Weta 27
Nugbodidọ—Be Nunọwhinnusẹ́n Dagbe Hugan lọ Wẹ E Yin Taun Ya?
BE HIẸ ko yin whiwhlepọn gbede nado dolalo ya? Ronald dọna onọ̀ etọn dọ emi ko jla abò emitọn mẹ do to whenuena e yindọ, na taun tọn, onú lẹpo wẹ e bẹ dlan akanma etọn glọ. Richard sọ tẹ́n walọ nulunọ tọn dopolọ pọ́n nado yí nukun gugutọ tọn do pọ́n mẹjitọ etọn lẹ. E dọna yé dọ nukọn ma yì emitọn to wehọmẹ, mayin na emi ma nọ plọnnu wutu wẹ gba, ṣigba dọ emi ‘ma nọ há po mẹplọntọ emitọn po wutu wẹ.’
Mẹjitọ lẹ po mẹho devo lẹ po nọ saba doayi ayiha wintinwintin he ma yọ́n ze whla mọnkọtọn lẹ go. Ṣogan enẹ ma nọ doalọtena susu jọja lẹ tọn sọn e whè gbau tintẹnpọn nado dolalo, diọkọna nugbo lọ, nado tafumẹ tlọlọ to whenuena e taidi nuhe na tindo alemọyinu. Na onú dopo, mẹjitọ lẹ ma nọ saba yinuwa po sọwhiwhe po hlan hunyanhunyan lẹ gba. Podọ to whenuena hiẹ gbọwhenu na ganhiho awe wá whégbè, e sọgan taidi whlepọn nado dọ dọ owunu-jijọ ajiji daho de jọ to alihogboji, kakati nado dọ nugbo he sọgan dowinyanmẹ lọ na mẹjitọ towe lẹ—yèdọ nado dọ poun dọ ganmẹ lọ wẹ hiẹ wọnji e go.
Wehọmẹ sọgan ze avùnnukundiọsọmẹnu nugbodidọ tọn devo donukọnnamẹ. Wehọmẹvi lẹ nọ saba tindo numọtolanmẹ dọ yé yin agbanpinpẹn dona po azọ́n whégbè tọn lẹ po. Agbawhinwhlẹn ylankan nọ saba wá aimẹ. Yèdọ, to États-Unis, dodinnanu lẹ dohia dọ hugan oda wehọmẹvi lẹpo tọn nọ finwepọn kavi wẹ ko finwepọn. Ṣigba to whenuena lalo de sọgan taidi nudọ̀nmẹdogo, bọ owe finfinpọn yin aliho he yọ́n hugan nado tindo kọdetọn dagbe, be e ka pekuẹ nado yin nugbomadọtọ nugbonugbo ya?
Lalodido—Nuhewutu E Ma do Pekuẹ
Lalodido nado gán sọn yasanamẹ mẹ sọgan taidi alenu to ojlẹ enẹ lọ mẹ. Ṣigba Biblu gbẹnunamẹ dọmọ: “Ewọ he sọ to lalodo ma na duidọ̀n.” (Howhinwhẹn lẹ 19:5) Yọnbasi lọ klo dọ lalo lọ na yin dide gbà bọ yasanamẹ na dekọtọn to ninọmẹ depope mẹ. Enẹgodo mẹjitọ towe lẹ na gblehomẹ e mayin na nuṣiwa towe hoho tọn gba ṣigba na lalo towe na yé wutu ga!
Etẹwẹ dogbọn wefinfinpọn to wehọmẹ dali? Anadenamẹtọ tito-to-whinnu whẹdida owhé wehọmẹ daho tọn dọmọ: “Wehọmẹvi depope he to walọ nugbomadọ wepinplọn tọn yizan na tin to owù sinsinyẹn hinhẹn wepinplọn sọgodo etọn tọn po dotẹnmẹ azọ́nwiwa etọn tọn lẹpo gble mẹ.”
