Dike Ohó Jiwheyẹwhe Tọn Ni Tá Hinhọ́n Do Omọ́-Liho Towe Ji
“Ohó towe wẹ . . . hinhọ́n hlan omọ́-liho ṣie.”—PSALM 119:105.
1, 2. Etẹwẹ mí dona wà eyin ohó Jehovah tọn na tá hinhọ́n do omọ́-liho mítọn ji?
OHÓ Jehovah tọn na tá hinhọ́n do omọ́-liho mítọn ji eyin mí na ẹn dotẹnmẹ nado wàmọ. Nado mọaleyi sọn hinhọ́n gbigbọmẹ tọn mọnkọtọn mẹ, mí dona yí sọwhiwhe do plọn Biblu bo yí ayinamẹ etọn lẹ do yizan mẹ. Gbọn mọwiwà dali kẹdẹ wẹ mí sọgan tindo numọtolanmẹ dopolọ hẹ psalm-kantọ lọ he dọmọ: “Ohó towe wẹ zògbán de hlan afọ ṣie, hinhọ́n hlan omọ́-liho ṣie.”—Psalm 119:105.
2 Todin mì gbọ mí ni gbadopọnna Psalm 119:89-176. Nudọnamẹ susugege nankọtọn die he wefọ he yin tito do hukan 11 ji ehelẹ bẹhẹn! Yé sọgan gọalọna mí nado gbọṣi aliho ogbẹ̀ madopodo tọn ji.—Matiu 7:13, 14.
Naegbọn Mí Dona Yiwanna Ohó Jiwheyẹwhe Tọn?
3. Nawẹ Psalm 119:89, 90 dohia dọ mí sọgan ganjẹ ohó Jiwheyẹwhe tọn go gbọn?
3 Wanyina ohó Jehovah tọn nọ dekọtọn do dolilo gbigbọmẹ tọn mẹ. (Psalm 119:89-96) Psalm-kantọ lọ jihàn dọmọ: “OKLUNỌ E, ohó towe hẹnai to olọn mẹ kakadoi. . . . Hiẹ hẹn aigba lodo, e sọ nọte.” (Psalm 119:89, 90) Gbọn ohó Jiwheyẹwhe tọn, yèdọ “aṣẹdai olọn lẹ tọn” etọn lẹ gblamẹ, nugonu olọn tọn lẹ nọ sẹtẹn to aliho pipé de mẹ podọ aigba yin hinhẹn lodo kakadoi. (Job 38:31-33; Psalm 104:5) Mí sọgan ganjẹ ohó he tọ́nsọn onù Jehovah tọn mẹ lẹpo go; nuhe Jiwheyẹwhe dọ lẹpo na “wà dagbe” to lẹndai etọn hinhẹndi mẹ.—Isaia 55:8-11.
4. Etẹwẹ wanyina ohó Jiwheyẹwhe tọn nọ wà na devizọnwatọ etọn he yin nukunbiana lẹ?
4 Psalm-kantọ lọ na ko ‘dọ̀n to nukunbibia etọn mẹ eyin osẹ́n Jiwheyẹwhe tọn ma ko yin homẹhunhun etọn.’ (Psalm 119:92) E ma yin jonọ lẹ wẹ to nukunbiana ẹn gba; Islaelivi sẹ́ngbatọ he gbẹwanna ẹn lẹ wẹ. (Levitiku 19:17) Ṣigba ehe ma hẹn ẹn gbọjọ, na e yiwanna ohó mẹhẹndote Jiwheyẹwhe tọn wutu. To Kọlinti, apọsteli Paulu tin “to owù mẹ to mẹmẹsunnu lalonọ lẹ ṣẹnṣẹn,” vlavo ehe bẹ “apọsteli dahodaho” he to tintẹnpọn nado sawhẹdokọna ẹn lẹ hẹn. (2 Kọlintinu lẹ 11:5, 12-14, 26) Ṣogan, Paulu luntọ́n to gbigbọ-liho na e yiwanna ohó Jiwheyẹwhe tọn wutu. To whenuena e yindọ mí yiwanna Ohó Jehovah tọn bo nọ yí nuhe e dọ lẹ do yizan mẹ, mí yiwanna mẹmẹsunnu mítọn lẹ. (1 Johanu 3:15) Dile etlẹ yindọ aihọn gbẹwanna mí, ehe ma nọ hẹn mí nado wọnji anademẹ Jiwheyẹwhe tọn dopo tata go. Mí to ojlo etọn wà zọnmii to kọndopọ owanyi tọn mẹ hẹ mẹmẹsunnu mítọn lẹ dile mí to nukundo nado wà sinsẹ̀nzọn ayajẹnọ hlan Jehovah kakadoi.—Psalm 119:93.
