Obu Jiwheyẹwhe Tọn—“Oplọn Nuyọnẹn Tọn”

NUYỌNẸN nugbo ko basi tito na hùnwhẹ daho de. E do “awhli etọn lẹ hlan gbonu: e to awhádo to fihe yì aga otò tọn ji, dọ, mẹdepope he yin wunvinọ ni zẹ̀ do file: na ewọ he zinzin pò na, e dọ hlan ẹn dọmọ. Wá dù to núdùdù ṣie mẹ, bo nù to ovẹn ṣie he yẹn ko flusọ́ mẹ. Gbẹ́ nululu dai, na a ni nọgbẹ̀: bosọ nọ zinzọnlin to aliho zinzin tọn ji.”—Howhinwhẹn lẹ 9:1-6.

Nado dùnú to tafo nuyọnẹn tọn ji ma nọ dekọtọn do oylan kavi awugble mẹ gbede. Todidoai na nuyọnẹn Jiwheyẹwhe tọn he tin to howhinwhẹn gbọdo lẹ mẹ po alọkikẹyi mẹplọnlọ etọn lẹ po nọ dekọtọn do dagbe mẹ. Ehe yin nugbo gando ohó nuyọnẹn tọn he yin kinkàndai to Howhinwhẹn lẹ 15:16-33 mẹ lẹ go.a Hihodo ayinamẹ oló kleun kleun ehelẹ tọn sọgan gọalọna mí nado tindo pekọ to onú vude poun mẹ, nado zindonukọn, podọ nado tindo ayajẹ to gbẹzan mítọn mẹ. Mọwiwà sọ sọgan gọalọna mí nado basi nudide dagbe lẹ bo nasọ hẹn mí penugo nado gbọṣi aliho he yì ogbẹ̀ mẹ lọ ji.

To Whenuena E Pọnte Nado Tindo Pẹẹde

“Vude po osi [kavi obu] OKLUNỌ tọn po bọawu hú adọkunnu susu po tukla po,” wẹ Ahọlu Sọlọmọni Islaeli hohowhenu tọn dọ. (Howhinwhẹn lẹ 15:16) Nululu wẹ e yin nado gbẹkọ Mẹdatọ lọ go bo doafọna nutindo agbasa tọn lẹ taidi yanwle tintan to gbẹ̀mẹ. Gbẹzan mọnkọtọn nọ gọ́ na kanvinván mapote po magbọjẹ susu po. Lehe e na blawu do sọ dọ mẹde ni wá mọ to yọnhowhe mẹ dọ gbẹzan etọn blebu ko yin to ovọ́ mẹ bo ma tindo zẹẹmẹ depope! Na nugbo tọn, agbasanu lẹ bibẹpli po “tukla” po ma yin nuyọnẹnnu gba. Lehe e pọnte do sọ nado plọn aṣli pekọ tọn bosọ nọ nọgbẹ̀ sọgbe hẹ ẹ! Pekọ nujọnu tọn tin to obu Jehovah tọn mẹ—yèdọ to haṣinṣan mítọn hẹ ẹ mẹ—e ma yin to nutindo agbasa tọn lẹ mẹ gba.—1 Timoti 6:6-8.

Nado zinnudeji dọ haṣinṣan dagbe de tintindo hẹ mẹdevo lẹ họakuẹ tlala hugan agbasanu lẹ bibẹpli, Sọlọmọni dọmọ: “[Omá-nusọnu] to fie owanyi te, bọawu hú oyìn yìndù de podọ wangbẹnamẹ po e po.” (Howhinwhẹn lẹ 15:17) Mọwẹ, owanyi to whẹndo mẹ yọ́n hugan núdùdù dojo susugege tintindo. To whẹndo godoponọ de mẹ, nutindo lẹ sọgan whè taun. To otò delẹ mẹ e sọgan yindọ núdùdù wamọnọ tọn kẹdẹ wẹ mẹde sọgan mọ dù. Etomọṣo, whẹndo lọ nọ to ayajẹ to fie owanyi tin te.

