Nọavunte Sọta Oklọ Satani Tọn Lẹ

‘YÈ KLỌ mì blo. Jiwheyẹwhe mìtọn ma to na whlẹn mì. Mì jogbe poun, e ma yinmọ mì na jiya!’ Owẹ̀n ehe wẹ Labṣakẹ he yin wẹnsagun Ahọlu Sẹnnakelibi Assilia tọn do na tòmẹnu Jelusalẹm tọn lẹ. Awhànpa ahọlu lọ tọn lẹ ko lẹdo otò Juda tọn. Hogbe wẹnsagun lọ tọn lẹ yin awuwlena nado hẹn tòmẹnu Jelusalẹm tọn lẹ jẹflumẹ podọ nado dobuna yé, na yé nido jogbe.—2 Ahọ. 18:28-35.

Assilianu lẹ yin yinyọnẹn na kanyinylan po danuwiwa yetọn po. Yé nọ dọ lehe yé nọ yinuwa hẹ kanlinmọ yetọn lẹ po kanyinylan po do na kẹntọ yetọn lẹ nado gbàhundona yé. Sọgbe hẹ whenuho-kàntọ Philip Taylor, “aṣa yetọn wẹ nado nọ dobuna gbẹtọ lẹ bo hẹn linlin oklọ tọn lẹ gbayipe nado sọgan pé yé go podọ nado gbàhundona mẹhe sọgan lẹzun kẹntọ yetọn to nukọn mẹ lẹ po linlin danuwadomẹgo tọn yetọn lẹ po.” Awhànfunnu huhlọnnọ de wẹ linlin oklọ tọn lẹ hinhẹn gbayipe yin. E “nọ yin awuwlena nado hẹn gbẹtọ lẹ jẹflumẹ,” wẹ Taylor dọ.

Klistiani nugbo lẹ ‘ma to ahidi sọta ohùn po agbasalan po gba, ṣigba sọta huhlọn gbigbọ ylankan tọn lẹ,’ he yin nudida gbigbọnọ he ṣiatẹ sọta Jiwheyẹwhe. (Efe. 6:12) Mẹhe yin tọ́ntlọ́ngbọ́n to yé mẹ wẹ Satani Lẹgba. Ewọ lọsu nọ yí budonamẹ po nujijla oklọ tọn lẹ po zan.

Satani sọalọakọ́n dọ emi sọgan hẹn tenọgli dopodopo mítọn tọn gble. To azán tọgbo Job tọn lẹ gbè, e dọna Jehovah Jiwheyẹwhe dọmọ: “Ehe gbẹtọ tindo lẹpo wẹ e na jo na ogbẹ̀ etọn.” To hogbe devo mẹ, gbidikọna yé pẹẹde dogọ, podọ a na mọdọ e yá wẹo kavi e dẹn wẹo gbẹtọ ma na hẹn tenọgli etọn na Jiwheyẹwhe go ba. (Job 2:4) Be nugbo dọ wẹ Satani te ya? Be dopodopo mítọn wẹ tindo dogbó he kọ̀n mí sọgan doakọnnanu jẹ—bọ e yin akọndonanu mítọn zẹ̀ dogbó enẹ go, e na biọ dọ mí ni tùnafọ nunọwhinnusẹ́n he sọgbe lẹ ji whẹpo do nọgbẹ̀ wẹ ya? Pọndohlan he Satani jlo dọ mí ni tindo niyẹn. Abajọ e do nọ yí ayiha oklọ tọn lẹ zan nado dó enẹ do ahun mítọn mẹ. Mì gbọ mí ni gbadopọnna delẹ to ayiha wintinwintin he e nọ yizan nado wàmọ lẹ mẹ, bo pọ́n lehe mí sọgan nọavunte sọta ẹ do.

