‘Gbẹtọ Dagbe Nọ Mọ Nukundagbe Jiwheyẹwhe Tọn’

JEHOVAH JIWHEYẸWHE wẹ yin asisa ogbẹ̀ lẹpo tọn. (Psalm 36:9) Mọwẹ, “ewọ mẹ wẹ míwlẹ togbẹ̀ te.” (Owalọ lẹ 17:28) Podọ be ahun mítọn ma nọ gọ́ na pẹdido eyin mí lẹnnupọndo ale he e nọ na mẹhe tindo haṣinṣan pẹkipẹki hẹ ẹ lẹ ji ya? Mọwẹ, “nunina Jiwheyẹwhe tọn wẹ ogbẹ̀ madopodo.” (Lomunu lẹ 6:23) Lehe e yin nujọnu do sọ dọ mí ni dín nukundagbe Jehovah tọn!

Psalm-kàntọ lọ hẹn mí deji dọ ‘Jiwheyẹwhe nọ namẹ nukundagbe.’ (Psalm 84:11) Ṣigba mẹnu lẹ wẹ e nọ na? To egbehe, gbẹtọ lẹ nọ saba do nukundagbe hia mẹdevo lẹ sinai do wésise, adọkun, sinmẹ agbasa tọn, kúnkan, po mọmọ po ji. Mẹnu lẹ wẹ Jiwheyẹwhe nọ do nukundagbe hia? Ahọlu Sọlọmọni Islaeli hohowhenu tọn gblọn dọmọ: “Gbẹtọ dagbe de mọ nukundagbe to OKLUNỌ dè: ṣigba gbẹtọ nùflo ylankan tọn de wẹ e na gblewhẹdo.”—Howhinwhẹn lẹ 12:2.

E họnwun dọ, Jehovah nọ hùnhomẹ do mẹdagbe go—yèdọ omẹ jijọ dagbenọ. Jijọ dagbe mẹdagbe de tọn bẹ mẹplọnlọ-dido-edetiti go, mẹnukuntamahopọn, whiwhẹ, awuvẹmẹ, po zinzin po hẹn. Dodo wẹ linlẹn etọn lẹ, ohó etọn lẹ nọ namẹ tuli, nuwiwa etọn lẹ nọ sọgbe bo nọ hẹn ale wá. Adà bẹjẹeji weta 12tọ owe Howhinwhẹn lẹ tọn do lehe dagbewà dona yinuwa do gbẹzan mítọn egbesọ tọn ji bosọ do ale he nọ wá sọn jẹhẹnu ehe didohia mẹ hia. Dogbigbapọnna nuhe yin didọ to finẹ na na mí ‘wuntuntun nado wadagbe.’ (Psalm 36:3) Yíyí ayinamẹ etọn do yizan mẹ na gọalọna mí nado tindo nukundagbe Jiwheyẹwhe tọn.

Mẹplọnlọ Yin Onú Titengbe

“Mẹhe yiwanna oplọn yiwanna nuyọnẹn,” wẹ Sọlọmọni dọ, “ṣigba ewọ he gbẹwanna wọhẹ kanlin-jọmẹ wẹ.” (Howhinwhẹn lẹ 12:1) Mẹdagbe nọ jlo mẹplọnlọ na e to jejeji nado basi vọjlado wutu. E nọ yawu yí ayinamẹ he e mọyi to opli Klistiani tọn lẹ ji kavi to hodọdopọ lẹ mẹ do yizan mẹ. Ohó he tin to Owe-wiwe po owe sinai do Biblu ji lẹ po mẹ nọ taidi owùn, he nọ sisẹ́ mí nado wà dodo. E nọ dín oyọnẹn bo nọ yí i do jlọ aliho etọn lẹ. Mọwẹ, mẹhe yiwanna mẹplọnlọ sọ nọ yiwanna oyọnẹn ga.

