Hinhẹn Ohó Gbọdo Jiwheyẹwhe Tọn Go po Nugbonọ-yinyin Po

“Mí ko gbẹ́ onú bibẹ bublu tọn lẹ dai, mí ma to zọnlinzin to oklọ mẹ, mí ma sọ to oklọ yí do to ohó Jiwheyẹwhe tọn go hẹn.” —2 KỌLINTINU LẸ 4:2.

 1. (a) Etẹwẹ ko yin bibiọ nado sọgan basi wadotana azọ́n heyin didohia to Matiu 24:14 po 28:19, 20 po mẹ tọn? (b) Jẹ obá tẹ mẹ wẹ Biblu tin to aimẹ jẹ to ogbè gbẹtọ lẹ tọn mẹ to whenuena azán godo tọn lẹ bẹjẹeji?

TO DỌDAI daho etọn mẹ gando ojlẹ tintin tofi gigonọ etọn tọn po vivọnu titonu hoho tọn lọ po go, Jesu Klisti dọ dọdai dọmọ: “Yè nasọ dọ yẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” E sọ degbe dọmọ: “Mì . . . hẹn akọta lẹpo zun nuplọntọ, . . . na mì ni sọ nọ plọn yé nado nọ doayi onú lẹpo go, nudepope he yẹn degbena mì.” (Matiu 24:14; 28:19, 20) Hẹndi dọdai ehelẹ tọn bẹ azọ́n susu lẹdogbedevomẹ-bibasi po zinzinjẹgbonu Biblu tọn po hẹn, to pinplọn gbẹtọ lẹ nuhe e zẹẹmẹdo, gọna alọgigọna yé nado yí yé zan to gbẹzan yetọn lẹ mẹ. Lehe e yin lẹblanulọkẹyi do sọ nado tindo mahẹ to nuyiwa enẹ mẹ! To 1914 Biblu lọ kavi apadewhe etọn delẹ ko yin zinzinjẹgbonu do ogbè 570 lẹ mẹ. Ṣigba sọn whenẹnu gbọ́n ogbè po ogbè flinflin kanweko devo lẹ po ko yin yiyidogọ, podọ hugan lẹdogbedevomẹ dopo ko yin hinhẹn tin-to-aimẹ to ogbè susu lẹ mẹ.a

 2. Linlẹn voovo tẹlẹ wẹ ko yinuwado azọ́n lẹdogbedevomẹ-basitọ Biblu tọn lẹ po zinzinjẹgbonutọ lẹ tọn po ji?

² Avùnnukundiọsọmẹnu de wẹ e yin na lẹdogbedevomẹ-basitọ depope nado lilẹ́ owe de sọn ogbè de mẹ do ogbè devo mẹ bo hẹn ẹn yin nuhe yin nukunnumọjẹemẹ gbọn mẹhe to hihia bosọ to sisè ogbè devo lẹ dali. Lẹdogbedevomẹ-basitọ Biblu tọn delẹ ko wazọ́n yetọn po oyọnẹn vẹkuvẹku po dọ nuhe yé to lilẹdogbedevomẹ yin Ohó Jiwheyẹwhe Tọn. Mẹdevo lẹ ko yin whinwhan gbọn avùnnukundiọsọmẹ weyinyọnẹn tọn na azọ́n lọ dali. Yé sọgan ko pọ́n nuhe tin to Biblu mẹ hlan taidi ogú họakuẹ de poun. Na mẹdelẹ, sinsẹ̀n wẹ yin yanwle yetọn, podọ zinzinjẹgbonu owe de tọn he tindo yinkọ yetọn taidi lẹdogbedevomẹ-basitọ lọ yin apadewhe gbẹninọ yetọn tọn. E họnwun dọ linlẹn yetọn yinuwado lehe yé wazọ́n yetọn lẹ gbọn ji.

