣekẹmi tọn lẹ po ṣẹnṣẹn bọ yé yinuwa hẹ Abimẹlẹki po oklọ po. 24 Ehe yinmọ, na yè nido yiahọsu danú he yin wiwà do visunnu 70 Jelubaali tọn lẹ go tọn, na ohùn yetọn nido to okọ̀ na nọvisunnu yetọn Abimẹlẹki he hù yé+ podọ to okọ̀ na nukọntọ Ṣekẹmi tọn lẹ, na yewlẹ wẹ gọalọna ẹn nado hù nọvisunnu etọn lẹ wutu. 25 Enẹwutu, nukọntọ Ṣekẹmi tọn lẹ de sunnu lẹ nado tọ̀pọwuna ẹn to osó lẹ ji aga, yé sọ nọ jẹajo do mẹdepope he gbọn fie yé te to aliho lọ ji. To godo mẹ, linlin lọ yin nina Abimẹlẹki.

26 Enẹgodo, Gaali visunnu Ebẹdi tọn po nọvisunnu etọn lẹ po dasá biọ Ṣekẹmi+ bọ nukọntọ Ṣekẹmi tọn lẹ jẹ jidedo ewọ go ji. 27 Yé tọ́nyi danji dile yé ko nọ basi do bo bẹ ovẹn sinsẹ́n vẹngle yetọn lẹ tọn pli bosọ finyọ́n yé bo basi hùnwhẹ de, to enẹgodo yé yì ohọ̀ yẹwhe yetọn+ tọn mẹ bo dù bosọ nù bo hodẹ̀do Abimẹlẹki. 28 Whenẹnu, Gaali visunnu Ebẹdi tọn dọmọ: “Mẹnu wẹ Abimẹlẹki, podọ mẹnu wẹ Ṣekẹmi bọ mí nado nọ sẹ̀n ẹn? Be e ma yin ewọ wẹ visunnu Jelubaali+ tọn bọ Zebuli yin anadenanutọ etọn ya? Mìwlẹ ni nọ sẹ̀n visunnu Hamọli tọn lẹ, yèdọ otọ́ Ṣekẹmi tọn! Ṣigba, naegbọn míwlẹ dona nọ sẹ̀n ẹn? 29 Eyin omẹ ehelẹ ko tin to anademẹ ṣie glọ wẹ, yẹn na de Abimẹlẹki sẹ̀.” To whenẹnu, e dọna Abimẹlẹki dọmọ: “Hẹn awhànpa towe sudeji bo tọ́n wá.”

30 To whenue Zebuli ahọvi tòdaho lọ tọn sè nuhe Gaali visunnu Ebẹdi tọn dọ lẹ, homẹgble e sinsinyẹn. 31 Enẹwutu, e do wẹnsagun lẹ hlan Abimẹlẹki to nuglọ* dọmọ: “Pọ́n! Gaali visunnu Ebẹdi tọn po nọvisunnu etọn lẹ po tin to Ṣekẹmi todin bo to tòdaho lọ hẹn nado fọngu do ji we. 32 Todin, hẹji wá to zánmẹ, hiẹ po sunnu towe lẹ po bo tọ̀wu dai to danji. 33 Hiẹ dona yawu fọ́n to afọnnu, tlolo he owhè zẹ̀ bo tọ́nawhàn tòdaho lọ; podọ eyin ewọ po sunnu etọn lẹ po tọ́n wá ji we, wà nuhe go a pé lẹpo nado gbawhàn etọn.”*

34 Enẹwutu, Abimẹlẹki po mẹhe tin to e dè lẹpo po fọ́n to zánmẹ bo wleawuna awhànfun-gbẹ́ ẹnẹ bosọ tọ̀wu dai na Ṣekẹmi. 35 To whenue Gaali visunnu Ebẹdi tọn tọ́nyi bo nọte to họngbo tòdaho lọ tọn ji, Abimẹlẹki po mẹhe tin to e dè lẹ po fọ́n sọn fie yé tọ̀pọwu dai do. 36 To whenue Gaali mọ mẹlọ lẹ, e dọna Zebuli dọmọ: “Pọ́n! Gbẹtọ lẹ to tejẹ ja sọn osó lẹ ji aga.” Ṣigba, Zebuli dọna ẹn dọmọ: “Oyẹ̀ osó lẹ tọn mọ wẹ a te bo lẹndọ gbẹtọ lẹ wẹ.”

37 To godo mẹ, Gaali dọmọ: “Pọ́n! Gbẹtọ lẹ to tejẹ ja sọn ṣẹnṣẹn aigba lọ tọn bọ awhànfun-gbẹ́ dopo gbọn ali atin daho Mẹonẹnimi tọn ja.” 38 Zebuli gblọnna ẹn dọmọ: “Be hiẹ ko wọn awagundido towe wẹ dọ, ‘Mẹnu wẹ Abimẹlẹki bọ mí nado nọ sẹ̀n ẹn?’+ Be e ma yin mẹhe hiẹ gbẹdai lọ lẹ die ya? Todin, tọ́nyi bo hoavùn hẹ yé.”

