Kanbiọ lẹ sọn Wehiatọ lẹ Dè

Fitẹ wẹ aovi lẹ na te to Gandudu Owhe Fọtọ́n Klisti tọn whenu?

Biblu ma na gblọndo kanbiọ ehe tọn tlọlọ gba. Etomọṣo, mí sọgan wá tadona he sọgbe kọ̀n gando fie aovi lẹ na te to Gandudu Owhe Fọtọ́n Klisti tọn whenu go.

Nado na mí numimọdohlan nukọn nuhe na jọ to bẹjẹeji po vivọnu Owhe Fọtọ́n lọ tọn po, apọsteli Johanu dọmọ: “Yẹn sọ mọ angẹli de jẹte sọn olọn mẹ ja odò, e tindo họnhungan odò mapote lọ tọn, kọgàn daho de sọ tin to alọ etọn mẹ. E sọ dè alọ bo hẹn dlagọni lọ, odàn hoho lọ, he yin Lẹgba, Satani, bo dogàn ẹn họ̀ owhe fọtọ́n, bosọ dọ̀n ẹn dlan odò mapote lọ mẹ, bo súnudo e, bo yí hiadonu do tlẹ́ ẹ, na e klọ akọta lẹ ba blo, kaka owhe fọtọ́n na do pé: to enẹgodo yè nasọ jo e dote whenu gli de.” (Osọhia 20:1-3) Zizedo odò mapote mẹ Satani tọn podọ didetọn etọn to godo mẹ na whenu gli de kẹdẹ ji wẹ wefọ ehelẹ dọhodo. Dile aovi lẹ ma tlẹ yin nùdego, e sọgbe hẹ lẹnpọn dagbe dọ to whenuena angẹli he tindo họnhungan odò mapote lọ tọn—yèdọ Jesu Klisti pagigona lọ—na wle Lẹgba bo dlan ẹn do odò mapote lọ mẹ, e na basi nudopolọ na aovi lẹ ga.—Osọhia 9:11.

Tlolo he Jesu Klisti lẹzun Ahọlu to olọn mẹ to 1914, e ze afọdide de he tindo nugandomẹgo sinsinyẹn do Satani po aovi lẹ po ji. Osọhia 12:7-9 dọmọ: “Awhàn de sọ tin to olọn mẹ: Mikaẹli po angẹli etọn lẹ po to avùnho hẹ dlagọni lọ; dlagọni lọ sọ to avùnho po angẹli etọn lẹ [aovi lẹ] po, yé ma sọ gbawhàn; mọ otẹn ma sọ tin na yé to olọn mẹ ba. Yè sọ yàn dlagọni daho lọ jẹgbonu, odàn hoho lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji, bosọ yàn angẹli etọn lẹ jẹgbonu po e po.” Sọn whenẹnu gbọ́n, Satani po aovi etọn lẹ po ko yin ginglọn do lẹdo aigba tọn mẹ. Po gbesisọ po, mí sọgan kẹalọyi dọ to whenuena Jesu Klisti nasọ wá doalọtena nuyiwa Satani tọn lẹ to nukọnmẹ nado whlẹn aigba sọn nuyiwadomẹji ylankan etọn si, E na basi nudopolọ na aovi lẹ ga.

Lẹnnupọndo dọdai tintan Biblu tọn lọ ji. E hia dọmọ: “Yẹn [Jiwheyẹwhe] nasọ yí okẹ̀n do hiẹ [Satani] po yọnnu lọ [titobasinanu olọn mẹ tọn Jehovah tọn] po ṣẹnṣẹn; podọ do okún towe [Satani tọn] po okún etọn [Jesu Klisti] po ṣẹnṣẹn: ewọ na só ota towe, hiẹ na só afọgbẹn etọn.” (Gẹnẹsisi 3:15) Ota sisó na odàn lọ bẹ Satani hinhẹn do odò mapote mẹ to Gandudu Owhe Fọtọ́n Klisti tọn whenu hẹn. Dọdai lọ zindonukọn dọ okẹ̀n tin to Mẹhe na só ota namẹ lọ po okún Satani tọn po ṣẹnṣẹn. Okún ehe, kavi titobasinanu ehe, bẹ adà mayinukundomọ de hẹn ehe yin angẹli ylankan, kavi aovi lẹ. Enẹwutu, e sọgbe hẹ lẹnpọn dagbe nado wá tadona lọ kọ̀n dọ to whenuena Jesu na dlan Satani do odò mapote mẹ, e na blá aovi lẹ ga bo bẹ yé dlan odò mapote lọ mẹ. Nugbo lọ dọ gbigbọ ylankan lẹ ko dibusi dogbó kavi odò mapote taun dohia dọ yé yọnẹn dọ alọhẹndotenamẹ enẹ ja nugbo.—Luku 8:31.