 3. Nukun tẹwẹ Wedegbẹ́ Lẹdogbedevomẹ-basitọ Biblu Aihọn Yọyọ Tọn do pọ́n azọ́n etọn?

³ Hodidọ he jẹ na ayidego de wẹ ehe heyin didọ gbọn Wedegbẹ́ Lẹdogbedevomẹ Biblu Aihọn Yọyọ Tọn dali dọmọ: “Lẹdogbedevomẹ Owe wiwe lẹ tọn bibasi zẹẹmẹdo lilẹdogbedevomẹ linlẹn po hodidọ Jehovah Jiwheyẹwhe tọn lẹ po . . . Linlẹn whiwhẹ tọn de wẹ enẹ yin. Lẹdogbedevomẹ-basitọ azọ́n ehe tọn lẹ, he dibusi bosọ yiwanna Dowatọ Owe wiwe lẹ tọn Sọn Olọn Mẹ, yin azọngban vonọtaunnọ hlan Ewọ dè nado lilẹ́ linlẹn po hodidọ etọn lẹ po do ogbè devo mẹ to gbesisọmẹ dile e sọgan yọnbasi do. Yé sọ yin azọngbannọ hlan wehiatọ dodinnanutọ lẹ he ganjẹ lẹdogbedevomẹ Ohó gbọdo Jiwheyẹwhe Gigogan tọn go na whlẹngán madopodo yetọn. To linlẹn azọngban mẹdezejo tọn enẹ tintindo to ayiha mẹ gbọn owhe lẹ gblamẹ wẹ wedegbẹ́ sunnu klandowiwe ehelẹ do wleawuna Biblu Les Saintes Écritures Traduction du monde nouveau.” Yanwle wedegbẹ́ lọ tọn wẹ nado wleawuna lẹdogbedevomẹ Biblu tọn de he na họnwun bo gọna nukunnumọjẹnumẹ podọ he na tẹdo dowhenu tọn heyin Heblu po Glẹkigbe mẹ tọn po go pẹkipẹki bo nasọ wleawuna dodonu de na whinwhẹ́n bo na to nukọnyi to oyọnẹn he pegan mẹ.

Etẹwẹ Ko Jọ do Oyín Jiwheyẹwhe Tọn Go?

 4. Nawẹ yinkọ Jiwheyẹwhe tọn yin nujọnu to Biblu mẹ do?

⁴ Yanwle tangan Biblu tọn dopo wẹ yin nado gọalọna gbẹtọ lẹ nado yọ́n Jiwheyẹwhe nugbo lọ. (Eksọdusi 20:2-7; 34:1-7; Isaia 52:6) Jesu Klisti plọn hodotọ etọn lẹ nado hodẹ̀ dọ oyín Otọ́ etọn tọn “ni yin hihiọ,” ni yin hinhẹn do wiwe ji, kavi yin nuyiwahẹ taidi wiwe. (Matiu 6:9) Jiwheyẹwhe hẹn oyín mẹdetiti tọn etọn nado yin zizedo Biblu mẹ hugan whla 7 000 lẹ. E jlo dọ gbẹtọ lẹ ni yọ́n yinkọ enẹ po jẹhẹnu Omẹ he tindo yinkọ lọ tọn po.—Malaki 1:11.

 5. Nawẹ lẹdogbedevomẹ-basitọ voovo lẹ ko ze oyín sọn olọn mẹ wá lọ donukọnnamẹ gbọn?

⁵ Suhugan lẹdogbedevomẹ-basitọ Biblu tọn lẹ ko do osí nugbo tọn hia hlan oyín sọn olọn mẹ wá lọ bo ko sọ yi ì zan gbọzangbọzan to lẹdogbedevomẹ yetọn mẹ. Lẹdogbedevomẹ-basitọ delẹ kẹalọyi Yahweh. Devo lẹ ko dè wunmẹ oyín sọn olọn mẹ wá lọ tọn he sọgbe hẹ ogbè yetọn bo gbẹ́ sọ basi dohia họnwun etọn to kọndopọmẹ hẹ nuhe tin to owe Heblu tọn mẹ, vlavo wunmẹ de heyin yinyọnẹn ganji na whenu dindẹn. Les Saintes Écritures Traduction du monde nouveau yí Jehovah zan whla 7 210 to wefọ titengbe etọn lẹ mẹ.

 6. (a) To owhe agọe tọn lẹ mẹ, etẹwẹ lẹdogbedevomẹ-basitọ lẹ ko wà to kọndopọmẹ hẹ oyín sọn olọn mẹ wá lọ? (b) Nawẹ walọyizan ehe ko gbayipe sọ?

