KANBIỌ LẸ SỌN WEHIATỌ LẸ DÈ

To Gẹnẹsisi 6:2, 4 mẹ, mẹnu lẹ wẹ yin yiylọdọ “visunnu Jiwheyẹwhe tọn lẹ” he nọgbẹ̀ jẹnukọnna Singigọ lọ?

▪ Nugbo lọ wẹ yindọ, visunnu gbigbọmẹ tọn Jiwheyẹwhe tọn lẹ wẹ hogbe ehelẹ to alọdlẹndo. Ṣigba, naegbọn mí do dọ mọ?

To Gẹnẹsisi 6:2 mẹ, mí hia dọmọ: “Visunnu Jiwheyẹwhe tọn lẹ sọ mọ viyọnnu gbẹtọ tọn lẹ dọ yé yọnwhanpẹ; bọ yé sọ mọ asi na yede sọn enẹ he yé de lẹpo mẹ.”

To Owe-wiwe Heblu tọn lẹ mẹ, hodidọ lọ lẹ “visunnu Jiwheyẹwhe nugbo lọ tọn lẹ” po “visunnu Jiwheyẹwhe tọn lẹ” po wẹ sọawuhia to ogbè dowhenu tọn lọ mẹ to Gẹnẹsisi 6:2, 4; Job 1:6; 2:1; 38:7; po Psalm 89:6 po mẹ.

E họnwun dọ nudida gbigbọnọ lẹ wẹ yin yiylọdọ “ovi Jiwheyẹwhe tọn lẹ” to Job 1:6 mẹ, yèdọ yé he sọawuhia to Jiwheyẹwhe nukọn lẹ. Satani he nọ to “yìyì nukọn po godo po to aigba ji” yin dopo to yé mẹ. (Job 1:7; 2:1, 2) Mọdopolọ, mí hia to Job 38:4-7 mẹ dọ “visunnu Jiwheyẹwhe tọn [lẹ] to abobo do na homẹhun” to whenue Jiwheyẹwhe “do zannu lọnglọnẹn” tọn aigba tọn. Matin ayihaawe, angẹli lẹ wẹ visunnu Jiwheyẹwhe tọn enẹlẹ dona ko yin, na gbẹtọ lẹ ma ko yin didá to whenẹnu. Jide mlẹnmlẹn tin dọ “ovi Jiwheyẹwhe tọn lẹ” he yin nùdego to Psalm 89:6 mẹ bo yin lilẹdo “ovi asuka lẹ tọn” to Biblu Wiwe lọ—Gun-Alada mẹ ma to alọdlẹndo gbẹtọvi lẹ gba, ṣigba nudida gbigbọnọ he tin po Jiwheyẹwhe po to olọn mẹ lẹ wẹ e to alọdlẹndo.

Eyin mọ wẹ, mẹnu lẹ wẹ yin “visunnu Jiwheyẹwhe tọn lẹ” he yin nùdego to kandai Gẹnẹsisi 6:2, 4 tọn mẹ? To kọndopọ mẹ hẹ nugbo Biblu tọn he go mí donù to aga lẹ, e sọgbe nado wá tadona lọ kọ̀n dọ visunnu gbigbọmẹ tọn Jiwheyẹwhe tọn he wá aigba ji lẹ wẹ kandai lọ to alọdlẹndo.

E nọ vẹawuna mẹdelẹ nado yise dọ angẹli lẹ sọgan tindo ojlo to kọndopọ zanhẹmẹ tọn mẹ. Hogbe Jesu tọn he tin to Matiu 22:30 mẹ lẹ dohia dọ alọwle po kọndopọ zanhẹmẹ tọn po ma tin to olọn mẹ. Etomọṣo to ojlẹ de mẹ wayi, angẹli lẹ nọ ze agbasa gbẹtọ tọn do bo tlẹ dùnú bosọ nù po gbẹtọ lẹ po. (Gẹn. 18:1-8; 19:1-3) Enẹwutu, e sọgbe hẹ lẹnpọn dagbe nado wá tadona lọ kọ̀n dọ to awusọhia gbẹtọ tọn mẹ, yé sọgan tindo kọndopọ zanhẹmẹ tọn hẹ yọnnu lẹ.

Kunnudenu sinai do Biblu ji lẹ tin nado yise dọ angẹli delẹ wàmọ. Juda 6, 7 yí ylando sunnu Sodọmi tọn lẹ, he doafọna agbasalan na yizan he ma yin jọwamọ tọn lẹ tọn jlẹdo “angẹli he ma gbọṣi otẹn dowhenu tọn yetọn mẹ ṣigba bo jo nọtẹn he jẹna yé lọ do lẹ” tọn go. Nuhe angẹli enẹlẹ po Sodọminu lẹ po tindo to kọndopọ mẹ wẹ yindọ yé “peve to galilọ mẹ bo doafọna agbasalan na yizan he ma yin jọwamọ tọn.” 1 Pita 3:19, 20 zinnudo linlẹn dopolọ ji bo dohia dọ angẹli tolivẹtọ enẹlẹ nọgbẹ̀ to “azán Noa tọn lẹ” gbè. (2 Pita 2:4, 5) Enẹwutu, nuyiwa angẹli tolivẹtọ he nọgbẹ̀ to azán Noa tọn gbè enẹlẹ tọn sọgan yin yiyijlẹdo ylando Sodọmi po Gomọla po tọn go.