Etlẹ yin to whẹndo he mẹ owanyi nọ yin didohia te to paa mẹ lẹ, ninọmẹ sinsinyẹn lẹ sọgan wá fọndote. Hagbẹ whẹndo lọ tọn dopo sọgan dọ kavi wà nude he na hẹn homẹgble mẹdevo. Nawẹ mẹhe gblehomẹ lọ dona yinuwa gbọn? Howhinwhẹn lẹ 15:18 dọmọ: “Homẹgbletọ fọ́n avùn dote: ṣigba ewọ he whleawu nado gblehomẹ hẹn avùn gbọ̀.” Hogbe dẹẹdẹ wẹ nọ hẹn jijọho wá, kakati nido yin hogbe adán tọn. Ayinamẹ howhinwhẹn ehe tọn sọ yọn-na-yizan to adà gbẹzan tọn devo lẹ mẹ, gọna nuyiwa agun mẹ tọn lẹ podọ to lizọnyizọn gbangba tọn mẹ.

To Whenuena ‘Aliho de Mẹ́n’

Howhinwhẹn he bọdego zinnudo vogbingbọn he tin to mẹhe vẹtolina nuyọnẹn po mẹhe tuntoai na ẹn lẹ po ṣẹnṣẹn ji. “Aliho adidọnọ tọn taidi ozun owùn tọn de,” wẹ ahọlu nuyọnẹntọ lọ dọ, “ṣigba aliho dodonọ lẹ tọn mimẹ́n wẹ.”—Howhinwhẹn lẹ 15:19.

Ozun owùn tọn yin aliglọnnamẹnu de. Adidọnọ nọ dín nuhe sọgan taidi aliglọnnamẹnu lẹpo bo nọ yí yé zan nado suwhẹna awugbopo etọn nado bẹ azọ́n de jẹeji. Ṣigba, dodonọ lẹ ma nọ kiya na nuhe sọgan glọnalina yé lẹ gba. Yé nọ penukundo azọ́n yetọn go po sọwhiwhe po bosọ nọ ze ayidonugo do azọ́n he to yìyì to alọnu lọ ji. Gbọnmọ dali yé nọ dapana nuhahun sinsinyẹn susu he yé sọgan wá pannukọn eyin yé dovọ́nanu. Aliho yetọn ‘mẹ́n,’ to linlẹn lọ mẹ dọ yé to nukọn yì. Yé nọ zindonukọn to azọ́n yetọn mẹ bosọ nọ jaya nado mọ dọ e to yìyì.

Apajlẹ dopo die. E nọ biọ vivẹnudido nado tindo oyọnẹn he pegan Ohó Jiwheyẹwhe tọn bo zindonukọn jẹ whinwhẹ́n kọ̀n. E bọawu dọ mẹde ni dín whẹjijọ ma nado yí ede zan po sọwhiwhe po to Biblu pinplọn mẹdetiti tọn mẹ gbọn didọ dali dọ emi ma sewé sọmọ, bo ma yọ́n wehia ganji, bosọ nọ yawu wọnnú. Lehe e na yọ́n do sọ ma nado nọ pọ́n onú mọnkọtọn lẹ hlan taidi aliglọnnamẹnu nado kẹalọyi oyọnẹn! Etlẹ yin po nugopipe pẹvide he mí tindo lẹ po, mí sọgan dovivẹnu nado hẹn wehihia mítọn po nukunnumọjẹnumẹ mítọn gando nuhe hia mí te po go pọnte, vlavo gbọn kinkanse mẹhe sè ogbè lọ ganji de dali kavi gbọn wezẹhomẹ de yiyizan dali eyin e tin-to-aimẹ. Pọndohlan dagbe de tintindo na gọalọna mí nado tindo oyọnẹn bo basi nukọnyiyi to gbigbọ-liho.

To Whenuena ‘Otọ́ de Hùnhomẹ’

“Ovi nuyọnẹntọ basi homẹhun otọ́ tọn,” wẹ ahọlu Islaeli tọn dọ, “ṣigba gbẹtọ nulunọ vlẹ onọ̀ etọn.” (Howhinwhẹn lẹ 15:20) Be mẹjitọ lẹ ma nọ hùnhomẹ eyin ovi yetọn lẹ yinuwa po nuyọnẹn po ya? Nugbo wẹ dọ e nọ biọ oplọn po mẹplọnlọ-domẹgo mẹjitọ lẹ tọn po nado sọgan tindo kọdetọn dagbe mọnkọtọn lẹ. (Howhinwhẹn lẹ 22:6) Nalete asisa ayajẹ tọn nankọ die ovi nuyọnẹntọ yin na mẹjitọ etọn lẹ! Ṣigba, ovi nulunọ nọ hẹn awubla tẹgbẹ tọn wá na yé.