“Dodonu [Yetọn] Tin to Kọ́gudu Mẹ”

Satani yí Elifazi he yin dopo to gbẹdohẹmẹtọ atọ̀n he wá dla Job pọ́n lẹ mẹ zan, nado dohia dọ gbẹtọvi lẹ yin madogánnọ sọmọ bọ yé ma sọgan nọavunte sọta mẹgbeyinyan Satani tọn lẹ. To whenue e to hodọ gando gbẹtọvi lẹ go taidi “yé he nọ nọ̀ ohọ̀ okò tọn lẹ mẹ,” e dọna Job dọmọ: “Dodonu [yetọn] tin to kọ́gudu mẹ, he yè hẹn pọ́tọ́ to odọ́ nukọn! Sọn afọnnu jẹ whèjai yè ko gbà yé kija: yé sọ dọ̀n kakadoi matin mẹdepope nado hò yé pọ́n.”—Job 4:19, 20.

To wefọ devo mẹ, mí yin yiyijlẹdo “núzinzan okọ́ tọn”—yèdọ ozẹ́n okò tọn he nọ yawu gbà lẹ go. (2 Kọl. 4:7) Mí yin madogánnọ na mí dugu ylando po mape po tọn wutu. (Lom. 5:12) Matin alọgọ depope, mí hùndonuvo na mẹgbeyinyan Satani tọn lẹ. Ṣigba taidi Klistiani, mí sọgan ganjẹ Jehovah go na alọgọ. Mahopọnna madogán mítọn lẹ, nuhọakuẹ wẹ mí yin to nukun Jiwheyẹwhe tọn mẹ. (Isa. 43:4) Humọ, Jehovah nọ na gbigbọ wiwe etọn mẹhe biọ to e si lẹ. (Luku 11:13) Gbigbọ wiwe etọn sọgan na mí “huhlọn he hú jọwamọ tọn,” na mí nido sọgan pehẹ nuhahun depope he Satani na hẹnwa mí ji lẹ. (2 Kọl. 4:7; Flp. 4:13) Eyin mí nọavunte sọta Lẹgba, “bo lodo to yise mẹ,” Jiwheyẹwhe na hẹn mí lodo dogọ. (1 Pita 5:8-10) Enẹwutu, mí ma dona dibuna Satani Lẹgba.

Gbẹtọ “to Ylanwa Nù”

“Etẹ gbẹtọ yin, na ewọ nido yin wiwe? podọ ewọ he yè ji sọn yọnnu de mẹ, na ewọ nido yin dodonọ?” wẹ Elifazi kanse. Enẹgodo e zindonukọn dọmọ: “Doayi e go, [Jiwheyẹwhe] ma tudido de do to omẹ wiwe etọn lẹ mẹ gba; mọwẹ, olọn lẹ ma yín wiwe to nukun etọn mẹ gba. Whè sọ na enẹ he yin wangbẹna po gbigble po, gbẹtọ he to ylanwa nù taidi osin!” (Job 15:14-16) Elifazi to didọna Job dọ Jehovah ma nọ pọ́n gbẹtọvi depope taidi dodonọ gba. Lẹgba lọsu nọ yí linlẹn agọ̀ lẹ zan. E nọ jlo dọ mí ni to nuhà gando nuhe mí ṣiwà wayi lẹ go, kavi tlẹ nọ gblewhẹdo míde zẹjlẹgo, nado lẹndọ todido depope ma tin ba. E sọ nọ jlo dọ mí ni lẹndọ nuhe Jehovah biọ to mí si lẹ sù hugan, bosọ nọ jlo dọ mí ni yí nukunpẹvi do pọ́n awuvẹmẹ, jonamẹ, po godonọnamẹ Etọn po.

Na nugbo tọn, mímẹpo wẹ ko “waylando bo whete do gigo Jiwheyẹwhe tọn go.” Gbẹtọvi mapenọ depope ma sọgan jẹ nubiọtomẹsi pipé Jehovah tọn lẹ kọ̀n. (Lom. 3:23; 7:21-23) Ṣigba, enẹ ma zẹẹmẹdo dọ mí ma yin nudepope to nukun etọn mẹ gba. Jehovah yọnẹn dọ “odàn hoho lọ, he nọ yin yiylọdọ Lẹgba podọ Satani,” wẹ to ninọmẹ mapenọ-yinyin tọn mítọn yizan. (Osọ. 12:9, 10) Na Jiwheyẹwhe yọnẹn dọ “kọ́gudu wẹ mí” yin wutu, e ma nọ ‘to nuṣiwa mítọn dín.’—Ps. 103:8, 9, 14.