Nugbo, e nọ taidi dọ suhugan wefinpọ́ntọ lẹ tọn nọ họngán sọn e mẹ. Wefinfinpọn sọgan hẹnwe tindo gbedewema enẹ, ṣigba etẹwẹ yin nugandomẹgo sọgodo tọn lẹ? Matin ayihaawe hiẹ na yigbe etọn dọ e na yin nulúnọnu-wiwà nado fìnwepọn bo yì klasi nukọn tọn mẹ gbọn tọ̀lilẹ dali. To popolẹpo mẹ, mẹnu wẹ jlo nado nọte to ageji to whenuena mẹlẹpo to awulẹ to sinmẹ! Podọ eyin hiẹ yin mẹhe yè sisẹ biọ otọ̀ de mẹ, walọyizan mẹfinfinpọn towe tọn lẹ sọgan hẹn we nado kutọ̀!
Ṣigba etẹwẹ dogbọn wefinfinpọn to nulinlẹn kavi nuhihia mẹ dali? Nugbo, kọdetọn lọ lẹ sọgan nọ mayin nugbajẹmẹji tọn lẹ—to tintan whenu. Nalete, eyin hiẹ ma ko wleawuna dodonu owe yinyọnẹn tọn, hiẹ sọgan mọ dewe nado “jẹflumẹ” to azọ́ndindin whenu! Podọ gbedewema wehọmẹ daho tọn mimọyi gbọn wefinfinpọn dali ma na yin gbẹ̀hẹndote sọmọ gba. Biblu dọmọ: “Adọkunnu whiwhla gbọn odẹ́ lalo tọn de dali, gbọfufu he to godoyi nukọnyi . . . de wẹ.” (Howhinwhẹn lẹ 21:6) Alemọyi depope he lalodido de sọgan hẹnwa yin whenu-gli tọn taidi azọ̀ tìtì de tọn. Lehe e na yọ́n hugan do sọ na hiẹ nado dovivẹnu sinsinyẹn bo plọnnu kakati nado dolalo bo fìnwepọn na nukọnyiyi to wehọmẹ! “Linlẹn tuklajẹtọ tọn hlan susu mẹ wẹ,” wẹ Howhinwhẹn lẹ 21:5 dọ.
Lalodido po Ayihadawhẹnamẹnu Towe Po
Viyọnnu de he nọ yin Michèle gbọn lalodido dali sawhẹdokọna nọvisunnu etọn dọ e gbà aṣọdonu yiwanna họmẹ tọn de, ṣigba e yin hinhẹn po huhlọn po nado yigbe lalodido etọn na mẹjitọ etọn lẹ to godo mẹ. “Na nugbo tọn yẹn nọ tindo numọtolanmẹ ylankan to whelẹponu,” wẹ zẹẹmẹ he Michèle basi. “Mẹjitọ ṣie lẹ ko deji do go e, podọ yẹn dowinyan yé.” Ehe basi yẹdenanu ganji lehe Jiwheyẹwhe ko ze nugopipe ayihadawhẹnamẹnu tọn do gbẹtọvi lẹ mẹ do. (Lomunu lẹ 2:14, 15) Ayihadawhẹnamẹnu Michèle tọn dotukla ẹ susu po numọtolanmẹ whẹmajọ tọn lẹ po.
Na nugbo tọn, omẹ de sọgan dè nado gbẹkọ ayihadawhẹnamẹnu etọn go. Ṣigba dile e na susọ bọ ewọ nado to lalodo, mọdopolọ wẹ e na susọ bọ e nado peve do ylanwiwa mẹ do niyẹn—‘mẹhe yè yí ogàn miawú do sinyẹn ayiha na.’ (1 Timoti 4:2) Na nugbo tọn be hiẹ jlo nado tindo ayihadawhẹnamẹnu he ko kú de ya?
Nukun he Jiwheyẹwhe do nọ Pọ́n Lalodido
“Odẹ́ lalo tọn” yin dopo to nuhe “Oklunọ gbẹwanna” lẹ mẹ. (Howhinwhẹn lẹ 6:16, 17) To popolẹpo mẹ, Satani Lẹgba lọsu wẹ yin “otọ́ lalo tọn.” (Johanu 8:44) Podọ Biblu ma basi vogbingbọn to lalo lẹ po dehe nọ yin yiylọ dọ lalo wiwe po ṣẹnṣẹn gba. “Lalo ma ṣẹ̀ sọn nugbo mẹ.”—1 Johanu 2:21.
