Wleawuna Haṣinṣan Pẹkipẹki hẹ Jehovah

“MÌ SẸPỌ Jiwheyẹwhe, ewọ nasọ sẹpọ mì,” wẹ devi Jakobu wlan. (Jakobu 4:8) Podọ psalm-kàntọ Davidi jihàn dọmọ: “Haṣinṣan pẹkipẹki Jehovah tọn tin to yé he dibusi i lẹ dè.” (Psalm 25:14, NW ) E họnwun dọ, Jehovah Jiwheyẹwhe jlo dọ mí ni tindo haṣinṣan pẹkipẹki de hẹ emi. Ṣogan, e mayin mẹhe to sinsẹ̀n basi hlan Jiwheyẹwhe bo to tonusena osẹ́n etọn lẹpo wẹ nọ tindo numọtolanmẹ dindọnsẹpọ ẹ tọn na dandan tọn gba.

Etẹwẹ dogbọn hiẹ dali? Be hiẹ tindo haṣinṣan pẹkipẹki mẹdetiti tọn de hẹ Jiwheyẹwhe ya? Matin ayihaawe, hiẹ jlo nado dọnsẹpọ ẹ. Nawẹ mí sọgan wleawuna haṣinṣan pẹkipẹki de hẹ Jiwheyẹwhe gbọn? Etẹwẹ ehe dona zẹẹmẹdo na mí? Owe Biblu tọn heyin Howhinwhẹn lẹ weta atọ̀ntọ wleawuna gblọndo lẹ.

Do Dagbewanyi po Nugbowa po Hia

Ahọlu Sọlọmọni Islaeli hohowhenu tọn bẹ weta atọ̀ntọ Howhinwhẹn lẹ tọn jẹeji po hogbe lọ lẹ po dọmọ: “Ovi ṣie, a wọn osẹ́n ṣie blo: ṣigba gbọ ayiha towe ni yí osẹ́n ṣie lẹ whlá. Na azán gaa, po ogbẹ̀ gaa po, po jijọho po wẹ yè na dogọ́ ẹ na we.” (Howhinwhẹn lẹ 3:1, 2) To whenuena e yindọ Sọlọmọni kanwe to gbọdo sọn olọn mẹ wá glọ, ayinamẹ taidi otọ́ tọn etọn ehe to wiwá sọn Jehovah Jiwheyẹwhe dè bosọ to yinyin anadena hlan míwlẹ na taun tọn. Mí yin ayinamẹ na tofi nado setonuna nuflinmẹ Jiwheyẹwhe tọn lẹ—yèdọ osẹ́n, kavi nuplọnmẹ etọn, gọna gbedide etọn lẹ—heyin kinkàndai to Biblu mẹ. Eyin mí wà ehe, “azán gaa, po ogbẹ̀ gaa po, po jijọho po wẹ yè na dogọ́ ẹ” hlan mí. Mọwẹ, mí tlẹ sọgan duvivi gbẹzan jijọho tọn de todin bo sọgan dapana yanwle he na hùn mí do nùvo hlan owù okú ovuwhenu tọn he nọ saba wá ylanwatọ lẹ ji lẹ. Humọ, mí sọgan tindo todido gbẹninọ kakadoi tọn to aihọn yọyọ jijọho tọn de mẹ.—Howhinwhẹn lẹ 1:24-31; 2:21, 22.

To nukọnzinzindo mẹ, Sọlọmọni dọmọ: “A dike [dagbewanyi po nugbowa, NW] po jo we dai blo: blá yé lẹdo okọ̀ towe; wlan yé do tafo ayiha towe tọn ji: mọwẹ hiẹ na mọ nukundagbe po zìnzìn dagbe po to nukun Jiwheyẹwhe po gbẹtọ po tọn mẹ.”—Howhinwhẹn lẹ 3:3, 4.

