Biblu pinplọn nọ hẹn ale wá namẹ. Amọ́, mọwiwà sọgan nọma bọawu to whelẹponu. To whedelẹnu, a gán nọ hanú dọ e ma na pà emi nado zindonukọn to Biblu pinplọn mẹ. Naegbọn a dona wà nuhe go a pé lẹpo nado to mọwà zọnmii? Etẹwẹ gán gọalọna we nado nọ sinyẹnlin mahopọnna nuhahun lẹ?

1. Naegbọn Biblu pinplọn do yin nujọnu?

“Ohó Jiwheyẹwhe tọn tin to ogbẹ̀ bo tindo huhlọn.” (Heblu lẹ 4:12) Biblu yin nuhọakuẹ de, na e bẹ linlẹn po numọtolanmẹ he Jiwheyẹwhe nọ tindo gando gowe lẹ po hẹn wutu. E nọ gọalọnamẹ nado tindo oyọnẹn, bosọ nọ namẹ nuyọnẹn po todido nujọnu tọn po. Humọ, Biblu nọ gọalọnamẹ nado lẹzun họntọn Jehovah tọn. Whenue a to Biblu plọn, dotẹnmẹ na huhlọn etọn a te nado hẹn gbẹzan towe pọnte dogọ.

2. Naegbọn e yin nujọnu nado yọ́n pinpẹn nugbo Biblu tọn lẹ tọn?

Nugbo he to Biblu mẹ lẹ yin adọkun họakuẹ de. Abajọ Biblu do na mí tuli nado “họ̀ nugbo bo ma sà ẹ gbede blo.” (Howhinwhẹn lẹ 23:23) Eyin mí nọ hẹn do ayiha mẹ dọ nugbo Biblu tọn lẹ họakuẹ, mí na wà nuhe go mí pé lẹpo nado zindonukọn to Biblu pinplọn mẹ—eyin mí tlẹ pehẹ aliglọnnamẹnu lẹ.—Hia Howhinwhẹn lẹ 2:4, 5.

3. Nawẹ Jehovah sọgan gọalọna we nado zindonukọn to nupinplọn towe mẹ gbọn?

Jehovah, yèdọ Mẹdatọ ganhunupotọ podọ Họntọn towe jlo na gọalọna we nado plọnnu dogbọn ewọ dali. E gán hẹn we “tindo ojlo bosọ [na we] huhlọn nado yinuwa.” (Hia Filipinu lẹ 2:13.) Enẹwutu, eyin e wá jọ bọ a tindo nuhudo mẹhe na dozolanmẹna we nado plọnnu kavi yí nuhe plọn a te lẹ do yizan mẹ tọn, ewọ sọgan gọalọna we. Humọ, eyin a tindo nuhudo huhlọn tọn nado duto aliglọnnamẹnu lẹ po nukundiọsọmẹ po ji, ewọ gán na we. Nọ hodẹ̀ hlan Jehovah to gbesisọ mẹ bo nọ biọ ẹ nado gọalọna we nado zindonukọn to Biblu pinplọn towe mẹ.—1 Tẹsalonikanu lẹ 5:17.

DINDONANU DOGỌ

4. Nọ ylọ Biblu pinplọn towe dọ nujọnu

To whedelẹnu alọnu mẹtọn nọ ján sọmọ bọ e nọ taidi dọ yè ma tindo whenu nado plọn Biblu. Etẹwẹ gán gọalọnamẹ? Hia Filipinu lẹ 1:10, enẹgodo dọhodo kanbiọ ehelẹ ji:

• Etẹlẹ wẹ a mọdọ yé yin delẹ to “nuhe yin nujọnu hugan” to gbẹ̀mẹ lẹ mẹ?

• Nawẹ a sọgan ylọ Biblu pinplọn towe dọ nujọnu gbọn?