Tadona enẹ sọgbe eyin mí flindọ angẹli he ze agbasa gbẹtọ tọn do bo wá tindo kọndopọ zanhẹmẹ tọn hẹ yọnnu lẹ wẹ yin yiylọdọ “visunnu Jiwheyẹwhe tọn lẹ” to Gẹnẹsisi 6:2, 4 mẹ.

Biblu dọ dọ Jesu “dọyẹwheho na gbigbọ he to gànpamẹ lẹ.” (1 Pita 3:19) Etẹwẹ ehe zẹẹmẹdo?

▪ Apọsteli Pita dohia dọ gbigbọ ehelẹ wẹ angẹli he “vẹtoli dai to whenuena homẹfa Jiwheyẹwhe tọn to ote to azán Noa tọn lẹ gbè.” (1 Pita 3:20) E họnwun dọ angẹli he basi dide nado kọnawudopọ hẹ Satani to atẹṣiṣi etọn mẹ lẹ wẹ Pita to alọdlẹndo. Juda donù angẹli he “ma gbọṣi otẹn dowhenu tọn yetọn mẹ ṣigba bo jo nọtẹn he jẹna yé lọ do lẹ” go, bo yidogọ dọ Jiwheyẹwhe “ko yí gẹdẹ madopodo lẹ do hlá [yé] dote to zinvlu gọ́ngọ́n mẹ na whẹdida azán daho lọ tọn.”—Juda 6.

Nawẹ angẹli lẹ vẹtoli to azán Noa tọn lẹ gbè gbọn? Jẹnukọnna Singigọ lọ, gbigbọ ylankan ehelẹ ze agbasa gbẹtọ tọn do, yèdọ nude he Jiwheyẹwhe ma basi tito etọn na yé. (Gẹn. 6:2, 4) Humọ, nuhe jẹagọdo jọwamọ wẹ angẹli enẹlẹ wà to whenue yé tindo kọndopọ zanhẹmẹ tọn hẹ yọnnu lẹ. Jiwheyẹwhe ma dá angẹli lẹ nado nọ tindo kọndopọ zanhẹmẹ tọn hẹ yọnnu lẹ. (Gẹn. 5:2) Angẹli ylankan podọ tolivẹtọ ehelẹ na yin vivasudo to ojlẹ dide Jiwheyẹwhe tọn mẹ. Todin whẹ́, yé tin to “zinvlu gọ́ngọ́n mẹ,” yèdọ gànpa gbigbọmẹ tọn de mẹ dile Juda dohia do.

Whetẹnu podọ nawẹ Jesu dọyẹwheho na “gbigbọ he to gànpamẹ” ehelẹ gbọn? Pita wlan dọ ehe jọ to whenue Jesu “yin hinhẹnwa ogbẹ̀ to gbigbọ mẹ” godo. (1 Pita 3:18, 19) Sọ doayi e go dọ, Pita dọ dọ Jesu “dọyẹwheho.” Hogbe he Pita yizan lẹ dohia dọ yẹwhehodidọ lọ wá aimẹ whẹpo Pita do kàn wekanhlanmẹ etọn tintan. Enẹwutu, e taidi dọ to ojlẹ vude to fọnsọnku Jesu tọn godo, ewọ basi nulila de na angẹli ylankan lẹ gando yasanamẹ he yé jẹna bo nasọ mọyi lọ go. Yẹwhehodidọ enẹ ma ze todido dagbe de donukọnna yé gba. Yẹwhehodidọ whẹdida tọn de wẹ. (Jona 1:1, 2) Na Jesu do yise po nugbonọ-yinyin po hia kakajẹ okú bosọ yin finfọnsọnku wutu, ewọ dohia dọ Lẹgba ma tindo huhlọn do emi ji. Gbọnmọ dali, Jesu tindo whẹwhinwhẹ́n he pé nado lá whẹgbledomẹ mọnkọtọn.—Joh. 14:30; 16:8-11.

To sọgodo, Jesu na blá Satani po angẹli enẹlẹ po bo na ze yé dlan do odò mapote mẹ. (Luku 8:30, 31; Osọ. 20:1-3) Kakajẹ whenẹnu, angẹli tolivẹtọ enẹlẹ na tin to zinvlu gọ́ngọ́n gbigbọmẹ tọn de mẹ, podọ vasudo mlẹnmlẹn yetọn na wá dandan.—Osọ. 20:7-10.