Nawẹ Ogbẹ̀ Bẹjẹeji Gbọn?

‘Jiwheyẹwhe dè wẹ asisa ogbẹ̀ tọn te.’ (Salmu lẹ 36:9) Be a yí enẹ sè ya? Mẹdelẹ nọ dọ dọ mẹde ma dá ogbẹ̀ lọ, dọ nulẹ wá aimẹ na yede poun wẹ. Eyin enẹ yin nugbo, be mí wá ogbẹ̀ gbọn kosọ dali niyẹn. Amọ́, eyin Jehovah Jiwheyẹwhe lọsu wẹ dá ogbẹ̀ lọ, be ogbẹ̀ na ko tindo lẹndai de, kavi e ma yin mọ wẹ ya?a Gbọ mí ni gbadopọnna nuhe Biblu dọ gando lehe ogbẹ̀ bẹjẹeji do go po nuhewutu e do sọgbe po.

1. Nawẹ wẹkẹ lọ wá aimẹ gbọn?

Biblu dọ dọ: “To bẹjẹeji Jiwheyẹwhe dá olọn lẹ po aigba po.” (Jenẹsisi 1:1) Suhugan lẹnunnuyọnẹntọ lẹ tọn wẹ kẹalọyi dọ wẹkẹ lọ do bẹjẹeji. Amọ́, nawẹ Jiwheyẹwhe dá ẹ gbọn? Ewọ yí “huhlọn-yido-wazọ́n” etọn, yèdọ gbigbọ wiwe zan nado dá nuhe tin to wẹkẹ lọ mẹ lẹpo, ehe bẹ bẹplidopọ sunwhlẹvu lẹ tọn, sunwhlẹvu lẹ po planẹti lẹ po hẹn.—Jenẹsisi 1:2.

2. Naegbọn Jiwheyẹwhe do dá aigba?

Jehovah “ma dá [aigba] to ovọ́ mẹ, ṣigba [E] dá ẹ na yè nido nọ nọ̀ e ji.” (Isaia 45:18) Ewọ dá planẹti mítọn, na mí nido vò to e ji kakadoi. (Hia Isaia 40:28; 42:5.) Lẹnunnuyọnẹn dohia dọ aigba gbọnvona planẹti devo depope. Planẹti ehe kẹdẹ ji wẹ gbẹtọvi lẹ gán nọgbẹ̀ te.

3. Etẹwẹ gbẹtọvi lẹ yí do gbọnvona kanlin lẹ?

Whenue Jehovah ko dá aigba godo, e dá nutogbẹ̀ lẹ do e ji. Atin po kanlin lẹ po wẹ e dá deji jẹnukọn. Enẹgodo, “Jiwheyẹwhe sọ dá gbẹtọ to apajlẹ etọn mẹ.” (Hia Jenẹsisi 1:27.) Etẹwẹ gbẹtọvi lẹ yí do gbọnvo? Na mí yin didá to apajlẹ Jiwheyẹwhe tọn mẹ wutu, mí gán nọ do jẹhẹnu etọn lẹ hia, taidi owanyi po whẹdida dodo po. Humọ, e sọ dá mí po nugopipe lọ po nado nọ plọn ogbè devo lẹ, yọ́n pinpẹn anazọ́n lẹ tọn bosọ duvivi nuhiho tọn. Gbọnvona kanlin lẹ, mí gán basi sinsẹ̀n hlan Mẹdatọ mítọn.

DINDONANU DOGỌ

Gbọ mí ni gbadopọnna kunnudenu delẹ he dohia dọ ogbẹ̀ yin didá, gọna kandai Biblu tọn delẹ he dohia dọ nugbo wẹ. Pọ́n nuhe jẹhẹnu he gbẹtọvi lẹ nọ dohia plọn mí gando Jiwheyẹwhe go.

4. Ogbẹ̀ yin didá

Gbẹtọ lẹ nọ mọ pipà susu yí na nuhe yé pọ́n nudida lẹ do basi lẹ. Enẹwutu, mẹnu wẹ dona mọ pipà nuhe go yé pọ́n do dó basi nudevo enẹlẹ tọn yí? Hò VIDEO lọ, enẹgodo dọhodo kanbiọ ehe ji.

VIDEO: Yise Tintindo to Jiwheyẹwhe Mẹ (2:43)

• Etẹwẹ dodinnanutọ lẹ plọn sọn nudida lẹ dè nado basi nudevo lẹ?

Ohọ̀ lẹpo wẹ nọ yin gbigbá gbọn mẹde dali. Amọ́, mẹnu wẹ dá nuhe to wẹkẹ lọ mẹ lẹ? Hia Heblu lẹ 3:4, enẹgodo dọhodo kanbiọ ehelẹ ji:

• Nudida tẹwẹ nọ hẹn awuji we hugan?