Ahọlu nuyọnẹntọ lọ dọ bọdego dọmọ: “Nululu wẹ ayajẹ na ewọ he zinzin pò na: ṣigba gbẹtọ zinzintọ nọ to zọnlinzin to dodo mẹ.” (Howhinwhẹn lẹ 15:21) Mẹhe zinzin pò na lẹ nọ jaya to nukiko nululu tọn po ayidedai he ma nọ hẹn pekọ nujọnu tọn kavi ayajẹ wá mẹ. Ṣigba, gbẹtọ zinzintọ yọnẹn dọ nulunu wẹ e yin nado lẹzun “wanyina aṣọ́ [kavi gbẹdudu] hú Jiwheyẹwhe tọ́.” (2 Timoti 3:1, 4) Titẹdo nunọwhinnusẹ́n Jiwheyẹwhe tọn lẹ go nọ gọalọna ẹn nado gbọṣi dodonọ-yinyin mẹ bo zinzọnlin to aliho jijlọ ji.

To Whenuena ‘Wadotana Dagbe Nọ Tin’

Gbẹninọ sọgbe hẹ nunọwhinnusẹ́n Jiwheyẹwhe tọn lẹ nọ hẹn ale wá to adà gbẹzan tọn devo lẹ mẹ. Howhinwhẹn lẹ 15:22 dọmọ: “Matin wedido, linlẹn lẹzun ovọ́: ṣigba susugege [ayinamẹtọ] lẹ tọn mẹ, yé nọ yí yé hẹnai,” kavi wadotana dagbe nọ tin.

Wedido zẹẹmẹdo hodọdopọ nuglọ tọn ṣigba ahundopo tọn to e whè gbau omẹ awe ṣẹnṣẹn. Hogbe Heblu tọn he yin lilẹdo “wedido” sọ yin yiylọdọ “pipli mẹvivẹ lẹ tọn” to Psalm 89:7 mẹ sọgbe hẹ lẹdogbedevomẹ Traduction du monde nouveau. Ehe zẹẹmẹdo haṣinṣan pẹkipẹki de tintindo to hodọdopọ mẹ. Wedido ma yin hodọdopọ tata de poun gba, ṣigba e zẹẹmẹdo nado má linlẹn nujọnu tọn po numọtolanmẹ lẹ po hẹ ode awetọ. Eyin asu po asi po lẹ, mẹjitọ lẹ po ovi lẹ po nọ yí awuvivo do dọhodopọ hẹ ode awetọ yetọn lẹ, jijọho po pọninọ po na tin to ṣẹnṣẹn yetọn. Ṣigba awugbopo nado nọ dewé dopọ nọ dekọtọn do flumẹjijẹ po nuhahun lẹ po mẹ to whẹndo mẹ.

To nudide nujọnu tọn lẹ bibasi whenu, nuyọnẹnnu wẹ e na yin nado hodo ayinamẹ lọ he dọmọ: ‘To susugege ayinamẹtọ lẹ tọn mẹ wẹ wadotana dagbe nọ tin te.’ Di apajlẹ, eyin mí jlo na de nukunpedomẹgo dotowhé tọn, be e ma na yin nuyọnẹnnu ma nado nọte do ayinamẹ dotozọ́nwatọ dopo gee tọn ji, titengbe eyin e gando whẹho sinsinyẹn lẹ go ya?

Nujọnu taun wẹ e sọ yin nado tindo ayinamẹtọ susugege to nukunpipedo whẹho gbigbọmẹ tọn lẹ go mẹ. Eyin mẹho agun tọn lẹ dọhodopọ bo yí nuyọnẹn pipli yetọn tọn zan, ‘wadotana dagbe nọ tin.’ Humọ, nugopọntọ yọyọ lẹ ma dona nọ whleawu nado dín ayinamẹ sọn mẹho agun tọn he ko whẹ́n bosọ tindo numimọ hugan lẹ dè, titengbe eyin whẹho he dona yin nukunpedego lọ yin whẹho sinsinyẹn de.

To Whenuena ‘Gbeyiyi Nọ Hẹn Ayajẹ Wá’

Kọdetọn dagbe tẹwẹ sọgan wá sọn ohó he yin didọ po zinzin po mẹ? “Gbẹtọ tindo ayajijẹ gbọn gbeyiyi onù etọn mẹ tọn dali,” wẹ ahọlu Islaeli tọn dọ, “podọ ohó dopo to ojlẹ etọn mẹ, nawẹ e jẹ do.” (Howhinwhẹn lẹ 15:23) Be homẹ mítọn ma nọ hùn to whenuena mẹde hodo gbeyiyi kavi ayinamẹ mítọn bo tindo kọdetọn dagbe ya? Ṣigba, na ayinamẹ mítọn nido tindo kọdetọn dagbe, e dona jẹ nubiọtomẹsi awe kọ̀n.

