Nọ Ganjẹ Jehovah Go to Ninọmẹ Ayimajai Tọn lẹ Mẹ

 1. Naegbọn mí dona setonuna avase Jesu tọn?

TO DỌDAI Jesu tọn gando azán godo tọn lẹ go mẹ, ewọ dọmọ: ‘Mì payi mìde go ma nado yí magbọjẹ gbẹ̀mẹ tọn lẹ [kavi nuhiha gando dandannu gbẹ̀mẹ tọn lẹ go; ayimajai egbesọegbesọ tọn lẹ] do doagban pinpẹn na ahun mìtọn.’ (Luku 21:34) Mí dona setonuna avase enẹ. Etẹwutu? Na to alọnu, mímẹpo wẹ nọ pehẹ ninọmẹ ayimajai tọn dopolọ lẹ wutu.

 2. Ninọmẹ ayimajai tọn tẹlẹ wẹ mẹmẹsunnu po mẹmẹyọnnu mítọn delẹ po pehẹ?

² To whedelẹnu, mí dona pehẹ ninọmẹ ayimajai tọn voovo lẹ to ojlẹ dopolọ mẹ. Mì gbọ mí ni lẹnnupọndo apajlẹ he bọdego lẹ ji. Kunnudetọ de he nọ yin John,b bo to azọ̀n sinsinyẹn de jẹ biọ bẹwlu mẹ pete, na asi etọn jo e do to whenue yé ko nọ alọwle mẹ na owhe 19 godo. Enẹgodo, viyọnnu etọn awe lẹ doalọtena Jehovah sinsẹ̀n. Bob po Linda po he yin asu po asi po pehẹ avùnnukundiọsọmẹnu debọdo-dego he gbọnvo de. Azọ́n gbledo yé, bọ enẹgodo yé masọ tindo owhé de ba. Gbọnvona nuhahun enẹlẹ, doto lẹ mọdọ Linda to ahun-zọ̀n de jẹ he gán wá hù i to nukọn mẹ, humọ e sọ tindo azọ̀n devo he to bibẹpla nugonu he nọ hoavùn sọta azọ̀n to agbasa etọn mẹ lẹ.

 3. Sọgbe hẹ Filipinu lẹ 4:6, 7, jidide tẹwẹ mí sọgan tindo?

³ Mí sọgan deji dọ Mẹdatọ, podọ Otọ́ owanyinọ mítọn Jehovah yọ́n obá he mẹ ayimajai nọ yinuwado mí ji jẹ. Podọ, ewọ jlo na gọalọna mí nado duto avùnnukundiọsọmẹnu he mí nọ pehẹ lẹ ji. (Hia Filipinu lẹ 4:6, 7.) Ohó Jiwheyẹwhe tọn bẹ otàn susu lẹ hẹn, he basi zẹẹmẹ nuhahun he mẹ devizọnwatọ etọn lẹ ko jugbọn lẹ tọn. E sọ bẹ kandai lehe Jehovah ko gọalọna yé nado duto ninọmẹ ayimajai tọn enẹlẹ ji do tọn hẹn. Mì gbọ mí ni gbadopọnna vude to apajlẹ ehelẹ mẹ.

 4. Avùnnukundiọsọmẹnu tẹlẹ wẹ Elija pehẹ, podọ nawẹ Jehovah gọalọna ẹn gbọn?

⁴ Elija sẹ̀n Jehovah to ojlẹ awusinyẹn tọn lẹ mẹ, bo pehẹ avùnnukundiọsọmẹnu he kàn dẹpẹ biọ lẹ. Ahabi yin dopo to ahọlu he ma yin nugbonọ to whenuho Islaeli tọn mẹ lẹ mẹ, podọ e dà Baali sẹ̀ntọ kanylantọ de he nọ yin Jezebẹli. Yé omẹ awe lẹ hẹn aigba lọ gọ́ na Baali sinsẹ̀n bosọ hù yẹwhegán Jehovah tọn susu. Elija tẹnpọn bo họ̀ngán. Ewọ sọ lùn ojlẹ huvẹ sinsinyẹn tọn de tọ́n, na e ganjẹ Jehovah go wutu. (1 Ahọ. 17:2-4, 14-16) Humọ, Elija ganjẹ Jehovah go to whenue e pehẹ yẹwhegán po sinsẹ̀n-basitọ Baali tọn lẹ po. Ewọ dotuhomẹna Islaelivi lẹ nado sẹ̀n Jehovah. (1 Ahọ. 18:21-24, 36-38) Elija mọ kunnudenu susugege he dohia dọ Jehovah to godona ẹn to ojlẹ ayimajai tọn enẹlẹ mẹ.