⁶ To owhe agọe tọn lẹ mẹ, dile etlẹ yindọ lẹdogbedevomẹ-basitọ Biblu tọn lẹ hẹn yinkọ yẹwhe kosi tọn mọnkọtọn lẹ taidi Baali po Molẹki po do aimẹ do, po agayiyi awuyiya tọn de po yé to dide yinkọ mẹdetiti Jiwheyẹwhe tọn sẹ̀ sọn lẹdogbedevomẹ Ohó gbọdo etọn tọn lẹ mẹ. (Eksọdusi 3:15; Jẹlemia 32:35) To wefọ mọnkọtọn lẹ mẹ taidi Matiu 6:9 po Johanu 17:6, 26 po mẹ, Biblu Albanie tọn he mimá etọn gbayipe taun basi lẹdogbedevomẹ hogbe lọ “yinkọ towe” (enẹ wẹ, yinkọ Jiwheyẹwhe tọn) do “hiẹ,” poun taidi dọ wefọ enẹlẹ ma ylọ yinkọ depope wẹ hunkọ. To Psalm 83:18, The New English Bible po Today’s English Version po dè yinkọ mẹdetiti Jiwheyẹwhe tọn po alọdlẹndonu depope dọ Jiwheyẹwhe tindo yinkọ de po sẹ̀. Dile etlẹ yindọ oyín sọn olọn mẹ wá lọ tlẹ sọawuhia to lẹdogbedevomẹ hoho Owe wiwe Heblu Tọn lẹ mẹ to ogbè susu mẹ, lẹdogbedevomẹ yọyọ lẹ nọ saba dè e sẹ̀ kavi nọ sọawuhia to nudọnamẹ odò tọn lẹ kẹdẹ mẹ. Ehe wẹ yin whẹho lọ to Glẹnsigbe mẹ, dile e sọ yin do to suhugan ogbè Europe, Aflika, Huwaji Amelika tọn, Inde, po lopo Pacifique tọn lẹ po mẹ do.

 7. (a) Nawẹ lẹdogbedevomẹ-basitọ Biblu Aflika tọn delẹ to nuyiwa hẹ oyín sọn olọn mẹ wá lọ gbọn? (b) Etẹwẹ yin numọtolanmẹ towe gando enẹ go?

⁷ Lẹdogbedevomẹ Biblu tọn basitọ do ogbè Aflika tọn delẹ mẹ sọ to afọde yinukọn hugan mọ. Kakati nado diọ oyín sọn olọn mẹ wá lọ po tẹnmẹ-yinkọ Owe wiwe tọn de po, taidi Jiwheyẹwhe kavi Oklunọ, yé to oyín lẹ heyin yíyí sọn nuyise sinsẹ̀n lẹdo lọ tọn mẹ lẹ yí do otẹn etọn mẹ. To The New Testament and Psalms in Zulu (zinjẹgbonu 1986 tọn mẹ), tẹnmẹ-yinkọ lọ Jiwheyẹwhe (uNkulunkulu) nọ yin yiyizan ode do de tẹnmẹ hẹ oyín mẹdetiti tọn de (uMvelinqangi) he Zulu lẹ mọnukunnujẹemẹ nado dlẹnalọdo ‘tọgbo daho lọ he nọ yin sinsẹ̀n-basina gbọn tọgbo gbẹtọ lẹ dali.’ Hosọ de to linlinnamẹwe The Bible Translator, octobre 1992 tọn mẹ, na linlin dọ to awuwiwle na Biblu Chichewa tọn he na yin yiylọdọ Buku Loyera mẹ, lẹdogbedevomẹ-basitọ lẹ yí Chauta zan taidi yinkọ mẹdetiti tọn nado diọtẹnna Jehovah. Linlinnamẹwe lọ basi zẹẹmẹ dọ, Chauta, yin “Jiwheyẹwhe he yé ko yọnẹn bosọ nọ basi sinsẹ̀n hlan tẹgbẹ̀ lọ.” Ṣogan suhugan omẹ ehelẹ tọn sọ nọ basi sinsẹ̀n hlan nuhe yé yise nado yin gbigbọ oṣiọ lẹ tọn. Be nugbo wẹ dọ eyin gbẹtọ lẹ hodẹ̀ hlan “Nupojipetọ de,” podọ nudepope he yè zan na “Nupojipetọ de” yin nude he sọgbe hẹ yinkọ mẹdetiti tọn Jehovah tọn, mahopọnna nudepope he sinsẹ̀n-bibasi yetọn bẹhẹn ya? Na nugbo tọn lala! (Isaia 42:8; 1 Kọlintinu lẹ 10:20) Nudevo de yí do diọ yinkọ mẹdetiti Jiwheyẹwhe tọn he na hẹn gbẹtọ lẹ lẹndọ nuyise aṣa tọn yetọn lẹ sọgbe ma nọ gọalọna yé nado dọnsẹpọ Jiwheyẹwhe nugbo lọ pẹkipẹki gba.