Tintan whẹ́, ayinamẹ lọ dona yin zize sinai gligli do Ohó Jiwheyẹwhe tọn, Biblu ji. (Psalm 119:105; 2 Timoti 3:16, 17) Enẹgodo, e dona yin nina to ojlẹ he sọgbe mẹ. Eyin ohó he tlẹ yin nugbo yin didọ to ojlẹ he ma sọgbe mẹ e sọgan gbleawunamẹ. Di apajlẹ, e ma yin nuyọnẹnnu kavi alọgọnamẹnu nado na ayinamẹ mẹde jẹnukọnna sisè nuhe mẹlọ tindo nado dọ lẹpo. Lehe e yin nujọnu do sọ dọ mí ni “nọ yawu nado sè, [bo nọ] whleawu nado gblọn”!—Jakobu 1:19.

“Aliho Ogbẹ̀ Tọn Tin to Aga”

Howhinwhẹn lẹ 15:24 dọmọ: “Aliho ogbẹ̀ tọn tin to aga hlan nuyọnẹntọ na e nido tọ́nsọn [Ṣeọl] mẹ to odò.” Mẹhe nọ yinuwa po zinzin po tin to aliho he dẹn do Ṣeọl, yèdọ yọdò paa gbẹtọvi lẹ tọn ji. E nọ nọla na walọ mẹhusudo tọn lẹ taidi fẹnnuwiwa, amasin adínọ ṣiṣizan po ahànnumu po—bo nọ gbọnmọ dali dapana okú azán mapemape. Aliho etọn nọ planmẹ yì ogbẹ̀ mẹ.

To vogbingbọn mẹ, doayi aliho mẹhe ma tindo zinzin lẹ tọn go: “OKLUNỌ na và owhé goyitọ tọn sudo: ṣigba e na hẹn dogbó asuṣiọsi tọn sinai. Linlẹn mẹylankan tọn osùnú de wẹ hlan OKLUNỌ: ṣigba wiwe wẹ ohó vivi to nukọn etọn. Ewọ he to ale mawadodo tọn dù to tuklado owhé ede tọn; ṣigba ewọ he gbẹwanna nunina [alọgodokuẹ] na gán.”—Howhinwhẹn lẹ 15:25-27.

Nado do lehe mí sọgan dapana omọ̀ he gbayipe de do hia mí, ahọlu Islaeli tọn dọmọ: “Ayiha dodonọ tọn kànayiha nado gblọn: ṣigba onù mẹylankan tọn nọ kọ́ onú ylankan jẹgbonu.” (Howhinwhẹn lẹ 15:28) Lehe ayinamẹ howhinwhẹn ehe tọn họakuẹ do sọ! Gblọndo nululu tọn he yin kikọ sọn nùmẹ matin nulẹnpọn lẹ ma nọ saba tọ́nkọ do dagbe mẹ. Eyin mí lẹnnupọndo adà voovo he whẹho de bẹhẹn lẹ ji, gọna ninọmẹ po numọtolanmẹ mẹdevo lẹ tọn po, e na vẹawu dọ mí ni dọ nude he na wá vẹna mí to godo mẹ.

To whelọnu lo, ale tẹwẹ tin to budisi Jiwheyẹwhe po alọkikẹyi mẹplọnlọ etọn po mẹ? Dawe nuyọnẹntọ lọ na gblọndo dọmọ: “OKLUNỌ dẹn do mẹylankan lẹ: ṣigba e nọ sè odẹ̀ dodonọ lẹ tọn.” (Howhinwhẹn lẹ 15:29) Jiwheyẹwhe nugbo lọ ma sẹpọ mẹylankan lẹ. “Ewọ he de otó etọn sẹ̀ sọn osẹ́n sise mẹ, odẹ̀ etọn lọsu na zun osùnú de,” wẹ Biblu dọ. (Howhinwhẹn lẹ 28:9) Mẹhe nọ dibusi Jiwheyẹwhe bo nọ dovivẹnu nado wà nuhe sọgbe to nukun etọn mẹ lẹ sọgan dọnsẹpọ ẹ po awuvivo po, bo deji mlẹnmlẹn dọ e na dotoaina yé.