Lehe mẹplọnlọ yin nujọnu na sinsẹ̀n-basitọ nugbonọ lẹ sọ—titengbe mẹplọnlọ-dido-mẹdetiti go! Mí sọgan jlo dọ mí ni tindo oyọnẹn sisosiso Ohó Jiwheyẹwhe tọn tọn. Mí sọgan jlo nado yin kọdetọn dagbenọ dogọ to lizọnyizọn Klistiani tọn mẹ bo yin Ohó Jiwheyẹwhe tọn plọnmẹtọ dagbe lẹ. (Matiu 24:14; 28:19, 20) Ṣigba e nọ biọ dọ mí ni do mẹplọnlọ míde go nado hẹn ojlo enẹlẹ di. Mẹplọnlọ-dido-mẹdetiti go sọ yin dandannu to adà gbẹzan tọn devo lẹ mẹ. Di apajlẹ, nuhe yin awuwlena nado fọ́n ojlo fẹnnuwiwa tọn dote lẹ sù taun to egbehe. Be e ma nọ biọ dọ mí ni do mẹplọnlọ míde go ma nado dike nukun mítọn lẹ ni pọ́n nuhe ma sọgbe lẹ ya? Humọ, na “ayilinlẹn ayiha gbẹtọ tọn mẹ tọn oylan wẹ sọn ovu etọn” wutu, linlẹn mawé tọn sọgan fọ́n to nuglọ ayiha tọn pete. (Gẹnẹsisi 8:21) Mí dona do mẹplọnlọ míde go ma nado nọ lẹnnupọndo linlẹn enẹ ji.

To alọ devo mẹ, mẹhe gbẹwanna wọhẹ ma yiwanna mẹplọnlọ kavi oyọnẹn gba. To awujijo na ayilinlẹn ylankan gbẹtọvi tọn nado gbẹ́ wọhẹ dai mẹ, e nọ hẹn ede wá odò jẹ obá kanlin he ma nọ lẹnnupọn de tọn mẹ—yèdọ gbekanlin—he ma tindo walọ dagbe depope. Mí dona gbẹ́ ayilinlẹn ehe dai gbidigbidi.

‘Adọ̀ He Ma Sọgan Yin Tẹnsẹna Lẹ’

Mẹdagbe ma sọgan yin mawadodonọ kavi mẹnukuntahopọntọ gba. Enẹwutu dodowiwa sọ yin dandannu nado tindo nukundagbe Jehovah tọn. Ahọlu Davidi jihàn dọmọ: “Hiẹ, OKLUNỌ E, na dona dodonọ, nukundagbe wẹ hiẹ na yí lẹdo e pé di awọyinu.” (Psalm 5:12) To ninọmẹ dodonọ tọn yiyijlẹdo mẹylankan tọn go mẹ, Sọlọmọni dọmọ: “Yè ma na yí afọ gbẹtọ tọn hẹnai gbọn jijọ ylankan dali gba: ṣigba adọ̀ dodonọ tọn ma na yin sisẹtẹnna.”—Howhinwhẹn lẹ 12:3.

E sọgan taidi dọ onú to yinyọ́n na mẹylankan. Lẹnnupọndo numimọ psalm-kàntọ Asafi tọn ji. E dọmọ: “Eyin yẹn tọn wẹ, afọ ṣie ko blá fẹ́; zọnlin ṣie blá tlẹ́.” Etẹwutu? Asafi gblọn dọmọ: “Na yẹn ko to awuwhàn hẹ awagundotọ lẹ, whenuena yẹn mọ jijọho mẹylankan lẹ tọn.” (Psalm 73:2, 3) Ṣigba dile e wá fiwiwe tẹmpli Jiwheyẹwhe tọn mẹ, e wá yọnẹn dọ aigba he dídí ji wẹ Jehovah ko ze yé do. (Psalm 73:17, 18) Kọdetọn dagbe depope he mẹylankan sọgan tindo na yin ojlẹ gli tọn. Naegbọn mí dona whànwu yé?

To vogbingbọn mẹ, mẹhe tindo nukundagbe Jehovah tọn nọ lodo. To nuyijlẹdonugo adọ̀ he hẹnai atin de tọn yiyizan mẹ, Sọlọmọni dọmọ: “Adọ̀ dodonọ tọn ma na yin sisẹtẹnna.” (Howhinwhẹn lẹ 12:3) Adọ̀ he mayin mimọ atin blibata de tọn, taidi ajlohun Californie tọn lẹ tọn, sọgan dlẹnkan yì fidindẹn bo hẹn atin lọ lodo to singigọ po yujẹhọn sinsinyẹn lẹ po whenu. Ajlohun blibata he yiaga fiofio de tlẹ sọgan nọavunte sọta aigba sisọsisọ huhlọnnọ de.