Ogbè dowhenu tọn na hogbe lọ “dagbewanyi” sọ nọ yin lilẹdogbedevomẹ do “owanyi nugbo tọn” podọ e nọ bẹ nugbonọ-yinyin, nuyiwa pọmẹ tọn, po nugbodidọ po hẹn. Be mí ko magbe nado gbọṣi kọndopọ pẹkipẹki mẹ hẹ Jehovah mahopọnna ninọmẹ depope ya? Be mí nọ do dagbewanyi hia to haṣinṣan mítọn hẹ yisenọ hatọ lẹ mẹ ya? Be mí nọ wazọ́n nado gbọṣi kọndopọmẹ hẹ yé ya? To nuyiwa egbesọegbesọ tọn hẹ yé mẹ, be mí nọ hẹn ‘osẹ́n dagbewanyi tọn do odẹ́ mítọn ji’ yèdọ etlẹ yin to ninọmẹ awusinyẹnnamẹ tọn lẹ glọ ya?—Howhinwhẹn lẹ 31:26.

Na yinyin mẹhe sù to dagbewanyi mẹ wutu, Jehovah “wleawufo nado [jonamẹ].” (Psalm 86:5) Eyin mí ko lẹnvọjọ sọn ylando mítọn he wayi lẹ mẹ bosọ to omọ́liho he jlọ lẹ de na afọ̀ mítọn lẹ todin, mí yin nina jide dọ “ojlẹ awumimiọn tọn” na wá sọn Jehovah dè. (Owalọ lẹ 3:19) Be mí ma dona hodo apajlẹ Jiwheyẹwhe mítọn tọn gbọn jijo ylando mẹdevo lẹ tọn lẹ na yé dali ya?—Matiu 6:14, 15.

Jehovah yin “Jiwheyẹwhe nugbo tọn,” podọ e nọ jlo ‘nugbowa’ sọn mẹhe to haṣinṣan pẹkipẹki dín hẹ ewọ lẹ dè. (Psalm 31:5) Be mí sọgan donukun dọ Jehovah ni yin Họntọn mítọn na nugbo tọn eyin mí nọ zan gbẹzan awe—yèdọ nọ yinuwa to aliho dopo mẹ to whenuena mí tin to gbẹdido Klistiani lẹ tọn mẹ podọ to aliho devo mẹ to whenuena mí ma tin to lẹdo yetọn mẹ—taidi ‘gbẹtọ lalonọ’ he nọ whlá gbẹtọ wunmẹ he yé yin lẹ ya? (Psalm 26:4) Lehe enẹ na yin nululu do sọ, to whenuena e yindọ “onú lẹpo wẹ to omẹ́ bosọ hùndonuvo to nukun” Jehovah tọn lẹ mẹ!—Heblu lẹ 4:13.

Dagbewanyi po nugbowa po dona nọ yin bòwlena taidi kọ́nu họakuẹ ‘heyin biblá lẹdo okọ̀ mítọn,’ na yé nọ gọalọna mí nado ‘mọ nukundagbe to nukun Jiwheyẹwhe po gbẹtọ tọn lẹ po mẹ.’ E mayin dọ mí dona do jẹhẹnu ehelẹ hia to gbangba kẹdẹ wẹ gba ṣigba dona wlan yé ‘do tafo ahun mítọn tọn ji,’ yèdọ nado hẹn yé yin adà tangan gbẹtọ-yinyin mítọn tọn.

Wleawuna Jidide Mlẹnmlẹn to Jehovah Mẹ

Ahọlu nuyọnẹntọ Sọlọmọni zindonukọn dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.”—Howhinwhẹn lẹ 3:5, 6.

Jehovah jẹna jidedomẹgo mlẹnmlẹn mítọn na nugbo tọn. Taidi Mẹdatọ lọ, ewọ “sinyẹn to huhlọn mẹ” bosọ yin Asisa ‘huhlọn daho tọn.’ (Isaia 40:26, 29) E penugo nado hẹn nuhe e ko lẹndai lẹpo di. Etẹ, yèdọ oyín taun etọn to paa mẹ zẹẹmẹdo “E Hẹn Nado Lẹzun,” podọ e jlọ jidide mítọn dote to nugopipe etọn nado hẹn nuhe e ko dopagbe lẹ di mẹ! Nugbo lọ dọ “e glo Jiwheyẹwhe nado dolalo” hẹn ewọ yin apajlẹ tangan nugbo tọn. (Heblu lẹ 6:18) Jẹhẹnu he diyin hugan etọn wẹ owanyi. (1 Johanu 4:8) Ewọ yin ‘dodonọ to aliho etọn lẹpo ji bosọ yin nugbonọ to azọ́n etọn lẹpo mẹ.’ (Psalm 145:17) Eyin mí ma sọgan dejido Jiwheyẹwhe go, mẹnu go wẹ mí sọgan dejido? Na nugbo tọn, nado wleawuna jidide to ewọ mẹ, mí dona ‘dọ́pọ́n bosọ mọ dọ dagbe wẹ Jehovah’ gbọn yíyí nuhe mí plọn sọn Biblu mẹ lẹ do yizan mẹ to gbẹzan mẹdetiti tọn mítọn mẹ dali podọ gbọn nulẹnpọn do dagbe he ehe nọ detọ́n lẹ ji dali.—Psalm 34:8.