1. Eyin a bẹ okọ́ do lọba de mẹ, bo wá bẹ zannu lẹ do e ji, zannu lọ lẹ ma na mọ tẹnmẹ

2. Eyin a bẹ zannu lọ lẹ do lọba lọ mẹ jẹnukọn, tẹnmẹ na gbẹ́ pò na we nado bẹ okọ́ susu do e ji dogọ. Mọdopolọ, eyin a ze “nuhe yin nujọnu hugan lẹ” do otẹn tintan mẹ to gbẹzan towe mẹ, a na penugo nado wà yé dotana, bọ whenu nasọ pò na we nado wà nudevo lẹ

Biblu pinplọn nọ hẹn pekọ wá na nuhudo gbigbọmẹ tọn mítọn lẹ—yèdọ nuhudo lọ nado wá yọ́n Jiwheyẹwhe bo sẹ̀n ewọ. Hia Matiu 5:3, enẹgodo dọhodo kanbiọ ehe ji:

• Nawẹ Biblu pinplọn yiylọdọ nujọnu nọ hẹn ale wá na mí gbọn?

5. Nọ sinyẹnlin to whenue a pehẹ nukundiọsọmẹ

VIDEO: Linsinsinyẹn Etọn Hẹn Ale Wá (5:22)

• To video lọ mẹ, nawẹ họntọn Francesco tọn lẹ po whẹndo etọn po yinuwa gbọn to whenue e dọ nuhe plọn e te lẹ na yé?

• Nawẹ linsinsinyẹn etọn hẹn ale wá na ẹn gbọn?

Hia 2 Timoti 2:24, 25, enẹgodo dọhodo kanbiọ ehelẹ ji:

• Nukun tẹwẹ hagbẹ whẹndo tọn po họntọn towe lẹ po nọ yí do pọ́n nuhe plọn a te?

• Sọgbe hẹ wefọ ehelẹ, nawẹ a dona yinuwa gbọn eyin homẹ mẹde tọn ma hùn dọ a to Biblu plọn? Etẹwutu?

6. Nọ lẹhlan Jehovah na alọgọ

VIDEO: Jehovah Gọalọna Mí Nado Basi Diọdo Lẹ (3:56)

• To video lọ mẹ, diọdo tẹlẹ wẹ Jim basi nado hẹn homẹ Jehovah tọn hùn?

• Etẹwẹ yinuwado ji we to apajlẹ etọn mẹ?

Hia Heblu lẹ 11:6, enẹgodo dọhodo kanbiọ ehelẹ ji:

• Etẹwẹ Jehovah na wà na mẹhe to “dindin in vẹkuvẹku” lẹ—enẹ wẹ mẹhe nọ dovivẹnu nado yọ́n ewọ bo hẹn homẹ etọn hùn lẹ?

• Po ehe po, nawẹ a lẹndọ Jehovah na yinuwa hẹ hiẹ lọsu gbọn eyin e mọ vivẹnu susu he do a te nado plọn Biblu?

BLADOPỌ

Dile etlẹ yindọ Biblu pinplọn ma nọ bọawu to whepoponu, e gán gọalọna we nado duvivi gbẹninọ tọn kakadoi. Zindonukọn nado nọ ganjẹ Jehovah go, ewọ na suahọ etọn we.

Dogbapọn

• Naegbọn nugbo Biblu tọn lẹ do họakuẹ na we?

• Nawẹ a sọgan dohia dọ a “mọdona nuhe yin nujọnu hugan lẹ” gbọn?

• Naegbọn a dona biọ Jehovah dọ ni gọalọna we nado zindonukọn to Biblu pinplọn mẹ?

PỌ́N NUDỌNAMẸ DEVO LẸ

Pọ́n onú ẹnẹ delẹ he ko gọalọna mẹsusu nado nọ yí whenu yetọn zan po nuyọnẹn po.

“Lehe A Gán Nọ Zan Whenu Towe po Nuyọnẹn po Do” (Fọ́n!, février 2014 tọn)

Nawe de to vivẹnudo nado hẹn homẹ Jiwheyẹwhe tọn hùn bọ asu etọn ma ka kọngbedopọ hẹ ẹ. Pọ́n lehe Jehovah gọalọna ẹn do.