Eyin mí gbẹkọ aliho ylankan mítọn go bo dọnsẹpọ Jehovah po ahun he dohia dọ nuhe mí wà vẹna mí po bosọ do gbigbọ lẹnvọjọ tọn hia, ‘e na jona mí susugege.’ (Isa. 55:7; Ps. 51:17) Biblu dọ dọ: “Eyin ylando mìtọn [tlẹ] bia, yé na wé taidi kẹnsu, eyin yé divẹẹ taidi alaali, yé na taidi sékanfun.” (Isa. 1:18) Enẹwutu, mì gbọ mí ni magbe ma nado jogbe gbede to ojlo Jiwheyẹwhe tọn wiwà mẹ.

Na mí yin ylandonọ wutu, mí ma sọgan yin dodonọ to nukun Jiwheyẹwhe tọn mẹ gbede. Whenue Adam po Evi po hẹn pipé-yinyin yetọn po yọnbasi lọ nado nọgbẹ̀ kakadoi po bu, yé bẹpla mímẹpo. (Lom. 6:23) Ṣigba, owanyi daho he Jehovah tindo na gbẹtọvi lẹ zọ́n bọ e hẹn ẹn yọnbasi na mí nado mọ jona ylando mítọn lẹ tọn yí, eyin mí do yise hia to avọ́sinsan ofligọ Ovi etọn, Jesu Klisti tọn mẹ. (Mat. 20:28; Joh. 3:16) Dohia “nukundagbe majẹhẹ” Jiwheyẹwhe tọn nankọ die! (Titu 2:11) Todido tin na mí! Eyin mọ wẹ, naegbọn mí nado dike Satani ni hẹn mí lẹndọ mí ma tindo todido?

“Doalọ Ohú Etọn Go po Agbasalan Etọn Po”

Satani sọalọakọ́n dọ Job na jogbe eyin e jẹazọ̀n. To whenue Lẹgba to avùnnukundiọsọ Jehovah, e dọmọ: “Doalọ ohú etọn go po agbasalan etọn po, ewọ bo nasọ gbẹ́ we dai to nukun towe mẹ.” (Job 2:5) Ayihaawe matin dọ Kẹntọ Jiwheyẹwhe tọn na jaya eyin e penugo nado hẹn mí lẹndọ mí ma pé nude go ba na manọna mítọn wutu.

Ṣigba, Jehovah ma nọ gbẹ́ mí dai eyin mí masọ penugo nado wà nuhe mí ko nọ wà dai lẹpo ba to sinsẹ̀nzọn etọn mẹ. Eyin mẹde tọ́navùn họntọn vivẹ́ mítọn de bo gbleawu i, nawẹ mí na yinuwa gbọn? Be mí na dovọ́na ẹn na e masọ penugo nado wà nuhe e ko nọ wà na mí dai lẹpo wutu wẹ ya? E na vẹawu! Mí na gbẹ́ yiwanna ẹn bo hò etọn pọ́n—titengbe eyin okàn mítọn hò wẹ e te bo do gbleawu. Be mí lẹndọ Jehovah na wà nuhe gbọnvona enẹ wẹ ya? “Jiwheyẹwhe ma yin mawadodonọ nado wọn azọ́n mìtọn po owanyi he mì dohia na oyín etọn po,” wẹ Biblu dọ.—Heb. 6:10.

Owe-Wiwe dọho gando “asuṣiọsi wamọnọ de” go, he sọgan ko nọgodona sinsẹ̀n-bibasi Jiwheyẹwhe tọn na owhe susu. To whenue Jesu mọdọ e ze “abọgan-kuẹ flinflin awe, he ma họakuẹ sọmọ” do adọkun potin tẹmpli tọn mẹ, be e yí nukun pẹvi do pọ́n ewọ po nunina etọn po wẹ ya? Kakatimọ, e pà ẹ na e wà nuhe go e pé lẹpo nado nọgodona sinsẹ̀n-bibasi nugbo.—Luku 21:1-4.

