Asuṣiọsi Zalefati Tọn Mọ Ahọsumẹ Yí Na Yise Etọn Wutu

ASUṢIỌSI wamọnọ de gbò yọpọ sunnu etọn fán, yèdọ ovi dopo gee he e tindo. Awuji i taun! Ojlẹ vude jẹnukọn, oṣiọ visunnu etọn tọn wẹ e hẹn do alọmẹ po awubla po. Ṣigba, todin nawe lọ to visunnu etọn he yin finfọnsọnku lọ pọ́n bo gọ́ na ayajẹ dile ovi lọ to nuko yẹsẹ. Jonọ he tin to owhé etọn gbè lọ dọna ẹn dọmọ: “Pọ́n, visunnu towe to ogbẹ̀.”

Fọnsọnku ayidego tọn enẹ wá aimẹ to nuhe hugan owhe 3 000 todin. Hiẹ sọgan hia kandai nujijọ enẹ tọn to 1 Ahọlu lẹ weta 17 mẹ. Jonọ he tin to owhé etọn gbè lọ wẹ yẹwhegán Jiwheyẹwhe tọn Elija. Mẹnu wẹ yin nawe lọ? Asuṣiọsi he mí ma yọ́n yinkọ etọn de wẹ, ehe nọ nọ̀ tòpẹvi Zalefati tọn mẹ. Fọnsọnku visunnu etọn tọn yin dopo to nujijọ he hẹn yise etọn lodo hugan to gbẹzan etọn mẹ lẹ mẹ. Dile mí na to dogbapọnna kandai he gando nawe ehe go, mí na plọn onú titengbe delẹ sọn ewọ dè.

Jehovah ko magbe dọ akúdido he na dẹn-to-aimẹ de na wá to gandudu Ahabi, ahọlu ylankan Islaeli tọn whenu. To whenue Elija lá akúdido lọ godo, Jiwheyẹwhe whlá ẹ do Ahabi bo gbọn azọ́njiawu dali na akla po olàn po yẹwhegán lọ gbọn ohọ́n de dali. Enẹgodo, Jehovah dọna Elija dọmọ: “Tite, hẹn we jẹ Zalefati, he yin Sidoni tọn, bo nọ finẹ: doayi e go, yẹn ko degbena nawe asuṣiọsi de to finẹ nado [na we núdùdù].”—1 Ahọ. 17:1-9.

To whenue Elija jẹ Zalefati, e mọ asuṣiọsi wamọnọ de to nake ṣinyan. Be ewọ wẹ yin nawe he na na núdùdù yẹwhegán lọ ya? Nawẹ ewọ sọgan wà ehe gbọn to whenuena e yindọ wamọnọ de wẹ e yin? Mahopọnna nudepope he Elija sọgan ko lẹn, e jẹ hodọ hẹ nawe lọ ji. Elija dọmọ: “Yẹn vẹ̀ we, hẹnwana mi osin vude do núzinzan de mẹ, na yẹn nido nù.” To whenue nawe lọ jei nado yì ba osin lọ, Elija sọ yidogọ dọmọ: “Hẹnwana mi, yẹn vẹ̀ we, nùdo akla tọn de.” (1 Ahọ. 17:10, 11) E ma vẹawuna asuṣiọsi lọ nado na osin jonọ lọ, ṣigba nuhahun lọ wẹ nado na ẹn akla.

Nawe lọ gblọn dọmọ: “Le OKLUNỌ Jiwheyẹwhe towe to ogbẹ̀, yẹn ma tindo akla hìhì de gba, adavo alọgogo linfin tọn de to odla lọ mẹ, po amì vude po to aboun lọ mẹ: bo, doayi e go, yẹn to nake-yẹyẹ awe de ṣinyan, na yẹn nido yì whégbè bo dà ẹ na mi po visunnu ṣie po, dọ mí nido dù i, bo kú.” (1 Ahọ. 17:12) Mì gbọ mí ni pọ́n nuhe hodọdopọ ehe dehia lẹ.