Taidi adọ̀ mọnkọtọn he tin to aigba he dojo mẹ lẹ, ayiha po ahun mítọn po dona biọ Ohó Jiwheyẹwhe tọn mẹ sisosiso bo nọ nù sọn osin ogbẹ̀-namẹ tọn etọn mẹ. Gbọnmọ dali yise mítọn na doadọ̀do bo lodo gligli, bọ todido mítọn na diun bo hẹnai ganji. (Heblu lẹ 6:19) Mí ma na nọ yin “yigọyigọdona, bọ yè na yí jẹhọn oplọn [lalo] tọn lẹpo do nọ hẹn [mí] dánpe.” (Efesunu lẹ 4:14) Nugbo wẹ dọ mí na nọ tindo nugandomẹgo whlepọn lẹ tọn bo tlẹ sọgan dibu na yajiji. Ṣigba ‘adọ̀ mítọn ma na yin tẹnsẹna.’

‘Jẹgbakun Wẹ Asi Nugopetọ de Yin na Asu Etọn’

Mẹsusu wẹ jẹakọhẹ hodidọ lọ heyin, ‘Kọdetọn dagbe tintindo sunnu de tọn tin to alọ asi etọn tọn mẹ.’ To dido lehe asi godonọnamẹtọ de họakuẹ sọ hia mẹ, Sọlọmọni dọmọ: “Yọnnu [nugopetọ] jẹgbakun de wẹ hlan asu etọn: ṣigba ehe nọ dowinyan omẹ taidi osin nutitẹ̀ tọn to ohú etọn mẹ.” (Howhinwhẹn lẹ 12:4) Hogbe lọ “nugopetọ” blá jẹhẹnu dagbewà tọn susu dopọ. Jẹhẹnu asi dagbe tọn, dile e yin zẹẹmẹ basina to gigọ́mẹ to Howhinwhẹn lẹ weta 31 mẹ do, bẹ azọ́n sinsinyẹn wiwà, nugbonọ-yinyin, po nuyọnẹn po hẹn. Jẹgbakun de wẹ yọnnu he tindo jẹhẹnu ehelẹ yin na asu etọn na walọ dagbe etọn nọ hẹn gbégbò wá na asu lọ bo nọ doyẹyigona ẹn to mẹdevo lẹ nukọn. E ma nọ gbọn ojlo zogbe dali tẹnpọn kavi whlẹ̀nagba yindidi tọn hẹ asu etọn gba. Kakatimọ, alọgọtọ po gọ́tọ po wẹ e nọ yin na asu etọn.

Nawẹ yọnnu de sọgan dowinyanmẹ gbọn, podọ etẹ wẹ na yin kọdetọn etọn? Winyandomẹ ehe bẹsọn nutlọ ji jẹ ayọdide ji. (Howhinwhẹn lẹ 7:10-23; 19:13) Nuwiwa asi mọnkọtọn de tọn nọ hẹn gbẹzan asu etọn tọn gble poun wẹ. Yọnnu lọ nọ taidi “osin nutitẹ̀ tọn to ohú etọn mẹ” to linlẹn lọ mẹ dọ “e nọ và sunnu lọ sudo, taidi awutu de he nọ degánpona agbasa,” wẹ owe de dọ. Owe devo dọmọ: “Hogbe egbezangbe tọn he sọgbe de sọgan yin ‘azọ̀n agbasa wiwọ̀ tọn’—yèdọ awutu de he nọ yí hlọnhlọn mẹsi vudevude.” Na Klistiani asi lẹ ni tẹnpọn nado mọ nukundagbe Jiwheyẹwhe tọn gbọn jẹhẹnu asi nugopetọ de tọn lẹ didohia dali.

Sọn Linlẹn Ji Jẹ Nuwiwa Ji Jẹ Kọdetọn lẹ Ji

Linlẹn lẹ nọ dekọtọn do nuwiwa lẹ mẹ, bọ nuwiwa lẹ nọ hẹn kọdetọn lẹ wá. Sọlọmọni basi dohia nujijọ debọdo-dego ehe tọn, bo do vogbingbọn hia to dodonọ lẹ po mẹylankan lẹ ṣẹnṣẹn. E dọmọ: “Linlẹn dodonọ tọn jlọ: ṣigba linlẹn mẹylankan lẹ tọn wẹ oklọ. Ohó mẹylankan tọn wẹ nado dowùna ohùn: ṣigba onù nugbonọ lẹ tọn na whlẹn yé gán.”—Howhinwhẹn lẹ 12:5, 6.