Nuhe Nọ “Hẹn Ayiha Jaya”

To nuyijlẹdonugo mẹhẹnlẹnnupọn tọn de yiyizan mẹ, Sọlọmọni dọmọ: “Hinhọ́n nukun tọn hẹn ayiha jaya: linlin dagbe sọ hẹn ohú dojo.” (Howhinwhẹn lẹ 15:30) Ohú he gọ́ na ojó nọ hẹn agbasa blebu lodo bosọ nọ hẹn ayiha jaya. Podọ ayajẹ ayiha tọn nọ sọawuhia to hinhọ́n nukun tọn ji. Nuyiwadomẹji he linlin dagbe de nọ tindo niyẹn!

Be linlin lẹdo aihọn pé tọn lẹ gando jideji sinsẹ̀n-bibasi Jehovah tọn go ma nọ yin asisa tulinamẹ tọn na mí ya? Na nugbo tọn, eyin mí sè dogbọn nususu he to yinyin wiwadotana to azọ́n yẹwhehodidọ Ahọluduta lọ tọn po mẹhẹnzun-devi po tọn mẹ, ehe nọ dozolanmẹna mí nado tindo mahẹ to lizọnyizọn lọ mẹ yinukọn dogọ. (Matiu 24:14; 28:19, 20) Numimọ mẹhe yí Jehovah do basi Jiwheyẹwhe yetọn bo kẹalọyi sinsẹ̀n-bibasi nugbo lẹ tọn nọ hẹn ahun mítọn lẹ gọ́ na ayajẹ. To whenuena e yindọ nuyiwadomẹji sinsinyẹn mọnkọtọn wẹ “wẹndagbe [he] sọn aganu” nọ tindo, lehe e yin nujọnu do sọ dọ mí ni nọ na linlin nuhe mí wà to lizọnyizọn lọ mẹ tọn domẹwhenu po nugbonọ-yinyin po!—Howhinwhẹn lẹ 25:25.

“Jẹnukọnna Yẹyi Wẹ Whiwhẹ”

Nado zinnudeji dọ nujọnu wẹ e yin nado kẹalọyi mẹplọnlọ wunmẹ voovo lẹ, ahọlu nuyọnẹntọ lọ dọmọ: “Otó he sè wọhẹ ogbẹ̀ tọn wẹ na nọ̀ nuyọnẹntọ lẹ ṣẹnṣẹn. Ewọ he gbẹ́ oplọn, vlẹ [alindọn] ede tọn: ṣigba ewọ he sè wọhẹ, e tindo zinzin.” (Howhinwhẹn lẹ 15:31, 32) Wọhẹ kavi mẹplọnlọ nọ jẹ ahun mẹde tọn mẹ bo nọ jla ẹ do, bosọ nọ hẹn ẹn tindo lẹnpọn dagbe. Abajọ “obá anademẹ tọn” wẹ nọ de ‘nululu he mlin do ayiha yọpọvu tọn mẹ’ sẹ̀! (Howhinwhẹn lẹ 22:15) Mẹhe sè wọhẹ sọ nọ tindo zinzin, kavi mẹwhinwhàn dagbe. To alọ devo mẹ, mẹhe gbẹ́ wọhẹ vlẹ ogbẹ̀ ede tọn.

Na nugbo tọn, alenu wẹ e yin nado hùndonuvo na mẹplọnlọ nuyọnẹn tọn bo yí whiwhẹ do kẹalọyi i. Gbọnvona dọ mọwiwà nọ hẹnmẹ tindo pekọ, nukọnyiyi, ayajẹ po wadotana dagbe po, e sọ nọ dekọtọn do yẹyi kavi gigo po ogbẹ̀ po mẹ. Howhinwhẹn lẹ 15:33 dotana dọmọ: “Osi [kavi obu] OKLUNỌ tọn wẹ oplọn nuyọnẹn tọn: podọ jẹnukọnna yẹyi wẹ whiwhẹ.”

[Nudọnamẹ Odò Tọn]

[Yẹdide to weda 17]

Owanyi to whẹndo mẹ yọ́n hugan núdùdù dojo susugege tintindo

[Yẹdide to weda 18]

Eyin mí ma tlẹ penugo sọmọ, pọndohlan dagbe de tintindo na gọalọna mí nado tindo oyọnẹn

[Yẹdide to weda 19]

Wedido zẹẹmẹdo nado má linlẹn nujọnu tọn po numọtolanmẹ lẹ po hẹ mẹdevo

[Yẹdide to weda 20]

Be hiẹ yọ́n lehe ‘linlin dagbe nọ hẹn ohú dojo’ gbọn ya?