Asuṣiọsi lọ yọnẹn dọ Elija yin Islaelivi budisi Jiwheyẹwhe tọ́ de. Hogbe etọn he dọ, “le OKLUNỌ Jiwheyẹwhe towe to ogbẹ̀” do enẹ hia. E taidi dọ e yọ́n onú delẹ gando Jiwheyẹwhe Islaeli tọn go, ṣigba e ma yin jẹ obá lọ mẹ nado yí hogbe lọ “Jiwheyẹwhe ṣie” zan to whenue e to hodọ gando Jehovah go. Ewọ nọ nọ̀ Zalefati “he yin Sidoni tọn” kavi tin to aṣẹpipa Sidoni tọn glọ, yèdọ tòdaho de to Fenike. E yọnbasi taun dọ Baali sẹ̀ntọ lẹ wẹ nọ nọ̀ Zalefati. Etomọṣo, Jehovah mọ onú dagbe de to asuṣiọsi ehe mẹ.

Mahopọnna dọ asuṣiọsi wamọnọ ehe nọ nọ̀ boṣiọ-sẹ̀ntọ lẹ ṣẹnṣẹn to Zalefati, e do yise hia. Jehovah do Elija hlan nawe lọ dè na dagbe yé omẹ awe lẹpo tọn. Nujijọ ehe plọn mí onú titengbe de.

E ma yin mẹhe nọ nọ̀ Zalefati fie Baali-sinsẹ̀n gbayipe te lẹpo wẹ ko gblezọn gba. To whenue Jehovah do Elija hlan asuṣiọsi ehe, e dohia dọ Emi nọ doayi gbẹtọ ahunjijlọnọ he ma ko to Emi sẹ̀n lẹ dopodopo go. Na nugbo tọn, “to akọta lẹpo mẹ, mẹhe nọ dibusi i bo nọ wazọ́n dodo tọn wẹ nọ yin alọkẹyi to e dè.”—Owalọ 10:35.

Susu mẹhe nọ nọ̀ aigba-denamẹ towe ji lẹ tọn wẹ taidi asuṣiọsi Zalefati tọn enẹ. Mahopọnna dọ yé sọgan nọ nọ̀ mẹhe nọ basi sinsẹ̀n lalo lẹ ṣẹnṣẹn, yé sọgan jlo vẹkuvẹku nado wà dagbe. Yé sọgan yọ́n onú vude kavi ma tlẹ yọ́n nudepope gando Jehovah go bo gbọnmọ dali tindo nuhudo alọgọ tọn nado sọgan kẹalọyi sinsẹ̀n-bibasi wiwe-ṣeke lọ. Be hiẹ nọ dín omẹ mọnkọtọn lẹ mọ bo nọ gọalọna yé ya?

Yí sọwhiwhe do lẹnnupọndo nuhe Elija biọ to asuṣiọsi lọ si nado wà ji. Nawe lọ ṣẹṣẹ dọna ẹn dọ núdùdù godo tọn wẹ emi jlo na dà na emide po visunnu emitọn po, bọ yé na dù i bo kú. Etomọṣo, etẹwẹ Elija dọ? “A dibu blo; yì bo wà dole a ko dọ do: ṣigba basi na mi sọn finẹ tọn mẹ akla hìhì de whẹ́, bo hẹn ẹn wá dè e, to enẹgodo basi na we podọ na visunnu towe. Na le wẹ OKLUNỌ, Jiwheyẹwhe Islaeli tọn dọ, Odla linfin tọn lọ ma to na jẹvọ́, mọ aboun amì tọn lọ masọ to na hú, kakajẹ azán lọ gbè he OKLUNỌ do jikun hlan aigba lọ ji.”—1 Ahọ. 17:11-14.

Mẹdelẹ sọgan ko dọ dọ, ‘Ma na we núdùdù mítọn godo tọn wẹ a dọ ya? Odlọ kú wẹ a te.’ Ṣigba, asuṣiọsi lọ ma yinuwa to aliho enẹ mẹ. Mahopọnna dọ onú vude wẹ e yọnẹn gando Jehovah go, e yí nuhe Elija dọ sè bo wà nuhe e biọ to e si. Mẹtẹnpọn yise tọn ayidego tọn nankọ die, podọ nudide nuyọnẹn tọn nankọ die!

