NUPINPLỌN 20

Lehe Agun lọ Yin Tito-Basina Do

Zinjẹgbonu

Jehovah yin Jiwheyẹwhe titojinọtọ de. (1 Kọlintinu lẹ 14:33) Enẹwutu, e sọgbe nado donukun dọ omẹ etọn lẹ ni nọ nọ̀ titoji. Nawẹ agun Klistiani tọn yin tito-basina gbọn? Nawẹ a sọgan yidogọna nukọnyiyi etọn gbọn?

1. Mẹnu wẹ yin nukọntọ agun lọ tọn?

“Klisti [wẹ] yin ota agun lọ tọn.” (Efesunu lẹ 5:23) E nọ deanana azọ́n omẹ Jehovah tọn lẹ tọn lẹdo aihọn pé sọn olọn mẹ. Jesu deazọ́nna “afanumẹ nugbonọ podọ nuyọnẹntọ” lọ—yèdọ pipli pẹvi de he bẹ sunnu numimọnọ lẹ hẹn, he sọ nọ yin yinyọnẹn taidi Hagbẹ Anademẹtọ lọ. (Hia Matiu 24:45-47.) Kẹdẹdile apọsteli po mẹho owhe kanweko tintan whenu tọn lẹ po nọ wà do to Jelusalẹm, Hagbẹ Anademẹtọ lọ nọ na anademẹ lẹ agun he tin lẹdo aihọn pé lẹpo. (Owalọ lẹ 15:2) Etomọṣo, e ma yin sunnu enẹlẹ wẹ yin nukọntọ titobasinanu mítọn tọn. Kakatimọ, Jehovah po Ohó etọn po go wẹ yé ganjẹ nado mọ anademẹ yí, podọ yé sọ nọ setonuna Jesu di nukọntọ yetọn.

2. Etẹwẹ yin azọngban mẹho lẹ tọn?

Sunnu Klistiani he whèwhín lẹ wẹ nọ yin dide di mẹho, podọ yé nọ plọnnumẹ sọn Owe-wiwe lẹ mẹ bosọ nọ deanana omẹ Jehovah tọn lẹ gbọn alọgigọna yé po tulinina yé po dali. Yè ma nọ sú akuẹ yé na azọ́n he yé nọ wà. Kakatimọ, yé nọ wadevizọn “sọn ojlo mẹ wá to Jiwheyẹwhe nukọn; e ma yin po owanyi na ale mawadodo tọn po, ṣigba po jejejininọ po.” (1 Pita 5:1, 2) Mẹho lẹ nọ mọ godonọnamẹ devizọnwatọ lizọnyizọnwiwa tọn lẹ tọn yí, mẹhe to nukọn mẹ sọgan wá pegan nado wadevizọn taidi mẹho lẹ ga.

Hagbẹ Anademẹtọ lọ nọ de mẹho delẹ taidi nugopọntọ lẹdo tọn. Yé nọ dla agun voovo lẹ pọ́n nado na yé anademẹ lẹ bosọ na yé tuli. Yé nọ pà mẹmẹsunnu lẹ taidi mẹho po devizọnwatọ lizọnyizọnwiwa tọn lẹ po, eyin omẹ ehelẹ jẹ nubiọtomẹsi Owe-wiwe tọn lẹ kọ̀n.—1 Timoti 3:1-10, 12; Titu 1:5-9.

3. Etẹwẹ yin azọngban Kunnudetọ dopodopo tọn?

Agun lọ blebu wẹ “nọ pà oyín Jehovah tọn” gbọn mahẹ tintindo to adà voovo opli agun tọn lẹ tọn mẹ podọ to lizọnyizọn lọ mẹ dali, sọgbe hẹ nugopipe yetọn.—Hia Salmu lẹ 148:12, 13.

DINDONANU DOGỌ

Gbadopọnna nukọntọ wunmẹ he Jesu yin, lehe mẹho lẹ nọ dovivẹnu nado hodo apajlẹ etọn do, gọna lehe mí sọgan nọ kọngbedopọ hẹ Jesu po mẹho lẹ po do.

4. Jesu yin nukọntọ de he nọ miọnhomẹnamẹ

Jesu ze oylọ-basinamẹ he whànmẹ de donukọnna mí. Hia Matiu 11:28-30, enẹgodo dọhodo kanbiọ ehe ji:

Nukọntọ wunmẹ tẹwẹ Jesu jlo dọ mí ni nọ yí emi do mọ?

