Etẹwẹ Hagbẹ Anademẹtọ Kunnudetọ Jehovah Tọn lẹ Tọn Yin?

Hagbẹ Anademẹtọ lọ yin pipli pẹvi Klistiani he whèwhín lẹ tọn de he nọ na anademẹ Kunnudetọ Jehovah tọn lẹ lẹdo aihọn pé. Azọ́n yetọn sọgan yin mimá do adà voovo awe ji:

• Yé nọ deanana azọ́n he nọ yin wiwà nado wleawuna nuplọnmẹ sinai do Biblu ji he mí nọ mọyi gbọn owe, opli po wehọmẹ Kunnudetọ Jehovah tọn lẹ tọn po gblamẹ.—Luku 12:42.

• Yé nọ penukundo azọ́n lẹdo aihọn pé Kunnudetọ Jehovah tọn lẹ tọn go gbọn anadidena lizọnyizọn gbangba tọn mítọn po lehe nunina voovo lẹ nọ yin yiyizan do po dali.

Hagbẹ Anademẹtọ lọ nọ hodo apajlẹ he ‘apọsteli po sunnu mẹho he to Jelusalẹm lẹ po’ zedai to owhe kanweko tintan whenu, bo nọ basi nudide titengbe lẹ do agun Klistiani tọn blebu tamẹ. (Owalọ lẹ 15:2) Dile sunnu nugbonọ enẹlẹ basi do, mẹhe tin to Hagbẹ Anademẹtọ lọ mẹ lẹ lọsu nọ dín anademẹ sọn Biblu mẹ, bo nọ kẹalọyi dọ Jesu Klisti wẹ Jehovah Jiwheyẹwhe de taidi Ota agun lọ tọn.—1 Kọlintinu lẹ 11:3; Efesunu lẹ 5:23.

To janvier 2018, mẹhe tin to Hagbẹ Anademẹtọ lọ mẹ lẹ wẹ Kenneth Cook Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson po David Splane po. Yé to devizọnwa to tatọ́-tẹnnọ aihọn tọn mítọn to Warwick, New York, États-Unis.

Hagbẹ Anademẹtọ lọ ze wedegbẹ́ voovo ṣidopo dai nado deanana adà voovo azọ́n mítọn tọn lẹ, podọ dopodopo yetọn nọ wazọ́n to wedegbẹ́ ehelẹ dopo kavi humọ mẹ.

• Wedegbẹ́ Anadenanutọ Tọn: Nọ penukundo whẹho whẹdidọ tọn lẹ go, nọ yawu yinuwa to nugbajẹmẹji lẹ whenu, kavi to nujijọ he mẹ hagbẹ sinsẹ̀n tọn mítọn lẹ yin homẹkẹndo te na nuyise yetọn lẹ wutu, po whẹho niyaniya tọn devo he gando Kunnudetọ Jehovah tọn lẹ po go mẹ.

• Wedegbẹ́ Nukunpedomẹgo Tọn: Nọ penukundo tito he gando hagbẹ whẹndo Bẹtẹli tọn lẹ tọn go.

• Wedegbẹ́ Wezinjẹgbonu Tọn: Nọ deanana didetọn po didohlan owe sinai do Biblu ji lẹ tọn po, gọna plitẹnhọ, azọ́nwatẹn lẹdogbedevomẹ bibasi tọn po wekantẹn alahọ tọn lẹ gbigbá po.

• Wedegbẹ́ Sinsẹ̀nzọn Tọn: Nọ deanana azọ́n yẹwheho “wẹndagbe ahọluduta lọ tọn” lilá tọn mítọn.—Matiu 24:14.

• Wedegbẹ́ Mẹpinplọn Tọn: Nọ deanana tito he nọ yin bibasi nado wleawuna nuplọnmẹ gbigbọmẹ tọn he nọ yin nina gbọn opli lẹ, wehọmẹ lẹ gọna tito hoyidokanji lẹ po video lẹ po tọn gblamẹ.

• Wedegbẹ́ Wekinkan Tọn: Nọ deanana awuwiwlena núdùdù gbigbọmẹ tọn he nọ yin nina mí gbọn owe mítọn he yin zinzinjẹgbonu lẹ po nọtẹn Intẹnẹt tọn mítọn po gblamẹ. E sọ nọ deanana azọ́n lẹdogbedevomẹ bibasi tọn.

Gbọnvona azọ́n he Hagbẹ Anademẹtọ lọ nọ wà gbọn wedegbẹ́ ehelẹ gblamẹ, yé sọ nọ pli to osẹ dopodopo mẹ nado lẹnnupọndo nuhudo titobasinanu lọ tọn lẹ ji. To opli ehelẹ whenu, yé nọ gbadopọnna nuhe Owe-wiwe lẹ dọ, bo nọ joawuna anademẹ gbigbọ wiwe tọn, bosọ nọ tẹnpọn nado wá gbèta he hagbẹ lọ lẹpo kẹalọyi lẹ kọ̀n.—Owalọ lẹ 15:25.

Klistiani dejidego lẹ wẹ mẹhe nọ gọalọna wedegbẹ́ voovo Hagbẹ Anademẹtọ lọ tọn lẹ. (1 Kọlintinu lẹ 4:2) Yé tindo nugopipe po numimọ po to azọ́n he wedegbẹ́ he mẹ yé yin azọ́ndena do nọ deanana mẹ, podọ yé nọ yì opli he wedegbẹ́ lọ nọ basi to sẹmẹsẹmẹ lẹ tẹnmẹ. Dile etlẹ yindọ yé ma tin to mẹhe nọ basi nudide lẹ mẹ, alọgọtọ lọ lẹ nọ na ayinamẹ yọ́n-na-yizan po nudọnamẹ gigọ́ lẹ po gando whẹho lẹ go, bo nọ hẹn ẹn diun dọ nudide wedegbẹ́ lọ tọn lẹ yin hihodo podọ yé nọ dindona kọdetọn he nudide lọ lẹ to hinhẹnwa. Yé sọgan sọ yin azọ́ndena gbọn Hagbẹ Anademẹtọ lọ dali nado dla mẹmẹsunnu mítọn lẹ pọ́n to awà voovo aihọn lọ tọn lẹ ji, kavi nado na hodidọ to nuwiwa delẹ whenu taidi opli whemẹwhemẹ tọn ogbẹ́ Watchtower tọn kavi to gbedewema yíyí Giliadi tọn tẹnmẹ.