5, 6. Sọgbe hẹ 1 Ahọlu lẹ 19:1-4, numọtolanmẹ tẹwẹ Elija tindo, podọ nawẹ Jehovah dohia Elija dọ emi yiwanna ẹn gbọn?

⁵ Hia 1 Ahọlu lẹ 19:1-4. Ṣigba, Elija dibu to whenue Ahọsi Jezebẹli sìn-adán nado hù i. Enẹwutu, e họnyi lẹdo Beẹli-ṣeba tọn mẹ. Ewọ jẹflumẹ sọmọ bo “jẹ okú biọ na ede ji.” Naegbọn ewọ do tindo numọtolanmẹ enẹ? Gbẹtọ mapenọ wẹ Elija yin, yèdọ “gbẹtọ he tindo numọtolanmẹ taidi mítọn lẹ nkọ.” (Jak. 5:17) Vlavo ayimajai po nuṣikọ sinsinyẹn etọn po wẹ wá húagbọ́ ẹ. Elija sọgan ko lẹndọ vivẹnu he emi do nado ze sinsẹ̀n-bibasi wiwe-ṣeke daga lẹpo wẹ yin ovọ́, dọ ninọmẹ nulẹ tọn ma pọnte to Islaeli, podọ emilẹ ṣo wẹ pò to Jehovah sẹ̀n. (1 Ahọ. 18:3, 4, 13; 19:10, 14) Nuyiwa yẹwhegán nugbonọ ehe tọn sọgan paṣa mí. Amọ́, Jehovah mọnukunnujẹ numọtolanmẹ Elija tọn lẹ mẹ.

⁶ Jehovah ma gblewhẹdo Elija na e dọ numọtolanmẹ etọn lẹ tọ́n wutu gba. Kakatimọ, ewọ gọalọna Elija nado gọ̀ huhlọn mọyi. (1 Ahọ. 19:5-7) To nukọn mẹ, Jehovah yí homẹdagbe do vọ́ pọndohlan Elija tọn jlado, gbọn huhlọn jiawu Etọn didohia ẹ dali. Enẹgodo, Jehovah hẹn họnwun na ẹn dọ emi gbẹ́ tindo yẹwhegán 7 000 to Islaeli he gbẹ́ nado sẹ̀n Baali. (1 Ahọ. 19:11-18) Jehovah yí apajlẹ ehelẹ zan nado dohia Elija dọ Emi yiwanna ẹn.

 7. Nawẹ aliho he mẹ Jehovah gọalọna Elija te vọ́ jide na mí gbọn?

⁷ Be a to pipehẹ ninọmẹ ayimajai tọn de wẹ ya? Lehe e yin homẹmiọnnamẹnu na mí do sọ nado yọnẹn dọ Jehovah mọnukunnujẹ numọtolanmẹ Elija tọn lẹ mẹ! Enẹ vọ́ jide na mí dọ ewọ nọ mọnukunnujẹ nuhe mílọsu to ahidi hẹ to numọtolanmẹ-liho lẹ mẹ ga. Ewọ yọ́n dogbó mítọn lẹ, podọ ewọ tlẹ nọ yọ́n linlẹn po numọtolanmẹ mítọn lẹ po. (Salm. 103:14; 139:3, 4) Eyin mí hodo apajlẹ Elija tọn bo nọ ganjẹ Jehovah go, ewọ na gọalọna mí nado pehẹ nuhahun he nọ hẹn ayimajai wá na mí lẹ.—Salm. 55:22.