Nalete nugbodidọ dona yin nujinọtedo na mẹdepope he jlo nado yin họntọn Jiwheyẹwhe tọn. Psalm 15tọ kanse dọmọ: “Oklunọ, mẹnu wẹ na wawaṣi to gohọ towe mẹ? Mẹnu wẹ na sinai to osó wiwe towe ji?” (Wefọ 1) Mì gbọ mí ni gbadopọnna gblọndo he yin nina to wefọ ẹnẹ he bọdego lẹ mẹ:
“Ewọ he zinzọnlin jlọjlọ, bo to azọ́n dodo tọn wà, bosọ to ohó nugbo dọ to ayiha etọn mẹ.” (Wefọ 2) Be enẹ dọnu taidi ajotọ kavi wefìnpọntọ de ya? Be mẹhe nọ dolalo na mẹjitọ etọn lẹ kavi he nọ do ede hia nado yin nuhe ewọ ma yin wẹ ya? Gbede pọ́n! Enẹwutu eyin hiẹ jlo nado yin họntọn Jiwheyẹwhe tọn, hiẹ dona yin nugbonọ, e mayin to walọyizan towe lẹ mẹ kẹdẹ gba ṣigba to ahún towe mẹ ga.
“Mẹhe ma yí odẹ́ etọn do dọmẹnu, bo ma sọ waylan do họntọn etọn, bo ma sọ yí ovlẹ do kọmẹnu etọn go gba.” (Wefọ 3) Be hiẹ ko na dotẹnmẹ dewe gbede nado zọnpọ po hagbẹ jọja lẹ tọn po he to ohó ylankan, mẹhẹngble tọn dọ dogbọn mẹdevo de dali ya? Wleawuna huhlọn ojlo nukun sinsinyẹn tọn nado gbẹ́ nado tindo mahẹ to hodidọ mọnkọtọn mẹ!
“Mẹhe nukunmẹ mẹgbigble zùn mẹvọ́nu te; ṣigba e nọ gbògbéna yé he dibusi Oklunọ lẹ. Mẹhe whle hlan awugble ede tọn, bo ma sọ lẹgodo.” (Wefọ 4) A ji họntọn hẹ jọja depope he nọ dolalo, finwepọ́n, kavi nọ dọho dogbọn fẹnnuwiwa dali lẹ blo; yé na donukun sọn hiẹ lọsu si nado wà onú dopolọ lẹ. Dile jọja de he nọ yin Robert doayi e go do: “Họntọn de he hiẹ nọ dolalo hẹ na dọ̀n we do tuklamẹ. Ewọ ma yin họntọn he go hiẹ sọgan dejido de gba.” Din họntọn he nọ na osi nujinọtedo nugbodidọ tọn lẹ.—Yijlẹdo Psalm 26:4 go.
Be hiẹ doayi e go dọ Jehovah wẹ yọ́n pinpẹn, kavi “doyẹyigona,” mẹhe nọ hẹn hogbe yetọn lẹ go ya? Vlavo hiẹ dopagbe nado gọalọ to nuwiwa delẹ mẹ to whégbè to Sibigbe ehe, ṣigba hiẹ ko yin oylọ-basina todin nado hò bọlu to whèmẹ enẹ. Be hiẹ na yinukun pẹvi do pọ́n hogbe towe bo yì po họntọn towe lẹ po, bo jó mẹjitọ towe lẹ do nado wà azọ́n lọ lẹ wẹ ya, kavi hiẹ na nọ ohó towe ji?
“Ewọ he ma yí akuẹ etọn do gbonu na alèmasẹ́nmẹ, he ma nọ yí nubibla do homẹvọnọ go. Ewọ he wà onú helẹ yè ma na diọtẹn na ẹn gbede.” (Wefọ 5) Be e ma yin nugbo wẹ dọ nukunkẹn wẹ nọ yin dodonu titengbe wefinfinpọn po nugbomadọ po tọn ya? Wehọmẹvi he nọ finwepọn to mẹtintẹnpọn whenu lẹ yin nukunkẹnnọ na gbedewema he yé ma plọnnu na. Mẹhe nọ yí alọgodokuẹ lẹ nọ yí nukun nuhọakuẹ tọn do pọ́n akuẹ hugan whẹdida dodo.