5. Nawẹ Ahọlu Asa dín Jehovah gbọn?
5 To mẹdezejo mítọn didohia Jehovah mẹ, mí sọgan hodẹ̀ dọmọ: “Towe wẹ yẹn, whlẹn mi; na yẹn ko dín ogbedai towe lẹ.” (Psalm 119:94) Ahọlu Asa dín Jiwheyẹwhe bo de atẹṣiṣi sẹ sọn Juda. To plidopọ daho de whenu to owhe 15tọ gandudu Asa tọn mẹ (963 J.W.M.), tòmẹnu Juda tọn lẹ “biọ alẹnu lọ mẹ nado . . . dín OKLUNỌ.” Jiwheyẹwhe “sọ yin mimọ sọn yé mẹ” bosọ “na gbọjẹ yé lẹdo pé.” (2 Otannugbo lẹ 15:10-15) Apajlẹ ehe dona whàn mẹdepope he ko danbú sọn agun Klistiani tọn mẹ nado dín Jiwheyẹwhe whladopo dogọ. Ewọ na dona mẹhe gọ̀ gbẹdido zohunhunnọ bẹjẹeji hẹ omẹ etọn lẹ bo nasọ basi hihọ́na yé.
6. Nuyiwa tẹwẹ na basi hihọ́na mí sọn awugble gbigbọmẹ tọn mẹ?
6 Ohó Jehovah tọn nọ na mí nuyọnẹn he sọgan basi hihọ́na mí sọn awugble gbigbọmẹ tọn mẹ. (Psalm 119:97-104) Gbedide Jiwheyẹwhe tọn lẹ nọ hẹn mí yọnnuin hú kẹntọ mítọn lẹ. Tonusisena nuflinmẹ etọn lẹ nọ na mí zinzin, podọ ‘ogbedai etọn lẹ yìnyìn nọ gọalọna mí nado zìn hú mẹhoho lẹ.’ (Psalm 119:98-100) Eyin ohó Jehovah tọn lẹ ‘vivi to okè mítọn mẹ hú owín to onù mítọn mẹ,’ mí na gbẹwanna bosọ dapana “aliho lalo tọn lẹpo.” (Psalm 119:103, 104) Ehe na yin hihọ́ de na mí sọn awugble gbigbọmẹ tọn mẹ to whenue mí pehẹ gbẹtọ saklanọ, kanylantọ he ma tindo jijọ-di-Jiwheyẹwhe tọn lẹ to azán godo tọn ehelẹ mẹ.—2 Timoti 3:1-5.
Zògbán de Na Afọ Mítọn
7, 8. Etẹwẹ mí dona wà nado yinuwa sọgbe hẹ Psalm 119:105?
7 Ohó Jiwheyẹwhe tọn yin asisa hinhọ́n gbigbọmẹ tọn he ma nọ ṣí gbede. (Psalm 119:105-112) Vlavo mí yin Klistiani yiamisisadode lẹ kavi mí yin gbẹdohẹmẹtọ yetọn “lẹngbọ devo” lẹ, mí nọ lá dọmọ: “Ohó towe wẹ zògbán de hlan afọ ṣie, hinhọ́n hlan omọ́-liho ṣie.” (Johanu 10:16; Psalm 119:105) Ohó Jiwheyẹwhe tọn tin taidi zògbán de he nọ tá hinhọ́n do aliho mítọn ji, na mí nikaa klẹnafọ bo jai to gbigbọ-liho. (Howhinwhẹn lẹ 6:23) Ṣogan, dopodopo mítọn dona dike ohó Jehovah tọn ni yin zògbán de na afọ etọn.
