‘Alọgọ Ṣie Wá sọn Jehovah Dè’

Whenue Yọnhowhe Lẹzun “Ojẹgbakun Gigo Tọn”

“GBẸZAN dagbe hugan he gbẹtọ sọgan zan,” wẹ Muriel owhe 101 mẹvi dọ. “Lẹblanulọkẹyi nankọ die!” wẹ hogbe he Theodoros owhe 70 mẹvi yizan. Maria lọsu dọ numọtolanmẹ etọn to whenuena e to owhe 73 tindo dọ “yẹn ma sọgan yí gbẹzan ṣie zan to aliho devo he yọ́n hugan ehe mẹ gba.” Yemẹpo wẹ ko yí gbẹwhenu yetọn zan to sinsẹ̀nzọn Jehovah Jiwheyẹwhe tọn mẹ.

Yọnhonọ mọnkọtọn lẹ yin delẹ to sinsẹ̀n-basitọ Jehovah tọn zohunhunnọ susu he tin lẹdo aihọn pé lẹ mẹ. Mahopọnna yọnhowhe, agbasamalo, po ninọmẹ sinsinyẹn devo lẹ po, yé pò to Jiwheyẹwhe sẹ̀n po alindọn lẹpo po. To agun Klistiani tọn mẹ, yọnhonọ heyin nugbonọ mọnkọtọn lẹ nọ yin sisina na apajlẹ mẹdezejo hlan Jiwheyẹwhe tọn yetọn lẹ wutu. Jehovah nọ yí nukun he họakuẹ tlala do pọ́n sinsẹ̀nzọn yọnhonọ lẹ tọn, dile etlẹ yindọ ninọmẹ yetọn lẹ sọgan nọ glọnalina nuhe yé sọgan wadotana lẹ.a—2 Kọlintinu lẹ 8:12.

Owe Psalm tọn basi zẹẹmẹ he sọgbe gando gbẹzan he nkọtọn yọnhonọ heyin nugbonọ lẹ sọgan donukun nado zan go. Yé sọgan tin taidi atin whanpẹnọ he ko poyọnho ṣogan bo gbẹ́ to sinsẹ́n detọ́n. Psalm-kantọ lọ jihàn gando yọnhonọ heyin nugbonọ lẹ go dọmọ: “Yé na to sinsẹ́n hẹn jẹgbonu wá to yọnho mẹ; yé na dósin bosọ kọ́.”—Psalm 92:14.

Mẹdelẹ sọgan to budi dọ yé na yin jijodo apadopo kavi yin kọgbẹ́ e go to whenuena yọnhowhe na de huhlọn yetọn pò. Davidi vẹ̀ Jiwheyẹwhe dọmọ: “A sisẹ́ mi hlan whenuena yẹn poyọnho blo; a sọ gbẹ́ mi dai whenuena huhlọn ṣie sẹpò [kavi depò] blo.” (Psalm 71:9) Etẹwẹ nọ do vogbingbọn hia to agbasa he to godo yì po dehe to vùnvùn po ṣẹnṣẹn to yọnhowhe mẹ? Jẹhẹnu dodowiwa tọn he Jiwheyẹwhe plọn mí nado nọ dohia wẹ. “Dodonọ na tọ́nkun taidi odétin,” wẹ ohàn he psalm-kàntọ lọ ji.—Psalm 92:12.

To paa mẹ, mẹhe ko yí gbẹzan yetọn zan to sinsẹ̀nzọn nugbonọ-yinyin hlan Jiwheyẹwhe tọn mẹ lẹ gbẹ́ nọ to sinsẹ́n detọ́n to yọnhowhe yetọn lẹ mẹ. To yẹhiadonu-liho, suhugan okún he yé ko dó do ahun mẹ na yedelẹ kavi do ahun mẹdevo lẹ tọn mẹ ko tọ́nkun bo whẹ́n bosọ de sinsẹ́n susugege tọ́n. (Galatianu lẹ 6:7-10; Kọlọsinu lẹ 1:10) To alọ devo mẹ, mẹhe ko hẹn ogbẹ̀ yetọn gú nado doafọna yanwle ṣejannabi tọn he jẹagọdo aliho Jiwheyẹwhe tọn lẹ ma nọ tindo nuhọakuẹ sọmọ dile yé to pipò.

Owe Howhinwhẹn lẹ tọn sọ zinnudo dodowiwa ji taidi aṣọ́ yọnhowhe tọn. Mí hia to finẹ dọmọ: “Ojẹgbakun gigo tọn wẹ ota owhànọ, eyin yè mọ ẹn to aliho dodo tọn ji.” (Howhinwhẹn lẹ 16:31) Mọwẹ, dodowiwa yin dohia whanpẹ homẹ tọn de. Afọdidona aliho dodo tọn to gbẹwhenu nọ hẹn sisi wá. (Levitiku 19:32) Eyin owhà zọnpọ hẹ nuyọnẹn po jijọ dagbe po, e nọ hẹn gbégbò daho wá.—Job 12:12.