• Be e sọgbe nado yise dọ wẹkẹ lọ po nuhe tin to e mẹ lẹpo po yin didá ya? Etẹwutu?

Be a yọnẹn ya?

A gán mọ hosọ po video he dọhodo whẹho ehe ji lẹ po to jw.org ji to adà lọ “Be E Yin Didá Wẹ Ya?” po “Pọndohlan lẹ Gando Bẹjẹeji Ogbẹ̀ Tọn Go” po glọ.

“Na nugbo tọn, ohọ̀ lẹpo wẹ nọ yin gbigbá gbọn mẹde dali, ṣigba mẹhe basi nulẹpo wẹ Jiwheyẹwhe”

5. Nuhe Biblu dọ gando nudida lẹ go sọgbe hẹ lẹnpọn dagbe

VIDEO: Be Wẹkẹ lọ Yin Didá Wẹ Ya?—Adà Kleun De (3:51)

• Be Biblu plọnmẹ dọ aigba po nuhe tin to e ji lẹ po yin didá to azán gànhiho 24 tọn donù ṣidopo gblamẹ wẹ ya?

• Be a lẹndọ kandai Biblu tọn gando nudida lẹ go sọgbe hẹ lẹnpọn dagbe ya? Naegbọn a do lẹnmọ?

Hia Jenẹsisi 1:1, enẹgodo dọhodo kanbiọ ehe ji:

• Lẹnunnuyọnẹntọ lẹ yigbe dọ wẹkẹ lọ do bẹjẹeji. Nawẹ gbèta he kọ̀n yé wá sọgbe hẹ nuhe a ṣẹṣẹ hia to Biblu mẹ gbọn?

Mẹdelẹ nọ lẹndọ Jiwheyẹwhe basi nulẹ to aliho de mẹ bọ nudida lẹ nọ wá aimẹ na yede. Hia Jenẹsisi 1:21, 25, 27, enẹgodo dọhodo kanbiọ ehelẹ ji:

• Be Biblu plọnmẹ dọ Jiwheyẹwhe dá nutogbẹ̀ wunmẹ de, he wá diọ ede zun nutogbẹ̀ wunmẹ voovo lẹ, taidi whèvi, kanlin po gbẹtọ lẹ po wẹ ya? Kavi be ewọ lọsu wẹ dá nutogbẹ̀ “wunmẹwunmẹ” he tin lẹ tlọlọ ya?b

6. Jiwheyẹwhe dá gbẹtọ lẹ to aliho he gbọnvo mẹ

Mí gbọnvona kanlin he Jehovah dá lẹ. Hia Jenẹsisi 1:26, enẹgodo dọhodo kanbiọ ehe ji:

• Eyin mí penugo nado nọ do owanyi po awuvẹmẹ po hia na mí yin didá to apajlẹ Jiwheyẹwhe tọn mẹ wutu, etẹwẹ enẹ dohia gando omẹ nankọ he Jiwheyẹwhe yin go?

BLADOPỌ

Jehovah wẹ dá wẹkẹ lọ po nutogbẹ̀ he tin to e mẹ lẹpo po.

Dogbapọn

• Etẹwẹ Biblu plọnmẹ gando lehe wẹkẹ lọ bẹjẹeji do go?

• Be Jiwheyẹwhe basi bọ nutogbẹ̀ wunmẹwunmẹ lẹ wá aimẹ na yede sọn nutogbẹ̀ dopo de mẹ wẹ ya, kavi e dá yemẹpo tlọlọ?

• Nawẹ gbẹtọvi lẹ gbọnvona nudida he pò lẹ gbọn?

PỌ́N NUDỌNAMẸ DEVO LẸ

Pọ́n nudida he go gbẹtọvi lẹ pọ́n do dó wleawuna nudelẹ.

“Etẹwẹ Nudida lẹ Plọn Mí?” (Fọ́n!, septembre 2006 tọn)

Pọ́n lehe otọ́ de gán basi zẹẹmẹ nuhe Biblu dọ gando nudida lẹ go tọn na visunnu etọn do.

“Jehovah . . . Wẹ Dá Nulẹpo” (2:37)

Pọ́n eyin vlavo Biblu nọgodona nuplọnmẹ lọ dọ nulẹ wá aimẹ na yede.

“Be Jiwheyẹwhe Dá Nutogbẹ̀ Voovo lẹ bọ Yé Nọ Wá Aimẹ Na Yede Wẹ Ya?” (Hosọ Intẹnẹt ji tọn)

Pọ́n eyin atin, ohú kavi nuhoho devo he yin mimọ to dòglọ lẹ, kavi dodinnanu lẹnunnuyọn-ẹntọ lẹ tọn lẹ dohia dọ ogbẹ̀ yin didá wẹ kavi dọ e wá gbọn kosọ dali.

Cinq questions à se poser sur l’origine de la vie (Alọnuwe Flansegbe tọn)