Linlẹn mẹdagbe lẹ tọn lọsu nọ sọgbe bo nọ deanana yé hlan nuhe jlọ bo yin dodo kọ̀n. Linlẹn dodonọ lẹ tọn nọ yin dagbe, na owanyi na Jiwheyẹwhe podọ na gbẹtọvi hatọ lẹ wẹ nọ whàn yé wutu. To alọ devo mẹ, ṣejannabi wẹ nọ whàn mẹylankan lẹ. Enẹwutu, linlẹn yetọn lẹ—ayilinlẹn lehe yé na jẹ yanwle yetọn lẹ kọ̀n do tọn—nọ yin oklọ. Nuwiwa yetọn lẹ nọ yin oylan. Yé ma nọ whleawu nado dó omọ̀ na homẹvọnọ lẹ, vlavo to whẹdatẹn de, gbọn owhẹ̀ lalo tọn sisadokọna yé dali. Hodidọ yetọn nọ “dowùna ohùn” na yé jlo na gbleawuna homẹvọnọ lẹ wutu. Dodonọ lẹ nọ penugo nado dapana omọ̀ ehe, na yé nọ yọ́n sébibla mẹylankan lẹ tọn bo tindo nuyọnẹn he na hẹn yé tin to aṣeji wutu. Yé tlẹ sọ nọ penugo nado na avase mẹhe ma to aṣeji lẹ bo whlẹn yé sọn omọ̀ oklọ mẹylankan lẹ tọn mẹ.

Etẹwẹ na jọ do dodonọ po mẹylankan lẹ po go? “Yé sisẹ mẹylankan lẹ liai, yé masọ tin: ṣigba owhé dodonọ lẹ tọn na nọte,” wẹ Sọlọmọni dọ. (Howhinwhẹn lẹ 12:7) Owe de dọ dọ owhé lọ “nọtena whédo po nuhọakuẹ omẹ lọ tọn lẹpo po, he hẹn gbẹninọ etọn yọnbasi.” E sọgan sọ dlẹnalọdo whẹndo po kúnkan dodonọ lọ tọn lẹ po. Depope he whẹho lọ yin, nuhe dọ howhinwhẹn lọ te họnwun: Dodonọ na nọte gligli to whlepọn glọ.

E Na Pọnte na Whiwhẹnọ Hugan

To nuzinzindo nujọnu-yinyin wuntuntun tọn ji, ahọlu Islaeli tọn dọmọ: “Yè na pà gbẹtọ kẹdẹdi nuyọnẹn etọn: ṣigba ewọ he tindo ayiha gblezọn wẹ yè na vlẹ.” (Howhinwhẹn lẹ 12:8) Wuntuntunnọ ma nọ wla-hodọ gba. E nọ lẹnnupọn whẹpo do dọho bo nọ duvivi haṣinṣan jijọho tọn hẹ mẹdevo lẹ na ‘nùflo nuyọnẹn tọn’ nọ hẹn ẹn nado yí sọwhiwhe do ṣinyan nuhe e na dọ lẹ wutu. Eyin nuyọnẹntọ pannukọn kanbiọ kavi hopàdọ nululu tọn de, wuntuntun nọ gọalọna ẹn nado “de ohó etọn pò.” (Howhinwhẹn lẹ 17:27) Omẹ mọnkọtọn nọ yin pipà bọ Jehovah sọ nọ hùnhomẹ do ewọ go. Lehe e gbọnvona mẹhe tindo linlẹn agọ̀ he wá sọn “ayiha gblezọn” de mẹ do sọ!

Mọwẹ, wuntuntunnọ nọ yin pipà, ṣigba howhinwhẹn he bọdego plọn mí nujọnu-yinyin whiwhẹ tọn. E dọmọ: “Ewọ he yè to vivlẹ bọ e sọ tindo lizọnyitọ de, e pọnte hú ewọ he to ede pà bo ma tindo núdùdù.” (Howhinwhẹn lẹ 12:9) E taidi dọ nuhe Sọlọmọni to didọ wẹ yindọ, e pọnte nado yin whiwhẹnọ hẹntọnọ, he tindo afanumẹ dopo poun, hugan nado yí dandannu gbẹ̀mẹ tọn lẹ zan to tintẹnpọn nado zan gbẹzan gbajumọ tọn de mẹ. Lehe ayinamẹ ehe yọ́n sọ, heyin nado zan gbẹzan akuẹ he mí tindo tọn!