Nawẹ mí sọgan ‘yọ́n Jehovah to aliho mítọn lẹpo ji’ gbọn? Psalm-kàntọ heyin gbigbọdo lọ dọmọ: “Yẹn na nọ lẹnayihamẹpọn do azọ́n towe lẹpo ji, bo nasọ nọ yin ahunmẹduna dogbọn nuwiwa towe lẹ dali.” (Psalm 77:12, NW ) To whenuena e yindọ mí ma sọgan mọ Jiwheyẹwhe po nukun po, ayihamẹlinlẹnpọn do azọ́n daho etọn lẹ ji podọ do nuwiwa etọn hẹ omẹ etọn lẹ ji yin onú titengbe nado wleawuna haṣinṣan pẹkipẹki hẹ ewọ.

Odẹ̀ lọsu sọ yin aliho tangan dopo nado yọ́n Jehovah. Ahọlu Davidi nọ ylọ Jehovah “to azán popo gbè.” (Psalm 86:3) Davidi nọ saba hodẹ̀ to ozán blebu mẹ, taidi to whenuena e yin omẹ họ̀njẹgbé de to zungbo mẹ. (Psalm 63:6, 7) “Mì nọ yí whepoponu do hodẹ̀ . . . to gbigbọ mẹ,” wẹ apọsteli Paulu dotuhomẹnamẹ dọ. (Efesunu lẹ 6:18) Nawẹ mí nọ hodẹ̀ gbọzangbọzan sọ? Be mí nọ duvivi hodọdopọ sọn ahun mẹ wá mẹdetiti tọn tintindo hẹ Jiwheyẹwhe ya? To whenuena mí pannukọn ninọmẹ sinsinyẹn lẹ, be mí nọ vẹ ẹ na alọgọ ya? Be mí nọ gbọn odẹ̀ dali dín anademẹ etọn whẹpo do basi nudide titengbe lẹ ya? Odẹ̀ ahundoponọ mítọn lẹ hlan Jehovah nọ dọ̀n mí sẹpọ ẹ pẹkipẹki. Podọ mí tindo nujikudo dọ e na dotoai na odẹ̀ mítọn bo ‘nasọ jlọ omọ́liho mítọn lẹ.’

Lehe e yin nululu do sọ nado ‘ganjẹ nukunnumọjẹnumẹ mídetiti tọn go’ kavi enẹ heyin omẹ diyin he tin to aihọn mẹ lẹ tọn go to whenuena mí sọgan ze jidide mlẹnmlẹn mítọn do Jehovah mẹ! “A yin nuyọnẹntọ to nukun dewe tọn mẹ blo,” wẹ Sọlọmọni dọ. To vogbingbọn mẹ, e dotuhomẹnamẹ dọmọ: “Dibusi OKLUNỌ, bo tọ́n sọn oylan mẹ. E na yin gángán na ahọ́n towe, podọ miọnmiọn na ohú towe.” (Howhinwhẹn lẹ 3:7, 8) Obu he sọgbe ma nado hẹn homẹgblena Jiwheyẹwhe dona nọ deanana nuyiwa, linlẹn, po numọtolanmẹ mítọn lẹpo po. Obu gbégbigbò tọn mọnkọtọn nọ glọnalina mí sọn nuhe ylan lẹ wiwà mẹ bosọ yin azọ̀nhẹngbọnamẹnu po kọfanamẹnu po to gbigbọ-liho.