8 Mí dona nọtegli masẹafọ taidi mẹhe pà ohàn Psalm 119 tọn lọ. E magbe ma nado buali sọn ogbedai Jiwheyẹwhe tọn lẹ kọ̀n. E dọmọ: “Yẹn ko whlé, . . . dọ yẹn na nọ yìn whẹdida dodonọ towe [Jehovah tọn] lẹ.” (Psalm 119:106) Mì ma dike mí ni yí nukunpẹvi do pọ́n nuhọakuẹ-yinyin Biblu pinplọn to gbesisọmẹ po mahẹ tintindo to opli Klistiani tọn lẹ mẹ po tọn gbede blo.
9, 10. Nawẹ mí wagbọn do yọnẹn dọ mẹhe ko klan yede do wiwe hlan Jehovah lẹ sọgan ‘buali sọn ogbedai etọn lẹ mẹ,’ ṣigba nawẹ mí sọgan dapana ehe gbọn?
9 Psalm-kantọ lọ ma ‘buali sọn ogbedai Jiwheyẹwhe tọn lẹ mẹ gba,’ ṣigba enẹ sọgan jọ do mẹde he ko klan ede do wiwe hlan Jehovah go. (Psalm 119:110) Ahọlu Sọlọmọni buali, dile etlẹ yindọ ewọ tin to akọta he yin kinklandowiwe hlan Jehovah mẹ bo ko sọ yinuwa sọgbe hẹ nuyọnẹn he Jiwheyẹwhe na ẹn to bẹjẹeji gandudu etọn tọn. “Yèdọ ewọ wẹ yọnnu jonọ lẹ hẹn nado waylando” gbọn kiklọ ẹ biọ sinsẹ̀n-bibasi yẹwhe lalo lẹ tọn mẹ dali.—Nẹhemia 13:26; 1 Ahọlu lẹ 11:1-6.
10 Omọ̀ susu wẹ “hẹhùtọ” lọ Satani nọ dó namẹ. (Psalm 91:3) Di dohia, mẹhe nọ dogbẹ́ hẹ mí dai de sọgan tẹnpọn nado hẹn mí buali sọn omọ́-liho hinhọ́n gbigbọmẹ tọn ji bo tlọ́ mí biọ zinvlu atẹṣiṣi tọn mẹ. To Klistiani Tiatila tọn lẹ ṣẹnṣẹn, “nawe nẹ Jẹzebẹli” tin to finẹ, vlavo pipli yọnnu lẹ tọn de he nọ plọn mẹdevo lẹ nado doalọ to boṣiọ-sinsẹ̀n po galilọ po mẹ. Jesu ma kẹalọyi ylanwiwa mọnkọtọn lẹ, podọ mílọsu lẹ ma dona wàmọ gba. (Osọhia 2:18-22; Juda 3, 4) Enẹwutu mì gbọ mí ni nọ biọ alọgọ Jehovah tọn to odẹ̀ mẹ na mí nido gbọṣi hinhọ́n sọn olọn mẹ wá mẹ kakati nado buali sọn ogbedai Jiwheyẹwhe tọn lẹ mẹ.—Psalm 119:111, 112.