 8. Nawẹ Jehovah sọgan gọalọna we nado pehẹ ayimajai gbọn?

⁸ Ayimajai sọgan zọ́n bọ a na lẹndọ ninọmẹ towe ma na diọ gbede, bọ a na gbọjọ. Eyin enẹ jọ, flindọ Jehovah na gọalọna we nado pehẹ ayimajai lẹ. Nawẹ ewọ na gọalọna we gbọn? Ewọ nọ donukun dọ a ni dọ ahunmẹdunamẹnu towe lẹ na emi. Podọ, e na sè awhágbe towe lẹ na alọgọ. (Salm. 5:3; 1 Pita 5:7) Enẹwutu, nọ hodẹ̀ hlan Jehovah whẹwhẹ gando nuhahun towe lẹ go. E ma na dọhona we tlọlọ dile e wà na Elija do, amọ́ e sọgan dọhona we gbọn Ohó etọn Biblu po titobasinanu etọn po gblamẹ. Kandai he a hia to Biblu mẹ lẹ sọgan miọnhomẹna we bo na we todido. Podọ, mẹmẹsunnu po mẹmẹyọnnu towe lẹ po sọgan na we tuli.—Lom. 15:4; Heb. 10:24, 25.

 9. Nawẹ họntọn dejidego de sọgan gọalọna mí gbọn?

⁹ Whenue Jehovah dọna Elija nado deazọ́nna Eliṣa, gbẹdohẹmẹtọ he sin hudo Elija tindo hugan lọ wẹ Ewọ na ẹn, yèdọ mẹhe matin ayihaawe gọalọna ẹn nado doakọnna nuhe to agbọ́ hú i to numọtolanmẹ-liho lẹ. Mọdopolọ, whenue mí dọ homẹ na họntọn dejidego de, ewọ sọgan gọalọna mí nado doakọnna nuhahun mítọn lẹ. (2 Ahọ. 2:2; Howh. 17:17) Eyin a nọ mọdọ emi ma do mẹde he emi na dọ homẹ na, hodẹ̀ hlan Jehovah nado gọalọna we, na a nido mọ Klistiani he whèwhín de he sọgan gọalọna we to numọtolanmẹ-liho.

10. Nawẹ numimọ Elija tọn na mí todido gbọn, podọ nawẹ opagbe he yin kinkandai to Isaia 40:28, 29 mẹ sọgan gọalọna mí gbọn?

¹⁰ Jehovah gọalọna Elija nado diahi hẹ ayimajai lẹ, podọ nado sẹ̀n ewọ po nugbonọ-yinyin po na owhe susu. Numimọ Elija tọn hẹn mí tindo todido. Mí sọgan jugbọn ojlẹ ayimajai sinsinyẹn tọn lẹ mẹ, bọ ehe sọgan hẹn mí vọgán to agbasa-liho podọ to numọtolanmẹ-liho. Etomọṣo, eyin mí ganjẹ Jehovah go, e na na mí huhlọn he sin hudo mí tindo nado to ewọ sẹ̀n zọnmii.—Hia Isaia 40:28, 29.

11-13. Nawẹ ayimajai yinuwado devizọnwatọ Jiwheyẹwhe tọn atọ̀n delẹ ji to hohowhenu gbọn?

¹¹ Biblu sọ donù mẹdevo lẹ go he pehẹ ayimajai sinsinyẹn. Di apajlẹ, Hanna pehẹ winyan he ovi-ma-ji nọ hẹnwa, gọna vlẹko sinsinyẹn sọn asisi etọn dè. (1 Sam. 1:2, 6) Flumẹjijẹ daho Hanna tọn hẹn awubla sinsinyẹn wá na ẹn sọmọ bọ e viavi bo ma tindo ojlo nado dùnú ba.—1 Sam. 1:7, 10.