Na Nuhe Go Hiẹ Pé Lẹpo Jehovah

Aliho devo tẹ mẹ wẹ mí sọgan sọ dọnsẹpọ Jiwheyẹwhe te? “[Yí nuhọakuẹ towe lẹ do gbògbéna Jehovah, NW] podọ po sinsẹ́n tintan sudeji towe lẹpo po,” wẹ ahọlu lọ dọ. (Howhinwhẹn lẹ 3:9) Nado gbògbéna Jehovah zẹẹmẹdo nado do sisi he yiaga hia ẹ podọ nado ze e daga to gbangba gbọn mahẹ tintindo po godoninọna lilá gbangba oyín etọn tọn po mẹ. Nuhọakuẹ lẹ he mí sọgan yí do gbògbéna Jehovah wẹ ojlẹ mítọn, nugopipe mítọn lẹ, huhlọn mítọn, po nutindo agbasa tọn mítọn lẹ po. Ehelẹ dona yin sinsẹ́n tintan lẹ—yèdọ nuhe go mí pé lẹpo. Be aliho he mẹ mí nọ yí nutindo mẹdetiti tọn mítọn lẹ zan te ma dona do gbemima mítọn nado ‘to ahọluduta lọ po dodo Jiwheyẹwhe tọn po dín jẹnukọn whẹ́’ hia ya?—Matiu 6:33.

Gbégbigbòna Jehovah po nuhọakuẹ mítọn lẹ po ma na nọma yin ahọsuna gba. “Mọwẹ zínhọ towe na gọ́ na susugege,” wẹ Sọlọmọni na jide dọ, “agbà towe na gọ́ na vẹnhàn yọyọ.” (Howhinwhẹn lẹ 3:10) Dile etlẹ yindọ kọdetọn dagbe tintindo to gbigbọmẹ to ede mẹ ma nọ hẹnmẹ tindo kọdetọn dagbe to agbasanu lẹ mẹ do sọ, nutindo mítọn lẹ yiyizan po alọtútlú po nado gbògbéna Jehovah nọ hẹn dona họakuẹ lẹ wá. Ojlo Jiwheyẹwhe tọn wiwà yin “núdùdù” mẹhẹndogbẹ tọn na Jesu. (Johanu 4:34) Mọdopolọ, mahẹ tintindo to azọ́n yẹwhehodidọ tọn po gbẹtọ lẹ hinhẹnzun devi lẹ he nọ pagigona Jehovah po mẹ nọ na alè mí. Eyin mí sinyẹnlin to azọ́n enẹ mẹ, agbànhọ gbigbọmẹ tọn mítọn na yin hinhẹn gọ́ susugege. Ayajẹ mítọn—he yin yẹdena gbọn vẹnhàn yọyọ dali—na gọfla.

Be e mayin Jehovah go wẹ mí nọ ganjẹ bo nọ hodẹ̀ hlan ẹn na pekọ núdùdù agbasa tọn egbesọegbesọ tọn ya? (Matiu 6:11) Na nugbo tọn, nuhe mí tindo lẹpo nọ wá mí dè sọn Otọ́ owanyinọ olọn mẹ tọn mítọn dè. Jehovah na kọ̀n dona susu dogọ lẹ do mí ji jẹ obá he mẹ mí to nuhọakuẹ mítọn lẹ yizan na pipà etọn te.—1 Kọlintinu lẹ 4:7.

Kẹalọyi Mẹplọnlọ Jehovah Tọn

To yinyọ́n nujọnu-yinyin mẹplọnlọ tọn to haṣinṣan pẹkipẹki de tintindo hẹ Jehovah mẹ, ahọlu Islaeli tọn na avase mí dọmọ: “Ovi ṣie, a vlẹ [mẹplọnlọ] OKLUNỌ tọn blo; mọ a dike nudikọna we na hokọnamẹ etọn blo. Na mẹhe OKLUNỌ yiwanna wẹ e nọ kọhona, kẹdẹdile otọ́ nọ kọhona ovi he go homẹ etọn hùn do.”—Howhinwhẹn lẹ 3:11, 12.