Ohó Jiwheyẹwhe Tọn Nọ Hẹn Mí Dote
11. Sọgbe hẹ Psalm 119:119, nukun tẹwẹ Jiwheyẹwhe nọ yí do pọ́n mẹylankan lẹ?
11 Jiwheyẹwhe na hẹn mí dote eyin mí ma buali sọn osẹ́ndoai etọn lẹ mẹ. (Psalm 119:113-120) Mí ma nọ kẹalọyi “ayihaawenọ lẹ,” kẹdẹdile Jesu jẹagọdo mẹhe gblọ to gbigbọ-liho bo nọ ylọ yede dọ Klistiani to egbehe lẹ do. (Psalm 119:113; Osọhia 3:16) Na mí yí ayiha mítọn lẹpo do to Jehovah sẹ̀n wutu, ewọ yin ‘fiwhiwhlá mítọn’ bo nasọ hẹn mí dote. E na ‘deafu do yé he buali sọn osẹ́ndoai etọn lẹ mẹ’ gbọn oklọ po nugbomadọ po yiyizan dali lẹ. (Psalm 119:114, 117, 118; Howhinwhẹn lẹ 3:32) E nọ pọ́n mẹylankan mọnkọtọn lẹ hlan taidi “ahaya”—yèdọ dihónu he nọ yin didesẹ sọn gànmú họakuẹ lẹ taidi fataka po sika po go. (Psalm 119:119; Howhinwhẹn lẹ 17:3) Mì gbọ mí ni yiwanna nuflinmẹ Jiwheyẹwhe tọn lẹ to whepoponu, na e họnwun dọ mí ma jlo na yin hihia dogọ mẹylankan lẹ to okiti ahaya vasudo tọn ji!
12. Naegbọn obu Jehovah tọn do yin nujọnu?
12 “Agbasalan ṣie kọ́yì na osi towe [Jehovah] tọn,” wẹ psalm-kantọ lọ dọ. (Psalm 119:120) Whẹpo Jiwheyẹwhe na do hẹn mí dote taidi devizọnwatọ etọn lẹ, dandannu wẹ e yin dọ mí ni nọ dibusi i to aliho he sọgbe mẹ, bo nọ do ehe hia gbọn didapana nuhe e gbẹwanna lẹ dali. Obu gbégbigbò tọn tintindo na Jehovah hẹn Job nado zan gbẹzan dodowiwa tọn. (Job 1:1; 23:15) Budisi Jiwheyẹwhe sọgan gọalọna mí nado zindonukọn to nuyiwa he ewọ kẹalọyi mẹ mahopọnna nuhe mí dona doakọnna. Ṣigba akọ́ndonanu nọ biọ odẹ̀ vivẹvivẹ hihò to yise mẹ.—Jakobu 5:15.
Nọ Hodẹ̀ to Yise Mẹ
13-15. (a) Naegbọn mí sọgan tindo nujikudo dọ odẹ̀ mítọn lẹ na mọ gblọndo yí? (b) Etẹwẹ sọgan jọ eyin mí ma yọ́n nuhe mí na dọ to odẹ̀ mẹ? (c) Basi dohia lehe Psalm 119:121-128 sọgan gando “winwẹ̀n he [mí] ma sọgan dọtọ́n” to odẹ̀ mẹ lẹ go do tọn.
13 Mí sọgan hodẹ̀ po nujikudo lọ po dọ Jiwheyẹwhe na yinuwa do ota mítọn mẹ. (Psalm 119:121-128) Taidi psalm-kantọ lọ, mí deji dọ odẹ̀ mítọn lẹ na yin sisè. Etẹwutu? Na mí yiwanna gbedide Jiwheyẹwhe tọn lẹ “hú sika; nugbo hú sika dagbedagbe.” Humọ, ‘mí nọ hia osẹ́n Jiwheyẹwhe tọn lẹpo nado yin jijlọ.’—Psalm 119:127, 128.
14 Jehovah nọ sè obiọ vivẹvivẹ mítọn lẹ na mí nọ hodẹ̀ to yise mẹ bo nọ yí sọwhiwhe do yìn osẹ́n etọn lẹ wutu. (Psalm 65:2) Ṣigba, eyin nuhahun mẹhẹnjẹflumẹ tọn lẹ nọ sayana mí to whedelẹnu sọmọ bọ mí ma nọ yọ́n nuhe mí na dọ to odẹ̀ mẹ lo? To whenẹnu ‘gbigbọ lọsu nọ yí winwẹ̀n he yè ma sọgan dọtọ́n do vẹvẹ na mí.’ (Lomunu lẹ 8:26, 27) To ojlẹ mọnkọtọn lẹ mẹ, Jiwheyẹwhe nọ kẹalọyi hodidọ he tin to Ohó etọn mẹ lẹ taidi odẹ̀ he sọgbe hẹ nuhudo mítọn lẹ.