Jehovah Nọ Na Huhlọn Mí Nado Hẹn Agbàn Mítọn (5:05)

Pọ́n lehe linsinsinyẹn nawe de tọn hẹn ale wá na asu etọn do.

N’Dindona Nugbo Lọ (6:30)

To whedelẹnu, yè nọ dowhẹ Kunnudetọ Jehovah tọn lẹ dọ yé nọ gbà whẹndo lẹ. Amọ́ be nugbo wẹ ya?

“Be Kunnudetọ Jehovah Tọn lẹ Nọ Gbà Whẹndo lẹ Wẹ Ya Kavi Nọ Hẹn Yé Lodo?” (Hosọ Intẹnẹt ji tọn)

Mímẹpo wẹ dona nọ basi nudide lẹ. Suhugan nudide ehelẹ tọn sọgan hẹn kọdetọn dagbe kavi ylankan wá mí ji bosọ yinuwado haṣinṣan mítọn hẹ Jehovah ji. Di apajlẹ, e gán biọ dọ mí ni basi nudide fie mí na nọ tọn, nuhe mí na wà nado mọ akuẹ do penukundo míde go tọn, podọ vlavo eyin mí na wlealọ kavi lala. Whenue mí basi nudide dagbe lẹ, gbẹzan mítọn nọ gọ́ na ayajẹ bọ mí sọ nọ hẹn homẹ Jehovah tọn hùn.

1. Nawẹ a gán yí Biblu zan nado basi nudide dagbe lẹ gbọn?

Whẹpo a nado basi nudide de, nọ hodẹ̀ nado biọ alọgọ Jehovah tọn, bo basi dodinnanu to Biblu mẹ nado mọ nukun he ewọ nọ yí do pọ́n whẹho lọ. (Hia Howhinwhẹn lẹ 2:3-6.) To ninọmẹ delẹ mẹ, anademẹ Jehovah tọn lẹ nọ họnwun tlọlọ. Enẹwutu, nudide dagbe hugan he a gán basi wẹ nado setonuna anademẹ etọn.

Bọ etẹwẹ lo, eyin anademẹ Biblu tọn de ma dọ nuhe a dona wà taun na we? Jehovah na gbẹ́ “deanana we to aliho he ji hiẹ dona zinzọnlin gbọn.” (Isaia 48:17) Gbọnna? Nunọwhinnusẹ́n delẹ gán tin he na deanana we. Nunọwhinnusẹ́n Biblu tọn lẹ yin nugbo dodonu tọn he nọ do linlẹn po numọtolanmẹ Jiwheyẹwhe tọn po hia lẹ. To whenue mí hia kandai Biblu tọn de, mí nọ saba mọ nuhe Jiwheyẹwhe lẹn gando whẹho de go. To whenue mí ko wá yọ́n linlẹn Jehovah tọn, mí gán basi nudide he na hẹn homẹ etọn hùn lẹ.

2. Etẹlẹ ji wẹ a dona nọ lẹnnupọndo whẹpo do basi nudide de?

Biblu dọ dọ: “Zinzintọ nọ lẹnnupọndo afọdide dopodopo ji.” (Howhinwhẹn lẹ 14:15) Ehe zẹẹmẹdo dọ whẹpo mí nido wà nude, mí dona nọ yí sọwhiwhe do lẹnnupọndo nudide he mí na basi taun ji. Dile a to aliho voovo he mẹ a gán wà nulọ te lẹ gbejepọn, kanse dewe dọ: ‘Nunọwhinnusẹ́n Biblu tọn tẹlẹ wẹ n’gán hodo? Detẹ to nudide he n’na basi lẹ mẹ wẹ na na mi jijọho ahun mẹ tọn? Nawẹ nudide he n’na basi na yinuwado mẹdevo lẹ ji gbọn? Hú popolẹpo, be e na hẹn homẹ Jehovah tọn hùn ya?’—Deutelonomi 32:29.