Nalete, mẹplọnlọ sọgan nọ ma bọawu na mí nado yí. “Mẹplọnlọ depope, whenuena e tin to ote, ma sọawuhia nado yin ayajẹnu gba, adavo homẹgblenu,” wẹ apọsteli Paulu wlan, “ṣigba to godo mẹ, e jo sinsẹ́n jijọho gigọ́ dodo tọn hlan yé he yè zan gbọn e dali lẹ.” (Heblu lẹ 12:11) Wọhẹ po mẹplọnlọ po yin adà titengbe azọ́nplọnmẹ tọn he nọ hẹn mí sẹpọ Jiwheyẹwhe pẹkipẹki. Hokọnamẹ sọn Jehovah dè—vlavo mí mọ ẹn yí sọn mẹjitọ lẹ dè, gbọn agun Klistiani tọn gblamẹ, kavi gbọn ayihamẹlinlẹnpọn do Owe-wiwe lẹ ji dali to oplọn mẹdetiti tọn whenu—yin dohia owanyi etọn tọn na mí. Mí na yin nuyọnẹntọ nado kẹalọyi i.

Tẹdo Nuyọnẹn po Wuntuntun po Go Gligli

Bọdego, Sọlọmọni zinnudo nujọnu-yinyin nuyọnẹn po wuntuntun po tọn ji to awuwiwlena haṣinṣan pẹkipẹki de hẹ Jiwheyẹwhe mẹ. E lá dọmọ: “Ayajẹnọ wẹ dawe lọ he ko mọ nuyọnẹn, po dawe he tindo wuntuntun po, na ajọ́ etọn hú ajọ́ fataka tọn, alè etọn hú sika dagbedagbe tọn. . . . Ewọ wẹ atin ogbẹ̀ tọn hlan yé he hẹn e go: podọ mẹhe hẹn ẹn go gligli lẹ na yin yiylọ dọ ayajẹnọ.”—Howhinwhẹn lẹ 3:13-18, NW.

To finflin mí nuyọnẹn po wuntuntun he yin didohia to azọ́njiawu nudida Jehovah tọn lẹ po mẹ, ahọlu lọ dọmọ: “Nuyọnẹn gbọn nuyọnẹn dali wẹ, OKLUNỌ yí dódó aihọn tọn hẹnai; [wuntuntun, NW] wẹ e yí do wleawu olọn lẹ tọn. . . . Ovi ṣie, a dike yé tọ́n sọn nukun towe mẹ blo: Yí [nuyọnẹn yọn-na-yizan po nugopipe nulẹnpọn tọn po, NW] whlá. Mọwẹ yé na yin ogbẹ̀ hlan ayiha towe, po nukundagbe po hlan okọ̀ towe.”—Howhinwhẹn lẹ 3:19-22.

Nuyọnẹn po wuntuntun po yin jẹhẹnu jijọ-di-Jiwheyẹwhe tọn lẹ. E mayin dọ mí tindo nuhudo nado wleawuna yé kẹdẹ wẹ gba ṣigba sọ dona tẹdo yé go gligli bo ma na dèkanpò gbede to sọwhiwhe yíyí do plọn Owe-wiwe lẹ mítọn mẹ po yíyí nuhe mí plọn lẹ do yizan mẹ po. “Whenẹnu wẹ hiẹ na to zọnlinzin to aliho to jijọho mẹ,” wẹ Sọlọmọni zindonukọn dọ, “afọ towe ma na planú.” E yidogọ dọmọ: “Whenuena hiẹ mlọnai hiẹ ma na dibu: nugbo, hiẹ na mlọnai, amlọn towe nasọ vivi.”—Howhinwhẹn lẹ 3:23, 24.

Mọwẹ, mí sọgan zinzọnlin to awuvivo mẹ bosọ damlọn to jijọho ayiha tọn mẹ dile mí to tenọpọn wiwá taidi ajotọ azán ‘vasudo ajiji’ tọn he ja aihọn ylankan Satani tọn ji. (1 Tẹsalonikanu lẹ 5:2, 3; 1 Johanu 5:19) Etlẹ yin to nukunbibia daho he ko sẹpọ lọ whenu, mí sọgan tindo mẹhẹndeji ehe dọmọ: “A savò na sisọsisọ ajiji tọn, kavi gbigbà mẹylankan lẹ tọn, whenuena e wá blo. Na OKLUNỌ na yin tudido towe, bo nasọ yí afọ towe whlá sọn wiwle mẹ.”—Howhinwhẹn lẹ 3:25, 26; Matiu 24:21.