15 Owe-wiwe gọ́ na odẹ̀ po linlẹn lẹ po he na gando “winwẹ̀n he yè ma sọgan dọtọ́n” mítọn lẹ go. Di dohia, lẹnnupọndo Psalm 119:121-128 ji. Aliho he mẹ nulẹ yin didọ te tofi sọgan sọgbe hẹ ninọmẹ mítọn lẹ. Di apajlẹ, eyin mí to budi ma nado yin awusinyẹnna kavi yin hihodu, mí sọgan biọ alọgọ Jiwheyẹwhe tọn dile psalm-kantọ lọ wà do. (Wefọ 121-123) Mí ni dọ dọ mí dona basi nudide sinsinyẹn de. Mí sọgan hodẹ̀ dọ gbigbọ Jehovah tọn ni gọalọna mí nado flin nuflinmẹ etọn lẹ bo yí yé zan. (Wefọ 124, 125) Dile etlẹ yindọ mí “gbẹwanna aliho lalo tọn lẹpo,” nuhudo sọgan tin dọ mí ni biọ to Jiwheyẹwhe si nado gọalọna mí ma nado joawuna whlepọn de nado gbà osẹ́n etọn. (Wefọ 126-128) Eyin mí nọ hia Biblu egbesọegbesọ, wefọ yọn-na-yizan mọnkọtọn lẹ sọgan nọ wá ayiha mẹ na mí to whenuena mí to Jehovah vẹ̀.
Nuflinmẹ Jehovah Tọn lẹ Nọ Gọalọna Mí
16, 17. (a) Naegbọn mí tindo nuhudo nuflinmẹ Jiwheyẹwhe tọn lẹ tọn, podọ nukun tẹwẹ mí dona nọ yí do pọ́n yé? (b) Nukun tẹwẹ mẹdevo lẹ sọgan nọ yí do pọ́n mí, ṣigba etẹwẹ yin nujọnu lọ?
16 Eyin mí jlo dọ Jiwheyẹwhe ni dotoaina odẹ̀ mítọn lẹ bo na mí nukundagbe etọn, mí dona nọ setonuna nuflinmẹ etọn lẹ. (Psalm 119:129-136) Na mí nọ yawu wọnji núgo wutu, mí tindo nuhudo nuflinmẹ jiawu Jehovah tọn lẹ tọn he nọ hẹn anademẹ po gbedide etọn lẹ po gọwá ayiha mítọn lẹ mẹ. Na nugbo tọn, mí nọ duvivi hinhọ́n gbigbọmẹ tọn he nọ yin titá gbọn nukunnumọjẹnumẹ yọyọ ohó Jiwheyẹwhe tọn lẹ tọn dopodopo dali. (Psalm 119:129, 130) Mí sọ dopẹ́ dọ Jehovah ko ‘hẹn nukun etọn họnwun do mí ji’ nado kẹalọyi mí, mahopọnna dọ ‘otọ̀ osin tọn lẹ to sisà sọn nukun mítọn lẹ mẹ’ na mẹdevo lẹ to osẹ́n etọn gbà wutu.—Psalm 119:135, 136; Osọha lẹ 6:25.