Nawẹ mẹho lẹ nọ hodo apajlẹ Jesu tọn gbọn? Hò VIDEO lọ.

VIDEO: Mẹho lẹ Gọalọ to Aigba Sisọsisọ Népal Tọn Whenu (4:56)

Biblu bẹ nuplọnmẹ he họnwun lẹ hẹn gando lehe mẹho lẹ dona nọ wà azọ́n yetọn do go.

Hia Isaia 32:2 gọna 1 Pita 5:1-3, enẹgodo dọhodo kanbiọ ehelẹ ji:

Numọtolanmẹ tẹwẹ e hẹn we tindo nado yọnẹn dọ, taidi Jesu, mẹho lẹ nọ dovivẹnu nado miọnhomẹna mẹdevo lẹ?
Etẹwẹ yin delẹ to aliho he mẹ mẹho lẹ nọ hodo apajlẹ Jesu tọn te mẹ?

5. Mẹho lẹ nọ plọnnumẹ gbọn apajlẹ zizedai dali

Nukun tẹwẹ Jesu jlo dọ mẹho lẹ ni nọ yí do pọ́n azọngban yetọn? Hò VIDEO lọ.

VIDEO: Mẹho lẹ Nọ Deanananu! (7:39)

Jesu ze apajlẹ dagbe de dai na mẹhe nọ deanananu to agun mẹ lẹ. Hia Matiu 23:8-12, enẹgodo dọhodo kanbiọ ehe ji:

Nawẹ e nọ ṣí na we, eyin a mọ lehe nuyiwa nukọntọ sinsẹ̀n tọn lẹ tọn nọ gbọnvona aliho he mẹ Biblu dọ dọ mẹho lẹ ni nọ yinuwa te do?

A. Bẹplidopọ yẹdide tọn: Mẹho de to nukunpedo nuhudo gbigbọmẹ tọn etọn po whẹndo etọn tọn po go. 1. E to dẹ̀ho jẹnukọnna Biblu hihia etọn. 2. E to Biblu plọn viyọnnu pẹvi etọn, to pọmẹ hẹ asi etọn.

B. Mẹho dopolọ po asi etọn po yì dla mẹmẹyọnnu agun yetọn tọn he to azọ̀njẹ bo to aimimlọn to dotowhé de pọ́n.

Mẹho lẹ nọ dovivẹnu nado hẹn gbigbọnọ-yinyin yedetiti po whẹndo yetọn po tọn lodo
Mẹho lẹ nọ penukundo mẹlẹpo go to agun lọ mẹ
Mẹho lẹ nọ dọyẹwheho to gbesisọ mẹ
Mẹho lẹ nọ yin mẹplọntọ lẹ. Yé sọ nọ gọalọ nado wà azọ́n wiwejininọ tọn gọna azọ́n devo lẹ

6. Mí ni nọ kọngbedopọ hẹ mẹho lẹ

Biblu na mí whẹwhinwhẹ́n titengbe de he wutu mí dona nọ kọngbedopọ hẹ mẹho lẹ. Hia Heblu lẹ 13:17, enẹgodo dọhodo kanbiọ ehelẹ ji:

Be e sọgbe hẹ lẹnpọn dagbe dọ Biblu na mí tuli nado nọ setonu bosọ nọ litaina mẹhe to anadenanu lẹ ya? Naegbọn a do dọ mọ?

Hia Luku 16:10, enẹgodo dọhodo kanbiọ ehe ji:

Naegbọn e do yin nujọnu nado nọ kọngbedopọ hẹ mẹho lẹ etlẹ yin to nuhe taidi onú pẹvi pete lẹ mẹ?

MẸDELẸ NỌ DỌ DỌ: “E ma yin dandan nado tin to sinsẹ̀n he to titoji de mẹ.”

Ale tẹlẹ wẹ a lẹndọ mẹde sọgan mọyi eyin e nọ basi sinsẹ̀n hlan Jiwheyẹwhe to pọmẹ hẹ agun de?

BLADOPỌ

Jesu wẹ yin ota agun lọ tọn. Po homẹhunhun po wẹ mí nọ kọngbedopọ hẹ mẹho he to devizọnwa to anademẹ Jesu tọn glọ lẹ, na yé nọ miọnhomẹna mí bosọ nọ plọnnu mí gbọn apajlẹ yetọn lẹ dali.