Nuplọnmẹ de Gando Goyiyi po Whiwhẹ po Go

NUJIJỌ de to gbẹzan Ahọlu Davidi tọn mẹ do vogbingbọn he tin to whiwhẹ nujọnu tọn po goyiyi po ṣẹnṣẹn hia. Nujijọ lọ wá aimẹ to whenuena Davidi ko gbawhàn Jelusalẹm tọn bosọ yí ì do basi tòdaho tatọ́-tònọ etọn godo. Davidi pọ́n Jehovah hlan taidi Ahọlu he to gandu nugbonugbo do Isaeli ji, enẹwutu e basi tito na Aki lọ he nọtena tintin to finẹ Jiwheyẹwhe tọn nido yin hinhẹn wá tòdaho lọ mẹ. Nujijọ ehe yin nujọnu na Davidi sọmọ bọ e do ayajijẹ etọn hia gbangba dile e hodo yẹwhenọ he ze Aki lọ ja lẹ. Tòmẹnu Jelusalẹm tọn lẹ mọ ahọlu yetọn to ‘linlọ́n’ bo “yí hlọnhlọn etọn lẹpo do to wedú.”—1 Otannugbo lẹ 15:15, 16, 29; 2 Samuẹli 6:11-16.

Ṣigba, asi Davidi tọn Mikali, ma kọnawudopọ to sadidi aglinjijẹ tọn enẹ mẹ gba. E to nupọnhlan sọn vẹsẹnu, podọ kakati nado na sisi aliho he mẹ Davidi to pipà na hlan Jehovah te, ewọ “sọ vlẹ ẹ to ayiha etọn mẹ.” (2 Samuẹli 6:16) Naegbọn Mikali do tindo numọtolanmẹ ehe? E họnwun dọ, e nọ mọ ede mẹ zẹjlẹgo na e yin viyọnnu Sauli ahọlu tintan Islaeli tọn bosọ yin asi ahọlu awetọ Islaeli tọn todin wutu. E sọgan ko lẹndọ, asu etọn he yin ahọlu, ma dona ko ze ede whè jẹ obá dopolọ mẹ hẹ mẹvọ́nu lẹ bo tindo mahẹ to nuyiwa aglinjijẹ tọn yetọn mẹ gba. Numọtolanmẹ goyiyi tọn mọnkọtọn sọawuhia to aliho he mẹ e dọnudo Davidi te to whenuena e lẹkọwa whegbè. Po hogbe mẹṣanko tọn lẹ po, e dọmọ: “Nawẹ ahọlu Islaeli tọn yin gigonọ do to egbé, mẹhe de ede do omẹ́ to egbé to nukun deviyọnnu devisunnu etọn lẹ tọn lẹ tọn mẹ, dile dopo sọn omẹ fúsa lẹ mẹ nọ yí matin winyan do de ede do omẹ́ do!”—2 Samuẹli 6:20.

Nawẹ Davidi yinuwa hlan homọdọdomẹgo ehe gbọn? Davidi gbẹnuna Mikali dọ Jehovah ko gbẹ́ otọ́ etọn Sauli dai, bo ko yí emi do do ahọlu do otẹn etọn mẹ. Davidi yidogọ dọmọ: “Yẹn na gbẹsọ yin omẹ fúsa hú le, bo nasọ yin mẹvọ́nu to nukun dee lọsu tọn mẹ: ṣigba deviyọnnu lẹ, ohó mẹhe tọn hiẹ dọ, sọn yé dè wẹ yè na tindo mi to gbégbò mẹ.”—2 Samuẹli 6:21, 22.

Mọwẹ, Davidi magbè nado to Jehovah sẹ̀n zọnmii po whiwhẹ po. Nuyiwa ehe gọalọna mí nado mọnukunnujẹ nuhewutu Jehovah ylọ Davidi dọ “omẹ ayiha ṣie tọn” mẹ. (Owalọ lẹ 13:22; 1 Samuẹli 13:14) Na nugbo tọn, Davidi to hihodo apajlẹ dagbe hugan whiwhẹ tọn—yèdọ enẹ he yin Jehovah Jiwheyẹwhe lọsu tọn. E jẹna ayidego dọ, hogbe he Davidi yizan to whenuena e dọna Mikali dọ, “Yẹn nasọ yin mẹvọ́nu” wá sọn hogbe dodonu Heblu tọn de mẹ he sọ yin yiyizan nado basi zẹẹmẹ gando nukun he Jiwheyẹwhe lọsu nọ yí do pọ́n gbẹtọvi lẹ go. Dile etlẹ yindọ Jehovah wẹ yin Mẹhe klo hugan to wẹkẹ lọ mẹ, Psalm 113:6, 7 basi zẹẹmẹ etọn taidi mẹhe “huwhẹ́ ede [enẹ wẹ nado jẹte sọn otẹn gigonọ de mẹ to nuyiwa hẹ mẹhe whè hugan de mẹ] nado payi olọn po aigba po go . . . E ze wamọnọ tite sọn kọ́gudu mẹ, bosọ ze agbátọnọ sọn ogbóji.”

To whenuena e yindọ Jehovah yin whiwhẹnọ, e ma yin nupaṣamẹ dọ e gbẹwanna “nukun goyiyi” gbẹtọ awagundotọ lẹ tọn gba. (Howhinwhẹn lẹ 6:16, 17) To jijọ ylankan ehe po sisi matindo po didohia mẹhe Jiwheyẹwhe ko de taidi ahọlu mẹ, Mikali hẹn lẹblanulọkẹyi lọ nado jì visunnu de na Davidi bú. E ma jì ovi de kaka bo do kú. Nuplọnmẹ titengbe nankọ die ehe yin na mí! Mẹhe jlo nukundagbe Jiwheyẹwhe tọn lẹpo dona hodo hogbe ehelẹ he dọmọ: “Mìmẹpo ni nọ yin mẹmẹglọ hlan mìnọzo, na yè nisọ yí whiwhẹ do ṣinyọnavọ̀na mì: na Jiwheyẹwhe ko diọnukunsọ goyitọ lẹ, bosọ na ojọmiọn ayiha whiwhẹnọ lẹ.”—1 Pita 5:5.