17 Mí deji dọ mí na to nukundagbe Jiwheyẹwhe tọn tindo zọnmii eyin mí nọ yinuwa sọgbe hẹ nuflinmẹ dodo etọn lẹ. (Psalm 119:137-144) Taidi devizọnwatọ Jehovah tọn lẹ, mí yigbe dọ ewọ tindo jlọjẹ lọ nado dọ̀n ayidonugo mítọn wá nuflinmẹ dodo etọn lẹ ji bo do yé ai taidi gbedide he mí dona setonuna lẹ. (Psalm 119:138) To whenuena e yindọ psalm-kantọ lọ setonuna gbedide Jiwheyẹwhe tọn lẹ, naegbọn e do dọmọ: “Yẹn whè, yè sọ to vivlẹ mi”? (Psalm 119:141) Nukun he kẹntọ etọn lẹ nọ yí do pọ́n ẹn wẹ e na ko to alọdlẹndo. Eyin mí ma jogbe to teninọ mítọn mẹ na dodowiwa, mẹdevo lẹ sọgan nọ vlẹ mí. Ṣogan, nujọnu lọ wẹ yindọ Jehovah nọ yí nukundagbe do pọ́n mí na mí to gbẹnọ sọgbe hẹ nuflinmẹ dodo etọn lẹ wutu.
Mí Tin to Hihọ́ po Jijọho po Mẹ
18, 19. Kọdetọn tẹwẹ tonusise mítọn na nuflinmẹ Jiwheyẹwhe tọn lẹ nọ hẹnwa?
18 Tonusisena nuflinmẹ Jiwheyẹwhe tọn lẹ nọ hẹn mí dọnsẹpọ ẹ. (Psalm 119:145-152) Na mí nọ payi nuflinmẹ Jehovah tọn lẹ go wutu, mí nọ voawu nado dawhá ylọ ẹ po ahun mítọn lẹpo po, podọ mí sọgan donukun dọ ewọ na dotoaina mí. Mí sọgan yawu fọ́n “to hinhọ́n afọnnu tọn mẹ” bo biọ alọgọ etọn. Ojlẹ dagbe nankọ die nado hodẹ̀! (Psalm 119:145-147) Jiwheyẹwhe sọ sẹpọ mí na mí nọ dapana walọ ylankan bo nọ pọ́n ohó etọn taidi nugbo, kẹdẹdile Jesu wà do wutu. (Psalm 119:150, 151; Johanu 17:17) Haṣinṣan mítọn hẹ Jehovah nọ hẹn mí dote to aihọn hunyanhunyan tọn ehe mẹ podọ e nasọ gọalọna mí nado lùn awhàn daho etọn heyin Amagẹdọni tọ́n.—Osọhia 7:9, 14; 16:13-16.
19 Na osi sisosiso he mí tindo na ohó Jiwheyẹwhe tọn wutu, mí nọ duvivi hihọ́ nujọnu tọn. (Psalm 119:153-160) To vogbingbọn mẹ na mẹylankan lẹ, mí ‘ma ko joagọ sọn nuflinmẹ Jehovah tọn lẹ mẹ gba.’ Mí yiwanna ogbedai Jiwheyẹwhe tọn lẹ podọ na enẹ tọn wutu, mí tin to hihọ́ mẹ to dagbewanyi etọn mẹ. (Psalm 119:157-159) Nuflinmẹ Jehovah tọn lẹ nọ fọ́n nugopipe ayiha mítọn tọn dote sọmọ bọ mí nọ flin nuhe e biọ to mí si to ninọmẹ dopodopo mẹ. To alọ devo mẹ, ogbedai Jiwheyẹwhe tọn lẹ yin anademẹ lẹ, podọ mí yigbe sọn ojlo mẹ wá dọ Mẹdatọ mítọn tindo jlọjẹ nado deanana mí. Na mí yọnẹn dọ ‘nugbo wẹ osọha ohó Jiwheyẹwhe tọn’ podọ dọ mílọsu lẹ ma sọgan deanana afọdide mítọn titi lẹ wutu, homẹ mítọn nọ hùn nado kẹalọyi anademẹ Jiwheyẹwhe tọn.—Psalm 119:160; Jẹlemia 10:23.