Glelilẹ po Kanlin-Yìnyìn po Wleawuna Nuplọnmẹ Dagbewà Tọn Lẹ

To apajlẹ kanlin-yìnyìn tọn yiyizan taidi nuyijlẹdonugo mẹ, Sọlọmọni na mí nuplọnmẹ awe to dagbewà mẹ. E dọmọ: “Gbẹtọ dodonọ de hò ogbẹ̀ kanlin etọn tọn pọ́n, ṣigba lẹblanu mẹylankan lẹ tọn wẹ okà.” (Howhinwhẹn 12:10) Dodonọ nọ yinuwa hẹ kanlin etọn lẹ po homẹdagbe po. E nọ yọ́n nuhudo yetọn bọ dagbemẹ-ninọ yetọn nọ duahunmẹna ẹn. Mẹylankan sọgan dọ dọ emi nọ hò kanlin lẹ tọn pọ́n, ṣigba nuhudo yetọn ma nọ duahunmẹna ẹn gba. Mẹwhinwhàn ṣejannabi tọn lẹ wẹ e tindo, bọ lehe e nọ yinuwa hẹ kanlin lẹ do nọ sinai do ale he e sọgan dù sọn yé mẹ ji. Nuhe omẹ mọnkọtọn nọ pọ́n taidi nukunpedonugo he pé na kanlin lẹ sọgan yin nuyiwa okà tọn na taun tọn.

Nunọwhinnusẹ́n nuyiwa hẹ kanlin lẹ to aliho he jọmẹ tọn mẹ bẹ nukunpipedo kanlin whégbè tọn lẹ go hẹn ga. Okà wẹ e na yin nado to kanlin lẹ yìn ṣigba wá jẹ yasana yé ji to godo mẹ gbọn kọgbigbẹ́ yé go dali! Eyin kanlin de to awutu sinsinyẹn jẹ kavi gbleawu, homẹdagbe sọgan biọ dọ e ni yin hùhù.

To adà glelilẹ tọn devo—yèdọ aigba pipọ̀ yiyizan mẹ, Sọlọmọni dọmọ: “Ewọ he pọ̀ aigba etọn wẹ yè na yí núdùdù do pekọna.” Na taun tọn, azọ́n sinsinyẹn wiwà nọ hẹn ale wá. “Ṣigba ewọ he to [afọdona nuvọ́] wẹ zìnzìn pò na.” (Howhinwhẹn lẹ 12:11) Na mẹhe “zìnzìn pò na” ma tindo wuntuntun kavi nukunnumọjẹnumẹ wutu, e nọ doafọna nuvọ́, owùnọ lẹ. Nuhe wefọ awe ehelẹ plọn mí lọ die: Yin lẹblanunọ bo yin azọ́n sinsinyẹn-watọ.

Dodonọ Nọ Vùn

‘Mẹylankan lẹ ko jlo nuyànwẹnna he tin to odọ̀ mẹylankan lẹ tọn mẹ,’ wẹ ahọlu nuyọnẹntọ lọ dọ. (Howhinwhẹn lẹ 12:12a) Nawẹ yé nọ wà enẹ gbọn? Yé nọ wàmọ gbọn ogblànnu heyin bibẹpli to aliho ylankan mẹ lẹ jijlo dali.

Etẹwẹ sọgan yin didọ gando mẹdagbe lẹ go? Omẹ mọnkọtọn nọ yiwanna mẹplọnlọ bo nọ doadọ̀do gligli to yise mẹ. E nọ yin dodonọ, zinzintọ po whiwhẹnọ po, awuvẹmẹtọ po sọwhiwhenọ po. Podọ Sọlọmọni dọ dọ: “adọ̀ dodonọ lẹ tọn sẹ́n sinsẹ́n,” kavi vùn. (Howhinwhẹn lẹ 12:12b) “Adọ̀ dodonọ tọn na gbọṣi aimẹ kakadoi,” wẹ An American Translation dọ. Omẹ mọnkọtọn nọ lodo bo nọ vò. Na nugbo tọn, ‘mẹdagbe nọ mọ nukundagbe Jiwheyẹwhe tọn.’ Enẹwutu, mì gbọ mí ni “dotudo OKLUNỌ go, bosọ nọ wà dagbe.”—Psalm 37:3.

[Yẹdide lẹ to weda 31]

Taidi atin he lodo de, yise dodonọ tọn nọ doadọ̀do gligli