Nawẹ Mí Sọgan Yin Wiwe to Nukun Jiwheyẹwhe Tọn mẹ Gbọn?

Lẹnnupọndo onọ̀ owanyinọ de ji, he to awuwlena visunnu pẹvi etọn nado dedo wehọmẹ. E lawu na ẹn ganji, bo hẹn ẹn diun dọ avọ̀ he e na do lẹ wé bosọ fẹ́awu. Ehe na zọ́n bọ ovi lọ na to ganji to agbasa mẹ bọ mẹdevo lẹ nasọ doayi e go dọ mẹjitọ etọn lẹ nọ wlebòna ẹn taun. To aliho dopolọ mẹ, Otọ́ owanyinọ mítọn Jehovah jlo dọ mí ni yin wiwe—to agbasa-liho podọ to walọyizan-liho. Eyin mí nọ mẹ́sin, mílọsu na duale etọn bo nasọ hẹn gbégbò wá na Ewọ.

1. Nawẹ mí sọgan yin wiwe to agbasa-liho gbọn?

Jehovah dọna mí dọmọ: “Mì dona yin wiwe.” (1 Pita 1:16) Nado yin wiwe nọ biọ dọ mí ni mẹ́sin kavi hẹn míde do wiweji to agbasa-liho podọ to walọyizan-liho. Mí sọgan mẹ́sin eyin mí nọ lawu whẹwhẹ, bo nọ hẹn avọ̀ mítọn lẹ, owhé, kẹkẹ kavi mọto mítọn do ninọmẹ he fẹ́awu bosọ dọnmẹdogo mẹ. Mí sọgan sọ nọ gọalọ nado hẹn plitẹnhọ Ahọluduta tọn mítọn do wiweji. Eyin mí nọ mẹ́sin, mí nọ hẹn gbégbò wá na Jehovah.—2 Kọlintinu lẹ 6:3, 4.

2. Nado yin wiwe, aṣa tẹlẹ wẹ mí dona nọ nọla na?

Biblu dotuhomẹna mí nado “klọ́ míde wé sọn hẹnflu agbasalan tọn podọ gbigbọ tọn lẹpo mẹ.” (2 Kọlintinu lẹ 7:1) Enẹwutu, mí dona nọ dovivẹnu nado nọla na nudepope he na hẹn agbasa kavi ayiha mítọn flu. Na nuhe mí nọ lẹn to ayiha mítọn mẹ lẹ dona hẹn homẹ Jehovah tọn hùn wutu, mí dona wà nulẹpo nado nọ dapana linlẹn he gblezọn lẹ. (Salmu lẹ 104:34) Mí nisọ nọ dovivẹnu ma nado nọ dọ ohó gbigble lẹ.—Hia Kolosinu lẹ 3:8.

Nudevo tẹlẹ wẹ gán zọ́n bọ mí ma na wé to agbasa mẹ kavi to walọyizan-liho? Nudelẹ tin he gán hẹn agbasa mítọn gblezọn. Enẹwutu wẹ mí nọ dapana onú mọnkọ lẹ taidi taba kavi amà nùnù, gọna amasin adínọ lẹ zinzan nado deayidai poun. Onú mọnkọ lẹ didapana nọ zọ́n bọ mí nọ nọ̀ ganji to agbasa mẹ bosọ nọ dohia dọ mí tindo sisi na nunina ogbẹ̀ tọn. Mí sọ nọ wà nulẹpo nado nọ wiweji to walọyizan-liho gbọn avùnteninọ sọta aṣa mawé delẹ dali taidi vijinu-yido-daihun, gọna yẹdide fẹnnuwiwa tọn lẹ pinpọn. (Salmu lẹ 119:37; Efesunu lẹ 5:5) Nado duto aṣa mọnkọ lẹ ji sọgan kàn dẹpẹ biọ, ṣigba Jehovah gán gọalọna mí bọ e na pà mí.—Hia Isaia 41:13.