Eyin mí hẹn tenọgli mítọn go, mí sọgan deji dọ nudepope ma na hẹn haṣinṣan mítọn hẹ Jehovah gble, mahopọnna nuhe mape sọgan hẹnwa mí ji lẹ, vlavo yọnhowhe kavi manọna. Jiwheyẹwhe ma na gbẹ́ nugbonọ etọn lẹ dai gbede na nuhahun dekanpona nugopipe yetọn nado sẹ̀n ẹn wutu.—Ps. 71:9, 17, 18.

Kẹalọyi “Ogangbakun Whlẹngán Tọn”

Nawẹ mí sọgan họ́ míde sọn oklọ Satani tọn lẹ si gbọn? Apọsteli Paulu wlan dọmọ: “Mì nọ to huhlọn mọyi sọn Oklunọ dè podọ sọn hlọnhlọn huhlọn etọn tọn mẹ. Mì ze gbaja Jiwheyẹwhe tọn blebu dó, na mì nido penugo nado nọte gligli sọta ayiha wintinwintin Lẹgba tọn lẹ.” Dopo to nuhe gbaja gbigbọmẹ tọn enẹ bẹhẹn lẹ mẹ wẹ “ogangbakun whlẹngán tọn.” (Efe. 6:10, 11, 17) Na nuhe dù oklọ Satani tọn lẹ, mí dona hẹn ẹn diun dọ mí kẹalọyi ogangbakun enẹ bo dike ni gbọṣi ota mítọn to whepoponu. Ogangbakun awhànfuntọ de tọn nọ basi hihọ́na ota etọn. “Todido whlẹngán tọn” mítọn—yèdọ jide mítọn to hẹndi opagbe Jiwheyẹwhe tọn lẹ mẹ gando aihọn yọyọ gigonọ etọn go—na basi hihọ́na ayiha mítọn sọn lalo Satani tọn lẹ si. (1 Tẹs. 5:8) Eyin mí nọ basi oplọn mẹdetiti tọn sọwhiwhe tọn, e na gọalọna mí nado hẹn todido enẹ go gligli.

Job doakọnna mẹgbeyinyan kanyinylan po wangbẹnamẹ po tọn sọn Satani dè. Yise Job tọn sinyẹn to fọnsọnku mẹ sọmọ bọ okú lọsu ma tlẹ dobuna ẹn. Kakatimọ, e dọna Jehovah dọmọ: “Hiẹ na ylọ yẹn nasọ siọ we: hiẹ do ko tindo ojlo de hlan azọ́n alọ towe lẹ tọn.” (Job 14:15) Eyin etlẹ biọ dọ Job ni kú na tenọgligo-hinhẹn etọn wutu, e deji dọ owanyi he Jiwheyẹwhe tindo na devizọnwatọ Etọn lẹ na whàn Ẹn nado fọ́n yé sọnku.

Mì gbọ mí ni tindo jide dopolọ to Jiwheyẹwhe nugbo lọ mẹ. Jehovah sọgan jla nudepope he Satani po godonọnamẹtọ etọn lẹ po sọgan hẹngble to mí go lẹ do. Sọ flindọ, Paulu hẹn mí deji dọmọ: “Nugbonọ wẹ Jiwheyẹwhe, podọ ewọ ma na dike mì ni yin whiwhlepọn zẹ̀ nuhe mì sọgan doakọnna go, ṣigba eyin whlepọn lọ wá, ewọ nasọ deali na mìwlẹ nido penugo nado doakọnna ẹn.”—1 Kọl. 10:13.

[Yẹdide to weda 20]

Jehovah yọ́n pinpẹn sinsẹ̀nzọn nugbonọ-yinyin tọn towe

[Yẹdide to weda 21]

Kẹalọyi ogangbakun whlẹngán tọn bo dike ni gbọṣi ota na we