¹² To ojlẹ delẹ mẹ, ayimajai húagbọ́ Ahọlu Davidi. Lẹnnupọndo nuhahun he e pehẹ lẹ ji. E nọ tindo numọtolanmẹ whẹhuhu tọn sinsinyẹn, na nuṣiwa susu he mẹ e ko jai jẹ lẹ wutu. (Salm. 40:12) Visunnu yiwanna etọn Absalọmi fọngu do e ji, podọ ehe dekọtọn do okú mẹ na Absalọmi. (2 Sam. 15:13, 14; 18:33) Humọ, dopo to họntọn alọmayiemẹ Davidi tọn lẹ mẹ dùpa do e ji. (2 Sam. 16:23–17:2; Salm. 55:12-14) Susu to salmu he Davidi kàn lẹ mẹ do numọtolanmẹ flumẹjijẹ tọn etọn lẹ po jidide mawhango etọn to Jehovah mẹ po hia.—Salm. 38:5-10; 94:17-19.

¹³ To nukọn mẹ, aliho gbẹninọ tọn mẹylankan lẹ tọn jẹ jijlo salmu-kantọ de ji. Ewọ sọgan ko yin ovivi Levinu lọ Asafi tọn de, mẹhe sẹ̀n to tẹmpli Jelusalẹm tọn mẹ wayi. Salmu-kantọ ehe pehẹ ninọmẹ ayimajai tọn sinsinyẹn lẹ, ehe zọ́n bọ e gọ́ na awubla bo jẹflumẹ petepete. Ewọ tlẹ jẹ kinkanse ede ji eyin Jiwheyẹwhe sinsẹ̀n nọ hẹn dona lẹ wá nugbonugbo.—Salm. 73:2-5, 7, 12-14, 16, 17, 21.

14, 15. Etẹwẹ apajlẹ Biblu tọn atọ̀n delẹ plọn mí gando lilẹhlan Jehovah nado mọ alọgọ go?

¹⁴ Sinsẹ̀n-basitọ nugbo atọ̀n he go mí ṣẹṣẹ donù enẹlẹ ganjẹ Jehovah go nado mọ alọgọ. Yé hodẹ̀ vivẹvivẹ bo dọ nuhe hẹn yé jẹflumẹ lẹ na ewọ. Yé yí ahundopo do dọ whẹwhinwhẹ́n he wutu yé do tindo ayimajai jẹ obá mọnkọ mẹ lẹ na ẹn. Podọ, yé zindonukọn nado nọ yì nọtẹn sinsẹ̀n-bibasi tọn Jehovah tọn.—1 Sam. 1:9, 10; Salm. 55:22; 73:17; 122:1.

¹⁵ Jehovah yí awuvẹmẹ do gblọnna dopodopo yetọn. Hanna vọ́ jijọho ahun mẹ tọn etọn mọyi. (1 Sam. 1:18) Davidi wlan dọmọ: “Susu wẹ awusinyẹn dodonọ tọn, ṣigba, Jehovah nọ whlẹn ẹn sọn popo mẹ.” (Salm. 34:19) Podọ to nukọn mẹ, salmu-kantọ lọ tindo numọtolanmẹ lọ dọ Jehovah “ko hẹn adusilọ [emitọn] go,” gbọn ayinamẹ owanyinọ etọn lẹ yíyí do deanana emi dali. E jihàn dọmọ: “Na yẹn tọn, e yọ́n na mi nado dọnsẹpọ Jiwheyẹwhe. Yẹn ko yí Oklunọ Nupojipetọ Jehovah do basi fibẹtado ṣie.” (Salm. 73:23, 24, 28) Etẹwẹ mí plọn sọn apajlẹ ehelẹ mẹ? To whedelẹnu, nuhahun he nọ do ayimajai namẹ lẹ na nọ húagbọ́ mí. Ṣigba, mí sọgan doakọnna eyin mí nọ lẹnayihamẹpọn do lehe Jehovah ko gọalọna mẹdevo lẹ do ji, nọ ganjẹ ewọ go to odẹ̀ mẹ, bosọ nọ setonuna ẹn gbọn nuhe ewọ biọ to mí si lẹ wiwà dali.—Salm. 143:1, 4-8.