Wà Nuhe Yin Dagbe

“A dọ̀n alọ dagbe tọn do godo sọn yé he a duahọ etọn do blo,” wẹ Sọlọmọni dotuhomẹnamẹ dọ, “[to] whenuena e tin to huhlọn alọ towe tọn mẹ nado basi i.” (Howhinwhẹn lẹ 3:27) Dagbe wiwà na mẹdevo lẹ bẹ nutindo mítọn lẹ yiyizan do ota yetọn mẹ po alọtútlú po hẹn, podọ ehe tindo adà susu lẹ. Ṣigba be alọgigọna mẹdevo lẹ nado wá tindo haṣinṣan de hẹ Jiwheyẹwhe nugbo lọ ma yin nuhe yọ́n hugan he mí sọgan wà na yé to “ojlẹ opodo tọn” ehe mẹ ya? (Daniẹli 12:4) To whelọnu lo, azán lọ lẹ die nado do zohunhun hia to azọ́n yẹwhehodidọ-Ahọluduta tọn po hinhẹn gbẹtọ lẹ zun devi po mẹ.—Matiu 28:19, 20.

Ahọlu nuyọnẹntọ lọ sọ slẹ nuyiwa delẹ he yè dona dapana, dọmọ: “A dọ na kọmẹnu towe blo, dọ, Yì, bo gọwá, whenuena hiẹ tindo e to alọ towe mẹ. A lẹn oylan do kọmẹnu towe go blo, le e sinai jijọho to adà towe mẹ. A wọhẹ omẹ matin owhẹho blo, eyin e ma wà oylan do ogo we. A háhomẹ awusinyẹnnamẹtọ tọn blo, a sọ de dopo to ali etọn lẹ mẹ blo.”—Howhinwhẹn lẹ 3:28-31.

To whẹwhinwhẹ́n ayinamẹ ehe tọn bibladopọ mẹ, Sọlọmọni dọmọ: “Na osùnú de wẹ tasinyẹntọ yin hlan OKLUNỌ: ṣigba aṣli etọn tin dodonọ lẹ dè. Dẹ̀hodo OKLUNỌ tọn tin to owhé mẹylankan lẹ tọn gbè: ṣigba e dona aisintẹn nugbonọ lẹ tọn. Nugbo e kò mẹṣankotọ lẹ, ṣigba e do ojọmiọn hlan whiwhẹnọ lẹ. Nugbo, nuyọnẹntọ lẹ na dugu gigo tọn: ṣigba nulunọ lẹ na hẹn winyan yetọn.”—Howhinwhẹn lẹ 3:32-35.

Eyin mí na duvivi haṣinṣan pẹkipẹki tọn hẹ Jehovah, mí ma dona lẹn ayilinlẹn oklọ tọn bo blasé awugblenamẹ tọn lẹ gba. (Howhinwhẹn lẹ 6:16-19) To whenuena mí wà nuhe jlọ to nukun Jiwheyẹwhe tọn lẹ mẹ kẹdẹ wẹ mí sọgan tindo nukundagbe po dona etọn po. Mí sọgan sọ mọ gbégbigbò he mí ma donukun etọn yí to whenuena mẹdevo lẹ doayi e go dọ mí nọ yinuwa to kọndopọmẹ hẹ nuyọnẹn he wá sọn aga. Enẹwutu mì gbọ mí ni gbẹ́ aliho oklọ tọn lẹ heyin kanyinylan po danuwiwa aihọn ehe tọn lẹ po dai. Na nugbo tọn, mì gbọ mí ni nọ doafọna nuyiwa he sọgbe bosọ wleawuna haṣinṣan pẹkipẹki de hẹ Jehovah!

[Yẹdide to weda 25]

‘Yí nuhọakuẹ towe lẹ do gbògbéna Jehovah’