 8. Naegbọn lẹndai Jiwheyẹwhe tọn nado hẹn yinkọ etọn zùn yinyọnẹn ma ko yin hinhẹn pòali?

⁸ Ehe lẹpo ma ko diọ kavi ko hẹn lẹndai Jehovah tọn nado hẹn yinkọ etọn zun yinyọnẹn pòali gba. To ogbè Europe, Aflika, Amelikanu lẹ tọn, po omẹ Whezẹtẹn tọn lẹ gọna lopo ohù tọn lẹ po tọn mẹ, suhugan Biblu he to yinyin mimá lẹdope lẹ gbẹ́ bẹ oyín sọn olọn mẹ wá lọ hẹn. Podọ hugan Kunnudetọ Jehovah Tọn 5 400 000 lẹ wẹ tin to otò po aigba-denamẹ 233 lẹ po ji he nọ klan hugan ganhiho liva lẹ dovo to owhe dopo mẹ na didọna mẹdevo lẹ dogbọn oyín po lẹndai Jiwheyẹwhe nugbo lọ tọn po dali. Yé nọ zinjẹgbonu bosọ nọ má Biblu—yèdọ dehe nọ zan oyín sọn olọn mẹ wá lọ—to ogbè he nọ yin dido gbọn gbẹtọ sọha 3 600 000 000 aigba tọn lẹ tọn dali, he bẹ Glẹnsigbe, Flansegbe, ogbè Chine, Russie, Espagne, Portugal, po Hollande tọn po hẹn. Yé sọ nọ zin alọgọnu lẹ na Biblu pinplọn to ogbè heyin yinyọnẹn dogbọn suhugan mẹhe nọ nọ̀ aigba ji lẹ tọn dali. To madẹnmẹ Jiwheyẹwhe lọsu na yinuwa to aliho de mẹ he na hẹn nulilá etọn dì bọ akọta lẹ “bo nasọ yọnẹn dọ [ewọ wẹ] Oklunọ.”—Ezekiẹli 38:23

Whenuena Yise Mẹdetiti Tọn Deanana Lẹdogbedevomẹ Lọ

 9. Nawẹ Biblu do nujọnu-yinyin azọngban he sinai do mẹhe to nuyiwa hẹ Ohó Jiwheyẹwhe Tọn lẹ ji tọn hia gbọn?

⁹ Azọngban sinsinyẹn de sinai do mẹhe nọ basi lẹdogbedevomẹ Ohó Jiwheyẹwhe Tọn po mẹhe nọ plọn ẹn mẹ lẹ po ji. Apọsteli Paulu dọ gando lizọnyizọn etọn po gbẹdohẹmẹtọ etọn lẹ tọn po go dọmọ: “Ṣigba mí ko gbẹ́ onú bibẹ bublu tọn lẹ dai, mí ma to zọnlinzin to oklọ mẹ, mí ma sọ to oklọ yí do to ohó Jiwheyẹwhe tọn go hẹn; ṣigba gbọn awusọhia nugbo tọn dali mí to míde pa hlan ayiha omẹ dopodopo tọn to nukọn Jiwheyẹwhe tọn.” (2 Kọlintinu lẹ 4:2) Nuyiwa oklọ tọn do to ohó Jiwheyẹwhe tọn go hẹn zẹẹmẹdo nado hẹn ẹn gblezọn gbọn dindọn onú jonọ de kavi he ma họakuẹ de wlùdopọ po e po dali. Apọsteli Paulu ma taidi lẹngbọhọtọ nugbo-madọtọ Islaeli tọn lẹ to azán Jẹlemia tọn gbè lẹ he Jehovah wọhẹ na lilá linlẹn yéde tọn lẹ kakati nado lá nuhe Jiwheyẹwhe dọ wutu. (Jẹlemia 23:16, 22) Ṣigba etẹwẹ ko jọ̀ to ojlẹ egbezangbe tọn mẹ?