16, 17. (a) Naegbọn mí ma dona nọ klan míde dovo? (b) Nawẹ mí sọgan vọ́ huhlọn mọyi gbọn?

¹⁶ Apajlẹ atọ̀n enẹlẹ sọ plọn mí onú titengbe devo—mí ma dona nọ klan míde sọn Jehovah po omẹ etọn lẹ po go. (Howh. 18:1) Nancy he jugbọn ninọmẹ ayimajai tọn he sinyẹn taun mẹ to whenue asu etọn jo e do, dọmọ: “Na azán susu lẹ, n’ma tlẹ jlo paali nado mọ mẹde kavi dọhona mẹdepope. Etomọṣo, lehe n’to dee klan dovo sọ, mọ wẹ awubla ṣie nọ jideji dogọ do niyẹn.” Nulẹ wá diọ whenue Nancy dín aliho lẹ nado gọalọna mẹdevo he to nuhahun mẹ lẹ. E dọmọ: “N’nọ dotoaina mẹdevo lẹ dile yé to avùnnukundiọsọmẹnu yetọn lẹ dọ. N’wá mọdọ lehe n’to awuvẹmẹ susu tindo na yé sọ, mọ wẹ awubla dee titi tọn nọ to didepo do niyẹn.”

¹⁷ Mí sọgan vọ́ huhlọn mọyi gbọn opli agun tọn lẹ yìyì dali. To whenue mí tin to opli lẹ ji, mí nọ hùn dotẹnmẹ susu dogọ dote na Jehovah nado yin ‘alọgọtọ podọ homẹmiọnnamẹtọ’ mítọn. (Salm. 86:17) To finẹ, ewọ nọ hẹn mí lodo gbọn gbigbọ wiwe etọn, Ohó etọn po omẹ etọn lẹ po gblamẹ. Opli lẹ nọ hùn dotẹnmẹ dote na mí nado duvivi “tulinina ode awetọ” tọn. (Lom. 1:11, 12) Mẹmẹyọnnu de he nọ yin Sophia dọmọ: “Jehovah po pipli mẹmẹsunnu lẹ tọn mítọn po wẹ gọalọna mi nado doakọnnanu. Opli agun tọn lẹ yin nujọnu taun na mi. N’doayi e go dọ lehe n’nọ do mahẹ susu to lizọnyizọn lọ mẹ sọ, mọ wẹ n’nọ penugo dogọ nado pehẹ ayimajai po magbọjẹ lẹ po do niyẹn.”

18. Eyin mí jẹflumẹ, etẹwẹ Jehovah sọgan na mí?

¹⁸ To whenue mí jẹflumẹ, mí ni nọ flindọ Jehovah ma dopà nado hẹn pọngbọ tẹgbẹ tọn wá to sọgodo kẹdẹ gba, ṣigba e sọ wleawufo nado gọalọna mí nado duto ayimajai lẹ ji todin. Ewọ nọ na mí ‘ojlo po huhlọn lọ po’ nado duto numọtolanmẹ flumẹjijẹ po todido matindo po tọn ji.—Flp. 2:13.

19. Jidevọnamẹ tẹwẹ Lomunu lẹ 8:37-39 na mí?

¹⁹ Hia Lomunu lẹ 8:37-39. Apọsteli Paulu hẹn mí deji dọ nudepope ma sọgan klan mí sọn owanyi Jiwheyẹwhe tọn go. Nawẹ mí sọgan gọalọna mẹmẹsunnu gọna mẹmẹyọnnu mítọn he to tintẹnpọn nado duto ayimajai ji lẹ gbọn? To hosọ he bọdego mẹ, mí na gbadopọnna lehe mí sọgan nọ hodo apajlẹ Jehovah tọn gbọn awuvẹmẹ didohia gọna godoninọna mẹmẹsunnu po mẹmẹyọnnu mítọn lẹ po to whenue yé tin to ninọmẹ ayimajai tọn lẹ mẹ dali do.