39 Enẹwutu, Gaali tọ́nyi to nukọnna nukọntọ Ṣekẹmi tọn lẹ bo hoavùn hẹ Abimẹlẹki. 40 Abimẹlẹki dómọna ẹn bọ Gaali họ̀n to nukọn etọn, mẹsusu wẹ sọ yin hùhù kakajẹ họngbo tòdaho lọ tọn ji.

41 Abimẹlẹki sọ zindonukọn nado nọ nọ̀ Aluma, bọ Zebuli+ yàn Gaali po nọvisunnu etọn lẹ po sẹ̀ sọn Ṣekẹmi. 42 To wunkẹngbe, gbẹtọ lẹ tọ́nyi danji bọ e yin hinhẹn zun yinyọnẹn na Abimẹlẹki. 43 Enẹwutu, ewọ bẹ gbẹtọ lẹ bo má yé do awhànfun-gbẹ́ atọ̀n mẹ bosọ tọ̀wu dai do danji. To whenue e mọ gbẹtọ lẹ to tintọ́n sọn tòdaho lọ mẹ, e fọ́n do yé ji bo hù yé. 44 Abimẹlẹki po awhànfun-gbẹ́ he tin to e dè lẹ po sọ whlẹndo bo yì ṣite to họngbo tòdaho lọ tọn ji, bọ awhànfun-gbẹ́ awe jẹ mẹhe tin to danji lọ lẹpo ji bo hù yé. 45 Abimẹlẹki hoavùn sọta tòdaho lọ to azán enẹlọ pete ji bo yí i. Ewọ hù mẹhe nọ nọ̀ e mẹ lẹ bọ to enẹgodo, e họ́ tòdaho lọ+ bo do ojẹ̀ do e mẹ.

46 To whenue nukọntọ atọ̀họ̀ Ṣekẹmi tọn lẹpo sè ehe, yé yawu họnyi fiwhiwhlá* ohọ̀* Eli-bẹliti tọn lọ.+ 47 Tlolo he linlin yin nina Abimẹlẹki dọ nukọntọ atọ̀họ̀ Ṣekẹmi tọn lẹpo ko bẹ yede pli dopọ, 48 Abimẹlẹki po mẹhe tin to e dè lẹpo po hẹji yì Osó Zalmọni ji. Abimẹlẹki ze asiọvi de hẹn do alọmẹ bo sán atinlà de bosọ ze e do abọ́ etọn ji bo dọna mẹhe tin to e dè lẹ dọmọ: “Nuhe mì mọ bọ yẹn wà, mì yawu bo wà nudopolọ!” 49 Enẹwutu, yemẹpo sán atinlà lẹ bo hodo Abimẹlẹki. Enẹgodo, yé bẹ atinlà lọ lẹ lẹdo fiwhiwhlá lọ, bo domiyọ́n fiwhiwhlá lọ. Mẹhe tin to atọ̀họ̀ Ṣekẹmi tọn mẹ lẹpo sọ kú, yèdọ nudi sunnu po yọnnu po 1 000.

50 Whenẹnu, Abimẹlẹki yì Tebẹzi; e sọ dosla bo hoavùn sọta Tebẹzi bosọ yí i. 51 Atọ̀họ̀ gángán de tin to tòdaho lọ ṣẹnṣẹn, bọ sunnu, yọnnu po nukọntọ tòdaho lọ tọn lẹpo po họnyi finẹ. Yé suhọ̀n do yede bo hẹji yì họta atọ̀họ̀ lọ tọn. 52 Abimẹlẹki dín ali yì atọ̀họ̀ lọ kọ̀n bo tọ́nawhàn ẹn. Ewọ sọ sẹpọ họntonu atọ̀họ̀ lọ tọn nado domiyọ́n ẹn. 53 Whenẹnu, dopo to yọnnu he to finẹ lẹ mẹ bli gilisé de dlan ota na Abimẹlẹki bo gbà taká etọn hányán.+ 54 Ewọ yawu ylọ devizọnwatọ he hẹn adánwanu etọn bo dọna ẹn dọmọ: “Dọ̀n ohí towe sún bo hù mi, na yé nikaa dọ gando go e dọ, ‘Yọnnu de wẹ hù i.’” Devizọnwatọ etọn sọ sọnú in luntọ́n bọ e kú.

55 To whenue omẹ Islaeli tọn lẹ mọdọ Abimẹlẹki kú, yemẹpo lẹkọyi whé. 56 Gbọnmọ dali, Jiwheyẹwhe suahọ Abimẹlẹki na oylan he e ko wà do otọ́ etọn gbọn nọvisunnu etọn 70 lẹ hùhù dali.+ 57 Jiwheyẹwhe sọ hẹn oylan he sunnu Ṣekẹmi tọn lẹ wà lẹpo wá ota yetọn titi ji. Gbọnmọ dali, dẹ̀hodo Jotami+ visunnu Jelubaali+ tọn wá yé ji.