Jehovah tindo jlọjẹ lọ nado dọ nuhe yin dagbe kavi ylankan na mí. To whenue mí jẹakọ hẹ osẹ́n po nunọwhinnusẹ́n etọn lẹ po ganji bo magbe nado hodo yé, mí nọ wleawuna ayihadawhẹnamẹnu dagbe de. Ayihadawhẹnamẹnu mítọn wẹ nọ dọ nuhe yin dagbe kavi ylankan na mí to ohò mítọn mẹ dọ́n. (Lomunu lẹ 2:14, 15) Ayihadawhẹnamẹnu he yin pinplọn ganji nọ gọalọna mí nado basi nudide dagbe lẹ.

DINDONANU DOGỌ

3. Dike Biblu ni nọ deanana we

VIDEO: Dike Nunọwhinnusẹ́n Biblu Tọn lẹ Ni Nọ Deanana We (5:54)

• Etẹwẹ mẹdekannujẹ nudide bibasi tọn yin?

• Naegbọn Jehovah do na mí dotẹnmẹ nado nọ basi nudide lẹ na míde?

• Etẹwẹ e ko na mí nado gọalọna mí, na mí nido nọ yí mẹdekannnujẹ nudide bibasi tọn mítọn zan to aliho dagbe hugan mẹ?

Nado mọ apajlẹ nunọwhinnusẹ́n Biblu tọn de tọn, hia Efesunu lẹ 5:15, 16. Enẹgodo, dọhodo lehe a gán “nọ yí whenu [towe] zan to aliho dagbe hugan mẹ” do ji nado . . .

• nọ hia Biblu egbesọegbesọ.

• lẹzun alọwlemẹ dagbe de, mẹjitọ, visunnu kavi viyọnnu dagbe de dogọ.

• nọ yí opli agun tọn lẹ.

4. Plọn ayihadawhẹnamẹnu towe nado nọ basi nudide dagbe lẹ

VIDEO: “Hẹn Ayihadawhẹnamẹnu Dagbe de Go” (5:13)

• Afọdide tẹlẹ wẹ mẹmẹyọnnu lọ ze nado plọn ayihadawhẹnamẹnu etọn, podọ nado basi nudide he na hẹn homẹ Jehovah tọn hùn?

Naegbọn mí ma dona nọ biọ to mẹdevo lẹ si nado nọ basi nudide lẹ do otẹn mítọn mẹ? Hia Heblu lẹ 5:14, enẹgodo dọhodo kanbiọ ehelẹ ji:

• Dile etlẹ gán di nuhe bọawu nado biọ to mẹdevo lẹ si nado basi nudide lẹ na mí, etẹwẹ mílọsu dona nọ yọnẹn na míde?

• Etẹwẹ gán gọalọna we nado plọn ayihadawhẹnamẹnu towe, bo nọ de dide dagbe lẹ?

5. Nọ na sisi ayihadawhẹnamẹnu mẹdevo lẹ tọn

Na mí gbọnvona mídelẹ wutu, nudide mítọn lẹ na nọ gbọnvo janwẹ. Nawẹ mí gán dohia dọ mí nọ na sisi ayihadawhẹnamẹnu mẹdevo lẹ tọn gbọn? Lẹnnupọndo ninọmẹ awe ji:

Ninọmẹ 1: Mẹmẹyọnnu de he yiwanna nado nọ gbonú do nukunmẹ nado doaṣọ́na ede, sẹtẹn yì agun devo mẹ fie e nọ dotukla susu mẹmẹyọnnu he to finẹ lẹ tọn te eyin yé mọdọ mẹde doaṣọ́ to aliho enẹ mẹ.