Jehovah ma jo asuṣiọsi wamọnọ ehe do. Dile Elija dopagbe na ẹn do, Jehovah hẹn núdùdù yetọn jideji bo penukundo Elija, asuṣiọsi lọ po visunnu etọn po go kakajẹ whenue akúdido lọ wá vivọnu. Na nugbo tọn, “odla linfin tọn lọ ma jẹvọ́, kavi aboun amì tọn lọ, kẹdẹdi ohó OKLUNỌ tọn, he e dọ gbọn Elija dè.” (1 Ahọ. 17:16; 18:1) Eyin nawe lọ ma ko yinuwa to aliho enẹ mẹ wẹ, akla hìhì he e yí linfin lọ po amì lọ po do basi na ko yin núdùdù godo tọn etọn nugbonugbo. Ṣigba, ewọ yinuwa po yise po bo dejido Jehovah go bosọ na núdùdù Elija whẹ́.

Nuhe mí sọgan plọn sọn nujijọ ehe mẹ wẹ yindọ Jiwheyẹwhe nọ dona mẹhe do yise hia lẹ. Eyin mí pannukọn whlepọn tenọgligo-hinhẹn tọn lẹ bo do yise hia, Jehovah na gọalọna mí. Ewọ na yinuwa taidi Awuwledainanutọ, Hihọ́-Basinamẹtọ podọ Họntọn de nado gọalọna mí nado duto whlepọn lẹ ji.—Eks. 3:13-15.

To 1898, Le Phare de la Tour de Sion zinnudo nuplọnmẹ ehe ji sọn otàn asuṣiọsi lọ tọn mẹ dọmọ: Eyin asuṣiọsi lọ tindo yise bo setonuna Elija, Jehovah na gọalọna ẹn. Eyin ewọ ma do yise hia to Jehovah mẹ, asuṣiọsi devo he na wàmọ na ko yin dide. Hosọ lọ zindonukọn dọ nudopolọ wẹ e yin na mílọsu. To whedelẹnu, Jehovah nọ dike bọ yise mítọn nọ yin whiwhlepọn. Eyin mí tindo yise, “mí na mọ dona lọ yí; eyin mí ma [tindo yise], dona lọ na gbọ mí go.”

Eyin mí pehẹ whlepọn tangan delẹ, mí dona dín anademẹ Jiwheyẹwhe tọn sọn Owe-wiwe lẹ po owe sinai do Biblu ji lẹ po mẹ. Enẹgodo, mí dona yinuwa to kọndopọ mẹ hẹ anademẹ Jehovah tọn mahopọnna lehe e sọgan vẹawu nado kẹalọyi i do. Na nugbo tọn, mí na mọ dona yí eyin mí yinuwa to kọndopọ mẹ hẹ howhinwhẹn nuyọnẹn tọn ehe dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.”—Howh. 3:5, 6.

To madẹnmẹ, yise asuṣiọsi ehe tọn nasọ yin whiwhlepọn. Kandai lọ zindonukọn dọmọ: “E sọ wá jọ to onú helẹ godo, wẹ visunnu nawe he tọn, asi daho owhé lọ tọn, to awutujẹ; awutu jijẹ etọn yin awufiẹ sọmọ bọ yè ma hẹn gbọfufu de pòai to e homẹ gba.” To whenue onọ̀ he to aluẹmẹ lọ to whẹwhinwhẹ́n he wutu nugbajẹmẹji ehe do wá e ji kanse, e dọna Elija dọmọ: “Etẹ yẹn tindo nado wà po hiẹ po, hiẹ omẹ Jiwheyẹwhe tọn E? Yè hẹn we wá dè e nado hẹn ylando ṣie wá hlan oflin, podọ nado hù visunnu ṣie!” (1 Ahọ. 17:17, 18) Etẹwẹ hogbe sinsinyẹn enẹlẹ zẹẹmẹdo?