10. (a) Nawẹ linlẹn dehe gbọnvona nugbonọ-yinyin hlan Jiwheyẹwhe ko yinuwado lẹdogbedevomẹ-basitọ delẹ ji to azán mítọn gbè gbọn? (b) Azọngban he mayin yetọn tẹwẹ yé to zize?

¹⁰ To Wẹkẹ-Whàn II whenu, wedegbẹ́ sinsẹ̀n-nuplọnmẹtọ po nukọntọ ṣọṣi tọn lẹ po kọngbedopọ hẹ gandudu Nazi tọn to Allemagne nado dè vọkan “Alẹnu Yọyọ lọ” tọn tọ́n he dè alọdlẹndonu nukundagbe tọn na Juvi lẹ gọna dohia depope dọ Jesu Klisti jọ̀ sọn akọta Ju tọn mẹ sẹ̀. To agọe, lẹdogbedevomẹ-basitọ he wleawuna The New Testament and Psalms: An Inclusive Version lẹ dẹ́ hlan apadopo, bo to vivẹnudo nado dè dohia lẹpo dọ Juvi lẹ yin azọngbannọ to kọndopọmẹ hẹ okú Klisti tọn sẹ̀. Lẹdogbedevomẹ-basitọ enẹlẹ sọ tindo numọtolanmẹ lọ dọ wehiatọ yọnnu lẹ na yin ayajẹnọ hugan eyin yè dọho Jiwheyẹwhe tọn, e mayin taidi Otọ́ gba, ṣigba taidi Otọ́-Onọ̀ podọ eyin Jesu yin yiylọdọ, Ovi etọn, ṣigba e mayin Ovi Jiwheyẹwhe tọn gba. (Matiu 11:27) Yé sọ dè nunọwhinnusẹ́n taliai asi lẹ tọn hlan asu yetọn lẹ podọ tonusise ovi lẹ tọn hlan mẹjitọ yetọn lẹ sẹ̀, dile yé to azọ́n yetọn wà. (Kọlọsinu lẹ 3:18, 20) E họnwun dọ lẹdogbedevomẹ-basitọ enẹlẹ ma kọngbedopọ hẹ gbemima apọsteli Paulu tọn ‘ma nado yí oklọ do to ohó Jiwheyẹwhe tọn go hẹn’ gba. Yé to jìwọn azọngban lẹdogbedevomẹ-basitọ tọn go, bo to otẹn dowatọ tọn yí, bo to awuwlena owe he to kọslona yinkọ dagbe Biblu tọn lẹ taidi aliho de nado ze linlẹn mẹdetiti tọn yetọn lẹ daga.

11. Nawẹ nuplọnmẹ Mẹylọhodotọklisti tọn lẹ sọta nuhe Biblu dọ dogbọn alindọn po okú po dali gbọn?

¹¹ Na paa tọn ṣọṣi Mẹylọhodotọklisti tọn lẹ plọnmẹ dọ alindọn gbẹtọ tọn yin gbigbọ, dọ e nọ jo agbasa lọ do to okú whenu, podọ e yin jọmaku ga. To vogbingbọn mẹ, lẹdogbedevomẹ hoho Biblu tọn lẹ to ogbè suhugan lẹ mẹ dọ ẹ họnwun dọ gbẹtọvi lẹ yin alindọn lẹ, dọ kanlin lẹ yin alindọn lẹ, podọ alindọn nọ kú. (Gẹnẹsisi 12:5; 36:6; Osọha lẹ 31:28; Jakobu 5:20) Enẹ ko dowinyan nukọntọ sinsẹ̀n tọn lẹ.