Nugbo wẹ dọ, mẹdelẹ nọ dlẹnalọdo tonudọtọ lẹ po nukọntọ ajọwatọ lẹ tọn po he nọ slokọna osẹ́n nugbodidọ tọn lẹ nado sọgan tindo kọdetọn dagbe. Ṣigba nawẹ kọdetọn dagbe omẹ mọnkọtọn lẹ tọn dolido gbọn? Psalm 37:2 na gblọndo dọmọ: “Na yè na sán yé zindai zandevie di ogbé, yé nasọ fiọ di omá mú.” E yin yé ma yin wiwle bo yin winyando gbọn mẹdevo lẹ dali, matin ayihaawe yé na pannukọn whẹdida Jehovah Jiwheyẹwhe tọn. Ṣigba, họntọn Jiwheyẹwhe tọn lẹ, “ma na yin hinhẹn gbọagbá gbede gba.” Jide tin na ogbẹ̀ madopodo sọgodo tọn yetọn.
Awuwlena ‘Ayihadawhẹnamẹnu Nugbo Tọn De’
To whelọnu lo, be whẹwhinwhẹ́n nujọnu tọn ma tin, nado dapana wunmẹ lalodido depope tọn ya? Apọsteli Paulu dọ dogbọn ede po hagbẹ etọn lẹ po dali dọmọ: ‘Na mí tindo tudido dọ mí tindo ayihadawhẹnamẹnu nugbo tọn.’ (Heblu lẹ 13:18) Be ayihadawhẹnamẹnu towe nọ doayi nugbomadọ go ga ya? Eyin e ma yinmọ, plọn ẹn gbọn Biblu po owe he sinai do Biblu ji lẹ taidi Atọ̀họ̀-Nuhihọ́ Lọ Tọn po Réveillez-vous! pinplọn po dali.
Jọja Robert ko wà mọ, po kọdetọn dagbe lẹ po. E ko plọn ma nado ṣinyọnnudo nuhahun lẹ po lalodido susu lẹ po gba. Ayihadawhẹnamẹnu etọn nọ whan ẹn nado dọnsẹpọ mẹjitọ etọn lẹ bo dọho do whẹho lẹ ji po nugbodidọ po. To whedelẹnu ehe ko dekọtọn do mẹplọnlọ yíyí etọn mẹ. Etomọṣo, e yigbe dọ emi ‘tindo numọtolanmẹ dagbe to ayiha mẹ’ na yinyin nugbonọ wutu.
Nugbodidọ, ma nọ saba bọawu gba. Ṣigba mẹhe basi dide nado dọ nugbo na hẹn ayihadawhẹnamẹnu dagbe de go, haṣinṣan dagbe de po họntọn nugbo etọn lẹ po, podọ dehe yọ́n hugan popolẹpo wẹ yin lẹblanulọkẹyi yinyin “waṣinu” to gohọ Jiwheyẹwhe tọn mẹ! To whelọnu lo, nugbonọ-yinyin mayin nujinọtedo dagbe hugan lọ kẹdẹ gba, ṣigba eyin nujinọtedo jijlọ na Klistiani lẹpo.
Kanbiọ Hodọdopọ Tọn Lẹ
◻ Etẹwẹ yin ninọmẹ delẹ he mẹ e sọgan taidi whlepọnnu nado dolalo te?
◻ Naegbọn e ma do pekuẹ nado dolalo kavi fìnwepọn? Be hiẹ sọgan basi zẹẹmẹ ehe tọn sọn ayidonugo kavi numimọ mẹdetiti tọn mẹ ya?
◻ Nawẹ lalonọ de nọ gbleawuna ayihadawhẹnamẹnu etọn gbọn?
◻ Hia Psalm 15. Nawẹ wefọ lọ lẹ gando whẹho nugbonọ-yinyin tọn go gbọn?
◻ Nawẹ jọja de sọgan wleawuna ayihadawhẹnamẹnu nugbo tọn de gbọn?
[Nudọnamẹ tangan lẹ to weda 212]
‘Wehọmẹvi depope he to walọyizan nugbomadọ wepinplọn tọn yizan na tin to owù sinsinyẹn dotẹnmẹ hundote sọgodo etọn tọn hinhẹngble mẹ’
[Nudọnamẹ tangan lẹ to weda 216]
Biblu ma basi vogbingbọn depope to lalo lẹ po lalo he nọ yin yiylọ dọ lalo wiwe lẹ po ṣẹnṣẹn gba
[Yẹdide to weda 214]
Mẹjitọ lẹ na nọ saba mọ nuyiwa afọdide agọ̀ tolivivẹ tọn lẹ