Ṣigba, be e sọgan ko yindọ Osọhia 20:1-3 ma donù aovi lẹ go na yé ko yin viva to Amagẹdọni po adà yinukundomọ okún Satani tọn po wẹ ya? Biblu dohia dọ ehe ma sọgan jọ gba. Gando opodo Satani tọn go, e yin winwlan dọmọ: “Yè sọ dọ̀n Lẹgba he klọ yé sọ yì dlan [agbàdo] miyọ́n hihla po whèmi tọn po mẹ, fie kanlin lọ po yẹwhegán lalonọ lọ po te, yé nasọ to nukunbia mẹ to okle po ozán po kakadoi.” (Osọhia 20:10) Kanlin lọ po yẹwhegán lalonọ lọ po nọtena pipli tonudọtọ lẹ tọn he yin apadewhe titobasinanu yinukundomọ Satani tọn tọn. (Osọhia 13:1, 2, 11-14; 16:13, 14) Yé na yin vivasudo to Amagẹdọni, whenuena Ahọluduta Jiwheyẹwhe tọn na gbà ahọludu aihọn tọn lẹpo do flinflin bo na sú yé do. (Daniẹli 2:44) Biblu dlẹnalọdo ‘ozò madopodo, he yè ko wleawu etọn dai na [Lẹgba] po angẹli etọn lẹ po.’ (Matiu 25:41) Satani po aovi etọn lẹ po na yin dindlan do ‘agbàdo miyọ́n hihla po whèmi tọn po’ dopolọ he mẹ kanlin lọ po yẹwhegán lalonọ lọ po ko yin dindlan do, ehe zẹẹmẹdo dọ yelọsu lẹ ga na yin vivasudo kakadoi. Eyin adà mayinukundomọ okún Satani tọn heyin huhlọnnọ hugan lọ lọsu na ko yin vivasudo to Amagẹdọni wẹ, matin ayihaawe, e na ko yin didohia dọ aovi lẹ lọsu ko tin to miyọ́n yẹhiadonu tọn enẹ mẹ gọna kanlin lọ po yẹwhegán lalonọ lọ po. To whenuena yé ma yin nùdego to Osọhia 20:10 mẹ, e họnwun dọ aovi lẹ ma na yin vivasudo to Amagẹdọni.

Dile e ma yin nùdego tlọlọ dọ aovi lẹ yin dindlan do odò mapote lọ mẹ do, mọjanwẹ e masọ yin didọ tlọlọ dọ yé yin didetọn do niyẹn. Etomọṣo, opodo yetọn na yin dopolọ po Lẹgba tọn po. To whenuena aovi lẹ na ko yin didetọn po Lẹgba po bọ yé na ko gọalọna Lẹgba to whlepọn godo tọn gbẹtọvi lẹ tọn mẹ to vivọnu owhe fọtọ́n lọ tọn, aovi lẹ lọsu na yin dindlan do agbàdo miyọ́n tọn lọ mẹ, fie yé na mọ vasudo madopodo te.—Osọhia 20:7-9.

Enẹwutu, dile etlẹ yindọ wiwle Satani tọn po zizedlan odò mapote mẹ etọn po kẹdẹ ji wẹ Osọhia 20:1-3 dọhodo, mí sọgan wá tadona lọ kọ̀n po whẹwhinwhẹ́n po dọ angẹli etọn lẹ lọsu na yin biblá bo na yin dindlan do odò mapote lọ mẹ ga. Dotẹnmẹ ma na yin jijodona Satani kavi awhànpa aovi tọn etọn lẹ nado glọnalina hẹndi lẹndai Jiwheyẹwhe tọn he yin nado diọ aigba zun paladisi de bo gọ̀ gbẹtọvi lẹ wá pipé kọ̀n to Gandudu Owhe Fọtọ́n Klisti tọn whenu gba.