Be nawe lọ flin ylando de bọ enẹ dotukla ayihadawhẹnamẹnu etọn wẹ ya? Be e lẹndọ okú visunnu etọn tọn yin yasanamẹ sọn Jiwheyẹwhe dè bọ Elija yin wẹnsagun Jiwheyẹwhe tọn he nọ hùmẹ de wẹ ya? Biblu ma dọna mí, ṣigba onú dopo họnwun: Asuṣiọsi lọ ma sawhẹ mawadodo tọn depope dokọna Jiwheyẹwhe.

Elija dona ko jẹflumẹ na okú visunnu asuṣiọsi lọ tọn wutu podọ na linlẹn nawe lọ tọn dọ finẹ he ewọ tin te wẹ hẹn aluẹmẹninọ wá na emi. To whenue Elija ko ze oṣiọ visunnu lọ tọn biọ abò aga tọn lọ mẹ godo, e dawhá dọmọ: “OKLUNỌ E Jiwheyẹwhe ṣie, hiẹ ko hẹn oylan wá ga do asuṣiọsi lọ ji mẹhe dè yẹn wáwáṣi te gbọn visunnu etọn hùhù dali?” Yẹwhegán lọ ma sọgan doakọnna masin he enẹ sọgan kọ̀n do oyín Jiwheyẹwhe tọn go, eyin Ewọ jo dotẹnmẹ do na nawe homẹdagbenọ podọ johẹmẹtọ ehe nido jiya dogọ. Enẹwutu, Elija vẹvẹ dọmọ: “OKLUNỌ E Jiwheyẹwhe ṣie, yẹn vẹ̀ we, gbọ [ogbẹ̀] ovi he tọn nisọ gọwá biọ ewọ mẹ.”—1 Ahọ. 17:20, 21.

Jehovah dotoaina odẹ̀ Elija tọn. Asuṣiọsi lọ ko penukundo yẹwhegán etọn go bosọ do yise hia. E taidi dọ Jiwheyẹwhe na dotẹnmẹ azọ̀n ovi lọ tọn nado dekọtọn do okú mẹ, to yinyọnẹn mẹ dọ fọnsọnku de na wá aimẹ wẹ nkọ, yèdọ fọnsọnku tintan he yin kinkandai to Owe-wiwe lẹ mẹ bo na na todido whẹndo he na bọdego lẹpo. To whenue Elija vẹ̀ Jehovah vẹkuvẹku, Ewọ hẹn ovi lọ gọwá ogbẹ̀. Yí nukun homẹ tọn do pọ́n lehe homẹ asuṣiọsi lọ tọn na ko hùn do to whenue Elija dọmọ: “Pọ́n, visunnu towe to ogbẹ̀”! Enẹgodo, asuṣiọsi lọ dọna Elija dọmọ: “Yẹn yọnẹn lo dọ omẹ Jiwheyẹwhe tọn de wẹ hiẹ, podọ ohó OKLUNỌ tọn to onù towe mẹ nugbo wẹ.”—1 Ahọ. 17:22-24.

Kandai lọ masọ dọ nude gando nawe ehe go ba. Ṣigba, sọgbe hẹ ohó dagbe he Jesu dọ gando nawe lọ go, ewọ na ko zan pipotọ gbẹzan etọn tọn taidi devizọnwatọ nugbonọ Jehovah tọn de. (Luku 4:25, 26) Otàn etọn plọn mí dọ Jiwheyẹwhe nọ dona mẹhe nọ wà dagbe na devizọnwatọ etọn lẹ. (Mat. 25:34-40) E sọ dohia dọ Jiwheyẹwhe nọ penukundo nugbonọ lẹ go, etlẹ yin to ninọmẹ sinsinyẹn lẹ mẹ. (Mat. 6:25-34) Kandai ehe do kunnudenu lọ hia dọ Jehovah tindo ojlo po nugopipe lọ po nado fọ́n oṣiọ lẹ sọnku. (Owalọ 24:15) E họnwun dọ whẹwhinwhẹ́n dagbe de wẹ ehelẹ yin na mí nado nọ flin asuṣiọsi Zalefati tọn lọ.