DINDONANU DOGỌ

3. Wiwejininọ to agbasa- liho nọ doyẹyigona Jehovah

Mí sọgan yọ́n nukun he Jehovah nọ yí do pọ́n wiwejininọ eyin mí gbadopọnna gbedide voovo he e na akọta Islaeli hohowhenu tọn. Hia Eksọdusi 19:10 gọna 30:17-19, enẹgodo dọhodo kanbiọ ehelẹ ji:

• Etẹwẹ wefọ ehelẹ plọn mí gando nukun he Jehovah nọ yí do pọ́n wiwejininọ to agbasa-liho go?

• Walọyizan dagbe tẹlẹ wẹ na gọalọna we nado hẹn agbasa towe do wiweji?

E nọ biọ whenu po vivẹnudido susu po nado hẹn agbasa mẹtọn do wiweji. Ṣigba mí sọgan wàmọ mahopọnna fihe mí nọ nọ̀, kavi vlavo mí yin adọkunnọ kavi wamọnọ. Hò VIDEO lọ, enẹgodo dọhodo kanbiọ he bọdego ji.

VIDEO: Jiwheyẹwhe Yiwanna Mẹhe Wé Lẹ (4:10)

• Nawẹ nutindo mítọn lẹ hinhẹn do wiweji nọ yidogọna kọdetọn dagbe azọ́n yẹwhehodidọ tọn mítọn tọn gbọn?

4. A sọgan duto aṣa gblezọn lẹ ji mlẹnmlẹn

Eyin a nọ nù azọ̀ kavi nọ zan amasin adínọ lẹ nado deayidai, a gán yọ́n lehe e nọ vẹawu sọ nado jo aṣa enẹ do. Etẹwẹ gán gọalọna we? Pọ́n nuhe aṣa enẹ nọ hẹngble na we lẹ. Hia Matiu 22:37-39, enẹgodo dọhodo kọdetọn he taba kavi amasin adínọ lẹ ṣiṣizan nọ tindo . . .

• do haṣinṣan mẹtọn hẹ Jehovah ji.

• do whẹndo mẹtọn kavi mẹdevo lẹ ji.

Ze tito de dai nado duto walọ ylankan de ji.a Hò VIDEO lọ.

VIDEO: Plọn Nado Nọ Duto Dewe Ji (2:47)

Hia Filipinu lẹ 4:13, enẹgodo dọhodo kanbiọ ehe ji:

• Nawẹ tito dagbe de tintindo na nuhe dù odẹ̀, Biblu pinplọn po opli lẹ yìyì to gbesisọ mẹ po gán gọalọna mẹde nado duto aṣa ylankan de ji gbọn?

5. Nọavùnte sọta linlẹn po walọyizan mawé lẹ po

Hia Kolosinu lẹ 3:5, enẹgodo dọhodo kanbiọ ehelẹ ji:

• Naegbọn mí sọgan dọ dọ yẹdide fẹnnuwiwa tọn lẹ pinpọn, hodidọ kavi wekanhlanmẹ gblewa tọn lẹ didohlan gbọn Intẹnẹt ji, gọna vijinu-yido-daihun yin walọyizan mawé lẹ to nukun Jehovah tọn mẹ?

• Be a lẹndọ e sọgbe hẹ lẹnpọn dagbe dọ Jehovah nọ donukun dọ mí ni zan walọ wiwe ya? Etẹwutu a do lẹnmọ?

Pọ́n lehe a sọgan nọavùnte sọta linlẹn mawé lẹ do. Hò VIDEO lọ.

VIDEO: Ze Afọdide lẹ Nado Gbọṣi Wiweji (1:51)

Jesu na apajlẹ de nado dohia dọ mí dona nọ yinuwa po nujikudo po nado hẹn walọyizan wiwe de go. Hia Matiu 5:29, 30, enẹgodo dọhodo kanbiọ ehe ji:

• Dile etlẹ yindọ nuhe dọ Jesu te ma yin dọ mí ni gbleawuna míde, e họnwun dọ tudohomẹna mí wẹ e te nado nọ ze afọdide he jẹ lẹ. Afọdide nujikudo tọn tẹwẹ mẹde sọgan ze nado dapana linlẹn mawé lẹ?b

Eyin a to avùnho nado duto linlẹn mawé lẹ ji, yọnẹn dọ Jehovah nọ yọ́n pinpẹn vivẹnudido towe lẹ tọn. Hia Salmu lẹ 103:13, 14, enẹgodo dọhodo kanbiọ ehe ji:

• Eyin a to ahidi hẹ aṣa mawé de, nawẹ wefọ ehe na tuli we nado to avùnho sọta ẹ zọnmii gbọn?