Jehovah nọ pọ́n gbẹzan jijlọ heyin yiyizan to sinsẹ̀nzọn etọn mẹ taidi nuhe yọnwhanpẹ tlala. Owe-wiwe dọmọ: “Yèdọ kakajẹ yọnho mìtọn mẹ yẹn lọ wẹ; yèdọ kakajẹ owhà mẹ wẹ yẹn na ze mì: yẹn ko basi i, yẹn na sinyẹnlin, nugbo, yẹn na ze, bo nasọ whlẹngán.” (Isaia 46:4) Homẹmiọnnamẹnu nankọtọn die nado yọnẹn dọ Otọ́ owanyinọ olọn mẹ tọn mítọn dopagbe nado hẹn nugbonọ etọn lẹ dote bo nọgodona yé to yọnhowhe yetọn mẹ!—Psalm 48:14.

To whenuena e yindọ Jehovah nọ pọ́n gbẹzan nugbonọ tọn heyin yiyizan to sinsẹ̀nzọn etọn mẹ taidi nuhe yọnwhanpẹ, be e ma jẹna sisi mẹdevo lẹ tọn ga ya? Eyin mí tindo pọndohlan dopolọ hẹ Jiwheyẹwhe, mí na nọ wlebòna yisenọ hatọ heyin yọnhonọ lẹ. (1 Timoti 5:1, 2) Enẹwutu mì gbọ mí ni dín aliho yọn-na-yizan he mẹ owanyi Klistiani tọn sọgan yin didohia te to nukunpipedo nuhudo yetọn lẹ go mẹ.

Jijẹ Aliho Dodonọ Tọn Ji to Yọnhowhe Mẹ

Sọlọmọni na mí jide dọ, “to aliho dodonọ tọn ji wẹ ogbẹ̀ te.” (Howhinwhẹn lẹ 12:28) Yọnhowhe ma nọ glọnalina mẹde nado jẹ aliho ehe ji dile azán lẹ to yìyì gba. Di dohia, to Moldavie, dawe owhe 99 mẹvi de ko yí jọja whenu etọn lẹpo do nọgodona nujinọtedo Communisme tọn lẹ. E tlẹ doawagun dọ ewọ lọsu penugo nado dọho tlọlọ hẹ nukọntọ nukundeji Communisme tọn lẹ, taidi V. I. Lénine. Ṣigba, to whenuena Communisme jai, gbẹzan dawe yọnhonọ ehe tọn biọ bẹwlu mẹ bo masọ tindo lẹndai ba. Nalete to whenuena Kunnudetọ Jehovah tọn lẹ dohia ẹ dọ Ahọluduta Jiwheyẹwhe tọn kẹdẹ wẹ sọgan hẹn pọngbọ wá na nuhahun gbẹtọvi lẹ tọn, e kẹalọyi nugbo Biblu tọn bo lẹzun Biblu plọntọ zohunhunnọ de. E blawu dọ okú glọnalina ẹn nado lẹzun devizọnwatọ Jehovah tọn he yí baptẹm de.

To nupinplọn gando nubiọtomẹsi walọ dagbe tọn Jiwheyẹwhe tọn lẹ go whenu, nawe owhe 81 mẹvi de to Hongrie mọdọ ewọ dona wlealọ hẹ dawe he e ko to ninọ̀ hẹ na owhe susu lẹ. Nawe lọ yí adọgbigbo do basi zẹẹmẹ pọndohlan sinai do Biblu ji etọn tọn na dawe lọ. E paṣa ẹ taun dọ dawe lọ yigbe nado wlealọ hẹ ẹ podọ ehe hẹn ayajẹ etọn gọfla. To alọwle yetọn hinhẹn sọgbe to osẹ́n-liho godo, e yinukọn to gbigbọ-liho po awuyiya po. To osun ṣinatọ̀n he bọdo whenue e jẹ Biblu plọn ji go lẹ gblamẹ, e lẹzun wẹnlatọ he ma ko yí baptẹm, bosọ yin bibaptizi to ojlẹ vude godo. Na nugbo tọn, dodowiwa sọgan ṣinyọ́n ojẹgbakun gigo tọn na yọnhonọ lẹ.

Mọwẹ, Klistiani yọnhonọ heyin nugbonọ lẹ sọgan deji dọ Jiwheyẹwhe tindo ojlo to yé mẹ. Jehovah ma na gbẹkọ mẹhe gbọṣi nugbonọ-yinyin mẹ hlan ẹn lẹ go gba. Kakatimọ, e dopagbe nado deanana yé, nọgodona yé, bosọ hẹn yé dote kaka biọ yọnhowhe yetọn mẹ. Podọ yé nọ tindo numimọ nuhe psalm-kàntọ lọ dọ tọn dọmọ: ‘Alọgọ ṣie wá sọn Jehovah dè.’—Psalm 121:2.

[Nudọnamẹ Odò Tọn]

[Blurb on page 9]

“Ojẹgbakun gigo tọn wẹ ota owhànọ, eyin yè mọ ẹn to aliho dodo tọn ji.”—HOWHINWHẸN LẸ 16:31

[Apotin to weda 8]

JEHOVAH NỌ PENUKUNDO DEVIZỌNWATỌ ETỌN YỌNHONỌ LẸ GO

“Hiẹ na fọnṣite to ota owhànọ lọ nukọn, bo gbògbéna nukunmẹ omẹ yọnhonọ lọ tọn.”—Levitiku 19:32.

“Yèdọ kakajẹ yọnho mìtọn mẹ yẹn lọ wẹ; yèdọ kakajẹ owhà mẹ wẹ yẹn na ze mì.”—Isaia 46:4.