12. To aliho tẹ mẹ wẹ Biblu agọe tọn delẹ hẹn nugbo dodonu Biblu tọn delẹ dozinvlu te?

¹² Todin vọkan yọyọ delẹ hẹn nugbo ehelẹ dozinvlu. Gbọnna? Yé dapana lẹdogbedevomẹ tlọlọ hogbe yinkọ tọn Heblu tọn lọ neʹphesh (alindọn) to wefọ delẹ mẹ. To Gẹnẹsisi 2:7 mẹ, yé dọ dọ sunnu tintan lọ “jẹ gbẹnọ ji” (kakati nado yin “lẹzun alindọn gbẹ̀tenọ”). Kavi yé sọgan dlẹnalọdo “nudida” kakati nado yin “alindọn” to whẹho ogbẹ̀ kanlin lẹ tọn mẹ. (Gẹnẹsisi 1:21) To wefọ lẹ taidi Ezekiẹli 18:4, 20 mẹ, yé dlẹnalọdo “omẹ lọ” kavi “omẹ dopodopo” (kakati nado yin “alindọn”) he nọ kú. Vlavo, lẹdogbedevomẹ enẹlẹ, sọgbe na lẹdogbedevomẹ-basitọ lọ. Ṣigba alọgọ sọha nẹmu wẹ yé na nugbo dintọ ahundoponọ he linlẹn etọn ko yin nuyiwadeji gbọn nuplọnmẹ he mayin owe wiwe tọn Mẹylọhodotọklisti tọn lẹ tọn dali?b

13. Gbọn etẹ dali wẹ vọkan Biblu tọn delẹ ko ṣinyọnnudo lẹndai Jiwheyẹwhe tọn gando aigba go te?

¹³ To vivẹnudido mẹ nado nọgodona yise yetọn dọ mẹdagbe lẹpo wẹ nọ yì olọn mẹ, lẹdogbedevomẹ-basitọ lẹ—kavi sinsẹ̀n-nuplọnmẹtọ he gbadopọnna azọ́n yetọn lẹ—sọgan tẹnpọn nado ṣinyọnnudo nuhe Biblu dọ dogbọn lẹndai Jiwheyẹwhe tọn na aigba dali. To Psalm 37:11, sọha lẹdogbedevomẹ delẹ tọn hia dọ whiwhẹnọ lẹ na dugu “aigba tọn.” “Aigba” yin zẹẹmẹ yọnbasi hogbe lọ (ʼeʹrets) heyin yiyizan to Heblu mẹ tọn. Ṣigba La Bible en Français Courant (he mẹ suhugan ogbè devo lẹ basi lẹdogbedevomẹ yetọn sọn) dosla na lẹdogbedevomẹ etọn. Dile etlẹ yindọ vọkan ehe tlẹ basi lẹdogbedevomẹ hogbe Glẹki tọn lọ ge taidi “aigba ji” whla 17 to Wẹndagbe Matiu tọn mẹ, to Matiu 5:5 e diọtẹn na “aigba ji” po hogbe lẹ “nuhe Jiwheyẹwhe ko dopagbe etọn” po. To jọwamọ liho hagbẹ ṣọṣi tọn lẹ nọ lẹndọ olọn mẹ wẹ. Yé mayin didọna po nugbonọ-yinyin po dọ, to Yẹwhehodidọ Osó ji tọn mẹ, Jesu Klisti dọ dọ walọmimiọnnọ lẹ, homẹmimiọnnọ lẹ, kavi whiwhẹnọ lẹ wẹ na “dugu aigba tọn” gba.

14. Linlẹn ṣejannabi tọn tẹwẹ họnwun to vọkan Biblu tọn delẹ mẹ?

¹⁴ E họnwun dọ lẹdogbedevomẹ-basitọ Owe wiwe tọn delẹ zan hogbe lẹ po pọndohlan nado gọalọna yẹwhehodọtọ lẹ nado mọ sùnmẹ-kuẹ dagbe de yí wutu po. E yin nugbo dọ Biblu dọmọ: “Azọ́nwatọ jẹ na alè etọn.” (1 Timoti 5:18) Ṣigba to 1 Timoti 5:17, fie e dọ te dọ sunnu mẹho he to nukunpedonugo to aliho dagbe mẹ lẹ wẹ yè ni “lẹn jẹ na yẹyi whla awe,” yẹyi dopo kẹdẹ lọ he delẹ to yé mẹ pọndohlan nado jẹ na nùdego wẹ alè akuẹ tọn. (Yijlẹdo 1 Pita 5:2 go.) Enẹwutu, The New English Bible dọ dọ mẹho ehelẹ “dona yin linlẹn jẹ na ahọsumẹ awe,” bọ Contemporary English Version dọ dọ yé “jẹ nado yin ahọsu do awe ji sọmọ.”