Eyin a tlẹ jai whlasusu, a gán gbẹ́ fọnṣite bo dudeji!

E gán bọawu nado dọ dọ, ‘E ma pà mi, ma gbọ bo hònúpla.’ Amọ́ lẹnnupọndo ehe ji: Eyin wezundotọ de klẹnafọ bo jai, enẹ ma dohia dọ e ma gán duto wezun lọ ji ba, kavi dona vọ́ bẹsọn godo pete wẹ gba. Mọdopolọ, eyin a vọ́ jai jẹ aṣa ylankan he a jlo na jodo de mẹ, enẹ ma zẹẹmẹdo dọ a ma gán vọ́ duto e ji gbede ba gba, kavi dọ vivẹnu he a ko do wayi lẹpo lẹzun ovọ́. Jọwamọnu wẹ e yin nado vọ́ jai jẹ aṣa ylankan de mẹ—na gbọnmọ dali wẹ yè nọ jo aṣa de do vudevude. A hònúpla blo! Po alọgọ Jehovah tọn po, a gán duto aṣa ylankan lọ ji pete.

BLADOPỌ

Mí nọ hẹn homẹ Jehovah tọn hùn eyin mí hẹn agbasa mítọn, ayiha mítọn po walọyizan mítọn po do wiweji to whepoponu.

Dogbapọn

• Naegbọn e do yin nujọnu taun dọ mí ni nọ gbọṣi wiweji?

• Nawẹ a gán dohia dọ a nọ nọ̀ wiweji to agbasa-liho gbọn?

• Nawẹ a gán nọ hẹn linlẹn po walọyizan towe lẹ po do wiweji gbọn?

PỌ́N NUDỌNAMẸ DEVO LẸ

Onú kleunkleun tẹlẹ wẹ a sọgan nọ wà nado nọ wiweji to agbasa-liho eyin a ma tlẹ do alọnu sọmọ?

Wiwejininọ po Agbasalilo Po—Alọ Kiklọ́ (3:01)

Pọ́n afọdide nujọnu tọn delẹ he a gán ze nado jo azọ̀-nùnù do.

“Lehe A Gán Jo Azọ̀-Nùnù Do Dó” (Fọ́n!, mai 2010 tọn)

Gbadopọnna kọdetọn he yẹdide fẹnnuwiwa tọn lẹ pinpọn nọ hẹnwa.

“Yẹdide Gblewa Tọn—Be Nude Ylan to E mẹ Wẹ Ya?” (Atọ̀họ̀-Nuhihọ́ lọ Tọn, octobre- décembre 2013 tọn)

Pọ́n lehe dawe de he ko peve to yẹdide fẹnnuwiwa tọn lẹ pinpọn mẹ wá duto aṣa enẹ ji do.

“N’Gboawupo Whlasusu Whẹpo Do Tindo Kọdetọn Dagbe” (Atọ̀họ̀-Nuhihọ́ lọ Tọn, Sọha 4 2016 tọn)

3. Naegbọn a ma dona natẹn obu nado glọnalina we?

Mẹdelẹ nọ dibu dọ emi ma na wá penugo nado de opà he emi do na Jehovah. Nugbo wẹ dọ a na wá ṣinuwa to whedelẹnu, kẹdẹdile e yindo na sunnu po yọnnu po nugbonọ delẹ he go Biblu donù. Amọ́, Jehovah ma nọ donukun dọ sinsẹ̀n-basitọ etọn lẹ ni yin mẹpipe lẹ. (Hia Salmu lẹ 103:13, 14.) Homẹ etọn nọ hùn eyin a wà nuhe go huhlọn towe pé lẹpo! Ewọ na gọalọna we. Na nugbo tọn, Jehovah hẹn mí deji dọ nudepope “ma na penugo nado klan mí sọn owanyi [etọn] go.”—Hia Lomunu lẹ 8:38, 39.