Hia Lomunu lẹ 15:1 gọna 1 Kọlintinu lẹ 10:23, 24, enẹgodo dọhodo kanbiọ ehelẹ ji:

• Sọgbe hẹ wefọ ehelẹ, nudide tẹwẹ mẹmẹyọnnu enẹ gán basi? Etẹwẹ a na wà eyin a topọ hẹ mẹde he ayihadawhẹnamẹnu etọn ma yigbena ẹn nado wà nude he ayihadawhẹnamẹnu hiẹ tọn kẹalọyi?

Ninọmẹ 2: Mẹmẹsunnu de yọnẹn dọ Biblu ma jẹagọdo ahàn sinsinyẹn nùnù do jlẹkaji, amọ́ e basi dide ma nado nọ nù. E wá yin oylọ-basina yì nuwiwa de tẹnmẹ fie e mọ bọ mẹmẹsunnu devo lẹ to ahàn sinsinyẹn nù te.

Hia Yẹwhehodọtọ 7:16 gọna Lomunu lẹ 14:1, 10, enẹgodo dọhodo kanbiọ ehelẹ ji:

• Sọgbe hẹ wefọ ehelẹ, nudide tẹwẹ mẹmẹsunnu enẹ gán basi? Etẹwẹ a na wà eyin a mọdọ mẹde to nude wà he ayihadawhẹnamẹnu towe ma kẹalọyi dọ a ni wà?

Afọdide tẹlẹ wẹ gán gọalọna we nado basi nudide dagbe lẹ?

1. Biọ to Jehovah si dọ ni gọalọna we nado de nuhe a na wà.—Jakọbu 1:5.

2. Basi dodinnanu lẹ to Biblu po owe sinai do Biblu ji lẹ po mẹ nado mọ nunọwhinnusẹ́n he gandego lẹ. A gán sọ kanhose Klistiani numimọnọ lẹ.

3. Lẹnnupọndo kọdetọn he nudide towe na tindo do ayihadawhẹnamẹnu towe po ayihadawhẹnamẹnu mẹdevo lẹ tọn po ji.

BLADOPỌ

Mí nọ basi nudide dagbe lẹ eyin mí yọ́n numọtolanmẹ Jehovah tọn lẹ gando whẹho de go bosọ dindona eyin nuyiwa mítọn lẹ na wà dagbe na mẹdevo lẹ kavi hẹn awugblena yé.

Dogbapọn

• Nawẹ a gán basi nudide he na hẹn homẹ Jehovah tọn hùn lẹ gbọn?

• Nawẹ a gán plọn ayihadawhẹnamẹnu towe gbọn?

• Nawẹ a gán dohia dọ a tindo sisi na ayihadawhẹnamẹnu mẹdevo lẹ tọn gbọn?

PỌ́N NUDỌNAMẸ DEVO LẸ

Nawẹ a gán basi nudide he na hẹn haṣinṣan towe hẹ Jiwheyẹwhe lodo dogọ lẹ gbọn?

“Nọ Basi Nudide He Nọ Gbògbéna Jehovah Lẹ” (Atọ̀họ̀- Nuhihọ́ lọ Tọn, 15 avril 2011 tọn)

Hẹn nukunnumọjẹnumẹ towe siso deji gando lehe Jehovah nọ na mí ayinamẹ lẹ do go.

Jehovah Nọ Deanana Omẹ Etọn Lẹ (9:50)

Pọ́n onú voovo he gọalọna dawe de nado basi nudide sinsinyẹn de.

Nudagbe Lẹpo Wẹ Do Jide to Jehovah Dè (5:46)

Gbadopọnna lehe mí gán hẹn homẹ Jehovah tọn hùn do to whenue e ma tlẹ na anademẹ tlọlọ de gando whẹho de go.

“Be Hiẹ Nọ Tindo Nuhudo Anademẹ Biblu Tọn Do Whẹho Lẹpo Ji Wẹ Ya?” (Atọ̀họ̀-Nuhihọ́ lọ Tọn, 1^er décembre 2003 tọn)