20. Naegbọn míwlẹ tindo ‘jijọho daho’?
20 Owanyi mítọn na osẹ́n Jehovah tọn nọ hẹn jijọho daho wá na mí. (Psalm 119:161-168) Homẹkẹn ma nọ hò “jijọho Jiwheyẹwhe tọn” he mayọnjlẹ lọ yí sọn mí si gba. (Filippinu lẹ 4:6, 7) Mí yọ́n pinpẹn whẹdida dodo Jehovah tọn lẹ tọn sọmọ bọ mí nọ pà ẹ gbọzangbọzan—yèdọ “whla ṣinawe gbèdopo.” (Psalm 119:161-164) “Daho wẹ jijọho he yé he yiwanna osẹ́n towe lẹ tindo,” wẹ psalm-kantọ lọ jihàn dọ, podọ “yé ma tindo nuhẹnmẹ klẹnafọ ahlìda tọn depope.” (Psalm 119:165) Eyin dopodopo mítọn yiwanna osẹ́n Jehovah tọn bo nọ yìn in, mí ma na yin hinhẹn dahli to gbigbọ-liho gbọn nuhe mẹdevo wà kavi whẹho devo depope dali gba.
21. Apajlẹ Owe-wiwe tọn tẹlẹ wẹ dohia dọ mí ma dona dahli eyin nuhahun lẹ fọndote to agun mẹ?
21 Mẹsusu he yin nùdego to kandai Biblu tọn mẹ lẹ ma dike nudepope ni lẹzun zannu ahlìda tọn na yé na ojlẹ dindẹn gba. Di dohia, sunnu Klistiani lọ, Gaiu ma yin hinhẹn dahli, ṣigba e “to zọnlinzin to nugbo lọ mẹ” mahopọnna walọ ylankan Diotlefe tọn. (3 Johanu 1-3, 9, 10) Paulu na tuli Euodia po Sintiki po, he yin yọnnu Klistiani lẹ, nado “tin to homẹ dopolọ mẹ to Oklunọ mẹ,” vlavo na nuhahun delẹ ko fọndote to ṣẹnṣẹn yetọn wutu. E họnwun dọ yé mọ alọgọ yí nado didẹ nuhahun yetọn bọ yé zindonukọn nado to Jehovah sẹ̀n po nugbonọ-yinyin po. (Filippinu lẹ 4:2, 3) Enẹwutu mí ma dona dahli eyin nuhahun wunmẹ depope fọndote to agun mẹ. Mì gbọ mí ni ze ayidonugo mítọn lẹpo do ogbedai Jehovah tọn lẹ yìnyìn ji, bo nọ flin dọ ‘aliho mítọn lẹpo tin to nukọn etọn.’ (Psalm 119:168; Howhinwhẹn lẹ 15:3) Eyin mí wàmọ, nudepope ma na hò ‘jijọho daho’ mítọn yí sọn mí si kakadoi gba.
22. (a) Eyin mí setonuna Jiwheyẹwhe, lẹblanulọkẹyi tẹwẹ mí na tindo? (b) Nukun tẹwẹ mí dona nọ yí do pọ́n mẹhe ko danbú sọn agun Klistiani tọn mẹ lẹ?
22 Eyin mí nọ setonuna Jehovah to whepoponu, mí na tindo lẹblanulọkẹyi lọ nado to pipà ẹ zọnmii. (Psalm 119:169-176) Gbọnvona dọ mí na duvivi hihọ́ gbigbọmẹ tọn eyin mí nọgbẹ̀ sọgbe hẹ osẹ́ndoai Jiwheyẹwhe tọn lẹ, ‘nùflo mítọn lẹ nasọ to pipà Jehovah tọn túntún jẹgbonu zọnmii.’ (Psalm 119:169-171, 174) Lẹblanulọkẹyi daho hugan he mí sọgan tindo to azán godo tọn ehelẹ mẹ niyẹn. Psalm-kantọ lọ jlo na nọgbẹ̀ bo to Jehovah sẹ̀n, ṣigba to aliho he ma yin didohia de mẹ, ewọ ko “danbú di lẹngbọ he bú.” (Psalm 119:175, 176) Mẹdelẹ he ko danbú sọn agun Klistiani tọn mẹ sọgan gbẹ́ yiwanna Jiwheyẹwhe bo jlo nado pà ẹ. Enẹwutu mì gbọ mí ni wà nuhe go mí pé lẹpo nado gọalọna yé, na yé nido mọ hihọ́ gbigbọmẹ tọn whladopo dogọ bo tindo ayajẹ lọ nado pà Jehovah to pọmẹ hẹ omẹ etọn lẹ.—Heblu lẹ 13:15; 1 Pita 5:6, 7.