Hinhẹn Ohó Jiwheyẹwhe Tọn Go po Nugbonọ-yinyin Po

15. Nawẹ mí sọgan magbe do lẹdogbedevomẹ Biblu tọn he dona yin hoyidọ sọn e mẹ tọn ji gbọn?

¹⁵ Etẹwẹ ehe lẹpo zẹẹmẹdo na Biblu hiatọ dopodopo lẹ gọna mẹhe nọ yí Biblu zan nado plọnnu mẹdevo lẹ? To suhugan ogbè gbayipe he nọ yin yiyizan lẹ tọn mẹ, e hugan lẹdogbedevomẹ Biblu tọn dopo sọn ehe mẹ yè dona dè sọn. Yí wuntuntun zan to dide Biblu he hiẹ na yizan lọ mẹ. (Howhinwhẹn lẹ 19:8) Eyin lẹdogbedevomẹ de mayin nugbonọ dogbọn Jiwheyẹwhe didohia dali—yèdọ dè yinkọ etọn sọn Ohó gbọdo etọn mẹ to whẹwhinwhẹ́n depope ji—be lẹdogbedevomẹ-basitọ lọ sọgan diọ adà Biblu lọ tọn devo lẹ wẹ? Eyin ayihaawe tin dogbọn gbesisọ-yinyin hogbe de tọn dali, tẹnpọn nado yí ì jlẹdo lẹdogbedevomẹ hoho tọn lẹ go. Eyin mẹplọntọ Ohó Jiwheyẹwhe Tọn wẹ hiẹ yin, yí nukundagbe do pọ́n lẹdogbedevomẹ he tẹdo nuhe tin to owe dowhenu Heblu po Glẹki tọn lẹ po mẹ go pẹkipẹki.

16. Nawẹ dopodopo mítọn lẹ sọgan do nugbonọ-yinyin hia to yizan Ohó gbọdo Jiwheyẹwhe tọn mẹ gbọn?

¹⁶ Dopodopo mítọn dona yin nugbonọ hlan Ohó Jiwheyẹwhe Tọn. Mí na wà enẹ gbọn sọwhiwhe yíyí do penukundo nuhe tin to e mẹ lẹ dali, yin e yọnbasi, mí ni zan ojlẹ de egbesọegbesọ nado hia Biblu. (Psalm 1:1-3) Mí nọ wà ẹ gbọn yíyí nuhe e dọ lẹ do yizan mẹ to gbẹzan mítọn lẹ mẹ dali, pinplọn nado zan nunọwhinnusẹ́n po apajlẹ lẹ po taidi dodonu lọ na nudide jijlọ lẹ bibasi. (Lomunu lẹ 12:2; Heblu lẹ 5:14) Mí nọ dohia dọ mí yin lilatọ zohunhunnọ Ohó Jiwheyẹwhe Tọn gbọn yẹwheho etọn didọ hlan mẹdevo lẹ dali. Mí sọ nọ wà ẹ taidi mẹplọntọ lẹ gbọn Biblu lọ yiyizan po sọwhiwhe po, ma nado slokọna ẹn gbede kavi dosla na nuhe e dọ lẹ nado sọgbe hẹ linlẹn mítọn dali. (2 Timoti 2:15) Nuhe Jehovah ko dọdai na yin hinhẹndi matin awugbopo. E yin nugbonọ to Ohó etọn lẹ hinhẹndi mẹ. Mì gbọ mí ni yin nugbonọ to hinhẹn e go mẹ.

[Nudọnamẹ Odò Tọn]

Be Hiẹ Flin Ya?

◻ Mẹwhinwhan tẹwẹ ko deanana azọ́n Biblu lẹdogbedevomẹ-basitọ ojlẹ mítọn mẹ lẹ tọn?

◻ Naegbọn aliho nuwiwa lẹdogbedevomẹ-basitọ egbezangbe tọn lẹ tọn ma ko hẹn linlẹn Jiwheyẹwhe tọn gando yinkọ etọn go pòali?

◻ Nawẹ lẹdogbedevomẹ-basitọ delẹ hẹn nugbo Biblu tọn lẹ dozinvlu gando alindọn, okú, po aigba po go gbọn?

◻ To aliho tẹlẹ mẹ wẹ mí sọgan dohia te dọ mí hẹn Ohó Jiwheyẹwhe Tọn go po nugbonọ-yinyin po?

[Yẹdide to weda 26]

Lẹdogbedevomẹ Biblu tọn tẹwẹ hiẹ dona yizan?