Hinhọ́n Tẹgbẹ Tọn Na Omọ́-Liho Mítọn
23, 24. Ale tẹlẹ wẹ hiẹ mọyi sọn Psalm 119 mẹ?
23 Psalm 119 sọgan hẹn ale wá na mí to aliho susu mẹ. Di apajlẹ, e sọgan whàn mí nado ganjẹ Jehovah go dogọ, na e dohia dọ ayajẹ nugbo nọ wá sọn ‘zọnlinzinzin to osẹ́n Jehovah tọn mẹ.’ (Psalm 119:1) Psalm-kantọ lọ flinnu mí dọ ‘nugbo wẹ osọha ohó Jiwheyẹwhe tọn.’ (Psalm 119:160) Na jide tọn, ehe dona hẹn pinpẹn-nutọn-yinyọnẹn mítọn jideji na Ohó Jiwheyẹwhe tọn blebu. Ayihamẹlinlẹnpọn do Psalm 119 ji dona whàn mí nado nọ plọn Owe-wiwe po sọwhiwhe po. Psalm-kantọ lọ vẹ̀ Jiwheyẹwhe whlasusu dọmọ: “Plọn osẹ́ndoai towe lẹ mi.” (Psalm 119:12, 68, 135) E sọ vẹvẹ dọmọ: “Plọn zinzin dagbe po yinyọnẹn po mi: na yẹn ko yí gbedide towe lẹ sè.” (Psalm 119:66) E jẹ dọ mí ni nọ hodẹ̀ to aliho dopolọ mẹ.
24 Nuplọnmẹ sọn olọn mẹ wá nọ hẹn ẹn yọnbasi nado tindo haṣinṣan pẹkipẹki hẹ Jehovah. Psalm-kantọ lọ ylọ ede whlasusu dọ devi Jiwheyẹwhe tọn. Na nugbo tọn, e dọ hogbe he whànmẹ ehelẹ hlan Jehovah dọmọ: “Towe wẹ yẹn.” (Psalm 119:17, 65, 94, 122, 125; Lomunu lẹ 14:8) Gbégbò nankọtọn die nado sẹ̀n Jehovah bo nọ pà ẹ taidi dopo to Kunnudetọ etọn lẹ mẹ! (Psalm 119:7) Be hiẹ to Jiwheyẹwhe sẹ̀n po ayajẹ po taidi wẹnlatọ Ahọluduta tọn de ya? Eyin mọwẹ, a sọgan deji dọ Jehovah na to godonọna we bo nasọ to didona we zọnmii to azọ́n ehe mẹ eyin hiẹ nọ dotudo ohó etọn go to whepoponu bo nọ dike e ni tá hinhọ́n do omọ́-liho towe ji.
Nawẹ Hiẹ Na Na Gblọndo Gbọn?
• Naegbọn mí dona yiwanna ohó Jiwheyẹwhe tọn?
• Nawẹ ohó Jiwheyẹwhe tọn nọ hẹn mí dote gbọn?
• Aliho tẹlẹ mẹ wẹ nuflinmẹ Jehovah tọn lẹ nọ gọalọna mí te?
• Naegbọn omẹ Jehovah tọn lẹ do tin to hihọ́ po jijọho po mẹ?
[Yẹdide to weda 16]
Ohó Jiwheyẹwhe tọn yin asisa hinhọ́n gbigbọmẹ tọn
[Yẹdide to weda 17]
Eyin mí yiwanna nuflinmẹ Jehovah tọn lẹ, e ma na pọ́n mí hlan taidi “ahaya” gbede
[Yẹdide to weda 18]
Eyin mí nọ hia Biblu egbesọegbesọ, wefọ yọn-na-yizan lẹ sọgan nọ wá ayiha mẹ na mí to whenuena mí to dẹ̀ho